2 Para ixtanajun:

―Jantu cachꞌapayau acsni va alin ju cꞌatan ni na aktsamcanta ju acsnich.

Va laich catatalhkꞌamalh ju lapanacni.

3 Pus ju Jesús ixvilhcha lakꞌachakꞌan Betania laꞌixchakaꞌ ju Simón ju na ixpacxanta istsꞌitsꞌi para palaich ixnavita ju Jesús.

Chai acsni ixvi ju lacamixa pus milh pumatam chakoꞌulh ju ixlhiminta lakatam lumeti ju chiux ixlhinavicanta.

Para na stacꞌacꞌa ixjunita.

Chai ju anuꞌ chiux alabastro juncan.

Pus ju anuꞌ lumeti ixputajun ju tuꞌuꞌ ju na saksi ixꞌacamin.

Chai ju yuchi nardo ixjuncan chai na laklhu ixtapalh ixjunita.

Pus ju anuꞌ chakoꞌulh kekpꞌakxlh ju lumeti chai tsuculh lakxtixtꞌekꞌemucꞌanaꞌ ju Jesús ju ixtajun.

4 Pus ju aliꞌin ju ixtavilanalh ju anch talhitalhkꞌamalh.

Chai talaclajunilh sia isꞌakstuꞌan:

―Tajuch ni va xalhakꞌamanan ju ani saksi acamin.

5 Ju yuchi jantu va lakatꞌutu cientos tumin ixtapalh junita.

Ni caꞌistꞌacalh pus lai caꞌixtaknicalh ju quilhpatinin ju ixtapalh.

Pus lana jantu kꞌox xatalhiulai tuchi navilh ju anuꞌ chakoꞌulh.

6 Para ju Jesús alacjuni:

―Amacꞌaꞌuntꞌit.

Tajuch ni va lhixcꞌayatꞌit.

Na kꞌox ju tuchi xaquinavinich.

7 Aktsꞌiya alin ju quilhpatinin junta vilatꞌit.

Chai acsni alacꞌasqꞌuinaꞌitꞌit laich anaviniyaꞌitꞌit ju kꞌox.

Para ju quitꞌin jantu actilatꞌaꞌalhtanankꞌalhiu.

8 Ju ani ya chakoꞌulh navilh tachi ju lai xanavi.

Mas tucaꞌ icmacnucanta para ju yuchi acsni quilacamucꞌalh ju cꞌuchꞌu pus tachi ju va jun quimucꞌalh ixlacata quiꞌaninti ni chunch ju lhilanicantauch ni xamatiꞌ taꞌacnui.

9 Slivasalh ju iclajunau.

Vanta anchach ju lacamunutpaꞌ junta canoncanaꞌ ta yu lai takꞌalhtaxtucan pus vachuꞌ canoncanaꞌ tuchi ju xanavi ju ani ya chakoꞌulh.

Ju chunch jantuch cacapcanaꞌ ju yuchi.

10 Ju Judas Iscariote pumatam ixlhipumacautꞌuiꞌan ixjunita.

Pus ju acsnich ju yuchi alakꞌalh ju xalackꞌajin palijni.

Alh atꞌatakꞌoxiniꞌ ta yu laich capumakꞌaxtꞌakꞌaꞌ ju Jesús.

11 Chai ju yuꞌunch acsni takꞌasmatlh ju ixchivinti ju Judas na talackꞌachalh.

Tamachꞌanulh.

Tajunilh ju Judas ni cataxtakniyaꞌ ju tumin.

Pus ju Judas tus acsnich na ixpuxcajui ta yu laich capumakꞌaxtꞌakꞌaꞌ ju Jesús.

12 Pus ju xapꞌulhnan avilhchan ixjunita ju anuꞌ cꞌatan acsni ixtaꞌui ju xkapavati ju jantu ixtamacaꞌanita ju xatꞌin chai acsni ixtamakni ixborregoꞌan ju ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.

Pus ju acsnich ju ixꞌalacmamakaꞌui ju Jesús tajunich:

―Tas anchach ju kꞌoxich lhiulai ju uxintꞌi ju acꞌanau lakꞌoxinin junta laich caꞌu ju borrego.

13 Pus ju Jesús amalakachalh ixtꞌiyunꞌan ixꞌalacmamakaꞌui.

Chai alacjunich:

―Apꞌinchitꞌit ju lakꞌachakꞌan.

Chai ju anch apꞌakxtꞌokꞌaꞌitꞌit pumatam jokꞌat ju lhiꞌanta xcan lacaxalu.

Pus atꞌaimalhipꞌinaꞌitꞌit ju yuchi.

14 Chai junta catanuyaꞌ ju yuchi pus vachuꞌ atꞌanuyaꞌitꞌit.

Chai chani ju aꞌunaꞌitꞌit ju amachakaꞌ:

“Ju amamakaꞌunuꞌ ma najun ni ta ma anchach ju alin ju cuarto junta lai catꞌaꞌuyaꞌ ju borrego ju ixꞌalacmamakaꞌui”.

15 Chai ju anuꞌ amachakaꞌ catamasuniyanch ixlhitantalaktꞌui junta kꞌaich ixchakaꞌ.

Ju anch lakasilakꞌoxinincantach.

Pus anchach ju alakꞌoxiniyaꞌitꞌit ju vaiti quilacatachꞌan quijnanꞌan.

16 Pus ju ixꞌamamakaꞌui taꞌalh ju lakꞌachakꞌan chai vasalh talhitajulh tachi ju ixꞌajuncantach.

Chai anchach ju talakꞌoxinilh ju vaiti ixlacata ju cꞌatan.

17 Chai acsni tokꞌoxa pus ju Jesús anch ju alactꞌaꞌalh ju ixpumacautꞌuiꞌan ixꞌamamakaꞌui.

18 Chai acsni tatavilh lacamixa chai tatsuculh venin pus ju Jesús alacjuni:

―Slivasalh ju iclajunau.

Pumatam ju milhiꞌuxijnan ju quilatꞌavenau aquimakꞌaxtꞌakꞌaꞌ.

19 Pus ju acsnich ju yuꞌunch na taꞌamakꞌaninilh.

Kꞌantam kꞌantam tajunich:

―Para ja quitꞌin.

Chai apumatam ixnajun:

―Para ja quitꞌin.

20 Chai ju Jesús alackꞌalhtailh.

Alacjunich:

―Yuchi ju pumatam ju sia uxijnan ju mimpumacautꞌuiꞌan ju lakputam quintꞌatamajkꞌoi laquincꞌaꞌulh.

21 Slivasalh ni acꞌanaꞌ laquiꞌaninti tachi ju iclhitsꞌokcanta.

Quitꞌin ju quimalakachatachilh Dios ni lapanac actsucuyaꞌ ju ani.

Para painich ju anuꞌ lapanac ju aquimakꞌaxtꞌakꞌaꞌ.

Palai kꞌox ixva ni jantu tavanan istsuculh ju anuꞌ lapanac.

22 Chai acsni ixtatꞌajun venin pus ju Jesús chꞌapalh ju xkapavati.

Xtaknilh lhakꞌailaktsꞌiuch ju Dios.

Acsnicaꞌ ju chꞌekꞌelh.

Alacxtaknilh ju ixꞌamamakaꞌui chai alacjunich:

―Aꞌutꞌitch.

Ju ani quilacatuna junita.

23 Vachuꞌ xakatailh ju tasa ju ixputajun ju vino.

Xtaknilh lhakꞌailaktsꞌiuch ju Dios chai axtaknilh ju ixꞌamamakaꞌui.

Chai ju yuꞌunch takꞌotkꞌo ixchuxꞌan.

24 Ju acsnich ju Jesús alacjunich:

―Ju yuchi quiꞌacꞌalhni.

Chai acsni cataxtuyaꞌ ju yuchi pus camavasalayaꞌ ju sastꞌi chivinti ju caꞌalaclhitꞌatakꞌoxiyaꞌ ju Dios ju lapanacni ni laich caꞌamacꞌacxaniyaꞌ ixꞌalactuꞌuntiꞌan lhu lapanacni.

25 Slivasalh ju iclajunau.

Jantuch tavanan actikꞌotchokolh ju vino tus acsnich avilhchan acsni ackꞌotꞌach ju sastꞌi vino junta lhinonacha ju Dios.

26 Pus acsni talakꞌaya ju Dios lacamilhpat pus tataxtulh ju lacachakaꞌ.

Taꞌalh ju anuꞌ akstijun junta chꞌancanta ju xaqꞌuiu olivos.

27 Chai acsni tachaꞌalh ju anch pus ju Jesús alacjunich:

―Minchuxꞌan aquilamacoyokꞌoyau ju chavai atatsꞌisni.

Iccꞌatsai ni chunch ju alayaꞌitꞌit ni chani najun ju Dios laꞌixchivinti ju tsꞌokcanta:

“Acmakniyaꞌ ju xaꞌalhistacnaꞌ.

Chai ju ixborregojni catataꞌakpitsiyaꞌ”.

Chunch ma naulh ju Dios.

28 Para ju astanch acsni actaꞌacxtuchokoyaꞌ junta acmacnucanaꞌ pus acpꞌulhꞌanaꞌ ju xaꞌestado Galilea.

Astan achꞌipꞌinaꞌitꞌit ju anch ju uxijnan.

29 Pus ju acsnich ju Pitaluꞌ junilh:

―Mas cataꞌatsꞌalhkꞌo ju aliꞌin para ju quitꞌin jantu tavanan actimacoyaꞌun.

30 Para ju Jesús junilh ju Pitaluꞌ:

―Slivasalh ju icjunan.

Ju chavai atatsꞌisni acsni tucaꞌ tꞌasai paktꞌui ju chilaꞌ ju uxintꞌi paktꞌutu naꞌuntꞌa ni jantu qꞌuimispꞌai.

31 Para ju Pitaluꞌ na pꞌas ixnajun ni jantu tavanan catinaulh ni jantu mispai mas tus catꞌamaknicalh.

Chai si chun ixtanajun ju aliꞌin ixꞌalacmamakaꞌui ju Jesús.

32 Pus ju astan ju Jesús chai ju ixꞌalacmamakaꞌui tachaꞌalh junta ixjuncan Getsemaní.

Chai acsni tachaꞌalh ju anch pus ju Jesús alacjuni ju ixꞌalacmamakaꞌui:

―Anich atꞌolatꞌitcaꞌ pantsꞌiquis.

Chactiquitꞌachiviniꞌ ju Dios.

33 Pus ju Jesús alackꞌailhiꞌalh ju Pitaluꞌ chai ju Jacobo chai ju Xivan.

Taꞌalh palai avinti lacatsꞌunin chai ju Jesús na talhanalh.

Chai tsuculh amakꞌaninin.

34 Chai alacjunich:

―Slivasalh na icꞌamakꞌaninin.

Tachi ju va aquimakniyaꞌ ju quiꞌamakꞌanit.

Aquilapacxauch ju ani.

Jantu alhtꞌatꞌatꞌit.

35 Ju acsnich ju Jesús palai makat alh lacatsꞌunin chai taꞌaktsokotavi chai taquilhputalh ju lacatꞌun.

Tꞌachivinilh ju Dios.

Sqꞌuinilh ni va laich cava jantu vana canaulh ju ixpai ni tasqꞌuini ni camaknicalh tachi ju aktsꞌiya ilhcata.

36 Chanich ju juni:

―Quimpai ju uxintꞌi lai navikꞌoꞌui tachi chun ju taxtokni.

Aqꞌuimakꞌosunin ju ani makꞌalhkꞌajnat ju slivasalh na tsꞌinqꞌui.

Para jantu anavitꞌi tachi ju iclacasqꞌuin ju quitꞌin.

Va yuchi ju anavitꞌi tachi ju anonaꞌ ju uxintꞌi.

37 Chai acsni taspꞌitcha ju Jesús alaclhitajulh ju ixtꞌutunꞌan ni va ixtalhtatavilanalh.

Chai ju yuchi junilh ju Pitaluꞌ:

―Simón ja va lhtꞌatꞌaich.

Ja lana jantu lai ixkꞌalhcꞌujtꞌi va pantsꞌiquis.

38 Akꞌalhcꞌujtꞌit.

Atꞌachꞌivinintꞌit ju Dios.

Ju chunch jantu cataꞌokxchokꞌoyan ju lhacaticuru.

Pus ju lamiꞌalhunutꞌan vasalh navipꞌutꞌunatꞌit ju kꞌox.

Para ju va lamiꞌakstuꞌan jantu lai naviyatꞌit.

39 Pus aktam anchokopa ju Jesús tꞌachiviniꞌ ju Dios.

Chai vana va chun ju nonchokopa.

40 Chai acsni taspꞌitcha aktam alaclhitajuchokopa ixpumatꞌutuꞌan ixꞌalacmamakaꞌui ni aktam ixtalhtatananchokopalai.

Pus na tsꞌinqꞌui ixjunita ixlakchulhꞌan ni na ixtalaclhtataputun.

Chai ju yuꞌunch jantu ixtacꞌatsai tuchi lai catajunilh ju Jesús.

41 Pus ampa tꞌachiviniꞌ ju Dios chai acsni minchokolh ixlhipaktꞌutuch pus alacjunich:

―Ja lana va alhtꞌatꞌakꞌalhiyaꞌitꞌit chai astꞌacnankꞌalhiyaꞌitꞌit.

Kꞌoxich ju chavai.

Chilh ju hora acsni acmakꞌaxtakcanach laꞌixmacaꞌan ju alactuꞌunin.

Quitꞌin ju quimalakachatachilh Dios ni lapanac actsucuyaꞌ ju ani.

42 Akꞌostꞌolatꞌit.

Caꞌauch apakxtoknin.

Va anich minta ju aquimakꞌaxtꞌakꞌach.

43 Pus lana chincha ju Judas acsni ixtꞌajuncaꞌ chiviniꞌ ju Jesús.

Yuchi ju Judas ju ixlhipumacautꞌui ixjunita ixꞌalacmamakaꞌui.

Ju yuchi ixꞌakꞌailhiminta lhu ju lapanacni.

Ixlapanacnich ixtajunita ju xalackꞌajin palijni chai ju papanin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin.

Ju aliꞌin ixtalhiminta ju ixmachitaꞌan chai aliꞌin ixtalhiminta ju tuꞌuꞌ qꞌuiu.

44 Pus ju anuꞌ ju camakꞌaxtaknanach ixꞌalaclhijunitach ju ixtalhavat lapanacni ta yu capumakꞌaxtꞌakꞌach.

Chani ixꞌalacjunita:

―Ju acmacchꞌuchꞌuyaꞌ yuchach.

Achꞌapꞌayaꞌitꞌit.

Alhipꞌinaꞌitꞌit.

Kꞌox alhistꞌacꞌaꞌitꞌit.

45 Pus acsni chaꞌalh ju Judas lana lakꞌalh junta ixya ju Jesús.

Junich:

―Amamakaꞌunuꞌ.

Chai lana macchꞌuchꞌulh.

46 Pus lana soko tachꞌapalh ju aliꞌin.

Tachꞌin tanavi.

47 Para ju pumatam ju ixtꞌavi ju Jesús lana soko maxtulh ixmachita.

Chai ulanilh ixlapanac ju xakꞌai pali.

Lana chakxpꞌuxnilh ju ixꞌakꞌaxkꞌolh.

48 Pus ju Jesús alacjuni ju ixtalhavat lapanacni:

―Tajuch ni va quilanaviyau tachi ju tam akꞌalhonaꞌ ju chꞌapꞌapꞌutꞌunatꞌit ni va lhitꞌantꞌatꞌit ju mimachitaꞌan chai ju qꞌuiu.

49 Chux avilhchan xaclatꞌatanuyau lacakꞌai mimpujitatꞌan ju uxijnan.

Chai xaclamalaniyau.

Para jantu xaquilachꞌapayauch ju acsnich.

Para chunchach ju tꞌajun tapasanaꞌ ni caꞌuctaxtuyaꞌ tachi chun ju tsꞌokcanta laꞌixchivinti Dios ju quilacata.

50 Ju acsnich tachi chun ju ixꞌalacmamakaꞌui ju Jesús tamacoyaulh.

Taꞌatsꞌalhkꞌo ixchuxꞌan.

51 Chai pumatam tsꞌalh ixchꞌakꞌokꞌai ju Jesús.

Chai ju yuchi va ixmacajucalh lakatam kꞌai pumpuꞌ.

Va yuchach ju ixlakchꞌita.

Pus ju ixtalhavat lapanacni tachꞌapalh vachuꞌ ju yuchi.

52 Para ju yuchi macontilalh ju kꞌai ixpumpuꞌ.

Va kꞌai tsasau atsꞌalaꞌalh.

53 Pus ixtalhavat lapanacni talhiꞌalh ju Jesús laꞌixchakaꞌ ju xakꞌai pali.

Chai ju anch talhitakꞌaixtoklh chux ju xalackꞌajin palijni chai ju papaninch chai ju na ixtalhatalanininta ju ixlhamapꞌaksin ju istꞌaꞌisraelitanin.

54 Pus ju Pitaluꞌ va ixlhimakat ixchꞌakꞌokꞌata ju Jesús tus tanu vachuꞌ pulacni ta ixlakachakꞌaxnucanta ju ixchakaꞌ ju xakꞌai pali.

Chai ju anch alactꞌatavi ju pulasiyajni.

Ju yuꞌunch ixtalacskꞌonvilanalh.

55 Pus ju xalackꞌajinch palijni chai ixchuxꞌan ju ucxtinin ixtapuxconich tichi chavaich ju lai catanaulh tuꞌuꞌ taꞌaklhtamat chivinti ni laich catalhinaulh ixmaknica ju Jesús.

Para jantu tavanan talhitajunilh tuꞌuꞌ talakꞌalhin.

56 Na lhu lapanacni ixtanajun taꞌaklhtamat chivinti ixlacata ju Jesús.

Para jantu va lakatam ixtanavi ixchivintiꞌan.

57 Ju aliꞌin lapanacni tataya.

Tanaulh taꞌaklhtamat chivinti ixlacata ju yuchi.

Ixtanajun:

58 ―Ju quijnan ickꞌasmatnitau acsni naulh ni ma calaclhmokaꞌ ju kꞌai pujitat ju yocanta laꞌixmacaꞌ lapanacni.

Chai ixlhilakatꞌutu avilhchan ma cayochokoyaꞌ alakatam.

Para ma jantu lapanacni ju catayoyaꞌ.

59 Para nin chunch jantu lai va lakatam ixtanavi ixchivintiꞌan.

60 Pus ju acsnich ju xakꞌai pali taya laꞌixꞌucxlacapuꞌan ixtalhavat lapanacni.

Sacmilh ju Jesús.

Junich:

―Ja jantu tuꞌuꞌ akꞌalhtꞌayananaꞌ.

Tijuch ju talhichivimakꞌanan ju ani tayanalh.

61 Para ju Jesús va sek taya.

Jantu tuꞌuꞌ xaꞌakꞌalhtayanan.

Chai ju xakꞌai pali aktam sacmichokopa.

Junich:

―Ja uxintꞌi ju Cristoꞌat ju ixnoncan camalakachatachilh ju Dios.

Ja istsꞌalhꞌat ju Dios ju lakꞌayacan.

62 Chai ju acsnich ju Jesús akꞌalhtayanalh:

―Quitꞌinch.

Chai astan aquilalaktsꞌinau acsni actolaꞌ vanin junta vi ju Dios ju na tachapun.

Chai aquilalaktsꞌinau acsni acminaꞌ laxaꞌataputsꞌi ju lactꞌiyan.

Quitꞌin ju quimalakachatachilh Dios ni lapanac actsucuyaꞌ ju ani.

63 Pus ju acsnich ju xakꞌai pali lana lhtꞌit kꞌexlh ju ixpumpuꞌ ju va ixtalhkꞌamtich.

Chai naulh:

―Tis aliꞌ chivinti maktasqꞌuiniyau.

64 Kꞌasmatꞌatꞌit ju macxcai chivinti ju xanajun ni tachi ju Dios ju jumputun.

Tas nonatꞌit ju chavai.

Pus ju yuꞌunch tsꞌan tanonkꞌo ni lhijunch ni camaknicalh.

65 Pus ju acsnich ju aliꞌin tatsuculh lakpuchujvanin ju Jesús.

Talakpuchꞌilh chai taꞌulanilh chai tajunich:

―Anauch tichi chavaich ju xaꞌulaniyan.

Chai astan ju pulasiyajni taquincatisamalh.

66 Pus ju Pitaluꞌ makspaꞌ ixvi laꞌixpulacni kꞌex.

Chai xajchilh pumatam isquitiꞌ ju xakꞌai pali.

67 Chai acsni laktsꞌilh ju Pitaluꞌ junta ismakskꞌonvi skotutu.

Junich:

―Ju uxintꞌi vachuꞌ ixtꞌaꞌucxuntꞌaꞌun ju Jesús amachakaꞌ Nazaret.

68 Para ju Pitaluꞌ junilh:

―Jantu icmispai chai jantu icmachakxai tuchꞌi qꞌuiꞌumpꞌutꞌun.

Chai lana taxtulh ju Pitaluꞌ.

Talacxtutaya.

Chai lana tꞌasalh ju puyux.

69 Pus ju anuch squitiꞌ ni laktsꞌinchokopa aktam ju Pitaluꞌ pus alacjunchokopa ju anuch ixtavilanalh:

―Ju ani vachuꞌ makyuchi.

70 Para aktam nonchokopa ju Pitaluꞌ ni jantu slivasalh.

Chai ni pantsꞌiquis jumpa pus yuꞌunch ju ixtavilanalh tajunchokopa ju Pitaluꞌ:

―Slivasalh ni vachuꞌ makyuchꞌat ni vachuꞌ amachakaꞌat Galilea ni vachuch chun ju chꞌivinin tachi ju tachivinin ju yuꞌunch.

71 Para ju Pitaluꞌ naulh:

―Chach quimamakꞌalhkꞌajni ju Dios ni jantu slivasalh ju tuchi iclajunau.

Dios cꞌatsai ni jantu icmispai ju anuꞌ lapanac tichi lhasacmininatꞌit.

72 Chai ju puyux lana tꞌasalh ixlhipaktꞌuich.

Chai ju Pitaluꞌ lana pastaclh ju ixchivinti ju Jesús ju ixjunita acsni junich ni paktꞌutu canonaꞌ ni jantu mispai acsni tucaꞌ paktꞌui tꞌasata ju puyux.

Pus ju Pitaluꞌ acsni pastaclh ju chunch lana tsuculh kꞌalhunuꞌ.