Ju Jesús puꞌamalani ju lapanacni ju makchꞌalhcatni lapanacni
12
Ju acsnich ju Jesús tsuculh ajuniniꞌ ju lapanacni ju chivinti ju ixtꞌalaktsꞌipaxcavaich ju tuꞌuꞌ.
Alacjuni:
―Pumatam lapanac chakxchꞌanlh ju xaqꞌuiu uvas laꞌixlacatꞌun.
Coralhnu lacakꞌex.
Pokꞌajꞌula junta catamaxtuyaꞌ ju xaxcan uvas.
Yaulh ju chakaꞌ ju na putankꞌai ni laich capulhistaccalh ju ixpuꞌuvas.
Chai acsni navikꞌo pus amachꞌixtaknilh ixpuꞌuvas ju lapanacni ju makchꞌalhcatnin.
Chai ju amatꞌun alh makat.
Marcos 12:1-17
2 Chai acsni chaꞌalh ju avilhchan ni chalh ju uvas pus ju amatꞌun malakachanilh pumatam ixlapanac ju anuꞌ makchꞌalhcatnin ni caꞌalh amaklhtayanaꞌ ju xalhiꞌut tachi ju ixꞌalhitꞌatakꞌoxitach.
3 Para ju anuch makchꞌalhcatnin tachꞌapalh ju ixlapanac ju amatꞌun.
Talakꞌanekma.
Talhixcavatsꞌala chai va chunch tamalakachachokolh.
4 Pus ju amatꞌun amalakachanichokolh apumatam ixlapanac.
Para ju anuꞌ lapanacni va talacatꞌalhma.
Tamacꞌatsani laꞌisꞌaktsulh.
Chai tanavi tachi ju jantu chun.
5 Pus ju amatꞌun aktam amalakachanichokolh apumatam.
Chai ju yuchi tamakni.
Ju astan na lhu amalakachanicalh.
Ju aliꞌ tamacꞌatsani.
Ju aliꞌ talamakni.
6 Pus ixtiꞌalin pumatam ju ixtꞌavi ju anuꞌ amatꞌun.
Yuchi ju istsꞌalh ju na ixmapaini.
Pus malakacha ju yuchi vachuꞌ ju saꞌastan.
Ixnajun:
“Catatalhoniyaꞌ ju quintsꞌalh”.
7 Para ju anuch makchꞌalhcatnin talaclajunich sia yuꞌunch:
“Yuchi ju ani ju amanavin cajunaꞌ acsni caniyaꞌ ju ixpai.
Asokꞌotꞌitch.
Camakniuch.
Ju chunch ju ani lacatꞌun ju xtakniputuncan ju yuchi quiꞌanuchꞌan cajunaꞌ”.
8 Pus lana tachꞌapalh.
Tamaknilh.
Chai tatantamacxtunilh ixlacatuna lacapuꞌuvas.
9 Pus tas canaviyach ju chavai ju amanavin puꞌuvas.
Pus caminach isꞌakstu ju yuchi chai camaknikꞌoyaꞌ ju ixchuxꞌan ju ixtachꞌalhcatnan ju anch.
Chai aliꞌin ju caꞌamachꞌixtakniyaꞌ ju ixpuꞌuvas.
10 Ja va jantu tavanan laktsꞌintꞌatꞌit ixchivinti Dios ju tsꞌokcanta junta ma chani najun:
Ju chiux ju tasacmackꞌalh ju ixyonin chakaꞌ yuchach ju valhch ju chiux ju makꞌastumucꞌacanta chakaꞌ junta tsꞌokcanta tuchi cꞌata ju yocanta.
11 Yuchi ju Dios ju navilh ju ani.
Chai acsni iclaktsꞌinau pus na kꞌai lhamakꞌan iclhiulayau.
12 Pus ju acsnich ju ixtatꞌajun kꞌasmatnin ju ixchivinti ju Jesús na ixtachꞌapaputun ni ixtamachakxai ni yuꞌunch ju ixꞌalhichivinin ju Jesús acsni xanajun ju anuꞌ chivinti ixlacata ju puꞌuvas.
Para aktsꞌiya va ixtatalhoni ju ixtalhavat lapanacni.
Pus tamacaulh.
Taꞌalh.
Ju Jesús sacmican ni lhijun ni cataꞌamapalanalh u jantu
13 Ju astan amalakachacalh ju aliꞌin fariseonin chai ju aliꞌin ju ixtachꞌakꞌokꞌai ju gobernador Herodes.
Pus ju yuꞌunch talakmilh ju Jesús para va ixtapuxcolakxtuniputun ju tuꞌuꞌ chivinti ju laich catalhimucꞌanilh ixtalakꞌalhin.
14 Pus talakꞌalh chai tajunich:
―Amamakaꞌunuꞌ iccꞌatsayau ni naꞌun ju stavasalanti ju uxintꞌi.
Chai jantu xamatiꞌ ju tꞌalhoni ni vaklhtam chun ju alaktsꞌin ju lapanacni.
Chai ju uxintꞌi aktsꞌiya sok masui ju ixti ju Dios.
Pus ja lhijun ni acꞌamapalanau laꞌixmacni ju xaꞌucxtin ju romanonin u jantu.
15 Para ju Jesús ixmachakxani ni va ixtaꞌacxputꞌiyunun ju yuꞌunch chai alacjuni:
―Tajuch ni va quilapuxconiputunau ju quintalakꞌalhin.
Aquilalhiminiuch ju tumin ju lhiꞌamapꞌalananatꞌit ni aclaktsꞌinach.
16 Pus ju yuꞌunch talhiminilh ju tumin.
Chai ju Jesús acsni laktsꞌilh alacjunich:
―Tis ixꞌucxpuꞌ ju ani okslai.
Tis ixtapakaꞌut ju tsꞌokcanta ju ani.
Pus ju yuꞌunch tajuni ni ixꞌanuꞌ ju César ixꞌucxtinꞌan ju romanonin.
17 Chai alackꞌalhtailh ju Jesús.
Alacjuni:
―Pus axtꞌaknitꞌit ju César ju ixꞌanuch.
Chai axtꞌaknitꞌit ju Dios ju ixꞌanuch.
Pus ju lapanacni acsni takꞌasmatlh tachi ju lhikꞌalhtayanalh ju Jesús na talhamakꞌaninilh ni na kꞌox xanajun.
Ju Jesús sacmican ta yu cajunaꞌ acsni catalokꞌonchokoyaꞌ ju lapanacni
18 Pus ju saduceonin ixtanajun ni jantu lai lokꞌonchokocan acsni va nicanch.
Pus ju aliꞌin sia yuꞌunch talakmilh ju Jesús chai tajuni:
Marcos 12:18-44
19 ―Amamakaꞌunuꞌ ju makꞌaniya ixlapanac Dios ju Moisés ixjuncan chani quintaꞌatsꞌoknunilh:
“Ju tam lapanac ni canilh chai ma camacontilalh ixꞌamachakaꞌ para ma jantu tuꞌuꞌ catꞌamacontilalh isꞌaskꞌatꞌa pus ju ispꞌisekꞌe ma calhitsucuchokolh ju ixꞌamachakach ixjunita ju xani ni laich caꞌalilh ju istsꞌalh.
Chai ju anuꞌ tsꞌalh ma casacnilh ju ixtapakaꞌut ju lijunto ixlakꞌau”.
20 Pus ixꞌalin pumatujun lhiꞌalakꞌavin.
Chai ju xakꞌai tamakꞌaxtoklh.
Chai acsni nilh jantu tuꞌuꞌ macontilalh ju isꞌaskꞌatꞌa.
21 Pus ju ixlhipumatꞌuich lhiꞌalakꞌavin tꞌatsucuchokolh ju ixꞌamachakach ixjunita ju lijunto ixlakꞌau.
Chai astan nipa ju yuchi sin tuꞌuꞌ camacontilalh ju isꞌaskꞌatꞌa.
Chai ju ixlhipumatꞌutu lhiꞌalakꞌavin vana va chun tapasapa.
22 Pus ju anuꞌ chakoꞌulh tꞌatsucukꞌo ju ixpumatujunꞌan lhiꞌalakꞌavin chai pumatam pumatam tani.
Para jantu xamatiꞌ macontilanilh isꞌaskꞌatꞌa.
Chai acsni ixtanikꞌota ju yuꞌunch pus astan vachuꞌ nilh ju anuꞌ chakoꞌulh.
23 Pus acsni cataꞌacxtuchokoyaꞌ ju tanita tis ixꞌamachakaꞌ cajunaꞌ ni ixpumatujunꞌan atꞌatsucukꞌo ju anuꞌ chakoꞌulh.
24 Pus ju acsnich ju Jesús akꞌalhtailh.
Alacjuni:
―Ju uxijnan jantu sok alacpꞌastꞌacnanatꞌit ni jantu machꞌakxayatꞌit ni na lacalhu ju tsꞌokcanta laꞌixchivinti Dios junta najun ni catalokꞌonchokoyaꞌ ju tanita.
Vachuꞌ jantu mispꞌayatꞌit tuchi lai navi ju Dios.
25 Pus acsni cataꞌacxtuchokoyaꞌ ju tanita jantu catamakꞌaxtokcanaꞌ nin calaꞌicalh.
Va ixtꞌachunchach catatsucuyaꞌ tachi ju anquilhnin ju tavilanancha lactꞌiyan.
26 Chai ni va asacmininatꞌit ni lai cataꞌacxtuchokoyaꞌ ju tanita u jantu pus ja lana jantu laktsꞌintꞌatꞌit junta tsꞌoklh ju Moisés junta najun ni laktsꞌilh ju achꞌitin ju ixmaktajita.
Chai ni lakꞌalh pus ju Dios xakꞌala chai juni ni isDiosꞌan junita ju Abraham chai ju Isaac chai ju Jacob.
27 Pus ju Dios ni isDios junita ju lapanacni ju tatꞌajun pus nomputun ni tatꞌajun ju anuch lapanacni mas noncan ni makꞌanch tanita.
Pus ju uxijnan na lhu makꞌatsꞌankꞌayatꞌit ju miꞌatalacpastꞌacꞌatꞌan.
Ju lhamapꞌaksin ju palai tasqꞌuini ni canavicalh
28 Chai pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin vachuꞌ lakmilh ju Jesús.
Ju yuchi iskꞌasmatach tachi ju ixtajuni ju Jesús ju saduceonin.
Chai ju yuchi machakxa ni na kꞌoxich ju xalhakꞌalhtayanan ju Jesús.
Pus vachuꞌ sacmilh ju Jesús.
Junich:
―Tachi chun ju ixlhamapꞌaksin ju Moisés tasmalhch ju palai tasqꞌuini ni canavicalh.
29 Pus ju Jesús kꞌalhtailh.
Junich:
―Ju lhamapꞌaksin ju palai tasqꞌuini ni anavitꞌi yuchi ju ani:
“Akꞌasmatꞌit ji israelitanin.
Ju miꞌucxtinꞌan Dios va pumatam.
30 Pus amapꞌainitꞌit ju miꞌucxtinꞌan Dios laꞌixlhichux miꞌalhunutꞌan chai laꞌixlhichux miꞌatsucuntiꞌan chai laꞌixlhichux mintacꞌatsanꞌan.
Amapꞌainitꞌit istavasalanti”.
Yuchach ju ani ju lhamapꞌaksin ju palai tasqꞌuini ni anavitꞌi.
31 Chai ju ixlhilakatꞌui va ixtꞌachunch junita.
Ju yuchi najun ni amapꞌainitꞌi ju vanin alactꞌavilhtꞌi tachi ju va jun miꞌakstu ju mapꞌainichꞌokꞌocꞌan.
Matiꞌ alakatam lhamapꞌaksin ju va palai tasqꞌuini ni anavitꞌi.
32 Pus ju acsnich ju anuꞌ lapanac ju na ixlhatalanininta ju ixlhamapꞌaksinꞌan ju istꞌaꞌisraelitanin junilh ju Jesús:
―Vasalh ji amamakaꞌunuꞌ.
Stavasalanti tachi ju naꞌun ni va pumatam ju Dios.
Matiꞌ akꞌantam.
33 Chai vasalh tasqꞌuini ni acmapaini ju Dios laꞌixlhichux ju quiꞌalhunut chai laꞌixlhichux ju quintacꞌatsan chai laꞌixlhichux ju quiꞌatsucunti.
Acmapaini istavasalanti.
Chai tasqꞌuini ni acmapaini ju vanin quintꞌavi tachi ju va jun quiꞌakstu ju icmapainichokocan.
Vasalh palai lhitapalai ni acnavi chux ju ani.
Palai jantu ni va tuꞌuch acmakninilh ju Dios u ni acxavanilh ju Dios tuꞌuꞌ lhakꞌailaktsꞌinti.
34 Pus ju Jesús acsni kꞌasmatlh ni aktsꞌiya na kꞌox ju xalhikꞌalhtaji ju anuꞌ lapanac pus junich:
―Ju uxintꞌi vasalh machꞌakxai tuchi lacasqꞌuin ju Dios.
Ju chavai va yuchi ju cꞌacxniyan ni alakꞌaꞌitꞌi ni calhinonkꞌo ju Dios lamiꞌatsucunti.
Pus ju acsnich tachi chun ju lapanacni na ixtatalhoni ju Jesús.
Jantu ixtaquilhasacmiputun tuꞌuꞌ aliꞌ.
Tis istsꞌalh ju Cristo
35 Ju Jesús ixꞌalacmasuni ju lapanacni ju lacakꞌai ixpujitatꞌan ju istꞌaꞌisraelitanin.
Chai ajuni:
―Ju na talhatalanininta ju milhamapꞌaksinꞌan tas laich talhinajun ni istsꞌalh David ju Cristo ju ixnoncan camalakachatachilh ju Dios.
36 Tas laich tanajun ju chunch ni mapastꞌacꞌani ju Spiritu Santu ni chani canaulh ju David:
Ju ucxtin Dios junilh ju quiꞌucxtin:
“Vanin atꞌaꞌulh junta icvi tus acsni actꞌalalhajayaꞌ ju mintꞌalaxcai”.
37 Pus ni isꞌakstu ju naulh ju David ni ixꞌucxtin junita pus ju chunch va nomputun ni jantu va istsꞌalh junita.
Pus ixtalhavat lapanacni va lhikꞌach ixtakꞌasmatni ju ixchivinti ju Jesús.
Ju Jesús amucꞌanilh ixtalakꞌalhinꞌan ju xalackꞌajin
38 Chai ju Jesús chani alacjuni ju lapanacni acsni ixꞌamalaninin:
―Jantu alacꞌaꞌinikꞌotꞌit tuchi tanajun ju yuꞌunch ju na talhatalanininta ju milhamapꞌaksinꞌan.
Ju yuꞌunch na tapuꞌalhtanamputun lacalhman ixpumpuꞌan ni xalackꞌajinch tatalacasuputun.
Chai na kꞌoxich talhiulai acsni tamacꞌami ju lapanacni ju laclhitamau junta chux catakꞌasmatꞌaꞌ.
39 Chai na tatolhputun junta tatolai ju xalackꞌajin ju lacpujitat chai lacapuvai.
40 Va tataiꞌini ixlacchakaꞌan ju chakolun ju va animacontilacanta.
Chai ni va talacasuputun tachi ju na va soknicꞌa ju isꞌatsucuntiꞌan pus talapalai tachi ju na panicni ju tatꞌachivinin ju Dios.
Pus ni chunch ju talai palai camamakꞌalhkꞌajnicanaꞌ ju yuꞌunch.
Palai jantu ju aliꞌin lapanacni.
Pumatam chakoꞌulh lhikꞌailaktsꞌilh ju Dios ixtumin
41 Ju aktam ju Jesús ixvi laꞌixpujitatꞌan ju istꞌaꞌisraelitanin.
Anch ixvi laꞌixꞌucxlacapuꞌ ju lacatꞌicstꞌi pꞌaklat junta ixtamujui ju tumin ju ixtalhakꞌailaktsꞌin ju Dios ju lapanacni.
Pus ju yuchi ixꞌalaktsꞌin ju lapanacni acsni ixtamujui ju ixtuminꞌan ju lacapꞌaklat.
Pus na lhu makꞌalinin na laklhu ixtamujui.
42 Chai milh pumatam chakoꞌulh ju va ixnimacontilacanta.
Na quilhpatiniꞌ ixjunita.
Pus ju yuchi muju lakatꞌui lactꞌicstꞌi tumin ju lana jantu laklhu ixtapalh ixjunita.
43 Pus ju acsnich ju Jesús alactꞌasanilh ju ixꞌamamakaꞌui chai alacjuni:
―Slivasalh ju iclajunau.
Na kꞌox xalhiulai ju Dios ju tuchi xamujui ju ani ya chakoꞌulh ju va nimacontilacanta chai ju na quilhpatiniꞌ.
Palai jantu chun ju aliꞌin ju tamujui ju ixtuminꞌan ju lacapꞌaklat.
44 Ju yuꞌunch va tamujui ju va xatanxajni ixtuminꞌan.
Para ju ani quilhpatiniꞌ mukꞌo tachi chun ju ixpacxanta.
Chux ju caꞌixlhitamaꞌuta ju ixvaiti.