Ju Jesús tanucha ju lakꞌachakꞌan Jerusalén
11
Ju vanin ju lakꞌachakꞌan Jerusalén ixtaꞌalin lakatꞌui lactꞌicstꞌi lakꞌachakꞌanixni.
Ju lakatam ixjuncan Betfagé chai ju lakatam ixjuncan Betania.
Chai vanin ju anuꞌ lakꞌachakꞌanixni ixꞌalin ju akstijun junta ixchꞌancanta ju xaqꞌuiu ju olivos ixjuncan.
Pus ju Jesús acsni alactꞌachaꞌalh ju anch ju ixtalhavat lapanacni pus amalakacha pumatꞌui ixꞌalacmamakaꞌui.
Marcos 11:1-14
―Aꞌinchitꞌit ju anuꞌ tasui lakꞌachakꞌan.
Chai acsni atꞌanutꞌachitꞌit alhitꞌaꞌuyaꞌitꞌit lakatam sastꞌi puru chꞌiyocanta.
Tucaꞌ xamatiꞌ putocꞌai.
Axkꞌotꞌayaꞌitꞌit.
Alhitꞌanaꞌitꞌit.
3 Chai ni xamatiꞌ catajunan:
“Tajuch ni va chun ju lapꞌalatꞌit”,
pus va aꞌunaꞌitꞌit ni ma maktasqꞌuini ju miꞌucxtinꞌan chai ma vatsꞌalhti camalakachachokotachilh.
4 Pus taꞌalh.
Chai talhitajucha ju puru junta ixchꞌiyocanta lacati vanin lacamalhtich.
Chai taxkꞌotailh.
5 Pus ju ixtayanalh anch tajuni:
―Tijuch ju naviyatꞌit ni va xkꞌotꞌayatꞌit ju puru.
6 Chai ju ixꞌamalakachan ju Jesús tajunilh tachi ixꞌajuncanta.
Chai ju acsnich yau ajunicalh ni catalhiꞌalh ju puru.
7 Chai talhimilh ju puru junta ixvi ju Jesús.
Taꞌakxchꞌamucꞌalh ixcutunꞌan chai ju Jesús putocꞌalh.
8 Pus na lhu lapanacni ixtamamalhiꞌanta ixcutunꞌan ju lacati junta capuminaꞌ ju Jesús.
Ju aliꞌin ixtachakxꞌi ju ixꞌacatan qꞌuiu chai ixtamamalhiꞌanta ju lacati.
9 Chai ju ixtaꞌapꞌulanan chai ju ixtakꞌaixunun ixtalactꞌasaꞌanta ju lacati.
Ixtanajun:
―Chach lakꞌayacalh ju ani minta.
Paxcat ju ani ju minta ju malakachatachilh ju Dios.
10 Na kꞌox cajunaꞌ ju ixpuꞌucxtin ju caꞌalinaꞌ.
Chunch ju cajunaꞌ tachi ixjunita ixpuꞌucxtin ju makꞌaniya quimpaiꞌan David.
Chach lakꞌayacalh ju Dios.
11 Pus ju Jesús acsni tanu ju lakꞌachakꞌan Jerusalén alh ju lacakꞌai ixpujitatꞌan ju istꞌaꞌisraelitanin.
Chai acsni islaktsꞌinkꞌotach tachi chun ju taxtokni ju anch pus alactꞌataxtuchokolh ju ixpumacautꞌuiꞌan.
Chai ni na ixtokꞌoxatach pus alactꞌaꞌalh ju lakꞌachakꞌan Betania.
Ju Jesús kꞌailh akꞌatam xaqꞌuiu higo
12 Chai acsni tuncunchokopa pus ju Jesús chai ju ixꞌamamakaꞌui tataxtuchokocha ju Betania chai ju Jesús chavanilh.
13 Chai acsni laktsꞌilh ju ixlhimakat akꞌatam xaqꞌuiu higo ju na xkꞌoyu ixlatach pus lakꞌalh.
Tsꞌa ma laich calhitaju tuꞌuꞌ xalhiꞌut.
Para acsni quilaktsꞌilh jantu tuꞌuꞌ lhitaju.
Va si xaxkꞌoi.
Va tsꞌalhti ixlakapꞌunta mas tucaꞌ ixchaꞌanta ju avilhchan acsni caꞌalilh ju xatocꞌat.
14 Pus ju acsnich ju Jesús junilh ju anuꞌ xaqꞌuiu higo:
―Jantu tavanan catiꞌalinchokolh ju miꞌatocꞌat ju lai cataꞌulh ju lapanacni.
Pus takꞌasmatlh ju ixꞌalacmamakaꞌui tuchi juni ju Jesús ju anuꞌ xaqꞌuiu higo.
Ju Jesús alacxcauxtulh ju astꞌanin lacpujitat
15 Astan ju Jesús chai ju ixꞌalacmamakaꞌui tamilh ju Jerusalén.
Chai acsni tanulh ju Jesús ju lacakꞌai ixpujitatꞌan ju istꞌaꞌisraelitanin pus tsuculh alactixcoxtunuꞌ ju lapanacni ju ixtaꞌastꞌanan chai ju ixtaꞌatamonan ju anch.
Alakmakspuspꞌitnikꞌo ju ixmixaꞌan ju ixmapaxanin tumin chai ixputolanꞌan ju istꞌanin lakꞌaxkꞌavan.
Marcos 11:15-33
16 Chai jantu xalacasqꞌuin ni xamatiꞌ cacꞌucꞌalhiꞌalh tuꞌuꞌ ju laꞌismakspaꞌ kꞌai ixpujitatꞌan ju istꞌaꞌisraelitanin ni tachi ju va lacati cataꞌulhtulh.
17 Chai ixꞌalacmasuni ju lapanacni chai alacjuni:
―Tsꞌokcanta laꞌixchivinti Dios junta najun ni ixchakaꞌ ma calhimispacanaꞌ ni anch ju lai catꞌachivinaꞌ ju Dios va tichi chavaich.
Chunch ju tsꞌokcanta para ju uxijnan ni va lhimalacxtꞌutꞌatꞌit ju tuꞌuꞌ lhucucu talhpa junta tatankꞌanui ju akꞌalhonin.
18 Pus ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju xalackꞌajin palijni takꞌasmatlh ju tuchi ixnajunta ju Jesús.
Chai ju acsnich tatsuculh puxconin ta yu laich catapumakniyaꞌ.
Para va ixtatalhoni ju Jesús ni chux ju lapanacni na ixtalhamakꞌaninin ju ixꞌatalaninti.
19 Para acsni tokꞌoxapa pus ju Jesús taxtuchokolh ju anch lakꞌachakꞌan.
Xixlh ju xaqꞌuiu higo
20 Chai acsni tuncunchokolh pus ju Jesús chai ixꞌalacmamakaꞌui taꞌalhtanampa ju lacati.
Chai talaktsꞌilh ju xaqꞌuiu higo ni ixixtach tus laꞌistisivic.
21 Ju acsnich ju Pitaluꞌ pastaclich tuchi ixtapasata chai junich ju Jesús:
―Amamakaꞌunuꞌ alaktsꞌich ju xaqꞌuiu higo ju lakꞌakꞌaimatꞌi.
Na xixtach ju chavai.
22 Chai ju Jesús akꞌalhtayanalh.
Alacjuni:
―Alhilaksitꞌit ju Dios.
23 Slivasalh ju iclajunau.
Va tichi chavaich ju cajunilh ju ani talhpa:
“Akꞌostꞌich.
Atꞌaꞌuchich ju lacaꞌalama”,
pus canavinicanaꞌ.
Para tasqꞌuini ni jantu va tam tam canonaꞌ laꞌixꞌalhunut.
Alai calacaꞌiyaꞌ ni calhixajanta tuchi canonaꞌ.
24 Yuchi iclalhijunau ni tachi chun ju asqꞌuinaꞌitꞌit acsni atꞌachꞌivininaꞌitꞌit ju Dios alacꞌaꞌitꞌit ni amaklhtꞌayananaꞌitꞌit chai axtꞌaknicꞌanaꞌitꞌit.
25 Chai acsni atsꞌucꞌuyaꞌitꞌit tꞌachꞌivinin ju Dios amacꞌacxanin ni alin xamatiꞌ ju tꞌalakꞌaitan.
Ju chunch ju mimpaiꞌan ju vilhcha lactꞌiyan catamacꞌacxaniyanch vachuꞌ ju uxijnan ju mintalakꞌalhinꞌan.
26 Para ju uxijnan ni jantu amacꞌacxaniyaꞌitꞌit ju mintꞌalaxcaiꞌan pus nin yuchi ju mimpaiꞌan ju vilhcha lactꞌiyan jantu catitamacꞌacxanin ju mintalakꞌalhinꞌan.
Ixtachaput ju Jesús
27 Ju acsnich ju Jesús chai ju ixꞌamamakaꞌui taꞌanchokopa ju lakꞌachakꞌan Jerusalén.
Chai ju Jesús ixꞌalhtanatꞌajun lacakꞌai ixpujitatꞌan ju istꞌaꞌisraelitanin.
Pus talakmilh ju yuchi ju xalackꞌajin palijni chai ju papaninch chai ju na ixtalhatalaninintach ju ixlhamapꞌaksinꞌan ju istꞌaꞌisraelitanin.
28 Tajunich:
―Tis chavaich ju xajunan ni laich anaviyaꞌ ju ani taxtokni.
29 Pus ju Jesús alackꞌalhtailh.
Alacjunich:
―Vachuꞌ aclasacmiyau ju uxijnan lakatam chivinti.
Ni aquilajuniuch pus vachuꞌ aclajunau tichi chavaich ju xaquijuni ni acnavi junima taxtokni.
30 Pus tis chavaich ju xamalakachayachilh ju Xivan amakpaxanaꞌ.
Ja yuchi ju Dios u yuꞌunch ju lapanacni.
Aquilajuniuch.
31 Pus ju acsnich ju yuꞌunch talaclajunilh ixlhiꞌakstuꞌan:
―Ni canaju ni Dios xamalakachayachilh pus ju yuchi laich aquintajunan tajuch ni jantu xalacaꞌiniyau.
32 Chai vana jantu lai catinaju ni ixtꞌalapanac ju xamalakachayachilh amakpaxanaꞌ.
Chunch ixtalaclajuni ni na ixtatalhoni ju lapanacni.
Ju lapanacni si ixtanonkꞌojui ni slivasalh ni ixnajun ixchivinti Dios ju Xivan.
33 Pus taꞌakꞌalhtayanalh chai tajunilh ju Jesús:
―Jantu iccꞌatsayau.
Pus ju acsnich ju Jesús alackꞌalhtailh.
Alacjuni:
―Nin quitꞌin jantu actilajuniu tichi chavaich ju xaquijuni ni acnaviyaꞌ junima taxtokni.