Ju Jesús alacjuni ju lapanacni ixlacata ju alamaconanta
10
Ju Jesús taxtulh ju lakꞌachakꞌan Capernaum.
Milh ju xaꞌestado Judea lhimakꞌantacutni ju kꞌai xcan Jordán.
Chai aktam takꞌaixtokchokopa ju lapanacni junta ixvi ju Jesús.
Chai aktam alacmalani tachi ju aktsꞌiya ixlai.
Marcos 10:1-31
―Ja lhijun ju lhamapꞌaksin ni camacaulh ju ixꞌamachakaꞌ ju tam jokꞌat.
3 Pus ju Jesús akꞌalhtayanalh.
Alacjuni:
―Tijuch ju naulh ju Moisés laꞌixlhamapꞌaksin.
4 Chai ju yuꞌunch taꞌakꞌalhtayanalh.
Tajuni:
―Pus ju Moisés ixlakꞌaꞌi ni actsꞌoklh lakatam alhiqui ju pulamacau chai acmacaulh.
5 Para ju Jesús alackꞌalhtailh.
Alacjuni:
―Va ixlacaꞌatalh ni na pꞌas ju miꞌalhunutꞌan yuchi xalhiꞌatsꞌoknun junima lhamapꞌaksin ju Moisés.
6 Para acsni tavanan navitacha ju Dios ju lacamunutpaꞌ ju yuchi navilh pumatam tsꞌalh chai pumatam atsiꞌ.
7 Pus ixlhiyuchi ju tam tsꞌalh camaconach ju ixpai chai ixnati chai catꞌatsucuyaꞌ ju ixꞌamachakaꞌ.
8 Pus ju anuꞌ ixpumatꞌuiꞌan tachi ju va pumatam catajunaꞌ.
Pus ju chunch jantuch vana pumatꞌui tajunita.
Alai tachi va pumatam lapanac tajunita.
9 Pus ju malakxtokta ju Dios jantu catitalhvaklh ju lapanacni.
10 Chai acsni tanuchokolh lacachakaꞌ ju Jesús pus ju ixꞌamamakaꞌui aktam tasacmichokopa ixlacata ju anuꞌ chivinti ju ixꞌajunita ju lapanacni.
11 Pus ju Jesús alacjuni:
―Va tichi chavaich ju camaconaꞌ ju ixꞌamachakaꞌ chai catꞌatsucuchokolh apumatam navi talakꞌalhin laꞌixmacni ixꞌamachakaꞌ ixjunita.
12 Chai ju chakoꞌulh ni camacaulh ju ixpapa chai catꞌatsucuchokolh akꞌantam pus talakꞌalhin ju navi vachuꞌ.
Ju Jesús sqꞌuinlh kꞌox isꞌatsucuntiꞌan ju askꞌatꞌan
13 Ju acsnich alhichaꞌanicalh ju Jesús ju askꞌatꞌan ni caꞌamokslanilh ixmacaꞌ laꞌixlacatunaꞌan ju yuꞌunch chai catapaininilh ju Dios ni kꞌox catatsuculh.
Para ju ixꞌalacmamakaꞌui taꞌalackꞌaima ju ixtalhichaꞌan ju isꞌaskꞌatꞌan.
14 Para acsni laktsꞌilh ju Jesús tuchi ixtanavi ju ixꞌalacmamakaꞌui pus talhkꞌamalh.
Alacjuni:
―Amacꞌaꞌuntꞌit ju askꞌatꞌan.
Chach quintalakmilh.
Jantu asaspꞌitꞌit ni quintalhilaksich ju yuꞌunch.
Chai va tichi chavaich ju aquilhilaksiyaꞌ tachi ju quintalhilaksi ju ani tayanalh askꞌatꞌan yuchi ju laich catanuyanta ju lactꞌiyan.
15 Slivasalh ju iclajunau.
Tachi chun ju lapanacni ju jantu quilhilaksi ju quitꞌin tachi ju tam askꞌatꞌa lhilaksi ju ixpai pus jantu tavanan lai catitanu junta lhinajun ju Dios.
16 Pus ju acsnich ju Jesús alacchꞌixlh ju askꞌatꞌan.
Alacmucꞌanilh ixmacaꞌ laꞌixꞌucxni ixlacatunaꞌan chai sqꞌuinlh ju kꞌox isꞌatsucuntiꞌan.
Pumatam makꞌaliꞌ tꞌachivinilh ju Jesús
17 Ju Jesús taxtuchokopa ju anch.
Chai acsni ixꞌamputun ju lacati pus atsꞌalamilh pumatam tsꞌalh chai taꞌaktsokotanilh ju yuchi.
Chai sacmilh:
―Amamakaꞌunuꞌ ju uxintꞌi na kꞌox lapanacꞌat.
Tijuch ju acnaviyaꞌ ni caꞌalilh ju quiꞌatsucunti ju conkꞌalhiyanta ju lactꞌiyan.
18 Pus ju Jesús juni:
―Ju uxintꞌi ni naꞌun ni va iclapanac pus tajuch ni va qꞌuiꞌunich ni ickꞌox.
Jantu xamatiꞌ ju kꞌox.
Va pumatam.
Yuchi ju Dios.
19 Ju uxintꞌi mispꞌaich junta chani najun lamilhamapꞌaksinꞌan:
“Jantu atꞌatsꞌucꞌu ju jantu miꞌamachakaꞌ.
Jantu amaknitꞌi xamatiꞌ.
Jantu akꞌalhaun.
Jantu anau taꞌaklhtamat chivinti ixlacata apumatam.
Jantu aꞌokxchꞌokꞌotꞌaiꞌinitꞌi tuꞌuꞌ xamatiꞌ.
Atꞌalhonin ju mimpai chai ju minatich”.
20 Pus ju anuꞌ tsꞌalh akꞌalhtayanalh.
Junich ju Jesús:
―Amamakaꞌunuꞌ.
Chux ju ani icmuctaxtukꞌota tus quilhitalacatꞌicstꞌin.
21 Ju acsnich ju Jesús laktsꞌilh ju anuꞌ tsꞌalh chai na mapaini.
Junich:
―Tiꞌalin lakatam taxtokni ju tasqꞌuini ni anavitꞌi.
Inchich.
Astꞌachich tachi chun ju miꞌalinta chai axtꞌaknin ju tumin ju amakꞌaixtꞌokꞌaꞌ ju quilhpatinin.
Ju chunch caꞌalinaꞌ ju mimakꞌalit ju lactꞌiyan.
Chai astan aqꞌuinchꞌakꞌokꞌach.
Chai achꞌixtꞌich ju makꞌalhkꞌajnat ju caꞌalinaꞌ va ixlacaꞌatalh ni aquilhilaksiyaꞌ ju quitꞌin.
22 Para ju anuꞌ tsꞌalh acsni kꞌasmatlh junima chivinti lana na amakꞌaninilh.
Na amakꞌaniniꞌalh ni na makꞌaliꞌ ixjunita.
23 Ju acsnich ju Jesús alaktsꞌilh ju lapanacni ju ixtayanalh ixtalakachoko chai alacjuni ju ixꞌalacmamakaꞌui:
―Na lhixcai ni lai catanu ju lactꞌiyan junta lhinajun ju Dios tam makꞌaliꞌ.
24 Pus ju ixꞌalacmamakaꞌui Jesús na talhamakꞌaninilh ju ixchivinti.
Para ju Jesús alacjunchokopa:
―Quintsꞌalan na lhixcai ni lai catatanu ju lactꞌiyan junta lhinajun ju Dios ju yuꞌunch ju na talhilaksi ju ixmakꞌalitꞌan.
25 Ju tuꞌuꞌ camello jantu lai catitapasalh junta tilhucucu ju macscat.
Pus vana va chun tam makꞌaliꞌ.
Ju yuchi jantu lai catitanun ju lactꞌiyan junta lhinajun ju Dios.
26 Pus ju ixꞌamamakaꞌui acsni takꞌasmatlh ju ani chivinti va palai talhamakꞌaninilh.
Chai talaclajuni sia yuꞌunch.
―Pus tis chavaich ju lai camakꞌalhtaxtucanaꞌ.
27 Para ju Jesús alaktsꞌilh.
Ajuni:
―Ju va lapanac aktsꞌiya palai tuꞌuꞌ lhiulai ju ixmakꞌalit.
Palai jantu ixtaxtokni Dios.
Para ju Dios lai amapaxani ixꞌatalacpastꞌacꞌat tam lapanac.
Pus tachi chun ju taxtokni si lai navikꞌojui ju Dios.
28 Ju acsnich ju Pitaluꞌ junich:
―Ju quijnan icmaconkꞌotauch chux quintaxtokni quincꞌan chai iclachꞌakꞌokꞌatauch.
29 Chai ju Jesús akꞌalhtayanalh.
Junich:
―Slivasalh ju iclajunau.
Va tichi chavaich ju calhimacaulh ju ixchakaꞌ u tam ixlakꞌau tsꞌalh u tam ixlakꞌau atsiꞌ u ixpai u ixnati u ixꞌamachakaꞌ u isꞌaskꞌatꞌan u ixlacatꞌun va ixlacaꞌatalh ni quinchꞌakꞌokꞌai ju quitꞌin chai va ixlacata ni laich caꞌajunilh ju lapanacni ta yu laich catatakꞌalhtaxtulh pus palai lhu caxtaknicanaꞌ.
30 Ju chunch calalh pus caꞌalinaꞌ lhu chakaꞌ junta laich cachaꞌanaꞌ tachi ju va laꞌixchakaꞌ junita.
Chai caꞌalinaꞌ lhu lapanacni ju tachi vasalh ixꞌalakꞌavin catajunaꞌ mas jantu.
Chai caꞌalinaꞌ ju tachi vasalh ixlacnatiꞌan tajunita chai tachi ixlacꞌaskꞌatꞌan catajunaꞌ.
Chai caꞌalinaꞌ lhu ju lacatꞌun junta lai camachꞌixtaknicanaꞌ ni laich cachꞌalhcatnanaꞌ tachi ju va ixꞌanuꞌ.
Caꞌalinaꞌ tachi chun ju ani para vachuꞌ catamakꞌalhkꞌajnanaꞌ ni vachuꞌ caꞌaxcaicanaꞌ.
Chai astan caꞌalinaꞌ isꞌatsucuntiꞌan ju conkꞌalhiyanta lactꞌiyan.
31 Para ju lactꞌiyan caꞌalinaꞌ lapanacni ju makꞌanch xaquintalhilaksi.
Para jantu lai actinaulh ni va ixlhiyuchi palai kꞌox caꞌalhilhiulacalh.
Palai jantu ju aliꞌin.
Chai cataꞌalinaꞌ lapanacni ju jantucaꞌ makꞌan xaquintalhilaksi.
Para jantu lai actinaulh ni ixlhiyuchi palai jantu kꞌox caꞌalhilhiulacalh.
Palai kꞌox caꞌalhiulacalh ju aliꞌin.
Aktam ju Jesús alacjuni ju ixlapanacni ni caniyaꞌ
32 Pus ju Jesús chai ju aliꞌin ixtaꞌalhtanaꞌanta laxati ju Jerusalén.
Chai ju Jesús ixꞌapꞌulhnita ju aliꞌin.
Chai ju ixꞌamamakaꞌui ni va ixtalhamakꞌaninin ju Jesús pus ixtatakꞌaixui.
Chai na ixtatalhanan.
Pus ju acsnich ju Jesús alactꞌasanilh ixpumacautꞌuiꞌan chai va isꞌakstuꞌan alactꞌaꞌalhtanalh ju lacati.
Chai ju yuchi tsuculh ajuniniꞌ ju taxtokni ju catapasayaꞌ laꞌisꞌatsucunti ju yuchi.
Marcos 10:32-52
―Alaktsꞌintꞌit.
Ju chavai cachaꞌanau ju Jerusalén.
Chai ju quitꞌin acmakꞌaxtakcanaꞌ laꞌixmacaꞌan ju xalackꞌajin palijni chai ju na talhatalanininta ju milhamapꞌaksinꞌan.
Quitꞌin ju quimalakachatachilh Dios ni lapanac actsucuyaꞌ ju ani.
Chai ju yuꞌunch aquintalhinonaꞌ ju quimaknica.
Chai aquintamakꞌaxtꞌakꞌaꞌ laꞌixmacaꞌan ju jantu quintꞌaꞌisraelitaninꞌan.
34 Chai ju yuꞌunch aquintalhitsꞌiꞌinaꞌ.
Chai aquintakꞌainekmayaꞌ.
Chai aquintaꞌacxpuchujvayaꞌ.
Chai aquintamakniyaꞌ.
Para ju ixlhilakatꞌutu avilhchan actaꞌacxtuchokoyaꞌ junta acmacnucanaꞌ.
Ju Jacobo chai ju Xivan tatapainini ju Jesús
35 Ju acsnich ju Jacobo chai ju Xivan istsꞌalan ju Zebedeo talakꞌalh ju Jesús chai tajunich:
―Amamakaꞌunuꞌ iclacasqꞌuinau ni aquilanaviniu ju tuchi aclasqꞌuiniyau.
36 Chai ju Jesús alacjuni:
―Tijuch ju lacꞌasqꞌuinatꞌit ju aclanaviniu.
37 Chai ju yuꞌunch tajunich:
―Va iclacasqꞌuinau ni alakꞌaꞌiyaꞌ ju uxintꞌi ni anch actolauch ju pumatam lamilhicana chai ju pumatam lamilhimacx acsni xakꞌai aꞌunaꞌ.
38 Pus ju acsnich ju Jesús alacjuni:
―Ju uxijnan jantu cꞌatsꞌayatꞌit tuchꞌi sqꞌuinatꞌit.
Ja lai amakꞌalhkꞌajnanaꞌitꞌit tachi ju acmakꞌalhkꞌajnanaꞌ ju quitꞌin.
39 Ju yuꞌunch taꞌakꞌalhtayanalh.
Tajunich ni calayach.
Chai ju Jesús alacjuni:
―Slivasalh chunch ju amakꞌalhkꞌajnanaꞌitꞌit tachi ju acmakꞌalhkꞌajnanaꞌ ju quitꞌin.
40 Para jantu quitꞌin ju acnonaꞌ tichi chavaich ju catolaꞌ laquilhicana chai laquilhimacx.
Yuꞌunch ju catatolach anch ju asacxtuta.
41 Pus ju ixpumacauꞌan ixꞌamamakaꞌui ju Jesús acsni takꞌasmatlh tuchi ixtanajunta ju Jacobo chai ju Xivan na talhitalhkꞌamalh.
42 Para ju Jesús alactꞌasanilh ixchuxꞌan chai alacjunich:
―Ju uxijnan cꞌatsꞌayatꞌit ni slivasalh na pꞌas talhinajun ju xaꞌucxtin lakatam kꞌai lacatꞌun.
Chai na alhimacchapui ju lapanacni ju salactꞌicstꞌi ucxtinin ju amalakachacan.
43 Para jantu chun ju alatꞌit ju uxijnan.
Alai va tichi chavaich ju lamilhiꞌuxijnan ju palai xakꞌai jumputun tasqꞌuini ni calhitalacasu tachi ju tam xalapanac.
44 Chai va tichi chavaich ju milhiꞌuxijnan ju xakꞌai jumputun tasqꞌuini ni cacaplich ju chunch.
Alai va cajunlh tachi ju va tam xalapanac.
45 Chunch ju alatꞌit tachi ju iclai ju quitꞌin ju quimalakachatachilh ju Dios ni lapanac actsucuyaꞌ ju ani.
Pus ju quitꞌin jantiyuꞌ iclhiminta ni va aquintachꞌalhcatnanilh ju lapanacni.
Alai iclhiminta ni acꞌalacchꞌalhcatnaniyaꞌ ju lapanacni chai acxtꞌakꞌaꞌ ju quiꞌatsucunti va ixꞌamalakxtuca lhu ju lapanacni.
Ju Jesús malacꞌavani pumatam alakꞌachꞌix
46 Ju Jesús chai ju ixꞌamamakaꞌui chai lhu lapanacni tamilh ju lakꞌachakꞌan Jericó.
Chai acsni tataxtuchokolh ju anch pus ixvi laꞌixquilhtuꞌ ti ju Bartimeo.
Istsꞌalh ju Timeo.
Ju yuchi va alakꞌachꞌix ixjunita chai ispusacꞌa ju tumin.
47 Chai ju yuchi acsni kꞌasmatlh ni minta ju Jesús amachakaꞌ Nazaret pus tsuculh tꞌasaniniꞌ.
Junich:
―Jesús.
Istsꞌalhꞌat ju kꞌai ucxtin David.
Aqꞌuinavininch lamapainin.
48 Para na lhu lapanacni ju ixtatꞌaminta ju Jesús ju lacati ixtalakꞌakꞌaimai.
Tajuni ni va sekch catavi.
Para ju yuchi va apalai pꞌas ixchivinin.
Ixnajun:
―Ji istsꞌalh ju kꞌai ucxtin David aqꞌuinavinin lamapainin ju quitꞌin.
49 Pus ju acsnich ju Jesús lana taya.
Lhinaulh istꞌasanica ju Bartimeo.
Pus taꞌalh tꞌasaninin ju alakꞌachꞌix chai tajunich:
―Akꞌachꞌach.
Atꞌaich.
Tꞌasaniyan ju yuchi.
―Tijuch ju acnaviniyan.
Chai ju alakꞌachꞌix juni:
―Amamakaꞌunuꞌ icꞌalacꞌavamputun.
52 Pus ju Jesús juni:
―Pus laich apꞌinaꞌ.
Ni xaqꞌuilhilacꞌapꞌinch pus laich alacꞌavananaꞌ.
Pus lana alacꞌavanalh ju anuꞌ alakꞌachꞌix ixjunita.
Chai tꞌaꞌalh ju Jesús ju lacati.