―Slivasalh ju iclajunau.

Alin ju lamilhiꞌuxijnan ju ani vilatꞌit ju jantu cataniyaꞌ tus acsni catalaktsꞌinaꞌ ta yu tasui acsni vi ju Dios laꞌixpuꞌucxtin.

Chai catasuyaꞌ ni vasalh na tachapun ju yuchi.

2 Pus ju ixlhilakachaxan avilhchan astan ju Jesús alactꞌasanilh ju Pitaluꞌ chai ju Jacobo chai ju Xivan.

Alhiꞌalh va isꞌakstuꞌan ju lactalhpa junta na putankꞌai ixjunita.

Chai ju Jesús na tamch ju atalacasunilh ju yuꞌunch.

3 Ju ixpumpuꞌ ju Jesús lana va lamnicꞌa va.

Lana na xnapapa va tachi ju tuꞌuꞌ miqui.

Pus tachi chun ju amakpanin ju ani lacatꞌun jantu lai xamatiꞌ chunch snakꞌankꞌa catinavi.

4 Chai vachuꞌ talacasuch ju Elías chai ju Moisés ju makꞌanchich ixtatꞌajun.

Va ixtatꞌachivinin ju Jesús.

5 Pus ju acsnich ju Pitaluꞌ junilh ju Jesús:

―Quiꞌamamakaꞌunuꞌ na kꞌoxich ni ani vilau.

Acyoyau akꞌatꞌutu pacꞌatsꞌa.

Akꞌatamch ju miꞌanuꞌ.

Akꞌatam ixꞌanuꞌ ju Moisés.

Chai ju akꞌatamch ixꞌanuꞌ ju Elías.

6 Pus ju Pitaluꞌ jantu iscꞌatsai tuchi ixnajun ni na ixtalhanan.

Ixchuxꞌan na ixtatalhanan.

7 Pus lana tamacatalh ju ataputsꞌi.

Aꞌakxtakmakꞌo ju yuꞌunch.

Chai takꞌasmatlh lakatam chivinti ju xaminacha lacaꞌataputsꞌi.

Chai chani ixnajun:

―Ju ani ya yuchi ju quintsꞌalh chai na icmapaini.

Yuchach ju akꞌasmatnitꞌit.

8 Chai lana taꞌalacꞌavanalh para jantu xamatiꞌ talaktsꞌilh.

Va yuchi ju Jesús.

9 Chai acsni ixtatꞌajun takꞌalhtajunin ju anuꞌ lactalhpa pus ju Jesús alaclhimapꞌaksi ju ixpumatꞌutuꞌan ixꞌamamakaꞌui.

Ajuni:

―Tun xamatiꞌ tꞌiꞌunitꞌit ju tuchꞌi xalaktsꞌinatꞌit.

Va acsnich ju lai anonaꞌitꞌit acsni va actaꞌacxtuchokotachilh junta acmacnucanaꞌ ju quitꞌin ju quimalakachatachilh Dios ni lapanac actsucuyaꞌ ju ani.

10 Pus jantu xamatiꞌ tajunilh.

Para ixtalasacmi sia yuꞌunch.

Ixtanajun:

―Tijuch nuꞌ ju nomputun ju yuchi ni va nompalai ni cataꞌacxtuchokoyaꞌ junta camacnucanaꞌ.

11 Pus ju acsnich tasacmilh ju Jesús.

Tajunich:

―Tajuch ni va tanajun ju na talhatalanininta ju quilhamapꞌaksinꞌan ni tasqꞌuini ni pꞌulhnan camilh ju Elías.

Astan ju yuchi ju noncan camalakachatachilh ju Dios.

12 Chai ju Jesús akꞌalhtailh.

Ajuni:

―Slivasalh ni pꞌulhnan caminaꞌ ju Elías.

Chai calakꞌoxikꞌoyaꞌ tachi chun ju taxtokni.

Chai vachuꞌ laꞌixchivinti Dios ju tsꞌokcanta najun tuchi actapasayach ju quitꞌin ju quimalakachatachilh Dios ni lapanac actsucuyaꞌ ju ani.

Ju anch najun ni na lhu acmakꞌalhkꞌajnanaꞌ chai jantu tuꞌuꞌ aclhiulacanaꞌ.

13 Para iclajunau ni quilachilh ju Elías chai ju lapanacni tanavilh chux tachi ju talacasqꞌuilh.

Chai ni chunch ju talalh pus uctaxtulh tachi ju lhitsꞌokcanta ju yuchi.

14 Ju astan ju Jesús atꞌaminchokolh ju ixpumatꞌutuꞌan junta ixtayanalh ju aliꞌin ixꞌalacmamakaꞌui.

Chai alaktsꞌilh ni na lhu lapanacni ixkꞌaixtokcan ixtalakachokoꞌan ju yuꞌunch.

Chai ju lapanacni ju na ixtalhatalanininta ju ixlhamapꞌaksin ju istꞌaꞌisraelitanin ixtatꞌajun tꞌalakꞌainin ju ixꞌamamakaꞌui ju Jesús.

15 Para ju lapanacni acsni talaktsꞌistuclh ju Jesús pus ixchuxꞌan lana na talhamakꞌaninilh.

Taꞌatsꞌalaꞌalh pakxtoknin.

Tamacꞌami.

16 Chai ju Jesús asacmi:

―Tijuch ju laꞌunatꞌit.

17 Pus akꞌalhtayanalh pumatam ju ixmakminta.

Junich:

―Amamakaꞌunuꞌ.

Iclhiminin ju quintsꞌalh.

Va tanun ju lhacaticuru laꞌixlacatuna chai ixlhiyuchi jantu lai chivinin.

18 Chai vanta anchach ju chꞌapai ju lhacaticuru pus tin lhinek.

Akpupuich.

Va latantsꞌacai ju istatsalat.

Pus va tꞌajun xixniꞌ.

Chai icꞌatapaininilh ju miꞌamamakaꞌui ni cataxcoxtulh ju lhacaticuru laꞌixlacatuna para jantu lai tanavi.

19 Chai akꞌalhtayanalh ju Jesús.

Alacjuni:

―Tis va yuchach ji lapanacni ni lana jantu lai lacꞌaꞌiyatꞌit.

Ja tasqꞌuini ni lana na makꞌan aclatꞌatolau tus acsni laich amachꞌakxayaꞌitꞌit.

Ja tasqꞌuini ni lana na makꞌan aclachꞌixniu tus acsni alacꞌaꞌiyaꞌitꞌit.

Aquilalhiminiuch ju anuꞌ tsꞌalh.

20 Pus lhiminicalh ju Jesús chai ju lhacaticuru acsni laktsꞌilh ju Jesús pus lana tin lhineklh ju anuꞌ tsꞌalh.

Tin taꞌaktalh.

Pꞌiliclh pꞌiliclh ucxuntama lacatꞌun.

Akpuputamalhch.

21 Pus ju acsnich ju Jesús sacmi ju ixpai ju anuꞌ takꞌankꞌan.

Junich:

―Ja makꞌanch xaꞌaktaji ju ixtakꞌankꞌat.

Chai ju xapai junilh ju Jesús:

―Tus ixlhitalacatꞌicstꞌin.

22 Chai ju lhacaticuru na paklhu ju macaꞌanta ju lacajipi chai lacxcan ni va makniputun.

Pus ni laich navi tuꞌuꞌ ju uxintꞌi aquilaꞌaktaijuch.

Aquilamapainiuch ju quijnan.

23 Chai ju Jesús junich:

―Ni laich lhilacꞌapꞌin ju Dios pus sich lai canavinikꞌocanaꞌ ju lhilacaꞌan yuchi.

24 Pus ju acsnich ju ixpai ju tsꞌalh lana pꞌas chivinilh acsni chani ju junilh ju Jesús:

―Iclhilacaꞌan ju Dios.

Para ni quincꞌacxni lacatsꞌunin pus aqꞌuiꞌaktꞌaiꞌutꞌich.

25 Pus ju Jesús acsni alaktsꞌilh ju ixtalhavat lapanacni ni ixtalacꞌatsꞌalaminta pus kꞌailh ju lhacaticuru.

Junich:

―Ji lhacaticuru ju jantu lakꞌaꞌi ni cachivinilh nin cakꞌasmatlh ju ani ya tsꞌalh quitꞌin ju icjunan ni atꞌaxtꞌuch laꞌixlacatuna chai jantuch tavanan atꞌanuchꞌokꞌoyaꞌ.

26 Pus ju acsnich ju lhacaticuru tsꞌau tꞌasalh.

Aktam tin lhineklh ju tsꞌalh.

Chai lana taxtulh laꞌixlacatuna.

Pus ju tsꞌalh lhtucu tama tachi ju va xaninch.

Chai aktsꞌiya na lhu lapanacni ixtanajun ni va nitach.

27 Para ju Jesús lana chꞌapanilh ixmacaꞌ ju tsꞌalh.

Saꞌula.

Chai ju yuchi taya.

28 Pus ju acsnich ju Jesús tanucha lacachakaꞌ.

Chai ju ixꞌamamakaꞌui acsni va isꞌakstuꞌan ixtatꞌavilanalh ju Jesús tasacmilh:

―Tajuch ni jantu lai xacxcoxtuyau ju lhacaticuru laꞌixlacatuna ju anuꞌ tsꞌalh.

29 Pus ju Jesús alacjuni:

―Ju lhacaticurulhni tachi ju anuꞌ ixtanun laꞌixlacatuna ju anuꞌ tsꞌalh va acsnich ju catataxtuyaꞌ acsni atꞌapꞌaininiyaꞌitꞌit ju Dios ju ixlacata chai atꞌascꞌaꞌayaꞌitꞌit.

30 Ju Jesús chai ju ixꞌamamakaꞌui acsni tataxtucha ju anch taputapasalh ju xaꞌestado Galilea.

Chai ju Jesús jantu ixlacasqꞌuin ni xamatiꞌ cacꞌatsa ni anch ixvi.

31 Va isꞌakstu ixꞌatꞌatolhputun ju ixꞌalacmamakaꞌui ni ixꞌalacmalaniputun tuꞌuꞌ.

Ixꞌalacjuni:

―Ju quitꞌin acmakꞌaxtakcanach laꞌixmacaꞌan ju lapanacni chai aquintamakniyach.

Quitꞌin ju quimalakachatachilh Dios ni lapanac actsucuyaꞌ ju ani.

Para mas acniyach actaꞌacxtuchokoyaꞌ junta acmacnucanaꞌ ixlhilakatꞌutu avilhchan.

32 Para mas chunch ixꞌajuni ixlaquilhtu jantu lai ixtamachakxai ju yuꞌunch tuchi ixꞌajumputun.

Chai na ixtatalhoni.

Jantu istasacmiputun.

33 Pus ju Jesús chai ju ixꞌalacmamakaꞌui tachaꞌalh ju lakꞌachakꞌan Capernaum.

Chai acsni ixtavilanalh lacachakaꞌ pus ju Jesús alacsacmi ju ixꞌamamakaꞌui.

Ajunich:

―Tijuch ju ixlacqꞌuilhuntꞌonatꞌit ju uxijnan acsni xaminauch ju lacati.

34 Pus ju yuꞌunch va sek tatavi ni vasalh va ixtalaklakꞌaiminta ju lacati tichi chavaich ju palai xakꞌai.

35 Pus ju Jesús tavi chai alactꞌasanilh ixpumacautꞌuiꞌan.

Alacjuni:

―Ni alin pumatam ju jumputun xakꞌai tasqꞌuini ni yuchi ju palai salacatꞌicstꞌi catalacasu tachi chun.

Chai caꞌalacchꞌalhcatnanilh tachi chun ju aliꞌin.

36 Chai ju Jesús macchꞌapaxakꞌatailh pumatam askꞌatꞌa.

Yaulh laꞌixlacaitat ju ixlacmamakaꞌui.

Astan chꞌixlh ju askꞌatꞌa chai chani alacjunich ju yuꞌunch:

37 ―Ju caꞌamaklhtayananaꞌ tam quilapanac ju jantu tuꞌuꞌ lhitꞌakꞌayai tachi ju lai ju ani vi askꞌatꞌa pus tachi ju va jun quitꞌin ju quiꞌamaklhtayanan.

Chai ju quiꞌamaklhtayanan ju quitꞌin pus jantu quiꞌakstu ju quiꞌamaklhtayanan.

Para tachi ju va jun amaklhtayanan vachuꞌ ju Dios ju quimacaminta.

38 Ju acsnich ju Xivan chani junilh ju Jesús:

―Quiꞌamamakaꞌunuꞌ iclaktsꞌiuch pumatam ju lamintapakaꞌut ixꞌalacxcoxtui ju lhacaticuru laꞌixlacatunaꞌan ju lapanacni.

Para ickꞌajiuch ni jantu lhiquijnanꞌan.

39 Para ju Jesús junich:

―Jantu ixkꞌaꞌitꞌit ni jantu quintꞌalaxcaiꞌan junita ju yuchi.

Pus ju lai navi ju kꞌai lhamakꞌan laquintapakaꞌut pus quiꞌamigoch junita.

Chai ju yuchi jantu lai astan macxcai aquilhichivinaꞌ.

40 Ju jantu quintꞌalaxcaichꞌan pus quijnanchꞌan.

41 Slivasalh ju iclajunau.

Va tichi chavaich ju cataxtakniyan mas va tam vaso ju xcan va ixlacaꞌatalh ni quilapanacni untꞌatꞌit pus Dios ju camapalhniyaꞌ.

Ju Jesús tailhiꞌalh ju ixchivinti chai chani naulh:

42 ―Va tichi chavaich ju camakꞌalhkꞌosuyaꞌ tam xamatiꞌ ju jantucaꞌ kꞌox quilhilacaꞌanta quitꞌin pus palai kꞌox caꞌixva ni caꞌixpixtuchꞌimucꞌacalh ju xvati chai caꞌixmacaꞌancalh lacaꞌalama acsni tucaꞌ ixmakꞌalhkꞌosui tam xamatiꞌ.

43 Pus ni pꞌuꞌalactꞌuꞌununatꞌit ju mimacaꞌan pus jantu anavitꞌit.

Alai alatꞌit tachi ju va chꞌakxpꞌuxcantach ju mimacaꞌan.

Palai kꞌox cava ni atꞌanuyaꞌitꞌit ju lactꞌiyan mas va lakatamch ju mimacaꞌan.

Palai jantu kꞌox cava ni apꞌacxantꞌit chux lakatꞌui ju mimacaꞌan para va apꞌumacꞌapꞌincꞌantꞌit ju lacajipi junta jantu tavanan mixta.

44 Junta alin ju tsapu ju jantu tavanan ni chai junta alin ju jipi ju jantu tavanan mixa.

45 Pus ni pꞌimpꞌutꞌunatꞌit junta akꞌalhkꞌosaꞌitꞌit pus jantu apꞌitꞌit ju anch.

Alai alatꞌit tachi ju va chꞌakxpꞌuxcantach ju minchꞌajaꞌan.

Pus palai kꞌox cava ni atꞌanuyaꞌitꞌit ju lactꞌiyan mas va lakatamch ju minchꞌajaꞌan.

Palai jantu kꞌox cava ni apꞌacxantꞌit chux lakatꞌui ju minchꞌajaꞌan para va apꞌumacꞌapꞌincꞌantꞌit ju lacajipi junta jantu tavanan mixta.

46 Junta alin ju tsapu ju jantu tavanan ni.

Chai junta alin ju jipi ju jantu tavanan mixa.

47 Chai ni yuchi ju laktsꞌimpꞌutꞌunatꞌit ju tamalactuꞌuniyan pus jantu alaktsꞌintꞌit.

Alai alatꞌit tachi ju va maxtꞌutꞌatꞌit chai makꞌantꞌatꞌit ju milakchulhꞌan.

Pus palai kꞌox cava ni atꞌanuyaꞌitꞌit junta lhinajun ju Dios.

Palai jantu kꞌox ni apꞌacxantꞌit chux lakatꞌui ju milakchulhꞌan para va apꞌumacꞌapꞌincꞌantꞌit ju lacajipi junta jantu tavanan mixta.

48 Junta alin ju tsapu ju jantu tavanan ni.

Chai junta alin ju jipi ju jantu tavanan mixa.

49 Ju tuꞌuꞌ jipi lhcukꞌojui ju amacxtalh.

Chai ni acmucꞌalh ju matsat lacatuꞌuꞌ lhivai pus jantu catitakꞌalhi.

Pus vana va chun lamiꞌatsucuntiꞌan.

Acsni makꞌalhkꞌajnanatꞌit pus palai macꞌonatꞌit ju amacxcai ju alin lamiꞌatsucuntiꞌan chai palai tꞌailhipꞌinatꞌit ju kꞌox ju aktsꞌiya naviyatꞌit.

50 Na kꞌox ju matsat.

Para ni jantu skꞌokꞌo cava pus jantu lhitapalai.

Pus vana va chun ju uxijnan.

Lhitapalai ju miꞌatsucuntiꞌan acsni vasalh tasui ni quilalhilaksiyau.

Chai vachuꞌ iclajunau ni jantu atꞌalasatꞌit ju uxijnan.