Ju Jesús amava lakatꞌatꞌi milh jokꞌatni
8
Ju acsnich na lhu ixtatakꞌaixtokta ju lapanacni.
Chai matiꞌ ixjunita tuchi cataꞌulh.
Pus ju Jesús alactꞌasanilh ju ixꞌalacmamakaꞌui chai alacjuni:
Marcos 8:1-21
2 ―Painiꞌitnich ju ani tayanalh lapanacni ni lakatꞌutu avilhchan xaquintatꞌatolan chai ju chavai matiꞌ tuchi cataꞌulh.
3 Ni aclacmalakachachokolh laꞌixlacchakaꞌan nin tucaꞌ tavajin jantu xcai ni catataꞌaktalh ju lacati ixchavanꞌan.
Ju aliꞌin na makat tamintacha.
4 Pus ju ixꞌalacmamakaꞌui takꞌalhtailh ju Jesús.
Tajuni:
―Para tas anchach ju lai camalhilaniyau tachi tantsꞌun ju lapanacni ju ani junta jantu xamatiꞌ tꞌajun.
5 Chai ju Jesús asacmipa:
―Tas akxchux vati ju chꞌapꞌatꞌatꞌit.
Chai ju yuꞌunch tajunilh ni akxtujun.
6 Pus ju Jesús alacjuni ju ixtalhavat lapanacni ni catatavi lacaꞌatsꞌinan.
Chai ju yuchi chꞌapalh ju akxtujun vati.
Pꞌulhnan xtaknilh lhakꞌailaktsꞌinti ju Dios chai astan chꞌekꞌelh ju vati.
Xtaknilh ju ixꞌalacmamakaꞌui.
Chai ju yuꞌunch taꞌalhilaktsakꞌo ju ixtalhavat.
7 Vachuꞌ ixtachꞌapata lacatsꞌunin pamata.
Pus ju Jesús xtaknilh lhakꞌailaktsꞌinti ju Dios chai ajunich ju ixꞌamamakaꞌui ni cataꞌaxtaknilh vachuꞌ ju ixtalhavat lapanacni.
8 Pus taxtaknilh.
Taꞌulh chai talhilalhch.
Chai astan ju ixꞌamamakaꞌui ju Jesús tasacchokolh ju tamaxajnicha.
Talaktsama lakatujun tankꞌalin.
9 Pus ju lapanacni ju tavailh ixchaꞌanta lakatꞌatꞌi milh jokꞌatni.
Pus ju Jesús alacmacꞌami.
10 Chai lana alactꞌatajuchokolh lacabarco ju ixꞌalacmamakaꞌui.
Taꞌalh ju xalacatꞌun Dalmanuta.
Ju fariseonin tatapaini ju Jesús ni canavi lakatam lhamakꞌan
11 Pus ju acsnich talakmilh ju Jesús ju fariseonin.
Tatsuculh tꞌalakꞌainin ju yuchi.
Pꞌas istasqꞌuini ni canavilh ju tuꞌuꞌ ju catapucꞌatsayaꞌ ni vasalh yuchi ju ixnoncan camalakachatachilh ju Dios.
Para va ixtalaktsꞌintanuputun.
12 Pus ju Jesús amakꞌaninilh chai alacjuni:
―Ju uxijnan ju chavai tꞌonatꞌit tajuch ni va quilamakpuxcoyau tuchi laich icnavi ni nonatꞌit ni chunch laich apꞌucꞌatsꞌayaꞌitꞌit ni vasalh icCristo.
Slivasalh ju iclajunau.
Jantu tuꞌuꞌ amasunicꞌanaꞌitꞌit ju uxijnan ju chavai tꞌonatꞌit.
13 Chai ju acsnich ju Jesús lana alacmacoyaulh ju fariseonin.
Tajuchokolh lacabarco.
Anchokolh makꞌantacutni ju atantsꞌin.
Ixlevaduraꞌan ju fariseonin
14 Pus ju ixꞌamamakaꞌui ju Jesús ixtacaptach ixlhiꞌanca ju tuꞌuꞌ xkapavati.
Lacanix va lakatam xkapavati ixlhiꞌanta pumatam lacabarco.
15 Pus ju Jesús alacjuni:
―Alaccꞌatsꞌanantꞌit ixlacata ixlevaduraꞌan ju fariseonin chai ju ixlevadura ju Herodes.
16 Chai ju ixꞌalacmamakaꞌui ju Jesús talaclajunich sia yuꞌunch:
―Ni jantu iclhimintau tuꞌuꞌ xkapavati ca yuchi quintalhijunan chunch.
17 Pus ju Jesús lana cꞌatsa tuchi ixtalaclajuni sia yuꞌunch.
Chai alacjuni:
―Tajuch ni va lhamakꞌanininatꞌit ni jantu lhitꞌantꞌatꞌit tuꞌuꞌ xkapavati.
Ja va jantucaꞌ machꞌakxayatꞌit ju uxijnan tuchi ju nomputun ju lhamakꞌan ju icnavita.
Ja lana na va oktanpꞌas untꞌatꞌit.
18 Alinch ju milakchulhꞌan.
Ja va jantu laktsꞌinatꞌit tuꞌuꞌ.
Alin ju miꞌakꞌaxkꞌolhꞌan.
Ja jantu lai pꞌakꞌasmatnanatꞌit.
Ja jantu lai pꞌastꞌacꞌatꞌit tuꞌuꞌ.
19 Ja lana jantu pꞌastꞌacꞌatꞌit acsni tavanan icchꞌekꞌelh akxquis vati chai talhilakꞌo lakaquis milh jokꞌatni.
Apꞌastꞌactꞌit.
Tas lakachux tankꞌalin ju xalaktsꞌamayatꞌit ju xasacchꞌokꞌoyatꞌit ju vati.
―Chai acsni icchꞌekꞌelh ju akxtujun vati chai tavailh lakatꞌatꞌi milh lapanacni tas lakachux tankꞌalin ju xalaktsꞌamayatꞌit ju xasacchꞌokꞌoyatꞌit ju xajcha.
―Ja ixlaquilhtu jantu lai machꞌakxayatꞌit.
Ju Jesús palai navi pumatam alakꞌachꞌix
22 Ju astan ju Jesús chai ixꞌamamakaꞌui tamilh ju lakꞌachakꞌan Betsaida.
Chai ju lapanacni talhiminilh ju yuchi pumatam alakꞌachꞌix.
Chai tatapaininilh ni calaktsꞌilh.
Marcos 8:22-38
23 Pus ju Jesús lana makchꞌapalh ju anuꞌ alakꞌachꞌix.
Maxtulh ju takꞌankꞌan.
Lhiꞌalh tus lacamacni.
Chai lakpuchujva laꞌixlakchulh.
Chai mokslanilh ixmacaꞌ laꞌixꞌucxni ixlakchulh chai sacmi:
―Ja laich alacꞌavanan lacatsꞌunin.
24 Chai ju anuꞌ alakꞌachꞌix ixjunita ni alacꞌavanalh naulh:
―Pus ju lapanacni icꞌalaktsꞌin ni taꞌalhtanan.
Para jantu kꞌox icꞌalaktsꞌin.
Tachi ju va qꞌuiu icꞌalaktsꞌin.
25 Pus ju Jesús lana mokslanichokolh ixmacaꞌ laꞌixꞌucxni ixlakchulh ju anuꞌ alakꞌachꞌix chai ju yuchi alacꞌavananchokolh.
Pus takꞌoxinikꞌo ixlakchulh.
Kꞌox alacꞌavanalh.
26 Pus ju acsnich ju Jesús malakachachokolh laꞌixchakaꞌ ju va lacamacni ixyacha.
Chai juni:
―Tun tꞌitꞌanutꞌicaꞌ ju lakꞌachakꞌan.
Chai tun tꞌiꞌaꞌun tuꞌuꞌ ju amachakꞌan anch.
Ju Pitaluꞌ naulh ni yuchi ju Cristo ju Jesús
27 Astan ju Jesús alactꞌataxtulh ju ixꞌalacmamakaꞌui.
Va ixtaꞌamputun ju lakꞌachakꞌanixni ju ixtalhilacaꞌanita ju lakꞌachakꞌan Cesarea Filipo.
Chai ju lacati ju Jesús asacmilh ju ixꞌalacmamakaꞌui.
Alacjuni:
―Tis chavaich ju quintalhiulai ju quitꞌin ju lapanacni.
28 Pus ju yuꞌunch takꞌalhtayanalh.
Tajuni:
―Pus ju aliꞌin lapanacni tanajun ni ma uxintꞌich ju Xivanꞌat ju ixꞌamakpaxanan.
Ju aliꞌin tanajun ni ma Elíasꞌat.
Ju aliꞌin tanajun ni ma uxintꞌich pumatam makꞌaniya lapanac ju ixnajun ixchivinti Dios.
29 Pus ju acsnich ju Jesús alacsacmipa ju yuꞌunch.
Ajuni:
―Para ju uxijnan tis chavaich ju quilalhiulayau ju quitꞌin.
Chai akꞌalhtayanalh ju Pitaluꞌ.
Juni:
―Uxintꞌi ju Cristoꞌat ju ixnoncan camalakachatachilh ju Dios.
30 Pus ju Jesús lana alaclhimapꞌaksi ni jantu xamatiꞌ catamacꞌatsani tichi chavaich ju yuchi.
Ju Jesús alacjuni ju ixꞌamamakaꞌui ni camaknicanaꞌ
31 Ju acsnich ju Jesús tsuculh alacmalaniniꞌ ju ixꞌalacmamakaꞌui.
Ajuni:
―Aktsꞌiya tasqꞌuini ni na lhu acmakꞌalhkꞌajnanaꞌ ju quitꞌin ju quimalakachatachilh Dios ni lapanac actsucuyaꞌ ju ani.
Chai ju xalackꞌajin lapanacni chai ju xalackꞌajin palijni chai ju na talhatalanininta ju milhamapꞌaksinꞌan jantu tuꞌuꞌ aquintalhiulayaꞌ.
Chai aquintamakniyaꞌ.
Para actaꞌacxtuchokoyaꞌ junta acmacnucanaꞌ ixlhilakatꞌutu avilhchan.
32 Ju Jesús lana vas ajuni ju ani chivinti.
Chai ju acsnich ju Pitaluꞌ lhiꞌalh alacatam ju Jesús chai tsuculh amapꞌaksiniꞌ.
33 Para ju Jesús talakaspꞌitlh.
Alaktsꞌilh ju aliꞌin ixꞌalacmamakaꞌui.
Chai kꞌailh ju Pitaluꞌ.
Junich:
―Akꞌostꞌi ju laquiꞌucxlacapuꞌ ji Satanás.
Ju uxintꞌi jantu alacpꞌastꞌacnan tachi ju alacpastacnan ju Dios.
Ju uxintꞌi va alacpꞌastꞌacnan tachi ju taꞌalacpastacnan ju lapanacni.
34 Ju acsnich ju Jesús alactꞌasanikꞌo ju ixꞌalacmamakaꞌui chai chux ju lapanacni.
Alacjuni:
―Va tichi chavaich ju aquinchꞌakꞌokꞌaputulh ju quitꞌin pus jantu lai catinavi ixkꞌachat isꞌakstu.
Chai cachꞌixaꞌ ju ixmakꞌalhkꞌajnat ju caꞌalinaꞌ va ixlacaꞌatalh ni quinchꞌakꞌokꞌai ju quitꞌin.
Chai aquinchꞌakꞌokꞌakꞌalhi.
35 Pus va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai maknicalh pus camakꞌatsꞌankꞌayaꞌ ju isꞌatsucunti ju caꞌixꞌalilh ju lactꞌiyan.
Para va tichi chavaich ju camakꞌatsꞌankꞌayaꞌ ju isꞌatsucunti va ixlacaꞌatalh ni quinchꞌakꞌokꞌai ju quitꞌin chai va ixlacata ni lacaꞌita ju chivinti ju najun ta yu lai takꞌalhtaxtucan pus caꞌalinaꞌ isꞌatsucunti ju lactꞌiyan.
36 Pus jantu tuꞌuꞌ lhajai tam lapanac mas calhajakꞌo chux ju xataxtokni ju alin ju ani lacamunutpaꞌ ni va calhimakꞌatsꞌankꞌa ju isꞌatsucunti ju caꞌixꞌalilh ju lactꞌiyan.
37 Chai ni va chunch ju calalh pus jantu laich catiꞌalh ju anch mas camapalalh lacatumin.
38 Ju lapanacni ju tatꞌajun ju chavai na tamacajunta ju Dios chai na taꞌalactuꞌunun.
Pus ni xamatiꞌ aquintꞌamaxanalh chai catꞌamaxanalh ju quinchivinti laꞌixꞌucxlacapuꞌan ju yuꞌunch pus vachuꞌ actꞌamaxananaꞌ ju yuchi acsni acminchokoyaꞌ laꞌixtachaput ju quimpai acsni acꞌalactꞌaminaꞌ ju ixꞌanquilhnin.