Alin ju taxtokni ju malhquiliqui ju lapanacni
7
Lakatam avilhchan ju fariseonin chai ju aliꞌin ju na ixtalhatalanininta ixlhamapꞌaksinꞌan ju istꞌaꞌisraelitanin ju ixtamintacha ju Jerusalén tatakꞌaixtoklh junta ixvi ju Jesús.
Marcos 7:1-23
2 Chai ju yuꞌunch talaktsꞌilh ju aliꞌin ixꞌamamakaꞌui ju Jesús ni jantu chun ixtamakchꞌakꞌai acsni ixtavajin tachi ju ixtalhilanita ju istꞌaꞌisraelitanin.
Pus ixlhiyuchach tanaulh ni jantu kꞌox tachi ju ixtalai ju ixꞌamamakaꞌui ju Jesús.
3 Pus ju fariseonin chai ixchuxꞌan ju aliꞌin israelitanin jantu ixtavajin ni jantu pꞌulhnan na paklhu catamakchꞌakꞌa.
Pus chunch ixjunita ju iscostumbreꞌan ju ixꞌamacontilanita ju makꞌaniya ixlacpaꞌitniꞌan.
4 Chai acsni ixtataspꞌittacha ju laclhitamau pus jantu catavenaꞌ ni jantu catapaxaꞌ pꞌulhnan tachi ju ixtalhilanita.
Chai na lhu aliꞌ costumbre ju ixtanavi tachi ju ixtanavi ju makꞌaniya ixlacpaꞌitniꞌan.
Tachi acsni talakꞌataxtꞌumakꞌan chai na paklhu ju talakchꞌakꞌai ju vaso chai ju xalu chai ju tsasnat xalu tachi ju aktsꞌiya ixtalhilanita.
5 Pus ju fariseonin chai ju ixtalhatalanininta ju lhamapꞌaksin tasacmilh ju Jesús.
Tajunich:
―Ju mintamamakaꞌun tajuch ni jantu tanavi tachi ju aktsꞌiya iclhilanitauch ju quijnan.
Ju yuꞌunch ni lai tavajin mas jantu tamakchꞌakꞌata tachi ju iclhilanitauch ju quijnan.
6 Pus ju Jesús alacmapuspitnilh ju chivinti chai alacjuni:
―Ju uxijnan na acxpꞌutꞌiyununatꞌit.
Slivasalh uctaxtulh tachi ju naulh ju makꞌaniya lapanac ju Isaías ixjuncan.
Ju yuchi naulh ni caꞌalinaꞌ ju lapanacni ju chunch catalayaꞌ tachi ju layatꞌit ju uxijnan.
Ju yuchi tsꞌokꞌula ni ma chani naulh ju Dios:
Ma yuchi ju Dios.
Para ju ani lapanacni ma va laꞌixquilhniꞌan ju tapunajun ni xakꞌai ju yuchi.
Para ju laꞌixꞌalhunutꞌan ma lana jantu tuꞌuꞌ talhiulai.
7 Ma jantu tuꞌuꞌ nomputun ni tanajun ni yuchi ju xakꞌai ju Dios.
Ju yuꞌunch ma taꞌamalaninin ju tuꞌuꞌ tachi ju vasalh ixlhamapꞌaksin Dios mas va ixlhamapꞌaksin ixtꞌalapanacꞌan.
Ju Isaías naulh ni ma chunch ju naulh ju Dios.
8 Chai ju quitꞌin iclajunauch ni vasalh chunch ju layatꞌit tachi ixnajun ju Isaías ni vachuꞌ macꞌaꞌuntꞌit ju uxijnan ju ixlhamapꞌaksin Dios.
Va yuchi ju lacꞌaꞌiyatꞌit ixlhamapꞌaksinꞌan ju mintꞌalapanacniꞌan.
Tachi acsni lakꞌatꞌaxtꞌumakꞌanatꞌit chai na paklhu ju chꞌakꞌayatꞌit ju tuꞌuꞌ xalu chai ju tuꞌuꞌ vaso.
Chai vachuꞌ alin palai lhu taxtokni va ixtꞌachun ju naviyatꞌit.
9 Chai ju Jesús ixꞌalacjuni vachuꞌ:
―Ju uxijnan samakꞌantꞌatꞌit ju ixlhamapꞌaksin Dios va ixlacaꞌatalh ni navipꞌutꞌunatꞌit ju miꞌatalanintiꞌan miꞌakstuꞌan.
10 Pus ju makꞌaniya lapanac ju Moisés ixjuncan chani naulh:
“Atꞌalhonin ju mimpai chai ju minatich.
Chai amakniyaꞌitꞌit va tichi chavaich ju va taxtokni cajunilh ju tam ixpai u tam ixnati”.
11 Pus mas chunch ju nonatꞌit para lakꞌaꞌiyatꞌit ni chani cajunilh ju ixpai u ixnati ju tam lapanac:
“Ju quitꞌin jantu lai actilaꞌaktaiju va ixlacaꞌatalh ni iclhikꞌailaktsꞌilh Dios ju anuꞌ tumin ju xaclapuꞌaktaiju”.
12 Chai ju uxijnan nonatꞌit ni ma jantu tasqꞌuini ni caꞌaktaiju ju ixpai u ixnati ni va chunch ju canaulh tam lapanac.
13 Para ni chunch ju layatꞌit pus va samakꞌanatꞌit ixchivinti Dios ni va navipꞌutꞌunatꞌit ju makꞌaniya miꞌatalanintiꞌan miꞌakstuꞌan.
Chai palai lhu taxtokni ju naviyatꞌit ju va ixtꞌachunch.
Chai vachuꞌ chun ju lacmasuniyatꞌit ju miꞌaskꞌatꞌanꞌan.
―Chunch ju alacjuni ju lapanacni ju Jesús.
14 Chai aktam ju Jesús alactꞌasanilh ju ixtalhavat lapanacni chai alacjuni:
―Aquilakꞌasmatniuch minchuxꞌan chai amachꞌakxatꞌit ju tuchi aclajunau.
15 Jantiyuꞌ ju ui tam lapanac ju lai malhquiliquini isꞌatsucunti.
Alai yuchi ju chivinti ju taxtui laꞌixꞌalhunut.
Yuchi ju malhquiliquini isꞌatsucunti tam lapanac.
16 Ju uxijnan ju alin ju mimpakꞌasmatniꞌan pus akꞌasmatꞌit.
17 Pus ju acsnich ju Jesús taxtulh lacatalhavat.
Alhtanalh.
Chai acsni tanucha ju lacachakaꞌ pus ju ixꞌalacmamakaꞌui tasacmi tuchi ixnomputun ju anuꞌ chivinti ju ixꞌajunita ju lapanacni.
18 Chai ju Jesús alacjuni:
―Ja vachuꞌ jantu lai amachꞌakxananatꞌit ju uxijnan.
Ja va jantu machꞌakxayatꞌit ni jantu lai malhquiliquini isꞌatsucunti tam lapanac ju tuchi ui.
19 Ju tuchi ui jantu tanun laꞌixꞌalhunut ju tam lapanac.
Alai va laꞌixpajan ju tajui chai astan va makꞌancanch.
―Tachi chun ju macxcai chivinti ju quilhtaxtui tam lapanac yuchi ju malhquiliquini ju isꞌatsucunti.
21 Pus laꞌixꞌalhunutꞌan ju lapanacni minacha ju jantu kꞌox atalacpastꞌacꞌat.
Chai ixpuxcajuca apumatam chakoꞌulh u apumatam jokꞌat.
Vachuꞌ lacaꞌalhunut minacha ju ixkꞌachanica ni va lacati tsucucan.
Chai ju amakninti.
22 Chai ju akꞌalhaꞌunti.
Chai ju ixmakkꞌachanica ju jantu ixꞌanuꞌ.
Chai ixnavicach tachi chun ju aliꞌ alactuꞌuntich.
Chai ju aꞌokxchokꞌonti.
Chai acsni matiꞌ ju maxanti.
Chai ju alhacchaꞌanti.
Chai ixnajunca ju macxcai ixlacata apumatam.
Chai ju alhitakꞌayanti.
Chai ixkꞌachanica ju va lhilakachaput.
23 Pus tachi chun ju ani alactuꞌunti pulacni ixꞌalhunut ju lapanac ju minacha.
Chai yuchach ju malhquiliquini isꞌatsucunti.
Pumatam chakoꞌulh lhilaksilh ju Jesús
24 Ju Jesús taxtulh ju anuꞌ lakꞌachakꞌan chai chaꞌalh ju xalacatꞌun junta ixꞌalin ju lakꞌachakꞌanixni Tiro chai Sidón.
Chai ju Jesús anch ixtꞌajun laꞌixchakaꞌ pumatam amachakꞌan anch.
Para jantu ixlacasqꞌuin ni xamatiꞌ cacꞌatsa.
Para jantu lai tatankꞌanu.
Marcos 7:24-37
25 Pus pumatam chakoꞌulh ixꞌalin istsiꞌ ju ixtanun ju lhacaticuru laꞌixlacatuna.
Chai acsni kꞌalhakꞌasmatlh ni ixvi ju Jesús pus lana lakmilh.
Taꞌaktsokotanilh vanin laꞌixchꞌajaꞌ.
26 Pus ju anuꞌ chakoꞌulh ixchivinin ju lhigriego chai amachakaꞌ Sirofenicia ixjunita.
Pus ju yuchi tapaininilh ju Jesús ni caxcoxtunilh ju lhacaticuru laꞌixlacatuna ju istsiꞌ.
27 Para ju Jesús chani juni:
―Chach pꞌulhnan actiꞌaktaiju ju quintꞌaꞌamachivinti.
Ni jantu chun aclalh pus ixtꞌachunch cava tachi ju va acꞌaquictaiꞌinilh ixniꞌan ju askꞌatꞌan chai acxtaknilh ju scꞌuyun.
28 Para ju anuꞌ chakoꞌulh akꞌalhtayanalh.
Junich:
―Vasalh ji quiꞌucxtin.
Para mas yuꞌunch ju scꞌuyun ju tavilanalh ixtankꞌapuꞌ mixa talacsacꞌui ju xataquicpuchin ju talacamacajun ju askꞌatꞌan.
29 Pus ju acsnich ju Jesús junich:
―Slivasalh na kꞌox xaquinkꞌalhtꞌaꞌi.
Pus apꞌinchꞌokꞌochitꞌich ju laminchakaꞌ.
Ju lhacaticuru taxtuta laꞌixlacatuna ju mintsiꞌ.
30 Pus ju chakoꞌulh alh.
Chai acsni chaꞌalh laꞌixchakaꞌ pus laktsꞌilh ju istsiꞌ ni ixtaxtutach ju lhacaticuru laꞌixlacatuna chai va ixmalhch laꞌixputaman.
Ju Jesús palai navi pumatam ju jantu lai kꞌox ixchivinin chai kꞌatapa
31 Ju Jesús taxtuchokocha junta ixvi vanin ju lakꞌachakꞌan Tiro.
Pumilh ju lakꞌachakꞌan Sidón chai ju lacatꞌun junta ixꞌalin lakacau lakꞌachakꞌanixni.
Chaꞌalh tus ju xaꞌatantsꞌin Galilea.
32 Pus lhiminicalh ju Jesús pumatam lapanac ju kꞌatapa ixjunita chai ju jantu lai kꞌox ixchivinin.
Chai ju lapanacni tatapaininilh ju Jesús ni camamanilh ixmacaꞌ laꞌixlacatuna ju anuꞌ takꞌankꞌan ni palaich cajunaꞌ.
33 Pus ju Jesús malakxtinu ju takꞌankꞌan.
Lhiꞌalh alacatam.
Chai manunilh ixmacaꞌ laꞌixꞌakꞌaxkꞌolh.
Quicchujva.
Tsamalh ju isimakꞌat ju anuꞌ takꞌankꞌan.
34 Chai ju Jesús talakstꞌalh ju lactꞌiyan.
Amakꞌaninilh.
Chai junilh ju takꞌankꞌan:
―Epata.
Ju chunch va nomputun:
Akꞌasmatꞌich.
35 Pus lana laich akꞌasmatnalh.
Chai na kꞌoxich ixchivinin.
36 Pus ju Jesús alaclhimapꞌaksilh ju lapanacni ni jantu xamatiꞌ catamacꞌatsani tuchi ixnavita.
Para mas va ta pakchux ixꞌajuni ju lapanacni va xaꞌapalaich ixtanajun tuchi ixnavich.
37 Slivasalh ixtalhamakꞌaninin.
Ixtanajun:
―Tachi chun si kꞌox ju navikꞌojui.
Ju kꞌatapa lai lakꞌoxini ixꞌakꞌaxkꞌolh.
Chai laich makꞌasmatꞌai.
Chai ju jantu lai tachivinin lai machivini kꞌox.