2 Chai acsni chaꞌalh ju avilhchan paꞌastacni pus ju Jesús alh laꞌixpujitatꞌan ju istꞌaꞌisraelitanin chai tsuculh amalaninin.

Pus na lhu ju takꞌasmatlh na talhamakꞌaninilh ixꞌatalaninti.

Ixtalaclajuni:

―Tas anchach nuꞌ ju xalani ju ani chivinti ju ani ya lapanac.

Tis atalaninti ju najun ju yuchi.

Chai tas lai lhinavipalai ju kꞌai lhamakꞌan.

3 Ni yuchi jumpalata ju axpitniꞌ.

Istsꞌalh ju Malia.

Ixlakꞌau ju Jacobo chai ju José chai ju Judas chai ju Simón.

Chai vachuꞌ ani tatꞌajun ju ixꞌapꞌisekꞌench atsiꞌin.

Pus na taxcailich ju Jesús.

4 Para ju Jesús alacjuni:

―Ju lapanac ju najun ixchivinti Dios aktsꞌiya tuꞌuꞌ lhiulacan vanta anchach ju an.

Va ixtꞌaꞌamachakꞌan chai ju ixtꞌaꞌamachivinti chai ixlhiꞌalakꞌavin ju jantu tuꞌuꞌ talhiulai.

5 Pus ju Jesús jantu lai tuꞌuꞌ xanavi kꞌai lhamakꞌan ju anch laꞌixtꞌun.

Va yuchi ni mama ixmacaꞌ laꞌixlacatunaꞌan ju takꞌankꞌanin chai acꞌuchꞌu.

Para jantu ilhuꞌan.

6 Pus ju Jesús na ixꞌalaklhamakꞌaninin ju lapanacni ni jantu ixtalhilaksi ju yuchi.

Pus astan ixꞌucxuꞌan lakꞌachakꞌanixni ju vanin ixlacvi.

Ixꞌamasuni ju lapanacni ixchivinti Dios.

7 Pus alactꞌasanilh ju ixpumacautꞌuiꞌan chai tsuculh alaclhcaꞌulanaꞌ pumatꞌiyun.

Alacmalakacha ni cataꞌalh nonin ju ixchivinti Dios.

Chai axtaknilh ixtachaputꞌan ni laich cataxcomakꞌalh ju lhacaticurulhni laꞌixlacatunaꞌan ju lapanacni.

8 Chai alacjuni ni jantu tuꞌuꞌ catalhiꞌalh ju ixlacata ju lacati.

Va yuchi ixpalicꞌan.

Jantu catalhiꞌalh ispastiꞌan nin ixniꞌan nin ixtuminꞌan.

9 Catachꞌantanu ju ixchꞌanxtꞌakꞌanꞌan para jantu kꞌalhtꞌui catalhiꞌalh ju ixpumpuꞌan.

10 Alacjuni:

―Ni xamatiꞌ catajunan ni lai alakꞌacꞌujtꞌit chai lai avenatꞌit laꞌixchakaꞌ pus anchach ju atꞌolhtꞌachitꞌit tus acsni atꞌaxtꞌuchꞌokꞌoyaꞌitꞌit ju anuꞌ lakꞌachakꞌan.

11 Para tachi chun ju jantu kꞌox cataꞌamaklhtayananan nin yuchi ni catakꞌasmatniputunan ju minchivintiꞌan pus acsni atꞌaxtꞌuyaꞌitꞌit ju anuꞌ lakꞌachakꞌan achꞌancꞌalhapꞌuxcꞌantꞌit ju pokxni laminchꞌanxtꞌakꞌan.

Ju chunch catapucꞌatsayaꞌ ni talakꞌalhin ju tanavita.

Slivasalh ju iclajunau.

Ju anuꞌ avilhchan acsni caꞌamakꞌosaspitcanaꞌ ju lapanacni palai macxcai catamakꞌalhkꞌajnanaꞌ ju anuꞌ amachakꞌan ju jantu catakꞌasmatꞌaꞌ ju minchivintiꞌan.

Palai jantu ju amachakꞌanixni ju makꞌaniya lakꞌachakꞌanixni Sodoma chai Gomorra.

―Chunch ju ajuni ju ixpumacautꞌuiꞌan ju Jesús.

12 Pus ju yuꞌunch tataxtucha chai ajuni ju lapanacni ni catamacaulh ixꞌalactuꞌuntiꞌan.

13 Vachuꞌ ixtaxcoxtui lhu ju lhacaticurulhni laꞌixlacatunaꞌan ju lapanacni.

Chai ixtalacamucꞌai ju aceite lhu ju takꞌankꞌanin chai palaich ixtajun.

14 Pus ju gobernador Herodes kꞌasmatlh tuchi ixnavi ju Jesús ni vanta anchach ispastaccanta.

Chai naulh:

―Ju anuꞌ ju Jesús tajuni ca yuchi ju Xivan ju amakpaxanaꞌ.

Ca va taꞌacxtuchokolh laꞌixꞌaninti.

Yuchi kꞌai lhamakꞌan lhinavi.

15 Para ju aliꞌin lapanacni ixtanajun:

―Jantiyuꞌ.

Alai ca yuchi ju Elías ju caminaꞌ acsni tucaꞌ min ju najunta Dios ni camalakachatachilh.

Chai ju aliꞌin ixtanajun:

―Jantiyuꞌ.

Alai ca yuchi ju lapanac ju najun ixchivinti Dios tachi ju ixtalai ju makꞌaniya lapanacni.

16 Para ju gobernador Herodes acsni kꞌasmatlh tuchi ixnavi ju Jesús naulh:

―Ju ani yuchi ju Xivan ju iclhinaulh ixꞌacchꞌucꞌuca.

Ca va taꞌacxtuchokolh junta ixmacnucanta.

17 Pus acsni tucaꞌ ixmaknicanta ju Xivan pus ju Herodes ixlhinajunta ixchꞌapꞌaca ju yuchi.

Chai lhinaulh ixmakchꞌica acsni tꞌalhnucalh.

Chunch ju navilh ju gobernador ni ixnaviniputun ixkꞌachat ju Herodías.

Pus ju Herodías ixꞌamachakaꞌ ixjunita ju Pilipe.

Ispꞌisekꞌe ju Herodes.

Para ixmacajunta ju Pilipe chai ju Herodes ixtꞌatꞌajun.

18 Chai ju Xivan chani ixjunita ju Herodes:

―Jantuch lhijun ju lhamapꞌaksin ni va miꞌamachakaꞌ xanavi ju ixꞌamachakaꞌ ixjunita ju mimpꞌisekꞌe.

19 Pus ju Herodías lhitꞌalaxcailh ju Xivan ixlacata ju ixchivinti.

Chai ixlhinomputun ixmaknica.

Para jantu lai ixnavi.

20 Pus ju Herodes na ixtalhoni ju Xivan ni iscꞌatsai ni soknicꞌa ixjunita isꞌatsucunti chai ixlapanac Dios ixjunita.

Pus yuchi jantu xalhilakꞌaꞌini ju Herodías ni tuꞌuꞌ macxcai canavi.

Para ju Herodes mas va tam tam ixnajun acsni ixkꞌasmatni ju ixchivinti para ixlaquilhtu na ixkꞌasmatniputun ju Xivan.

21 Pus lakatam avilhchan chilh ju pantsꞌiquis ju ixpacxan ju Herodías.

Pus ixcꞌatan ixjunita ju Herodes.

Chai ju yuchi anavinilh kꞌai lacvaiti ixtꞌaxalackꞌajin chai ju comandantenin chai ju xamakꞌalinin ju xaꞌestado Galilea.

22 Chai tanucha ju istsiꞌ ju Herodías junta ixtatꞌajun venin chai tsuculh atꞌiniꞌ.

Pus lana kꞌachanilh ju ixꞌatꞌinti ju Herodes chai ju ixꞌalactꞌavi lacamixa.

Chai ju Herodes junilh ju atsiꞌ:

―Aqꞌuisqꞌuininch va tuchi ixtalakxtuch ju lacꞌasqꞌuinch.

Ju quitꞌin acxtakniyan.

23 Pus ju Herodes lhipastacnilh Dios chai junilh ju atsiꞌ:

―Va tuchi ixtalakxtuch ju aqꞌuisqꞌuiniyaꞌ acxtakniyan mas aqꞌuisqꞌuiniyaꞌ ni alhinonaꞌ ju aliꞌ lakꞌachakꞌan junta iclhinajun ju chavai.

24 Pus ju atsiꞌ lana taxtucha.

Alh sacminiꞌ ju ixnati.

Junich:

―Tijuch ju acsqꞌuiniyaꞌ.

Pus ju ixnati junilh ni casqꞌuinilh ju isꞌaktsulh ju Xivan ju amakpaxanaꞌ.

25 Pus ju atsiꞌ lana tanuchokocha junta ixvi ju Herodes chai junilh:

―Iclacasqꞌuin ni chavai lana aqꞌuixtꞌaknin lacatuꞌuꞌ casavila isꞌaktsulh ju Xivan ju amakpaxanaꞌ.

26 Pus ju acsnich ju gobernador lana na amakꞌaninilh.

Para va ixlacaꞌatalh ni ixlhipastactach ju Dios acsni junilh ju atsiꞌ ni caxtakniyach va tuchi casqꞌuiniyach chai ni takꞌasmatlh ju ixꞌalactꞌavi lacamixa pus jantu lai naulh ni jantu.

27 Pus ju gobernador lana malakachalh pumatam ixtaropa.

Junilhch:

―Aqꞌuilhitꞌanin ju isꞌaktsulh ju Xivan.

28 Pus ju taropa alh acchꞌucꞌunuꞌ ju Xivan lacapulachꞌin.

Chai lhiminilh ju aktsulh lacatuꞌuꞌ casavila chai xtaknilh ju atsiꞌ.

Pus ju atsiꞌ quixtaknilh ju ixnati.

29 Chai acsni tacꞌatsa ju ixꞌalacmamakaꞌui ju Xivan pus taꞌalh.

Tasaclh ju ixlacatuna.

Taquimacnu.

30 Pus tataspꞌitchokocha ju ixꞌalacmalakachata ju Jesús ni cataꞌalh pumatꞌiyun amalaninin ju lapanacni.

Chai talakminchokolh ju Jesús chai tajunkꞌo chux tuchi ixtanavi chai tuchi ixtamasunita ju lapanacni.

31 Pus ju Jesús alacjuni:

―Atꞌatꞌitch ju uxijnan lacamacni junta lai catolauch va quiꞌakstuꞌan.

Junta lai caꞌastacnanau pantsꞌiquis.

Ju Jesús alhijunilh chunch ni na lhu lapanacni ixtamin ixtaꞌan junta ixꞌalactꞌavi ju Jesús ju ixꞌamamakaꞌui.

Pus lana matiꞌ ixjunita ispantsꞌiquisꞌan ni lai catavailh.

32 Pus tatajulh isꞌakstuꞌan lacabarco.

Taꞌalh lhimakꞌantacutni atantsꞌin junta jantu xamatiꞌ ixtꞌajun.

33 Para na pumalhu lapanacni talaktsꞌilh ju Jesús acsni alh.

Chai tamispa.

Chai ju amachakꞌan lakatamin lakꞌachakꞌan taꞌatsꞌalaꞌalh junta ixtaꞌamputun ju Jesús chai ixꞌamamakaꞌui.

Va tachꞌajaxꞌalh.

Chai pꞌulhnan tachaꞌalh ju va ixtachꞌajaxꞌanta.

Astan tachaꞌalh ju Jesús chai ixꞌamamakaꞌui.

34 Pus acsni tacutlh ju Jesús ju lacabarco pus alaktsꞌilh ju lapanacni ni na lhu ixtatakꞌaixtokta.

Pus na alacmapaini ju yuꞌunch ni tachi ju tuꞌuꞌ borregojni ixtajunita ju matiꞌ ixꞌalhistacnaꞌ.

Pus ju yuꞌunch vachuꞌ matiꞌ ixjunita xamatiꞌ ju ixꞌamasuni ju soknicꞌa ti.

Pus lana tsuculh alacmasuniniꞌ chai na tijlhu chivinti ju xaꞌajuni.

35 Para acsni tokꞌoxalh pus ju ixꞌalacmamakaꞌui talakꞌalh ju Jesús chai tajuni:

―Jantu xamatiꞌ tꞌajun ju ani chai ju chavai na tokꞌoxatach.

36 Amalakꞌachꞌatꞌich ju lapanacni ni cataꞌalh lacacuxtu junta lacyacha chakaꞌ chai ju lakꞌachakꞌanixni ju vanin lacvi.

Chach taꞌancha tamonin ju tuchi cataꞌuyach ni matiꞌ tuchi cataꞌulh ju ani.

37 Para ju Jesús akꞌalhtayanalh.

Alacjuni:

―Amavatꞌit ju uxijnan.

Para ju ixꞌamamakaꞌui taꞌakꞌalhtayanalh:

―Pus ja lai acꞌanauch tamonin lakatꞌui cientos tumin ju vati ni camavayauch.

38 Para ju Jesús alacjuni:

―Tas akxchux vati ju alin.

Inchitꞌit laktsꞌinin.

Chai acsni tacꞌatsa tajuni:

―Alin akxquis vati chai lakatꞌui pamata.

39 Chai ju Jesús alacjuni:

―Alaclhcꞌaꞌulachitꞌit ju lapanacni ju quilhmactamin quilhmactamin.

Chach tatavi lacaꞌatsꞌinan.

40 Pus alhvakpitsicalh chai tatavi ju lapanacni.

Ju quilhmactamin tamin cientos alhcaꞌulacalh.

Chai ju aquilhmactamin cincuenta alhcaꞌulacalh.

41 Ju acsnich ju Jesús chꞌapalh ju akxquis vati chai ju lakatꞌuich pamata.

Talakstꞌalh ju lactꞌiyan chai xtaknilh lhakꞌailaktsꞌinti ju Dios.

Chꞌekꞌelh ju vati.

Chai axtaknilh ju ixꞌalacmamakaꞌui ni cataꞌaxtakniyach ju ixtalhavat lapanacni.

Vachuꞌ lhvakpitsikꞌo ju lakatꞌui pamata.

42 Pus chux ju lapanacni tavailh chai talhilakꞌo.

43 Chai ju ixꞌamamakaꞌui ju Jesús tasacchokolh ju vati chai ju pamata ju tamaxajnicha ju jantu taꞌokꞌo.

Lakacautꞌui tankꞌalin aktsamkꞌo.

44 Pus sia yuꞌunch ju tavailh ixchaꞌanta lakaquis milh jokꞌatni.

45 Pus ju Jesús lana pꞌas ajuni ju ixꞌalacmamakaꞌui ni catatajuchokolh laꞌixbarcoꞌan.

Catapꞌulhꞌalh ju lakꞌantacutni atantsꞌin junta vilhcha ju lakꞌachakꞌan Betsaida.

Ju yuchi tavilhcaꞌ ju anch ni laich caꞌalacmalakachachokoyaꞌ laꞌixchakaꞌan ju ixtalhavat lapanacni.

46 Chai ju Jesús acsni alacmalakachakꞌo ju lapanacni pus alh ju akstijun.

Alh tꞌachiviniꞌ ju Dios.

47 Chai acsni tatsꞌisi pus ju ixꞌamamakaꞌui va laꞌixlacaitatcaꞌ atantsꞌin ixtaꞌanta lacabarco.

Para ju Jesús va isꞌakstu ixvilhchacaꞌ ju lacatꞌun.

48 Chai ju yuchi alaktsꞌilh ju ixꞌamamakaꞌui ni na ixtaxkꞌoptach ni ixtaxakataiꞌanta ju ixbarcoꞌan.

Para ni na pꞌas ixlai ju un chai na ixnekꞌespꞌitꞌa ju xcan pus jantu lai ixtamalhtanai ju barco.

Pus tachi lakatꞌutu hora vatsꞌisin alakmilh ju ixꞌamamakaꞌui ju Jesús.

Ixtachꞌantaꞌanta laꞌismusan ju xcan chai va ixꞌapuꞌiniputun ju yuꞌunch.

49 Para ju yuꞌunch acsni talaktsꞌilh ni va alhtanaminta laꞌismusan xcan pus tapastaclh ni ca yuchi ju macxcai un ju minta.

Chai lana tsꞌau talactꞌasalh.

50 Pus ixchuxꞌan talaktsꞌilh chai slivasalh na tatalhanalh.

Para ju Jesús lana soko axakꞌala.

Ajuni:

―Kꞌai anavitꞌit ju miꞌalhunutꞌan.

Quitꞌin.

Jantu atꞌalhanantꞌit.

51 Chai ju Jesús alactꞌataju ju lacabarco.

Chai lana sek va ju un.

Chai ju yuꞌunch na tatalhanalh chai na talhamakꞌaninilh.

52 Pus ju yuꞌunch lana jantu ixtamachakxai tichi lapanac ixlhitalacasui acsni amava ju akxquis vati ju lapanacni.

Na va pꞌas ixjunita ju ixꞌalhunutꞌan.

53 Acsni tachaꞌalh ju lhimakꞌantacutni ju atantsꞌin ju Jesús chai ixꞌamamakaꞌui pus tachaꞌalh ju xalacatꞌun Genesaret.

Anch ju tachꞌiꞌula ju ixbarcoꞌan.

54 Chai acsni tatacutlh ju yuꞌunch ju lacabarco pus lana tamispalhch ju Jesús ju lapanacni.

55 Va ani ani taꞌatsꞌalaꞌalh tachi chun ju lakꞌachakꞌanixni ju vanin ixlacvi.

Tatsuculh lhiminin lacalona ju takꞌankꞌanin junta ixnoncan ixvi ju Jesús.

56 Chai vanta anch ixꞌan ju Jesús u lacatꞌicstꞌi lakꞌachakꞌan u lackꞌai lakꞌachakꞌan u lacacuxtu pus ixꞌamamacan ju takꞌankꞌanin ju lacati.

Ixtatapaininich ju Jesús ni laich catalakchaꞌanilh mas va lacatsꞌunin ixquilhtuꞌ ixpumpuꞌ.

Pus ju Jesús alakꞌaꞌinilh chai tachi chun ju ixtalakchaꞌani ixpumpuꞌ palaich tava.