Ixtanun ju lhacaticurulhni laꞌixlacatuna pumatam amachakaꞌ Gadara
5
Pus ju Jesús chai ixꞌamamakaꞌui tachaꞌalh ju lhimakꞌantacutni atantsꞌin junta ixtꞌunꞌan ixjunita ju amachakꞌan Gadara.
Marcos 5:1-20
2 Chai acsni tacutlh ju lacabarco ju Jesús pus lana xajchilh ju campusantu pumatam lapanac ju ixpacxanta ju lhacaticurulhni.
Chai ju yuchi lana lakꞌalh ju Jesús.
3 Pus ju anuch lapanac ixꞌamachakꞌananta ju campusantu.
Chai nin lacacadena jantu xamatiꞌ lai ixmakchꞌi.
4 Va ta pakchux ixtachꞌanchꞌi chai ixtamakchꞌi lacacadena pus ju yuchi va ixꞌalackꞌexkꞌojui ju cadena.
Pus jantu xamatiꞌ lai ta ixnavi.
5 Chai ju tuncuj chai ju tsꞌis va tachi istꞌasatꞌajun lacatalhpan chai ju campusantu.
Ixlacamacꞌatsanikꞌocantach isꞌakstu ju lacachiux.
6 Pus ju anuch lapanac acsni laktsꞌilh ju Jesús ixlhimakat lana atsꞌalalakꞌalh.
Taꞌaktsokotanilh.
7 Chai ju lhacaticurulhni tapuchivinilh ixquilhni ju anuꞌ lapanac.
Chai na pꞌas ju tachivinilh acsni taxakꞌala ju Jesús.
Tajunich:
―Tijuch ju quilamintau lhilaktsꞌinin ju uxintꞌi.
Pus ju uxintꞌi istsꞌalhꞌat Dios ju vilhcha lactꞌiyan.
Laꞌixtapakaꞌut ju Dios iclatapaininiyau.
Jantu aquilamamakꞌalhkꞌajniu.
8 Pus ju lhacaticurulhni tapunaulh chunch ni Jesús ixꞌajunita ni catataxtulh laꞌixlacatuna ju anuꞌ lapanac.
9 Chai ju Jesús sacmilh ju lapanac tuchi juncan.
Chai ju yuchi akꞌalhtayanalh:
―Legión icjuncan ni na quilhu quincꞌan.
Pus ju Legión ixtapakaꞌut junita lhu taropajni.
10 Chai ju anuꞌ lhacaticurulhni na pꞌas tasqꞌuinilh lamapainin ju Jesús ni jantu caꞌaxcoxtulh ju anch lacatꞌun.
11 Pus vanin ju anuꞌ akstijun na lhu ixtatꞌajun ju pꞌaxnin.
Va ixtatꞌajun kꞌexvenin.
12 Chai ixchuxꞌan ju anuꞌ lhacaticurulhni kꞌasi tasqꞌuinilh lamapainin ju Jesús.
Tajunich:
―Aquilamacaꞌauch laꞌixlacatunaꞌan ju pꞌaxnin.
Chach ictanuyau ju anch.
13 Pus ju Jesús alakꞌaꞌinilh.
Chai ju anuch lhacaticurulhni acsni tataxtulh laꞌixlacatuna ju anuꞌ lapanac pus lana tatanu laꞌixlacatunaꞌan ju pꞌaxnin.
Chai ju ixtalhavat pꞌaxnin lana tin taꞌalh junta vak anta.
Tatajucha lacaꞌatantsꞌin chai anch ju tanitajukꞌo lacxcan.
Pus ju anuch pꞌaxnin ixtachaꞌanta lakatꞌui milh.
14 Pus ju ixtalhistꞌacꞌa ju pꞌaxnin na tatalhanalh chai taꞌatsꞌalalh.
Taꞌalh nonin ju lakꞌachakꞌan chai ju lacacuxtun tuchi ixtapasata.
Chai tataxtulh ju lapanacni amachakꞌan anch.
Taꞌalh laktsꞌinin tuchi ixtapasata.
15 Talakmilh ju Jesús.
Chai talaktsꞌilh ju anuꞌ lapanac ju ixpacxanta lhu ju lhacaticurulhni.
Para ju chavai ixmalakchꞌininta junta ixvi.
Chai ixtakꞌoxinita ju isꞌaktsulh.
Pus na tatalhanalh ju lapanacni.
16 Chai ju lapanacni ju talaktsꞌilh ju tuchi ixtapasata ixlacata ju anuꞌ lapanac chai ixlacata ju pꞌaxnin tanonkꞌo.
17 Pus tachi chun ju lapanacni tatapaininilh ju Jesús ni cataxtulh laꞌixtꞌunꞌan.
18 Chai acsni tanulh ju Jesús lacabarco pus ju anuꞌ lapanac ju ixtaxtunita ju lhacaticurulhni laꞌixlacatuna tapꞌastu ixchꞌakꞌokꞌaputun.
19 Para ju Jesús jantu lacasqꞌuinilh.
Va junich:
―Alai apꞌinchich ju laminchakaꞌ.
Aꞌunchich ju mintꞌaꞌamachakꞌan ni na kꞌai lhamakꞌan ju xanaviniyan ju Dios lamilacatuna chai ni na xaꞌaktaijuyan lacaꞌamapaininti.
20 Pus ju anuꞌ lapanac alh.
Lacquilhuntsuculh ixlhilacaputsꞌun ju lacatꞌun junta ixꞌalin lakacau lakꞌachakꞌanixni.
Ajuni ju lapanacni ni na kꞌai lhamakꞌan ju navilh ju Jesús laꞌixlacata.
Pus va talhamakꞌaninilh chux ju lapanacni.
Nilh ju istsiꞌ pumatam ju Jairo ixjuncan
21 Pus ju Jesús putapasachokopa aktam lacabarco laꞌixlhimakꞌantacutni ju atantsꞌin.
Pus talhitakꞌaixtokpa lhu ju lapanacni.
Chai ju Jesús taya laꞌixquilhtuꞌ ju atantsꞌin.
Marcos 5:21-43
22 Pus ju acsnich chincha pumatam lapanac ju Jairo ixjuncan.
Ju yuchi pumatam xakꞌai ixjunita sia yuꞌunch ju ixtachꞌalhcatnan laꞌixpujitatꞌan ju istꞌaꞌisraelitanin.
Chai acsni lakchilh ju Jesús pus lana taquilhputanilh ju lacatꞌun vanin laꞌixchꞌajaꞌ.
23 Tapaininilh ju Jesús chai juni:
―Ju quintsiꞌ tꞌajun niniꞌ.
Aqꞌuintꞌapꞌitꞌi kꞌai lamapainin.
Amokslanitꞌachiꞌ ju mimacaꞌ laꞌixlacatuna ju yuchi ni palaich cajunaꞌ.
Jantu caniyaꞌ.
24 Pus ju Jesús tꞌaꞌalh ju Jairo.
Chai ixtalhavat lapanacni tachꞌakꞌokꞌalh.
Na ixtalatankꞌasiꞌanta.
25 Chai pumatam chakoꞌulh ixmakꞌanta.
Chai ju yuchi lakacautꞌui cꞌata jantu ixlakxixta.
26 Na lhu ixmakꞌalhkꞌajnanta acsni ixtacꞌuchꞌui ju acꞌuchꞌunin.
Chai ixmacaꞌankꞌotach tachi chun ju ixꞌalinta para jantu tuꞌuꞌ ixlhitapalai.
Va apalai ixlhitapꞌasni.
27 Pus ju anuꞌ chakoꞌulh acsni kꞌasmatlh ni na lai ixꞌacꞌuchꞌunun ju Jesús pus lana puchincha laꞌixpulacan ju Jesús junta ixꞌalactꞌaꞌanta ixtalhavat lapanacni.
Chai lakchaꞌanilh ixpumpuꞌ ju Jesús.
28 Va ixnajun laꞌixꞌalhunut ni mas va yuchi ni calakchaꞌanilh lacatsꞌunin ixpumpuꞌ pus palaich cajunaꞌ.
29 Pus vasalh.
Acsni lakchaꞌanilh ixpumpuꞌ ju Jesús pus lana vatsꞌalhti vak tamactalh ju ixtakꞌankꞌat.
Chai lana ucsacꞌatsa laꞌixlacatuna ni palaich xajun.
30 Pus ju Jesús lana cꞌatsa ni ixcꞌuchꞌuta xamatiꞌ.
Chai talakaspꞌitlh junta ixꞌanta laꞌixtalhavat lapanacni chai alacjuni:
―Tis chavaich ju xaquilakchaꞌani ju quimpumpuꞌ.
31 Para ju ixꞌalacmamakaꞌui tajunich:
―Laktsꞌinch ni na lhu lapanacni ju tatankꞌasiyan ni tꞌisacminimpꞌalai tis chavaich ju xalakchaꞌaniyan ju mimpumpuꞌ.
32 Para ju Jesús alacꞌavanalh laꞌixtalhavat lapanacni ni va ixlaktsꞌimputun tichi chavaich ju ixlakchaꞌanita ju ixpumpuꞌ.
33 Pus ju anuꞌ chakoꞌulh na ixꞌaxqꞌuipꞌipꞌitninta ni na ixtalhananta.
Para ni cꞌatsa tuchi ixtapasata laꞌixlacatuna pus lakꞌalh ju Jesús chai taꞌaktsokotalh laꞌixꞌucxlacapuꞌ chai jonkꞌo tuchi ixlacaꞌatalh ju lhilakchaꞌalh chai ni palaich va.
34 Chai ju Jesús juni:
―Quintsiꞌ ni xaqꞌuilhilacꞌapꞌinch pus yuchi palai xalhiꞌun.
Lhikꞌach apꞌitꞌi.
Jantuch aktam apꞌacxanaꞌ ju ani mintakꞌankꞌat.
35 Pus acsni ixtꞌajuncaꞌ tꞌachiviniꞌ ju chakoꞌulh ju Jesús pus tachincha ju lapanacni ju ixtataxtutachalh ju ixchakaꞌ ju anuꞌ xakꞌai.
Tajunich ju yuchi:
―Ju mintsiꞌ nitach.
Tajuch ni va jeks amavapꞌalaꞌ ju amamakaꞌunuꞌ.
36 Para ju Jesús acsni kꞌasmatlh ju ixchivintiꞌan lana junilh ju anuꞌ xakꞌai:
―Jantu atꞌalhan.
Va aqꞌuilhilacꞌapꞌich.
37 Pus ju Jesús jantu lacasqꞌuilh ni xamatiꞌ cachꞌakꞌokꞌalh.
Va yuꞌunch ju Pitaluꞌ chai ju Jacobo chai ju Xivan ispꞌisekꞌe ju Jacobo.
38 Tamilh laꞌixchakaꞌ ju anuꞌ xakꞌai chai ju Jesús alaktsꞌilh ixtalhavat lapanacni ni na ixtalackꞌalhun.
Na pꞌas ixtalactꞌasai.
39 Chai acsni tanucha ju Jesús lacachakaꞌ pus alacjuni ju lapanacni:
―Tajuch ni na va lhilactꞌasayapꞌalatꞌit chai na lhikꞌalhumpꞌalatꞌit.
Ju ani atsiꞌ jantu nita.
Va lhtatai.
40 Para ju lapanacni va talhitsꞌiꞌilh ju Jesús.
Pus ju acsnich ju Jesús alacxcoxtokꞌo ixchuxꞌan.
Va yuchi ixpaich ju anuꞌ atsiꞌ ju lhiꞌalh chai ixnatich chai ju ixꞌalactꞌaminta.
Va yuꞌunch ju tatꞌatanu junta ixma ju atsiꞌ.
41 Chai ju Jesús chꞌapanilh ixmacaꞌ ju atsiꞌ chai juni:
―Talita,
cumi.
Ju chunch va nomputun:
Atsiꞌ uxintꞌi ju icjunan.
Akꞌostꞌaꞌulhch.
42 Pus ju atsiꞌ lana kꞌostavi.
Alhtanalh.
Ju yuchi lakacautꞌui cꞌata ixpacxanta.
Pus slivasalh na talhamakꞌaninilh ju lapanacni ju anch ixtavilanalh.
43 Para ju Jesús slivasalh alaclhimapꞌaksi ju ixnati chai ixpai ju atsiꞌ ni jantu xamatiꞌ catamacꞌatsani ju tuchi ixtapasata.
Chai lana lhinaulh ixmavaca ju atsiꞌ.