Ju Jesús apumalaninin ju chivinti ixlacata ju achꞌananaꞌ
4
Ju Jesús aktam taiꞌulachokopa ixꞌamalaninti laꞌixquilhtuꞌ atantsꞌin.
Chai ni na lhu tatakꞌaixtokpa ju lapanacni junta ixvi pus ju Jesús taju lacabarco ju ixvi laꞌixquilhtuꞌ atantsꞌin chai tavi ni laich caꞌamalanikꞌolh ixchuxꞌan.
Chai tachi chun ju lapanacni lacatꞌun ixtayanalh laꞌixquilhtuꞌ atantsꞌin.
Marcos 4:1-20
2 Chai ju Jesús na lhu taxtokni xaꞌamalani ju lapanacni lacachivinti ju ixtꞌalaktsꞌipaxcavaich ju tuꞌuꞌ.
Chai acsni xaꞌalacmalani chani alacjuni:
3 ―Akꞌasmatꞌitch ju aclajunau.
Pumatam achꞌananaꞌ alh lhavanaꞌ ju ixꞌachꞌananti.
4 Chai acsni ixtꞌajun lhavanaꞌ ju ixꞌachꞌananti pus ju aliꞌ xatꞌin tama laꞌixquilhtuꞌ ti.
Chai lana tamilh ju tsꞌokꞌo chai tasacꞌulh.
5 Chai ju alacatsꞌunin ju xatꞌin tamacha junta va lacatsꞌunin ixꞌalin ju tꞌun laꞌixꞌucxni ju chiux.
Pus vatsꞌalhti pꞌunlh ju tꞌin ni jantu lhu ixꞌalin ju tꞌun.
6 Para acsni na lhiꞌichich va pus lana lacxixlh ni va jantu makat ixtinui istisivic.
7 Chai ju alacatsꞌunin ju xatꞌin tamacha junta vachuꞌ ixma ju xatꞌin alhtucunuꞌ.
Pus pꞌulhnan takꞌaya ju alhtucunuꞌ chai akxtakma ju anuꞌ achꞌananti chai jantu tuꞌuꞌ xtaklh ju xatocꞌat.
8 Ju alacatsꞌunin xatꞌin tamacha lacakꞌoxi tꞌun.
Pꞌunlh.
Takꞌaya.
Chai tocꞌalh ju xalhiꞌut.
Pus talhava ju akatamin achꞌananti.
Ju aliꞌ tocꞌalh lakapꞌuxamcau ju xalhiꞌut.
Ju aliꞌ achꞌananti tocꞌalh sesenta ju xalhiꞌut.
Ju aliꞌ achꞌananti tocꞌalh tam cientos ju xalhiꞌut.
9 Ju acsnich ju Jesús alacjuni ju lapanacni:
―Va tichi chavaich ju alin ixpakꞌasmatni pus cakꞌasmatlh.
Ju Jesús alacmavasalani ju ixpumacautꞌuiꞌan tajuch ni va chunch xaꞌalacjuni ju lapanacni
10 Astan acsni taꞌanchokolh laꞌixchakaꞌan ju ixtalhavat lapanacni pus ju ixpumacautꞌuiꞌan chai ju aliꞌin ixꞌalacmamakaꞌui ju ixtatꞌavilanalhcaꞌ ju Jesús tatsuculh sacminin tuchi ixnomputun ju chivinti ju xanajun.
11 Chai ju Jesús alacjuni:
―Ju uxijnan lacꞌasqꞌuinicꞌantꞌatꞌit ni amachꞌakxayatꞌit ju chivinti ju najun ni lhinomputun ju Dios laꞌisꞌatsucuntiꞌan ju lapanacni.
Para ju aliꞌin lapanacni ju jantu quintalhilaksiputun va amasunican ixtaxtokni Dios laca tuꞌuꞌ chivinti ju ixtꞌalaktsꞌipaxcavaich ju tuꞌuꞌ.
12 Ju chunch ju yuꞌunch mas va tachi talaktsꞌin tuchi icnavi para jantu catitamispa tuchi nomputun.
Chai mas va tachi tatꞌajun kꞌasmatnin ju quinchivinti para jantu tavanan catitamachakxa.
Ju chunch jantu lai tam cativa ju isꞌatsucuntiꞌan.
Chai jantu tavanan camacꞌacxanicanaꞌ ju ixꞌalactuꞌuntiꞌan.
Ju Jesús mavasalai ju chivinti ixlacata ju achꞌananaꞌ
13 Chai ju Jesús chani alacjuni ju ixꞌamamakaꞌui:
―Ni jantu lai machꞌakxayatꞌit ixlacata ju achꞌananaꞌ ju ixtꞌalaktsꞌipaxcavaich ju tuꞌuꞌ pus tꞌas alhimachꞌakxayaꞌitꞌit ju aliꞌ chivinti ju tꞌalaktsꞌipaxcavaich tuꞌuꞌ.
14 Pus chani ju nomputun.
Ju achꞌananaꞌ yuchi ju najun ixchivinti Dios.
Tachi ju va chꞌan ju chivinti laꞌixꞌalhunutꞌan ju lapanacni.
15 Chai ju xatꞌin ju tamacha vanin laꞌixquilhtuꞌ ti yuꞌunch ju takꞌasmatꞌa ixchivinti Dios para astan min ju lhacaticuru chai macꞌapꞌani ju chivinti ju ixꞌachꞌananicanta laꞌixꞌalhunutꞌan.
16 Chai ju xatꞌin ju tamacha laꞌixꞌucxni chiux yuꞌunch ju takꞌasmatlh ixchivinti Dios chai lana lhikꞌach talacaꞌi.
17 Para chunch tajunita tachi ju anuꞌ xapꞌun laꞌixꞌucxni chiux.
Ju yuꞌunch jantu vasalh laꞌixlhichux ixꞌalhunutꞌan ju takꞌachani.
Va pantsꞌiquis kꞌox talhiulai.
Para acsni min ju tuꞌuꞌ makꞌalhkꞌajnat u tuꞌuꞌ axcayanti va ixlacata ni talacaꞌinita ju ixchivinti Dios pus lana tamacajun ixti Dios.
18 Chai ju xatꞌin ju tamacha junta ixꞌalin ju xatꞌin alhtucunuꞌ pus yuꞌunch ju takꞌasmatꞌa ixchivinti Dios.
19 Para va tachi talhamakꞌaninin ju xataxtokni ju alin ju ani lacamunutpaꞌ.
Chai va taputaꞌokxchokꞌoi ju tumin.
Chai na lhu taxtokni ju tatamoputun.
Pus tachi chun ju ani taxtokni va amacꞌapꞌani ju ixchivinti Dios ju ixꞌachꞌananicanta laꞌixꞌalhunutꞌan.
Chai jantu tavanan tasui ixtachaput Dios laꞌisꞌatsucuntiꞌan.
20 Para ju xatꞌin ju tamacha lacakꞌoxi tꞌun yuꞌunch ju takꞌasmatꞌa ju ixchivinti Dios chai lana talacaꞌi.
Chai lana tasui ixtachaput ju Dios laꞌisꞌatsucuntiꞌan.
Ju aliꞌin va lacatsꞌunin tasui ju ixtachaput ju Dios laꞌisꞌatsucuntiꞌan.
Ju aliꞌin lapanacni palai lhu tasui ixtachaput Dios laꞌisꞌatsucuntiꞌan.
Chai ju aliꞌin lapanacni na lhu lana tasui ixtachaput Dios laꞌisꞌatsucuntiꞌan.
Ju Jesús apumalaninin ju chivinti ixlacata ju tuꞌuꞌ maclhcu
21 Ju Jesús vachuꞌ alacjuni ju lapanacni:
―Acsni lhimincan ju tuꞌuꞌ maclhcu ju lacachakaꞌ jantu va akxtakꞌulacan laca tuꞌuꞌ valhtila nin laxtankꞌapuꞌ acapuꞌ caꞌula.
Alai va mucꞌacan talaclhman junta mucꞌacan ju maclhcu.
Marcos 4:21-41
22 Chai vana va chun ju quinchivinti.
Mas va miꞌakstuꞌan xaclamavasalaniyau ju chivinti para astan amacꞌatsꞌaniyaꞌitꞌit ju lapanacni.
Chai tuchi chivinti ju jantu amamachakxanican ju ixtalhavatꞌan lapanacni pus uxijnan ju amacꞌatsꞌaniyaꞌitꞌit.
23 Pus ju alin ixpakꞌasmatni pus cakꞌasmatlh.
24 Vachuꞌ chani alacjuni ju lapanacni:
―Anavitꞌit cuenta ju tuchꞌi kꞌasmatꞌatꞌit.
Ni anaviyaꞌitꞌit cuenta ju tuchi iclajunau pus palai lhu catamakꞌasmatniyan ju Dios.
Chai palai lhu amachꞌakxayaꞌitꞌit ju uxijnan ni vasalh anaviyaꞌitꞌit cuenta ju quinchivinti.
25 Pus ju navi cuenta ju tuchi kꞌasmatꞌa pus palai lhu camakꞌasmatnicanaꞌ.
Para ju jantu tuꞌuꞌ navi cuenta ju tuchi kꞌasmatꞌa pus camacꞌapꞌanicanaꞌ ju lacatsꞌunin ju makꞌata laꞌixꞌalhunut.
Ju Jesús apumalaninin ju chivinti ixlacata ju tuꞌuꞌ tꞌin ju takꞌayai
26 Ju Jesús vachuꞌ chani alacjuni ju lapanacni:
―Acsni lhinajun ju Dios laꞌixꞌalhunutꞌan ju lapanacni chunch ju tapasai tachi ju tapasai acsni achꞌananan tam jokꞌat.
27 Pus ju yuchi lhtatai ju tsꞌis.
Chai vatsꞌisin kꞌostolai.
Para va isꞌakstu pꞌun ju ixꞌachꞌananti.
Takꞌayai.
Para ju anuꞌ achꞌananaꞌ jantu machakxai tas lhipꞌunch.
28 Pus va lacatꞌun ju pꞌun.
Pꞌulhnan ju xaxkꞌoi ju pꞌun.
Astan alinch ju xaxivic.
Chai ju astan xacuxich ju tocꞌai.
29 Chai acsni cꞌatꞌatach ju xatocꞌat pus lana caꞌaxkꞌanancanach ni kꞌoxich cꞌatꞌatach.
Ju Jesús apumalani ju lapanacni ju xatꞌin mostaza
30 Ju Jesús vachuꞌ chani alacjuni ju lapanacni:
―Tijuch nuꞌ ju ixtꞌachunch jumputun tachi acsni lhinajun ju Dios laꞌisꞌatsucuntiꞌan ju lapanacni.
31 Pus acsni lhinajun ju Dios laꞌisꞌatsucuntiꞌan ju lapanacni pus na lhu talhilacaꞌan ju Dios.
Chunch ju tapasai tachi ju tapasai acsni chꞌancan ju xatꞌin mostaza ju lacatꞌun.
Pus ju anuꞌ tꞌin yuchi ju palai lactꞌicstꞌi tachi chun ju tꞌin ju alin ju ani lacamunutpaꞌ.
32 Para acsni chꞌancan takꞌayai.
Chai palai katakꞌaich jun tachi chun aliꞌ achꞌitin.
Chai ju tsꞌokꞌo lai taꞌastacnan laꞌixmakpu ju anuꞌ achꞌananti.
Ju Jesús jantu vas xaꞌamalani ju lapanacni
33 Ju Jesús na tijlhu chivinti ju ixꞌajuni ju lapanacni ju ixtꞌalaktsꞌipaxcavai ju tuꞌuꞌ.
Para va yuchi ixꞌajuni ju laich ixtamachakxai.
34 Chai va tapakchux ju ixꞌamalani ju lapanacni aktsꞌiya ixpuxcajui ju chivinti ju lai ixtꞌalaktsꞌipaxcavai ju tuꞌuꞌ.
Para acsni va isꞌakstu ixꞌalactꞌatolai ju ixꞌalacmamakaꞌui pus lana vas ixꞌalacmavasalanikꞌojui chux ju chivinti ju ixꞌajunita ixtalhavat lapanacni.
Ju Jesús amalacaꞌini ju un chai ju xcan
35 Chai ju anuꞌ avilhchan acsni tokꞌoxalhch pus ju Jesús alacjuni ju ixꞌalacmamakaꞌui:
―Catapasauch ju lhimakꞌantacutni atantsꞌin.
36 Pus talacmacaulh ju ixtalhavat lapanacni chai talhiꞌalh ju Jesús lacabarco junta ixvi acsni ixꞌamalani ju lapanacni.
Chai ixꞌalin vachuꞌ ju aliꞌin lapanacni ju ixtatꞌaꞌan lacalacatꞌicstꞌi ixbarcoꞌan vachuꞌ.
37 Pus kꞌostaya ju kꞌai un chai na pꞌas tanekꞌelh ju xcan.
Chai ixquitanuich lacabarco.
Pus ju barco va isꞌaktsamputun ju xcan.
38 Para ju Jesús va ilhtatai laꞌixtimusni ju barco.
Laꞌisꞌaktsꞌi ixlacpatai.
Pus ju ixꞌalacmamakaꞌui tamaklokꞌo ju Jesús chai tajuni:
―Amamakaꞌunuꞌ ju uxintꞌi ja jantu tuꞌuꞌ xcaniyan ni tꞌonau ninin lacxcan.
39 Pus ju Jesús kꞌostavi.
Kꞌailh ju un.
Chai juni ju xcan:
―Va sekch atꞌaꞌulh.
―Tajuch ni va tꞌalhananatꞌit.
Ja jantu lana quilalhilacaꞌanau.
41 Pus ju ixꞌalacmamakaꞌui lana na talhamakꞌaninilh.
Talaclajunich sia yuꞌunch:
―Tis chavaich nuꞌ ju ani ni laich taquiclacaꞌi ju un chai ju xcan.