Pumatam lapanac ixꞌalin ixmacaꞌ ju va ixixnita
3
Ju Jesús aktam tanuchokopa laꞌixpujitatꞌan ju istꞌaꞌisraelitanin.
Chai ixtanumacha pumatam lapanac ju va ixixnita lakatam ixmacaꞌ.
Marcos 3:1-19
2 Chai vachuꞌ ixꞌalin ju anch ju lapanacni ju ixtalhistactꞌajun ju Jesús.
Va ixtalaktsꞌimputun ni caꞌacꞌuchꞌunulh ju avilhchan paꞌastacni u jantu.
Va ixtapuxconi ta yu laich catapumucꞌani ixtalakꞌalhin.
3 Pus ju Jesús junilh ju anuꞌ lapanac ju va ixixnita ju ixmacaꞌ:
―Akꞌostꞌaꞌulh.
Atꞌaich ju ani junta laich catalaktsꞌinan ju lapanacni.
4 Chai alacjunich ju lapanacni:
―Tꞌas nonatꞌit.
Ja lhijun ni acnavi ju kꞌox ju avilhchan paꞌastacni u acnavi ju talakꞌalhin ni jantu acꞌaktaiju tam xamatiꞌ.
Ja lhijun ni acmakꞌalhtaxtulh ju atsucunti ju avilhchan paꞌastacni u aclaktsꞌimakni.
Pus ju lapanacni va sekch tataya.
5 Pus ju acsnich ju Jesús alaktsꞌilh ju lapanacni ju ixtalakachoko.
Talhkꞌamalh.
Chai na amakꞌaninilh ni na pꞌas ixjunita ixꞌalhunutꞌan.
Pus junich ju takꞌankꞌan:
―Alhitꞌach ju mimacaꞌ.
Pus ju anuꞌ lapanac xtaknilh ju ixmacaꞌ.
Chai lana tachapunch va.
6 Pus lana tataxtucha ju fariseonin.
Taꞌalh junta ixtavilanancha ju ixtachꞌakꞌokꞌai ju gobernador Herodes.
Taꞌalh machꞌanxtaminin ju chivinti ixlacata ju Jesús ta yu laich catapumakniyaꞌ.
Tatakꞌaixtoklh lhu ju lapanacni laꞌixquilhtuꞌ atantsꞌin
7 Pus ju Jesús alh laꞌixquilhtuꞌ atantsꞌin.
Alactꞌaꞌalh ju ixꞌalacmamakaꞌui.
Chai na lhu tachꞌakꞌokꞌalh ju amachakꞌan xaꞌestado Galilea chai ju amachakꞌan ju xaꞌestado Judea.
8 Vachuꞌ ju amachakꞌan lakꞌachakꞌan Jerusalén chai ju amachakꞌan ju xalacatꞌun Idumea.
Chai ju lapanacni ju ixtatꞌajun lhimakꞌantacutni lacxcan Jordán chai ixtalakachoko ju lakꞌachakꞌanixni Tiro chai Sidón.
Na lhu lapanacni takꞌasmatlh ni na kꞌai lhamakꞌan xanavi ju Jesús chai talakmilh ju yuchi.
9 Pus ju Jesús alacjuni ju ixꞌalacmamakaꞌui ni catalakasipuxcaulh lacatꞌicstꞌi barco ni laich cataju anch ni na ixtatankꞌasi ju lapanacni ni na ilhuꞌan.
10 Pus ni na lhu ixꞌacꞌuchꞌui ju lapanacni ju Jesús pus ju aliꞌin ju ixtapacxanta ixtakꞌankꞌatꞌan va kꞌasi kꞌasi ixtalakꞌan ju Jesús.
11 Chai vachuꞌ ixꞌalin ju lapanacni ju ixtanun ju lhacaticurulhni laꞌixlacatunaꞌan.
Chai ju anuꞌ lhacaticurulhni ixtamispai ju Jesús.
Pus ju lapanacni ju ixtapacxanta ju lhacaticurulhni taꞌaktsokotanilh laꞌixꞌucxlacapuꞌ ju Jesús chai ju lhacaticurulhni tapuchivinilh ixquilhniꞌan ju anuch lapanacni.
Na pꞌas tachivinilh.
Tajunich ju Jesús:
―Ju uxintꞌi istsꞌalhꞌat Dios.
12 Para ju Jesús pꞌas alhimapꞌaksi ni jantu catajunilh ju lapanacni tichi lapanac ju yuchi.
Ju Jesús asacxtulh ju ixpumacautꞌuiꞌan ixlapanacni
13 Chai ju Jesús ampa junta ixvilhcha lakatam akstijun chai alactꞌasanilh ju isꞌasacxtuputun.
Chai ju yuꞌunch talakmilh.
14 Pus asacxtulh pumacautꞌui ixꞌalacmamakaꞌui ni laich caꞌalactꞌaꞌalhtanatsuculh ju yuchi chai ni laich caꞌalacmalakachayaꞌ ixnajunca ju ixchivinti Dios.
15 Vachuꞌ axtaknilh ixtachaputꞌan ni laich palai catanavi ju lapanacni ju ixtachꞌapata ixtakꞌankꞌatꞌan.
Chai laich vachuꞌ cataxcoxtuniyaꞌ ju lhacaticurulhni laꞌixlacatunaꞌan ju lapanacni.
16 Pus sacxtucalh ju Simón.
Chai ju yuchi xtaknichokocalh alakatam ixtapakaꞌut.
Lhimapakaꞌucalh Pitaluꞌ.
17 Chai sacxtucalh ju Jacobo chai ju Xivan.
Pus ju Xivan ispꞌisekꞌe ixjunita ju Jacobo.
Chai ju yuꞌunch istsꞌalan ju Zebedeo ixtajunita.
Axtaknilh ixlhilakatꞌui ixtapakaꞌutꞌan.
Alaclhixakꞌalacalh Boanerges.
Ju chunch va nomputun ni na pꞌas ixtachivinin tachi acsni tꞌasai ju tꞌajin.
18 Chai sacxtucalh ju Tilix chai ju Pilipe chai ju Bartolomé chai ju Mateo chai ju Tumax chai apumatam Jacobo ju istsꞌalh Alfeo ixjunita.
Chai sacxtulh ju Tadeo chai apumatam Simón ju makyuꞌunch ixjunita ju cananistanin.
19 Vachuꞌ sacxtucalh ju Judas Iscariote ju astan makꞌaxtaklh ju Jesús.
Tajuni ju Jesús ni laꞌixtachaput ju lhacaticuru ju chꞌalhcatnan
Astan ju Jesús alactꞌaꞌalh ju ixꞌamamakaꞌui lacachakaꞌ.
20 Chai aktam tatakꞌaixtokpa ju lapanacni.
Chai ixlhiyuchi matiꞌ ixjunita ju ispantsꞌiquisꞌan ju Jesús chai ixꞌamamakaꞌui ni laich catavailh.
Marcos 3:20-35
21 Pus acsni takꞌalhakꞌasmatlh ju ixlhiꞌalakꞌavin ju Jesús ni chunch ixlai pus tamilh inin.
Va ixtanajun ni jantu isꞌacꞌatsananta ju Jesús.
22 Vachuꞌ ixtaꞌalin ju lapanacni ju ixtalhatalanininta ju ixlhamapꞌaksin ju istꞌaꞌisraelitanin.
Ju yuꞌunch ixtamintacha ju lakꞌachakꞌan Jerusalén.
Pus ju yuꞌunch ixtanajun ni va ixtanun ju Satanás laꞌixlacatuna ju Jesús.
Chai laꞌixtachaput yuchi ju ixtixcoxtui ju lhacaticurulhni laꞌixlacatunaꞌan ju lapanacni.
23 Pus ju acsnich ju Jesús alactꞌasanilh ju anuch lapanacni chai alacjuni ju chivinti ju ixꞌapumavasalaniputun tuꞌuꞌ.
Chani ju ajuni:
―Ju Satanás jantu lai catixcoxtulh ixtꞌalhacaticurulhni.
24 Tachi chun ju kꞌai lacatꞌun junta lhinajun ju tam kꞌai ucxtin ni quilhmaclhu cajuncalh chai catalaclasayaꞌ ju sia isꞌakstuꞌan pus va caꞌaclayaꞌ.
25 Chai ju tatanumanalh lacachakaꞌ ni va catalasachokolh ixlhiꞌakstuꞌan pus jantu lai vana lakputam catatsuculh.
26 Chai vana va chun ju lhacaticuru.
Ni caꞌatixcoxtulh ju aliꞌin ixtꞌalhacaticurulhni pus tulai tailhiꞌan laꞌixpuꞌucxtin.
Alin ixꞌaclanti ju ixtachaput.
27 Ni xamatiꞌ catanuputulh laꞌixchakaꞌ pumatam jokꞌat ju na tachapun chai camaxtuniputulh ju ixtaxtokni tasqꞌuini ni pꞌulhnan camakchꞌimalh ju anuꞌ jokꞌat.
Acsnicaꞌ ju lai camaxtunilh ju ixtaxtokni ni va jantu lai tamacyajui.
Pus chunch ju ajuni ju lapanacni ju Jesús ni ixꞌamamachakxaniputun ni yuchi ju tꞌalalhajalh ju lhacaticuru.
Yuchi lai lhixcoxtui ju lhacaticurulhni laꞌixlacatunaꞌan ju lapanacni.
Chai tailhiꞌalh ixchivinti.
Ajuni:
28 ―Slivasalh ju iclajunau.
Tachi chun ju talakꞌalhin chai va tuchi macxcai chivinti ju tanajun ju lapanacni laich camacꞌacxanicanaꞌ.
29 Para va tichi chavaich ju macxcai chivinti calhichivinilh ju Spiritu Santu jantu tavanan lai catimacꞌacxanicalh ju anuꞌ alactuꞌunti.
Va camucꞌanikꞌalhicanaꞌ ju ixtalakꞌalhin.
30 Ju Jesús chunch ju ajuni ju lapanacni va ixlacaꞌatalh ni ixtanajunta ni lhacaticuru ju ixpuchꞌalhcatnan ju Jesús.
Ixnati chai isꞌapꞌisekꞌench talakmin ju Jesús
31 Astan tachincha ju isꞌapꞌisekꞌen ju Jesús chaich ju ixnati.
Tataya makspaꞌ chai talhinaulh istꞌasanica ju Jesús.
32 Pus ju lapanacni ju ixtalakavilanalh ixtalakachokoch ju Jesús tajuni:
―Ju minati chai ju miꞌapꞌisekꞌen tapuxcoyan makspaꞌ.
33 Para ju Jesús alackꞌalhtailh.
Alacjuni:
―Tis chavaich ju quinati chai quiꞌapꞌisekꞌen.
34 Chai acsni naulh ju chunch pus ju Jesús alaktsꞌilh ju ixtalakavilanalh ixtalakachoko ju yuchi chai naulh: