Yang aran ni Judas ang nagsulat yang sulat ang naa, duru-durung mga tukayu nang mga Judio atii kanay. Kung bëngatën tung bitalang Hinebreo ay “Judah” ang yay sasang ana ni Jacob ang yay pinamuaran yang namagkaraadi tung nasyun yang Israel. Ug̓aring ilëm kung bëngatën nira tung bitalang Giniriego, ay “Judas” da. Piru tinu pang Judasay w̓asu ang nagsulat yang sulat ang naa? Bëlag̓an ka ti Judas ang atiing nagtraidur tung ni Ginuung Jesus, kung indi, ya ra ti Judas ang sasang putul ni Ginuung Jesus ang sinambit tung Isinulat Ni Mateo 13:55 may tung Isinulat Ni Marcos 6:3.

Yang katuyuan nang nagsulat ay gustu nang magpaaman tung mga tumatalig natëtëngëd tung mga manigtulduk ta kabuklian ang pamagpatumatalig-tumatalig ilëm. Ay ya ray pamagliliw̓utun ang pagturuldukanën tung mga tumatalig ang basi pa ra ilëm maëklan nira yang mga isip nira. Kipurki yang nag̓apapaktëlan nira, kumus tinapnay ra unu tanirang tanan natëtëngëd ilëm tung kanëëman yang Dios ang ibinuluntad na tung nira, ig disir, liw̓ianu ra unu tanirang magpagustu ra ilëm ang magpakasalak. Tutal unu, indi ra unu dilëmën yang Dios buat tung nira. Purisu durug kaimpurtanti tung ni Judas ang pabantayën na ra yang mga tumatalig natëtëngëd tung mga taung atii ug̓ud simpan dang manguntiël ta ustu tung nag̓itulduk nirang dakulung kamali (4). Ay muya, kung indi mangabantay, maumid da tung kalainan ang katulad ka tung mga taung namagkuntra ka tung Dios atiing tukaw (11). Kapurisu yang dapat ang buatën yang mga tumatalig, pabakërën nira yang pagtaralig̓ën nira tung Dios ig yang pagparanangërën nira tung kamatuuran ang ipinag̓intriga tung nira ang para indi ra ëngëd maguyuran yang mga taung atiang mga manigtulduk ta kabuklian (20-21).