Yuung pag̓aningën ang pagmaëpët-ëpët napagsulataw ra tung nuyu ay nag̓agëgmaana yëën ta duru natëtëngëd pariuitang pag̓usuy tung kamatuuran ang liit tung Dios.

2 Ungkuy,

yang nag̓ipag̓ampuu tung Dios para tung nuyu ang padag̓ën-dag̓ënana ra anyang pirmi tung tanan ang pag̓urubraën mu pati paninanguni mu ang pirmi ka tung maayën ang katulad ka tung pagtaralig̓ën mu tung anyang nag̓abalitaanung maayën ka.

3 Nag̓apag̓aningaw ta maning tia ay tung pagkaw̓ut tani yang mga putul tang duma,

durung pisan agkasadya yang isipu natëtëngëd tung ibinalita nira tung yëën ang yawa unu pag̓usuya tung kamatuuran,

bilang asan ka unu nag̓ipaatuay mu yang pasais mu.

4 Anda ray magdëëg ta ikasadya yang isipu ang mabalitaanaw ra nganing natëtëngëd tung maning tung numyung agkaw̓ig̓ënung mga anaw ang yang mga pasais mi asan tung kamatuuran nag̓ipaatuay mi.

5 Ungkuy,

yang pag̓abuat mu talagang atung pisan tung kamatuuran ang nag̓apanangëd ta.

Ay kipurki kada mamansikaw̓ut da nganing asan yang mga putul tang mga tumatalig ang pamagliliw̓utun,

ya ray nag̓apadag̓ën-dag̓ënan mu ta mupia maskin indi mu pa nganing nag̓ailala ang kaisan.

6 Ay kipurki tanira mismu namagbaw̓alitaën da nganing tung mga kaputulan tang sam pundaan tani kung ya pa ag̓ari yang pagpaita mu yang gëgma mu tung nira.

Purisu durug tinlu kung ya ray padayunan mu yang pagparadag̓ën-dag̓ënën mung atia tung mga pagparanawën nirang pamagparakaw̓utun ang katulad ka tung magkabag̓ay ang buatën ta tung kumpurming pagpaturuw̓ulun tung Dios.

7 Dispuis pa,

yang mga putul tang atia,

kada mamagliliw̓utun ang para mamagparakaw̓utun tung mga tau natëtëngëd tung ni Jesu-Cristo,

indi pamagrisibi ta supurta tung bëlag̓an mga tumatalig.

8 Purisu ta yatën ang mga tumatalig kaministiran ang itay magpadag̓ën-dag̓ën tung mga maning tia ug̓ud asanita ra nga sug̓apilay tung pagparakaw̓utun nira yang kamatuuran.

9 Tan taa pa napagpaëkëlaw ra ta sulat tung sam pundaan asan natëtëngëd tung bag̓ay ang atia.

Piru anday pinakaw̓ut na natëtëngëd tung ni Diotrefes ang naang indi kang lag̓i pag̓ilala tung katëngdanan yamën.

Ay ya pa ag̓ari,

yang pag̓asikad na ang tanya ilëm ay tingaraën ang pagmangulu tung sam pundaan.

10 Purisu kung kumaw̓utaw ra nganing asan,

ipatalungaw ra tung anyang ipatuw̓al yang mga ubra-ubra na ang yami nag̓ipagsatsat na tung kadaklan ang pulus tung bukli ang para mararanggaami ilëm.

Bëlag̓an pa ka ëngëd kuntintu tung isip na tia,

ang indi,

nag̓adulangan na pa.

Ay kung may mamansikaw̓ut da nganing ang mga putul tang pamagliliw̓utun,

indi na ra ag̓asikasuën tung sëlëd yang pamalay-w̓alay na ig yang dumang pangalëlyag ang mamag̓asikasu mag̓ampalarën na pa.

Ang pagkatapus kung mamag̓asikasu ra ka ëngëd,

ag̓ityapuiraën na ra ilëm dayun tung sam pundaan.

11 Ungkuy,

indi ta ëngëd usuyun yang malain,

kung indi,

yang usuyun tang pirmi ya ra ilëm yang matinlu.

Ay ya pa ag̓ari,

yang taung pagpadayun tung pagburuatën nang matinlu yay maning pa tung inana ra yang Dios.

Piru yang taung pagpadayun tung pag̓urubraën nang malain,

indi pa ka ëngëd nag̓apagpakirampil ang matuud tung Dios.

12 Kung natëtëngëd tung ni Demetriong atiang pinapag̓ëkëlu yang sulat ang atia,

tanya nag̓akëgngan yang tanan ang mga kaputulan ta tani ig pati yang kamatuuran mismu,

kung mapagbitala ilëm,

magkërëng da ka tung anya ang yang mga pasais na talagang uyun tung pitik na.

Pati yami ëngëd,

pagkërëngami ka tung anya ig nag̓askëan mu ra ka ang kung unu pay nag̓ipagpaingmatuud yamën natëtëngëd tung sasang tau,

talagang matalig̓an mung matuud.

13 Ta nungaynang pag̓impisaw yang pagsurulatënu tung nuyu,

duru pa ka rin ang nag̓aisipung ianing tung nuyu.

Piru numaan anda ray gustuu ang ipabtangu pa tung sulat ang naa.

14 Kung indi,

dakulung sarig̓u ang indi ra ilëm buay mangayaw ra ka ëngëd asan tung nuyu ug̓ud mag̓ëmëtanita sing magkësën.

15 Buinu,

yang nag̓ipag̓ampuu para tung nuyu,

ungkuy,

ang mas pang ikasadya mu yang kaampiran mu tung Dios ang naang baklu.

Yang mga ungkuy ta tani pamagpakikumusta ka tung nuyu asan.

Asta yang mga ungkuy ta asan,

panganingën mu ka sasa may sasa ang yuu pagpakikumustaw ka tung nira asan.