Atii kanay tung timpu ni Juan, may mga manigparakaw̓utun ang pinanuw̓ul nang mamagliliw̓utun tung duma-rumang lugar ang para mamagparakaw̓utun yang Matinlung Balita natëtëngëd tung kalibrian ang pinagtukud ni Ginuung Jesu-Cristo. Ang pagkatapus, pagkaw̓ut nira tung sasang lugar ang may sam pundaan yang mga tumatalig, indi ra rinisibi yang sasang pagmangulu ang yay nag̓aranan tung ni Diotrefes. Maskin pangalëlyag yang dumang mga tumatalig ang mamag̓asikasu tung mga bisitang atia, nag̓atag̓aman nang mag̓ampalarën. Ang pagkatapus kung mamag̓asikasu ra ka ëngëd, ag̓ityapuiraën na ra ilëm dayun tung sam pundaan (10). Ay ya pa ag̓ari, ti Diotrefes ang atia indi kang lag̓i pag̓ilala tung ni Juan. Ay atii pala, yang pag̓asikad na ang tanya ilëm ay tingaraën ang may kalalangan tung sam pundaan ang atia (9). Purisu naisip da ti Juan ang magsulat tung sasang ungkuy nang nag̓aranan tung ni Gayo ang lug̓ud tung sam pundaan ang atia. Tukaw tung tanan dinayaw na natëtëngëd tung pag̓arasikasuën na tung mga manigparakaw̓utun ang atiang pinanuw̓ul na (3-8). Pagkatapus ipinabantay na ra ka dayun ang kung kumaw̓ut da nganing tanya asan tung nira, ipatalunga na ra tung ni Diotrefes ang ipatuw̓al yang mga ubra-ubra nang malalain ang na Juan nag̓ipagsatsat na tung kadaklan ang pulus tung bukli ang para mararangga ilëm tanira (10). Pagkatapus ipinailala na ra dayun tung ni Gayo ti Demetrio ang yay pinapag̓ëkël na yang sulat ang naa ang para risibiën da ni Gayong asikasuën (12).