Yang Yadwang Isinulat Ni JUAN
Yang Intrada Yang Sulat (1-3)
1
1-2 Yuung nagsulat ti Juan ang pinakamaëpët tung mga pamagmaëpët-ëpët tani.
Yang sulat ang atia,
ipinaëkëlu ra tung nuyung sasang baw̓ay asan ang pinilik yang Dios,
kasiraanamu ra ka yang mga ana mu.a
Nag̓amaalamu yëën ta mupia gatëd parariuitang pag̓usuy tung kamatuuran ang liit tung Dios.
Bëlag̓an ilëm yuuy pagmaal tung numyu,
kung indi,
pati yang kumpurming natultul da ka tung kamatuuran ig pag̓usuy,
ya ka,
pamagmaal ka tung numyu.
Yang nag̓ipagmaal yamën tung numyu ay natëtëngëd ilëm tung kamatuuran ang atiang durug kabuilu yang apiktar na tung yatën ig ya ra kay pag̓inëtëg̓an yang mga isip ta ang asta tung sampa.
3 Yang gustuu ang yang Dios ang ya ray nagyaring Ama ta durua ni Jesu-Cristong yay pag̓aningën nang Ana Na,
padayunanita ra nirang paitaan ta kanëëman nirang makabëw̓ërëng ang nunut da ka ta kaildaw nira ig paëyanganita ra ka nira ta paglimëngan yang mga isip ta mintras pagpadayunita ra tung pagparanangërën ta tung kamatuuran may tung paggërëgmaan tang magpurutul.
Yang Nag̓ikasadya Ëngëd Yang Isip Ni Juan (4)
4 Durug sadya yang isipu atiing nabalitaanu ra ang yang mga pag̓urubraën yang mga kaarumanan ming duma asan uyun ang pisan tung kamatuuran ang katulad ka tung itinuw̓ul yang Ama tang Dios tung yatën.
Nag̓apaprusigir Nang Mamagpadayun Tung Paggërëgmaan Nirang Magpurutul (5-6)
5 Kapurisu numanyan may sasang nag̓aingaluku tung numyu asan ang ta yatën ang tanan ang mga tumatalig maggërëgmaanita ëngëd ta ustu.
Bëlag̓an ang mag̓aning ang yang nag̓isulatung atia sasang baklung katuw̓ulan,
kung indi,
ya ra kang lag̓i ay itinuw̓ul yang Dios tung yatën atiing primirung pagtalig ta tung ni Ginuung Jesus.
6 Maning taa yang kamtangan yang ustung paggërëgmaën ang ita mag̓usuy tung kumpurming unu pay nag̓ituw̓ul na tung yatën.
Utru si kung papagbilug̓un ta yang tanan ang nag̓ipanuw̓ul na tung yatën,
ya ra ka man taang ipinagngël tung numyu atiing primirung pagtalig mi tung ni Ginuung Jesus ang ya ray dapat ang tumanën ta.
Nag̓apaamanan Na Natëtëngëd Tung Mga Mandarayang Pamaglua (7-11)
7 Ag̓aningënamu ra yëën ta maning tia ay natëtëngëd duru rang mga mandarayang namaglua.
Yang nag̓itulduk nira tung mga tau ang ti Jesus unu bëlag̓an yang pag̓aningën ang Cristo ig indi ka unu nag̓ingtaung bilug.
Kung tinu pay magtulduk ta maning tia yay sasang mandaraya ang pariu ta sistima yang sasang magpakigbatuk tung ni Ginuung Jesus tung uri ang yay magpa Cristo-cristo.
8 Purisu magbantayamu ta mupia tung mga sarili mi ug̓ud indiamu mawaraan yang pinakabëdlayan mi,
kung indi,
marisibi mi ra ka ëngëd yang maning pa tung sasang primyung nag̓ibaratu yang Dios tung numyu ang andang pisan ay buin na.
9 Kumpurming tinu pay indi ra pagpadayun tung dating nag̓itulduk yamën ang mga apustul sigun tung pagkabëtang yang pag̓aningën ang Cristo,
kung indi,
ya rag pasubraay na,
asan dag pagpaalawid tung Dios.
Piru kumpurming tinu pay pagpadayun tung dating nag̓itulduk yamën yay pagpakigsasa tung pag̓aningën ang Ama durua yang pag̓aningën ang Ana ang yay paglinukutay tung pagkadios.
10 Kapurisu kung tinu pay magkaw̓ut asan tung numyu ang yang nag̓itulduk na bëlag̓an pariu tung dating nag̓itulduk yamën tung numyu natëtëngëd tung pag̓aningën ang Cristo,
indi mi ra ilëm padayunun asan tung mga balay mi.
Indi mi ka nganing saptën ang katulad ka tung pagsarapëtan tang magpurutul.
11 Ay kipurki kung tinu pay magsapët tung nira ta maning tia,
katimbang nang pagpakigdamay ra tung pag̓urubraën nirang atiang malain.
Yang Pagtapusan Yang Sulat (12-13)
12 Maskin duru pa rin ang gustuung ianing tung numyu,
tinimbang-timbangu ra tung isipu ang indi ra ilëm dayununung ipabtang tung sulat ang atia,
kung indi,
dakulung sarig̓u ang mangayaw ka ëngëd asan tung numyu ug̓ud mag̓ërëmëtanita rang magkërësën ug̓ud asan da mag̓ing bug̓us yang kasadyaan tang tanan.
13 Yang tanan ang mga kinasakpan yang sam pundaan tani ang pinagpilik da ka yang Dios ang katulad ka tung numyu pamagpakikumusta tung numyung sam pundaan asan.
Ya ra ilëm tia ay masulatu tung numyu