3 Mga putulung nag̓amaalu ta duru,

duru ra ka rin ang kalëlyag̓ung magsulat tung numyu natëtëngëd tung kalibrian tang naang parariung nalg̓uran ta.

Piru naa pala,

nasimanu ra ang may kaministiranung dakulu ang sulatanamu ra yëën ang para paktëlënamu ra yëën ang magpadayun ka ëngëd tung pag̓urusuyun mi tung kamatuuran natëtëngëd tung ni Ginuung Jesus ang nunut da ka ta pagparakaw̓utun mi tung duma may ruma.

Yang kamatuuran ang naa ya ra kay dapat ang këgngan mi ta mupia tung mga taung pamagtag̓am ta baliskad,

ay ya ra ka man ay ipinagpiar yang Dios tung yatën ang kumpurming binuat nang mga tauan na ang para indi ra ëngëd mag̓uman yang nag̓adapatan na^b.

4 Sanu pa indiamu aningënu ay kipurki may mga tau ra asan ang pamagsag̓usut da tung mga grupu mi ang indi mi ra nabantayan.

Anda tung kuinta nira yang kalëlyag̓an yang Dios.

Yang bukling nag̓itulduk nira,

kumus pinaitaanamu ra yang Dios ta kanëëman nang tinapnay tung diw̓aldi,

ya ra ilëm agbaliskaray nirang buatën ang sasang padatëlan ang yang sasa unung tumatalig,

maskin magpadayun da unu tung pagburuatën nang malalaway,

anday bali unu tung Dios buat.

Maskin nganing ti Ginuu tang Jesu-Cristong yay nanggawad tung nirang nagpakugmatay ang para ultimu ra ilëm din tanya yang pangag̓alënan nira,

ya pay indi nira ag̓ilalaën^d.

Yang mga taung atia,

nabuay ra kang lag̓ing naula tung kasulatan kung ya pa ag̓aring sintinsiaan yang Dios tung kalainan ang maning taa tung magdarasun ang sambitënu^c.

5 Maskin luw̓us dang nag̓aintindian mi yang mga bag̓ay ang naang ag̓ulitënu,

gustuu ilëm ang ipadëmdëm tung numyu kung ya pa ag̓ari yang pagsirintinsiaën yang Dios tung kalainan tung namagpakasalak tung anya atiing tukaw pang mga panimpu.

Padëmdëman mi ra kanay yang nasyun ang Israel ang atiing primiru ang pinagbawi ra ni Yawing ipinagpalua duun tung banwang Egipto.

Piru tung uri,

yang kumpurming namagdiskumpiar tung anya,

pinagsintinsiaan na tung kalainan^e.

6 Padëmdëman mi ra ka yang dumang mga angil ang bëlag ya mamagpadayun tung katëngdanan ang ipiniar yang Dios tung nira,

ya mamamutwan ang para mamagpaklëd da tung anda ëngëd ay kalalabtën nira^f.

Purisu ikinulung da yang Dios duun tung sasang lugar ang duru kang pisan agkakiklëp ig durug kapinitinsia ug̓ud duun da ilëm iëlatay na tung uras ang ipagsintinsia na ëngëd tung nirang pangultimu.

7 Padëmdëman mi ra ka yang mga taung namagtinir duun tung siudad yang Sodoma durua yang Gomora asta tung mga lansangan tung paliw̓ut nira.

Nangasug̓ut da tanira tung ug̓ali yang mga angil ang atii.

Ay namampaklëd da ka tung pangumbaw̓ay may pangunlalii ig yang duma,

laliig baw̓ay,

binaliskad da nira yang natural nira.

Purisu ya ray natëngëran na ang yang mga taung atii pinagsintinsiaan da yang Dios ang pinabungsaran ta apuy^g.

Duun da nga buatay nang sasang mulidu kung ya pa ag̓ari yang pagsintinsia na tung uri tung kumpurming pagpasuag tung kalëlyag̓an na ang tanira duun da iplëkay na tung sasang apuy ang anda ëngëd ang pisan ay kapugdaw-pugdawan nang asta tung sampang anda ëngëd ang pisan ay pagtapusan na^h.

8 Maning kang pisan tia yang pag̓urubraën yang mga manigtulduk ang atiang pamagpakiglakët da asan tung numyu.

Bilang,

kumus pamag̓ambu ra ang tanira unu nag̓apapanalakinëp yang Dios kung unu pay dapat ang buatën nira,

asan da ta pagpaklëd nira tung mga malalaway ang pagburuatën ang asan da ka nga mansaay yang mga pagkatau niraⁱ,

asan da ka ta pagpakuindi nirang indi ra ka ëngëd magpalalang tung may mga kagaëman^j,

pati yang mga aruman ming piniaran yang Dios ang mamagmangulu tung numyu,

imbis galangën nira,

ya rag sawayay nira^k.

9 Piru,

maskin nganing ti Miguel ang sasang angil ang pag̓atuw̓ul yang Dios ang abwat ta katëngdanan,

indi ra ka nganing nagsaway.

Ay atiing pagtinuw̓alay ra tanira ni Satanas tung katalungaan yang Dios natëtëngëd tung tinanguni ni Moises kung tinu pa tung nirang durua ay may kagaëman,

indi nagpabëtang tung sadili na ang tanya may kagaëman nang magsintinsia tung ni Satanas ang puiding insultuën na,

kung indi,

ya ra ilëm ag̓aningay nang,

11 Kanugun tanira!

Durung pisan agkalëbat yang sintinsiang maagmaan nira tung uri natëtëngëd yang nag̓asug̓ut nira ya ra yang ug̓ali ni Cain ang durug kalain^l.

Yang nag̓apagamënan ang pisan ta mga isip nira ya ra kang pisan yang natalangan ni Balaam ang kumus durug kainamlukun ta kuarta,

simpan da rin ang magbuat yang nag̓akdëkan na ra kang lag̓i ang kuntra tung kalëlyag̓an yang Dios^m.

Katulad ka tung ni Core ang nagpakigkuntrang tukaw tung na Moises ni Aaron,

yang mga manigtulduk ang atia,

pamagpakigkuntra ra ka tung mga pamagmaëpët-ëpët tung numyung salëgsang pundaan.

Purisu,

talagang sintinsiaan da ka ëngëd yang Dios tung kalainan ang katulad ka tung binuat na tung na Coreⁿ atiing tukaw pa.

12 Yang mga taung atiang pagturuldukun asan,

kung magpakiglakët da nganing tung uras dang pagsararuanamu rang magpurutul ang asan da ka nag̓ipaitaay mi yang paggërëgmaan ming matinlu^o,

ya ray dapat ang pangamanan mi.

Kipurki kung tung mga binag̓ëng pa ang alëngët dang lumput ipananglitay tanira,

indi mi madipara agkali yang katuyuan nira asan.

Ay yang pagpakisadu nirang atia tung numyu ya ra kay pagparapsawën nira tung tanan ang kalëlyag̓an nira ang andang pisan aman-aman nira ang may turuw̓alën da nira asan.

Anday dumang mag̓isipën nira,

kung indi,

tëëd da ilëm tung mga sadili nira.

Kung tung pagtaraw̓angën ipananglitayu,

mga inutil da tanira ang katulad ka tung mga panganud ang kung kaisan ya ag̓ëlat-ëlatay tang mag̓ëkël ta kuran ang pagkatapus,

sigi ra ilëm ang pakapwas nira tung palët ang maskin dayawraw ra ilëm,

andang pisan ay pakdul na.

Inding pisan mapagpalua ta mga ubra-ubrang nag̓auyunan yang Dios ay sigun tung pagkablag nira tung anyang maning pa tung sasang patay.

Yang kaalimbawaan nira maning pa tung mga ayu ang maskin timpu rang igbururak,

andang pisan ay burak ang mapakinaw̓angan tung nira.

Katulad tung mga ayung napatay ra ang pagkatapus namansiktang da ilëm ang ya ra kag dawalay yang mga lamut nirang miskawan ang indi ra maimung mamurak ang uman,

yang pisan ay kaalimbawaan yang mga taung atia.

Andang pisan ay mataw̓ang nira tung duma kung ya pa ag̓ari magbuat yang magkatama.

13 Katulad tung mga lakun ang darakulu ang indi ra ka ëngëd masuspindi,

yang mga taung atia indi nira ka ëngëd kayanan ta pagsuspindi yang mga kalëlyag̓an nira.

Katulad tung mga putput ang maliligna ang pag̓aëkël-ëkëlan ta mga lakun ang kung sumampa ra nganing tung mga binakayan,

magkarabutwan da ilëm asan yang ligna na,

yay kaalimbawaan yang mga ubra-ubra nirang malalaway ang duru kang pisan agkakaëyak^p.

Dispuis yang mga taung atia,

indi mi ëngëd matalig̓an ang mapakdulanamu nira ta matinlung painunuku kung ya pa ag̓aring mag̓usuyamu tung kalëlyag̓an yang Dios.

Kipurki tanira maning pa tung mga bulalakaw ang anday pirmaminting rumbu nira ang para matalig̓an din ta mga manigsaay.

Purisu may nag̓iëlat da yang Dios tung nirang durung pisan agkakiklëp duun tung impirnu ang asta tung sampa indi ra ka ëngëd mapuklutan nira^q.

14 Dispuis,

yang mga manigtulduk ang naang nag̓ipaamanu tung numyu,

yang pisan ay nag̓atëmëngan yang sasang inulang tukaw ni Maëpët Enoc ang yay sasang apu ni Adan tung dapa-rapa yang kakay na^r.

Mag̓aning ang nagbitala,

17 Piru ta yamung nag̓amaalu ta duru,

padëmdëman mi ra ka yang inula ra kang lag̓i yang mga apustul ang atiing tinuw̓ul ni Ginuu tang Jesu-Cristong magpalikëd yang Matinlung Balita natëtëngëd tung anya asan tung numyu.

18 Pinagpaamananamu rang lag̓i nirang pinag̓aning ang,

20 Piru ta yamung nag̓amaalu ta duru,

maskin maning da tiag kaliwag,

pirmiamung magsarasaan ang magparakëtël-këtëlan ug̓ud asan da magbakëd yang pagparanangërën mi tung kamatuuran ang yay sagradung bitala yang Dios ang nunut da ka ta pagturumanën mi.

Kada mag̓ampuamu ra nganing,

yang Espiritu Santo,

ya ra kay pirming papagmanguluën mi.

21 Landaw ra tung tanan,

padëmdëman ming pirmi yang utang ming kanëëman tung Dios natëtëngëd tung gëgma nang lutuk ang pisan ang ibinuluntad na tung numyu,

mintras pagpakbatamu tung ni Ginuu tang Jesu-Cristong maglëkat ang ya ray uras ang ipag̓ildaw na ëngëd tung yatën ang ipasapënita ra anya tung Dios ang asta tung sampang anda ëngëd ang pisan ay katapus-tapusan na.

22 Alimbawa kung may mga aruman mi asan ang yang mga isip nira midyu tung pagdua-dua ra kung ay pay matuud ang dapat panangdën nira,

kaministiran ang ya ray ildawan mi ta mupiang painunukuan ta matinlu.

23 Ig kung may duma asan ang yang mga isip nira midyu tung ya rang ya rang ipaëkël nira tung maling nag̓itulduk yang mga taung atia,

ya ray tag̓aman ming saklawan ang pabalikën tung kamatuuran ug̓ud malibrian da ka nira yang kalainan ang malambëg̓an da rin nira^u.

Ya ray padërëpan ming bawiën ang katulad ka tung pagbawi mi tung sasang langaw ang dinëëtan da ta apuy ang tung makali yag law̓utay mi.

Bawiën mi tanira ang maning pa tung yag kalaway mi tung apuy.

Ig kung may duma asan ang yang mga isip nira midyu tung ipinaëkël da ka ëngëd nira tung maling nag̓itulduk yang mga taung atia,

kaministiran ang ya pa ka ëngëd ay ildawan mi ang nunut da ka ta dakulung pangaman mi ang muya maumiramu pa tung mga ubra-ubra nirang malalaway ang yay dapat ang panlignaan ming maning pa tung aw̓ël ang kinëtkët da ta mansa.

24 Buinu,

mga putulu,

magkabag̓ay ang pisan ang yay pirming dayawën ta yang Dios ay kipurki yay masarang ang magmanada tung numyu simanyan ang para indiamu maguyuran yang mga manigtulduk ang atiang magpakasalak ang pariu ka tung nira^v.

Ya kay masarang ang magmangulung pirmi tung numyu ta matinlu ang asta kaw̓utun da ilëm yang uras ang ipagpakdëng na tung numyu duun tung katalungaan nang durug kasulaw ang duruamu ra kang pisan agkasadya ang andang pisan ay dapat ang mabangdan na tung numyu.

25 Tanya yay ultimu ilëm ang Dios ang ya ra kay nagtapnay tung yatën ëkël tung pinagtalus ni Ginuu tang Jesu-Cristong nagpakugmatay.

Tëëd mi yang pagkadios na,

durung pisan agkasulaw yang pagkabëtang na,

may pagkaadi nang inding pisan mapasiring-siringan,

yay makagag̓aëm tung tanan ang maskin unu pa man ang bag̓ayay,

kayanan nang ubraën.

Maning kang lag̓i tia yang pagkadios na disti pa atii tung katëbtëw̓an,

pati simanyan,

ang asta ra ilëm tung sampa ang anda ëngëd ang pisan ay katapus-tapusan na.

Talagang matuud ka man tia.