Yang Pagtaralig̓ën Nira Tung Ni Jesus Nag̓ipananglit Na Tung Karirang Maglaksuën Nira (12:1-3)
12
Kapurisu ta yatën ang mga tumatalig simanyan,
yang kaalimbawaan ta,
maning pa tung mga maniglaksu tung karira.
Yang kaalimbawaan yang mga taung atiing nagkarasambitu ta nungayna ang nagpaita yang pagtaralig̓ën nirang bug̓us tung Dios,
maning pa tung gaw̓ung ang pisan tanirang pamagrikudu ang pamagpaniid tung pagralaksuën ta.
Purisu,
magprusigirita tung pagtaralig̓ën ta ang ya ray maning pa tung karirang nag̓ipalaksu yang Dios tung yatën ang asta masapungan ta ra ëngëd.
Maskin unu pay pagpaluw̓ay tung pagtaralig̓ën ta pati yang maskin unu pang kasalananay ang midyu durug pëg̓ët yang awid na tung yatën,
ya ray luw̓us ang ipamlëk ta.
2 Yang pabilug̓an ta ëngëd yang mga isip tang paglaksu tung karirang naa ya ra yang sasang durug tinlung mag̓ugyat tung yatën natëtëngëd tung pagtaralig̓ën tang bug̓us tung Dios ang yay indi na ra ka ëngëd tinëgkaan.
Anday dumang nag̓aaningu,
ya ra ti Jesu-Cristo.
Natëtëngëd tung kasadyaan ang nag̓iëlat yang Dios tung anya,
nag̓agwantang nagpalansang tung krus.
Yang kaëyakan ang napasaran na duun binaliwala na ra ilëm.
Pagkatapus simanyan duun dag kakarung tung tëpad ang pisan yang Dios ampir tung tuu na ang para duun da mangërëngan tung yatën.
3 Ya ray nag̓asambitu ay gustuung yay panëëm-nëëman ta ta maayën kung ya pa ag̓ari yang pag̓aragwantaën na tung pagbaratukun tung anya yang mga taung makinasalananën,
ug̓ud indiita ra magpaluw̓ay ang magtëgka.
Nag̓ipadëmdëm Na Ang Kung Mapasaran Da Nganing Tanira Ta Mga Kaliwag̓an, Asan Da Ka Nga Tadlëngay Yang Dios (12:4-11)
4 Tung pag̓imuras ming panguntiël tung mga taung atiang pamagrëg̓ës tung numyung mamalpas tung ni Jesus,
indi mi pa ka nag̓ipaturuk yang dug̓u mi ang katulad ka tung anya.
5 Ayw̓a,
lipat dang pisan tung mga isip mi yang sasang bitalang nag̓ipagpaktël yang Dios tung mga isip ta ang duunita ra ag̓aningay nang mga ana na?
Ay may sasang napabtang tung kasulatan ang mag̓aning,
“Anaw,
kung tadlëngëna ra nganing ni Yawi ang disiplinaën,
intindiën mu ra ta mupia.
Kung paintindiëna ra nganing anya natëtëngëd tung kamaling binuat mu,
bëlag̓an ang yay padatëlan mung magpaluw̓aya ra ang muya asana ra ilëm tëmëgka.
6 Ay yang kumpurming nag̓agëgmaan na,
ya ra kay magtadlëngën nang magpainunukuan,
ig yang kumpurming agkaw̓ig̓ën nang ana na,
ya ra kay agburdunun na,”
mag̓aninga.
7 Yang nag̓ipag̓agwanta ta tung mga kaliwag̓an ay yay sasang papanaw yang Dios ang panadlëng tung yatën.
Ay asan da tung pagtaradlëngën na nga bilug̓ay ta ang agkaw̓ig̓ënita ra ka man anyang mga ana na.
Ayw̓a,
tinu pay nag̓aintindian tang anaën ang indi ra magtadlëngën ni tatay na?
8 Ay kung indiita ra tadlëngën yang Dios ang pariu tung nag̓abuat na tung tanan ang mga ana na,
anday inaning,
ig disir bëlag̓anita ra mga ana nang matuud,
kung indi,
maning pa tung ita lupaw ra ilëm.
9 Dispuis pa padëmdëman ta ra kanay yang pagpadakul tung yatën yang sadiling mga tatay ta.
Atiing tinadlëngita ra nganing nira,
ginalang ta ra tanira ta mupia.
Purisu mas pang magkabag̓ay rang pisan ang magparanëkitang magpatadlëng tung Ama tang sam bilug duun tung langit ang ya ray nagpaëyang tung yatën yang ipagpangabui tang baklu.
Ay asan da nga tultulay ta yang pagpangabuing uyun tung nag̓auyunan na.
10 Talagang magkabag̓ay rang pisan ang ya ray buatën ta,
ay tëlëngan ta ra ilëm.
Yang pagtaradlëngën yang mga tatay ta tung yatën,
sëlëd ilëm tung pira pa ilëm ang takun,
ig sigun ka ilëm tung nag̓aintindian nirang magkatama.
Piru yang pagtaradlëngën yang Dios tung yatën,
yang pag̓asikad na,
ang ya ikaayënay ta ug̓ud asanita ra ngayap tung ug̓ali nang limpiu.
11 Buinu,
kung papagbilug̓unu ra yang gustuung ianing,
simanyan kada tadlëngënita ra nganing yang Dios,
midyu bëlag̓an sasang ya ikasadyaay ta,
kung indi,
ya ikapungaway ta.
Piru tung uri yang pakaw̓utun na tung yatën ang kumpurming magparanëk ang magrisibi tung pagtaradlëngën nang atia,
asanita ra magluang matinumanën tung kalëlyag̓an na ang magkalimëng dang pisan yang mga kinaisipan ta.
Kung Ya Pa Ag̓aring Maulikan Da Yang Kaluluw̓ayën Nira (12:12-13)
12 Kapurisu yamung kumpurming maning pa tung pamanlungikngik da yang mga kalima mi pati mga tuud mi maning pa tung pamamultang da,
paktëlën mi ra yang mga isip ming magpadayun yang pagtaralig̓ën mi tung ni Ginuung Jesus.
13 Yang maning pa tung dalan ang matadlëng,
ya ra kay padayunan ming usuyun ang asta masapungan mi ug̓ud kung may mga kaarumanan ming duma ang midyu panluw̓ayan da ka tung pagtaralig̓ën nira,
yamung kadaklan mapaitaan mi ta matinlung mulidu ang mapausuyan nira ug̓ud indi ra magpaluntug,
kung indi,
maulikan da ka yang kaluluw̓ayën nirab.
Nag̓ipasanag Na Kung Unu Pay Dapat Ang Mataw̓ang Nira Kung May Mga Aruman Nirang Panluw̓ayan Da Ang Para Malikayan Nira Yang Sasang Durung Pisan Agkaliwag (12:14-17)
14 Yang kalibrian ang pinagtukud ni Jesu-Cristo,
ya rag dëmtay ming pasiguruan ang kasiraanamu rang kang tanan ang magpasiguru.
Bilang yang pagkabag̓ay mi tung Dios ya rag pasiguruay mi ay kipurki kumpurming tinu pay indi ra pinabag̓ay ni Jesu-Cristo tung anya,
indi na ra ëngëd maita yang pirsunal na tung uric.
15 Yang pagpasiguru ming atia,
panuntan mi ra ka ta pagbarantayan ming magpurutul nusias may asan tung numyung tubuan da ta isip nang manalyud da tung kanëëman ang ipinagpaita yang Dios tung yatën ang asanita ra ka man nga tapnayay na.
Nusias may magpatëg̓as dang magdiskumpiar tung ni Jesu-Cristong anda unu ay kalibrian ang maita na tung anya.
Maning pa tung sasang pagtubung makakailu ang pagkatapus yamung kadaklan,
paliwag̓anamu ra anya ta mupia ay ëkël tung anya,
duru rang maumid ang mag̓usuy tung anyad.
16 Mangamanamu ra ta mupia nusias may asan tung numyung tubuan da ta isip nang mamalpas da tung ni Jesu-Cristo.
Pati yang baklung ipinagpakigpaig̓u yang Dios tung yatën ëkël tung anya,
ya ra ilëm ag̓ipabtangay nang anday kuinta na ang katulad ka tung binuat ni Esau atiing tukaw.
Ay yang sasang pudir ang ipinakdul yang Dios tung anya natëtëngëd tung pagkadakulu na ang tung anya ra rin ipapanaway na yang ipinagpakigpaig̓u na tung na apu na ni tatay na,
indi na ra minaal,
kung indi,
ya ra ilëm ipabailuay na ta sa nga mangkukan ka ilëm ang pamangane.
17 Papatandaan mi ta maayën yang paamanung atia tung numyu,
ay kipurki nag̓akdëkan mi ra ka ang atiing pagtaklib da yang pira pang kaldaw,
atiing gustu na rang magpaampu tung ni tatay na ang para pakaayënën yang Dios,
anday naimu na.
Maskin pang durung pag̓aramuy-amuyun nang pagtarangitën,
anda ra ka ëngëd ay rimidyung sarang mabuat na ang para bawiën na pa rin yang pagpabailu na yang pudir yang pagkadakulu na tung ari naf.
Nag̓apapagsunaid Na Yang Dating Patakaran May Yang Baklu Sigun Tung Pagparalëngëtën Yang Mga Tau Tung Dios (12:18-24)
18 Kaministiran ang pakdulan mi ta kantidad na yang nag̓ipagpaamanung atia tung numyu ay kipurki yang pagparalëngëtën mi tung Dios simanyan dakulung pinag̓umanan na tung pagparalëngëtën yang mga kinaampu tang atiing tukaw pa.
Ay atiing pagpalëngët nira tung katalungaan na,
saragpun da tanira duun tung tinënaran yang sasang bukid ang paggug̓uuyan ang Sinai.
Yang tanan ang nagkarainabu duun nabilug̓an da nirang pisan.
Yang bukid ang atii may apuy nang pagdaw̓a-raw̓a.
Akyup ang pisan ta makiklëp.
Durug këtël yang palët ang maning pa tung balyu.
19 May nagngël ka nirang budyung ang durung pisan agkatunul,
pati yang busis mismu yang Dios ang pagbitala tung nira,
ya ra kay nagngël nira.
Pag̓agngël nira,
durung pagpakiildaw nira ang kung maimu ilëm,
indi ra ilëm magpadayun ang magbitala tung nirag.
20 Ay kipurki pinanlëbatan da ta mupia tung sasang urdin yang Dios ang kung tinu pa unu ay malaktëd tung lindiruan ang malikëd ilëm tung bukid ang atia,
maskin ayëp ilëm nira,
dapat unung batwën dang imatayënh.
21 Kumpurming nabandaw tung bukid ang atii,
pinangalipudpuran da ta mupia.
Maski nganing ti Moises ya ra ngabngang mag̓aning,
“Ya ra nga talamtamayu yang kandasung pagpangërël,”
mag̓aningi.
22 Piru simanyan bëlag̓an dang maning tii yang palaksu yang pagparalëngëtën ta tung Dios.
Kung pananglitan ta yang nag̓apalëngtan ta simanyan ya ra yang bukid ang sam bilug ang yay paggug̓uuyan ang Sionj ang ya ray talub yang siudad ang Jerusalem ang duun pa tung langit ang yay pag̓atiniran yang ultimu ilëm ang Dios mismuk.
May mga angil na duun ang pira-pira rang laksa ang pirming pamagpakasadyang pamagdarayawën tung anya.
23 Pati yang intirung kabilug̓an yang mga tauan yang Dios ang pamagsaragpun ka duun ya ra kay nag̓apalëngtan ta.
Yay pinamilik yang Dios ang mag̓ing mga ana nang sadili ang maning pa tung may pagkadakulu nirang tanan,
ay may nag̓iëlat yang Ama nirang ipakdul tung nira ang dakulung pisan yang kantidad nal.
Yang mga aran nira ipinaglista na rang lag̓i nganing tung maning pa tung akta yang siudad ang atii duun tung langitm.
Anday dumang mga tau tia,
kung indi,
ya ra yang atiing baklung nagkarapatay,
inusgaran da kang lag̓i yang Dios ang salu rang pisan tung pagtërëlëngën na ëkël tung pagtalig nirang bug̓us tung ni Jesu-Cristo ig ya ra kay pinasalapay nang pisan tung kaministiran ang masalapayan nira.
Pati yang manig̓usgad ang pinakalandaw ang yay nag̓usgad tung nira ta maning tia ang ya ra ka man yang Dios mismung nag̓imu tung tanan ang mga tau,
ya ra kay nag̓apalëngtan ta.
24 Pati yang nagpabakëd tung baklung patakaran ang naang ipinagpakigpaig̓u yang Dios tung yatën,
ya ra kay nag̓apalëngtan ta.
Anday duma ya ra ti Jesus mismuo ang yang dug̓u na ya ray ipinaturuk na ang para asanita ra nga punasay na tung mga kasalanan ta.
Dispuis yang pagpaturuk nang atii yang dug̓u na,
maning pa tung yay pagpaintindi tung yatën natëtëngëd tung sasang kaayënan ang landaw ang pisan ta timbang kay tung nadapatan yang pagpaturuk ni Abel yang dug̓u yang mga ayëp na ang atiing idinasag nang ipinirisintar tung Diosn.
Yang Ultimung Pagpaaman Na Tung Nirang Indi Ra Ëngëd Magpabëngël Tung Dios Ang Pagpaintindi Tung Nira Natëtëngëd Tung Baklung Patakaran Ang Pinagtukud Ni Jesu-Cristo (12:25-29)
25 Kapurisu mangamanita ra ang indiita ra ëngëd magpabëngël tung Dios ang ya ra kay pagpaintindi tung yatën simanyan natëtëngëd tung baklung ipinagpakigpaig̓u nang naa.
Ay padëmdëman ta ra ilëm kanay yang pinanampëtan yang mga kinaampu tang namagpabëngël tung Dios ang nagpaaman tung nira atiing pagparanëk na duun tung bukid ang atiing nainambitu.
Kung tanira indi nganing nangalibri tung sintinsia na,
ita simanyan,
kung alimbawa,
magpabëngëlita tung anya ang duun tung langit agpagpaaman tung yatën,
talagang mas pang siguradu ang indiita ra ka ëngëd malibri tung sintinsia nap.
26 Kipurki yang busis nang nagpaaman tung nira tung uras ang atii,
pinayëgyëg na yang katanëkanq.
Piru simanyan may sasang pinangakuan nang mag̓aning,
“Payëgyëg̓ënu pa ta minsa,
bëlag̓an da ilëm yang katanëkan,
kung indi,
pati yang kalangitan,”
mag̓aningr.
27 Atiing pag̓aning nang payëgyëg̓ën na pa ta minsa,
asan da ngaintindiay ta ang yang kumpurming inimu nang bëlag̓an pirmaminti,
luw̓us dang mansilagsik ang magkarapëlëk ug̓ud yang kumpurming këën,
ya ra kay magnatis.
28 Kapurisu,
natëtëngëd pinakdulanita ra ka man yang Dios ta pudir tang magpakiugpu tung anyang maggaraëmën tung kaliw̓utan ang baklu ang indi ëngëd ang pisan këmëdëg-këdëg,
ya ëngëd ay pasalamatan ta tung anya ta duru.
Asan da ipapanaway ta yang pagturuuën ta tung anyang talagang mauyunan na ang nunut da ka ta bastanting panggalang ta tung anya ang yang pagkadios nang durung pisan agkasagradu pirming magbaw̓atikal tung mga isip ta.
29 Ay yang Dios ang pag̓atuuan ta bëlag̓an irintrimisën ay kipurki kung masilag da nganing,
maning pa tung sasang apuy ang durug këtël ang pumangan tung tanan ang kumpurming bëlag bag̓ay tung anyas.