4 Padëmdëman ta ra kanay ti Abel.

Natëtëngëd tung pagtalig nang bug̓us tung Dios,

yang idinasag nang ipinirisintar tung anya mas matinlu tung pagtërëlëngën na kay tung ipinirisintar ni Cain.

Natëtëngëd tung pagtalig nang nagdasag,

duun da ngauyunay yang Dios ang suminalu ra tung pagtërëlëngën na ay tung pagdawat na tung ipinirisintar na tung anya duun da ka nga paitaay na ang yay nauyunan na.

Purisu natëtëngëd tung pagtalig nang atii,

puiding aningën ta ang maskin patay ra ka man tanya,

piru katimbang nang nag̓apagbitala pa ka ëngëd tung yatën ëkël tung matinlung mulidung atiang ibinutwan na tung yatën^a.

5 Pariu ka tung ni Enoc.

Natëtëngëd tung pagtalig na tung Dios,

indi ra nagpasar tung kamatayën,

kung indi,

ingkëlan da ilëm yang Dios ta layun.

Purisu indi ra ka nganing nasagyapan ay nagkamaningan da ka man ta maning tii.

Ay atiing indi pa nag̓aëklan,

may idiniklara kang lag̓i yang Dios natëtëngëd tung anya ang napabtang ka tung kasulatan ang tanyay nauyunan na^b.

6 Ig disir asan da ngaintindiay ta ang maskin tinu pang tauay,

indi ra ka ëngëd mauyunan yang Dios kung indi magtalig tung anya.

Ay kipurki kung tinu pay malëlyag ang magpalëngët tung anya,

dapat ang manangëd ang tanya asan ka man ig yay magbalës tung kumpurming pagpadërëp ang pagsagyap tung anya.

7 Maning ka tia tung ni Noe.

Natëtëngëd tung pagtalig nang bug̓us tung Dios,

atiing pagpaaman da tung anya sigun tung sasang magkainabu ang indi pa nag̓aita-ita,

naëyangan da ta ipag̓ëlëd na tung Dios ang pagkatapus,

dayun da kang lag̓ing nagbuat ta salaayan ang durug dakul ang para ya ray pagpalibrian nirang sam pamilya^c.

Tung pagtalig nang maning tia tung Dios,

binuat da yang Dios ang sasang pitik ang ipinagpasunaid na tung kadaklan ang mga taung namagdiskumpiar da ang duun da ka ipatiëlay na yang katadlëngan nang nagsintinsia tung nira.

Yadwa pa,

ëkël tung pagtalig nang atia tung Dios,

asan da ka ngausgaray yang Dios ang salu rang pisan tung pagtërëlëngën na^d.

8 Maning ka tia tung ni Abraham.

Natëtëngëd tung pagtalig na tung Dios,

atiing pagbëtëng na tung isip nang magdistinu duun tung sasang banwang pinangakuan na tung anya,

nanangëd dang nagliit tung sadiling banwa na ag̓ad indi na pa nag̓askëan kung ay pa manganing^e.

9 Natëtëngëd tung pagtalig na tung Dios,

nagpauman da duun tung banwang atiing pinangakuan yang Dios tung anya,

piru yang pagkabëtang na duun maning pa tung sasang dayuan ka ilëm ang anday may anya duun.

Yang tininiran nira yang mga aruman na mga turda ka ilëm ang ya ag̓ipakëtayay ang kada mamagpauman.

Maskin pa nganing ti Isaac ang ana na pati ti Jacob ang apu na ang naglulug̓uran da ka tung pinangakuan yang Dios tung anya,

maning ka ilëm tiang pirmi yang pagkarabëtangën nira duun.

10 Yang ipinag̓agwanta nang nagtinir duun maskin pang maning ka ilëm tia yang pagkabëtang na,

ay yang inlatan na ëngëd ang mëyang ya ra yang sasang siudad ang anday dumang may planu ig may kabuat-buatan,

kung indi,

ya ra yang Dios mismu.

Yay siudad ang durung pisan agkabaw̓akëd yang paniëlan na ig ya ra kay magnatis ang asta tung sampang anda ëngëd ay pagtapusan na.

11 Natëtëngëd tung pagtalig na tung Dios ang pakdulan na ta ana nang sadili,

maskin bakyaw yang kasawa nang ti Sara,

pinaëyangan da ka ëngëd yang Dios ta kaya nang maana,

maskin masyadu ra tiing kamëmëptën nang lampas dang pisan ta idad ang indi ra rin puiding maana^f.

Piru napagtalig da ka ëngëd tung anya ay yang pagpabëtang na tung nagpangaku tung anya yay sasang matalig̓an nang pisan ang magkërëng tung nabitalaan na.

12 Kapurisu tanyang sa nga tauan ilëm ang katimbang nang patay ra kang lag̓i yang tinanguni na,

ya pay namuad tung mga tau ang yang kinadaramëlën nira midyu ra ilëm tung mga dumakël tung langit ubin midyu ra ilëm tung kënay tung mga binakayan ang indi ra mabilang-bilang.

13 Yang sam pamilyang naang nagkarasambitu,

ikinagmatay ra ilëm nira yang pagtaralig̓ën nira tung Dios.

Maskin indi pa nagkarapakdulan na yang pinangakuan na tung nira,

piru midyu tung nakinaw-kinaw rang lag̓i nirang ikinasadya ta duru.

Aminadu ra ka nganing tanira ang maning pa tung mga dayuan ka ilëm ang pamagpalag̓u-lag̓u duun tung banwang atiing tininiran nira.

14 Ay yang mga taung pamagbitala ta maning tia,

pamagpailala ang may nag̓alangkag nirang banwa ang mapagnatisan nira.

15 Kung alimbawa inandëm pa nira yang banwang atiing pinagliitan da nira atiing primiru,

may lugar pa ka rin nira ang para mabalikan pa nira.

16 Piru bëlag ya mamangandëm ang mamagbalik,

ya ra pangyëngët-yëngëtay ang para mangapalg̓ud tung sam bilug ang lugar ang yay mas matinlung matiniran nira,

bilang yang pag̓atiniran ëngëd yang Dios mismu.

Purisu kumus maning da ka man tia yang pagtaralig̓ën nira tung anya,

indi naëyak yang Dios ang aningën nirang yay Dios nira.

Nag̓askëan ta tia ay taniray pinagsimpanan na ta sasang siudad ang ya ray pakigsapënan nira tung anyang asta tung sampa.

17-18 Natëtëngëd tung pagtaralig̓ën ni Abraham ang bug̓us tung Dios,

atiing pagsukda yang Dios tung anya,

pinag̓intriga na tung anya yang ana nang ti Isaac.

Tëëd mi,

tanya mismung pinangakuan yang Dios ang ëkël tung ana nang atiang pinakalusu,

asan da magkatinir ta mga kinaapu-apuan na,

ang pagkatapus ya rang ya rang idasag na!

19 Napag̓intriga yang ana na tung anya,

ay natëtëngëd pinagtimbang-timbang na ra kang lag̓i tung isip na ang maskin mapatay ra yang ana na,

kayanan ka ëngëd yang Dios ang pabuiën si kang uman.

Purisu natëtëngëd tung pagtalig nang atia tung anyang bug̓us,

asan da ka ibalikay na yang ana na tung anya ang katimbang nang napatay ra ka man ang pagkatapus ya si nga bungkaras^g.

20 Pati ti Isaac ang naa,

natëtëngëd tung pagtaralig̓ën na tung Dios ang magkërëng tung pinangakuan na,

ipinag̓ampu na yang mga ana nang ti Jacob durua ni Esau ang pakaayënën yang Dios^h.

21 Pati ti Jacob ang naa,

natëtëngëd tung pagtaralig̓ën na tung Dios ang talagang matuurun na yang pinangakuan na tung anya,

atiing tanya alëngët dang mapatay,

ipinag̓ampu na ra ka yang mga apu nang durua ang yay mga ana ni Jose ang pakaayënën ka yang Diosⁱ.

Baklu napag̓ampu,

ya rag pëpgës tung suyud nang nagtuu tung Dios^j ang nagpasalamat ta dakulung pagpasalamat natëtëngëd tung kaayënan ang pinangakuan na tung mamagsurubli-subli tung anya.

22 Asta ti Joseng naa,

natëtëngëd ka man tung pagtaralig̓ën na tung Dios ang magkërëng tung pinangakuan na,

atiing makali ra kang mapatay,

napagtuyun da ang kung kaw̓utun da nganing yang uras ang ipagliit yang mga masigkanasyun na duun tung Egipto,

kaministiran ang yang tinanguni na,

maskin pang duli na ra ilëm,

ëklan da nira ang para ipalw̓ëng da nira duun tung banwang atiing pinangakuan yang Dios tung nasyun nira.

Ay inula na ra kang lag̓i ang tung uri ta kaldaw mamagliit da tanira duun tung Egipto ang para mamagdistinu ra duun^k.

23 Pati yang mga ginikanan ni Moises ngani,

natëtëngëd tung pagtaralig̓ën nira tung Dios,

atiing ti Moises ipinangana ra,

maskin nagkalalangan da yang Adi ang yang tanan ang mga ana nirang mga Israel ang mga lalii dapat ang pangimatayën,

anday ëlëd nirang naglampas.

Purisu anday dumang binuat nira,

itinaluk da ilëm nira yang mula tung sëlëd tulung bulan ay may nasinyalan da ka nira tung kapastilan na^l.

24 Pati ti Moises ngani,

natëtëngëd tung pagtalig na tung Dios atiing ustu ra tung idad,

iningwara na ra yang pagkabëtang nang abwat ang tanya ana ta sasang prinsisang ana yang Faraon.

25 Ay yang ipinalandaw na bëlag̓an ang tanya magpapsaw tung pagburuatën ta kasalanan ang tung gësyëng uras ka ilëm yang pagparapsawën na,

kung indi,

ang tanya magpakiunung da tung mga masigkanasyun nang mga tauan yang Dios ang nag̓adërëëg-dëëg̓an.

26 Ya ray ipinalusu na ay natëtëngëd pinagtimbang-timbang na ra kang lag̓i tung isip na ang maskin sawayën dang pakaëyakan ta duru natëtëngëd tung pagpakbat na tung pag̓aningën ang Cristo^m,

piru mas maal yang marisibi na asan kay tung magpaumpuk da ilëm ta manggad tung Egipto ang ya ra rin ay ipasubli yang Faraon tung anya.

Yang ipinagtimbang-timbang na ta maning tia,

ay ipinabalay na ra kang lag̓i tung isip na yang kantidad yang iblës yang Dios tung anya tung uri ta kaldaw.

27 Dispuis natëtëngëd tung pagtaralig̓ën na tung Dios,

nagliit da duun tung Egipto ang anday ëlëd na maskin duru rang kasisilag̓ën yang Adi tung anya.

Pinatëntën na ra ilëm yang isip nang magpadayun ay yang Dios ang indig dakatën ta mata ya ray pirming nag̓apabilug̓an ta isip na.

28 Natëtëngëd ka man tung pagtalig na tung Dios ang yay magpalibri tung mga tauan na,

napagtukud da ta sasang silibraën nirang sang nasyun ang ya ray pag̓aningën ang Taklib.

Nagkalalangan da ka tung nira ang mamangimatay ra tung mga karniru nira ang pagkatapus yang dug̓u na ya ray ibag̓id nira tung pilariti may ambaan yang mga purta yang mga balay nira.

Ya ray buatën nira ug̓ud kung kumaw̓ut da nganing yang sasang angil ang tinuw̓ul yang Dios ang magpangimatay tung tanan ang mga pangulung lalii duun tung Egipto,

panakliw̓an na ra ilëm yang mga balay nirang pinamag̓iran ta dug̓uⁿ.

29 Dispuis natëtëngëd ka man tung pagtaralig̓ën nirang mga kinaampu ta tung Dios,

nangapanaw ra duun tung kakngaan yang tëëb ang atiang pag̓aningën ang “Mapula” ang asta nangatindak da ang yang pinanawan nirang atii langung tanëk.

Piru yang mga tag̓a Egiptong namagrutus tung nira,

atiing namansitag̓am dang mamagpanaw ka duun,

pinanampëkan da tanira yang tëëb ang nagbinalikay ra ang asta nagkaralëmës da ilëm tanirang tanan^o.

30 Dispuis natëtëngëd ka man tung pagtaralig̓ën nira tung Dios,

atiing pagliliw̓utun nira duun tung siudad yang Jerico tung sëlëd pitung kaldaw,

tung yapitu unaw̓is ya ra mansiktang yang mga padir tung paliw̓ut yang siudad ang atii^p.

31 Dispuis pati ti Rahab ang yay sasang baw̓ay ang tag̓a duun ang yang nag̓ipangita na ra rin pagpagamit yang sadili na,

ëkël tung pagtalig na tung matuud ang Dios,

indi ra naumid tung kalainan ang nalambëg̓an yang kadaklan ang mga masigkasiudad nang namagpasuag tung Dios.

Ay ipinabistu na yang pagtaralig̓ën na tung Dios ëkël tung pag̓arasikasuën na ta matinlu tung mga tiktik ang pinanuw̓ul ni Josuë^q.

32 Kung tung bag̓ay,

dakëlë pa yang mga kinaampu tang nagtalig ang bug̓us tung Dios ang gustuu pa ka rin ang panambitën yang mga kapanawan nira ang katulad ka tung ni Gideon,

tung ni Barak,

tung ni Samson,

tung ni Jefte,

tung ni David,

tung ni Samuel^r may tung namagdarasun-dasun tung ni Samuel ang pinanalig̓an ka yang Dios ang magpadapat yang bitala na.

Ug̓aring ilëm,

midyu agkampus-kampusunaw ra ta uras ang ipag̓inambitu yang palaksu yang pagtaralig̓ën nirang tanan.

33 Yang mga taung mga maning tia,

natëtëngëd tung pagtaralig̓ën ka nirang bug̓us tung Dios,

maning taa yang mga binuat-buatan nira.

May asan da ta nagpakiggira tung duma-rumang inadian ang asta pinandëëg da nira yang mga kuntrariu nira.

May asan da ka ta durug katadlëng yang pag̓urusgarën nira tung mga kinasakpan nirang anday dapig tung duw̓ali may duw̓ali.

May asan da ka ta namatuuran da yang mga pinangakuan yang Dios.

May asan da ka ta nanalunga tung mga liun ang mamakta ra rin tung nira ang pagkatapus tinakmëd da ilëm yang Dios yang nganga nira^s.

34 May asan da ka ta indi ra nagkarasiruk tung apuy ang puirti yang pagdaw̓a-raw̓a na^t.

May asan da ka ta nagkaralibri tung mga kuntrariu nirang mamug̓us da rin tung mga dikël nira.

May asan da ka ta maskin pinanluluw̓ayan pa,

pinabalikan da ka ëngëd yang Dios ta këtël nirang mamaningayaw tung gira ang asta namandëëg da dayun tung mga sundalung tag̓a duma-rumang nasyun.

35 May mga baw̓ay pa nganing ang natëtëngëd tung pagtaralig̓ën nira tung Dios,

pinabalikan na ra tung mga minatay nira ang ya si kay binwi nang uman^u.

Ug̓aring may duma kang pinag̓anut da ta mupia ang asta ya ray napatayan nira natëtëngëd indi ra ëngëd nampauyun tung kundisiun ang itindul tung nira ang basta manalyud da tung Dios,

asan da malibri.

Ay yang ipinalandaw nira ang tung uri pabungkarasën yang Dios ang yang mabtangan nira mas matinlu kay tung malibri ra rin tung kamatayën ang atia.

36 May asan da ka ta pinagtiradaan ta mga bitalang malëlbat ang nunut da ka ta pag̓aplit ta latigu.

May asan da ka ta idinasëk tung kalabus ang yag këkëdkëd ta kadina tung kakay may tung kalima^v.

37 May asan kang pinagbatu ang asta ya ray napatayan nira^w.

May asan da ka ta linag̓aring simbung^x.

May asan da ka ta pinapug̓usan ta dikël nira.

May asan da ka ta pagkabëtang ang durung pisan agkaalang-alang ang pirming nag̓adëëg-dëëg̓an ang nag̓apapinitinsiaan ta duma ang ya ra kay ipinagpalag̓u-lag̓u ra ilëm nira ang yang mga suut nira ulit da ilëm ta karniru ubin kambing,

yang kaliliwag̓ën nirang subra^y.

38 Bëlag̓an bag̓ay tanira tung kaliw̓utan ang naa ang yang sistima na yay pagpaguyuran yang kadaklan ang pamagpasuag tung kalëlyag̓an yang Dios.

Purisu duun da ilëm namagpalag̓u-lag̓ung namaglaktëd-laktëd tung banwang kapas may duun tung mga kabukiran asta tung mga lëyang ubin mga bug̓ang man ang ya ray pinantalukan nira.

39 Yang tanan ang mga taung atiang nagkarasambitu,

maskin dinayaw ra ka man yang Dios ta mupia natëtëngëd tung pagtaralig̓ën nirang bug̓us tung anya,

piru indi pa ka nangarisibi yang sasang kaayënan ang pinangakuan yang Dios.

40 Ay kipurki ta yatën ang nag̓auri tung nira,

pinagsimpananita ra kang lag̓i anya ta sasang may kantidad nang inding pisan mapasiring-siringan.

Anday dumang pag̓asikad na,

ang indi,

baklu ra pasalapayay na tanirang mamag̓ing sukat dang pisan tung planu na ang dërënganita ra kang magkasira-siraan ang tanan.