Bistu Ra Ang Indi Masalapay Yang Dating Patakaran Gatëd Ya Ra Ag̓ulit-ulitay Yang Pagparadasag̓ën Yang Mga Tau (10:1-4)
10
Padëmdëman ta ra kanay yang sasang tima ang sinambitu ta nungaynaa.
Yang dating patakaran ang atiang ipinatiël tung mga katuw̓ulan,
yang kaalimbawaan na,
maning pa tung sasang ulung ka ilëm ang yay palaskaw yang kaayënan ang magkakaw̓ut.
Bëlag̓an ang mag̓aning ang ya ra mismu yang kaayënan ang atia.
Yang pagparadasag̓ën yang mga tau ta mga ayëp ang ya ra ag̓ulit-ulitay nira tung takun-takun ang asta tung kumpurmi,
indi ra ka ëngëd maimu ang asan da nga liwayay yang dalan ang pagpalëngtan nira tung Dios.
2 Kung asan da nga liwayay ang matuud,
intunsis napukis da rin yang pagparadasag̓ën nirang atia ay natëtëngëd kung pinagpunasan dang pisan yang Dios tung minsa ilëm ang pagpadasag nira,
indi ra rin agbasulun ta mga painu-inu nira natëtëngëd tung binuatan nirang mga kasalanan.
3 Kung indi,
yang nag̓ainabu tung pagparadasag̓ën nirang maning tia,
takun-takun asan da nga padëmdëmay tanira tung mga kasalanan nira.
4 Ay ya pa ag̓ari,
basta dug̓u ta mga sinday ta baka ubin kambing yang nag̓ipaturuk ang para iprisintar tung Dios,
indi ka ëngëd maimu ang asan da nga punasay ang pisan yang mga tau tung mga kasalanan nira.
Yang Pagdarasag̓ën Ang Ya Ag̓ulit-ulitay Pinaklian Da Ta Sam Bilug Ilëm Ang Idinasag (10:5-10)
5 Kapurisu kumus maning da tia,
atiing pag̓ingtaung bilug yang pag̓aningën ang Cristo taa tung kaliw̓utan ang naa,
may sasang sinambit na tung Dios natëtëngëd tung sadiling tinanguni na ang yay idasag nang iprisintar tung anya.
Yay naulang tukaw pa ang pagkatapus napabtang tung kasulatan ang mag̓aning,
“Bëlag̓an yang mga ayëp ang atiang nag̓ipandasag pati mga igparasalamat ang nag̓iprisintar tung nuyu ang ya ëngëd ay nalëlyag̓an mu,
kung indi,
sinimpananaw ra nuyu ta tinanguniung bilug.
6 Maskin yang mga ayëp ang atiang nag̓ipandasag ang nag̓ikuw̓ul tung apuy pati yang nag̓idasag ang para tung pagkamakinasalananën yang pagpadasag,
bëlag̓an ang mag̓aning ang ya ëngëd ay nauyunan mu.
7 Buinu,
Ampuanung Dios,
naniaw ra.
Simpanaw rang magtuman yang nag̓alëlyag̓an mung yay buatënu ang katulad ka tung isinulat tung kasulatan ang nag̓adadapat tung yëën,”
ag̓aaningb.
8 Ta,
tëlëngan mi.
Tung primirung aning na,
yang mga ayëp unung atiang nag̓ipandasag pati mga igparasalamat ang nag̓iprisintar tung Dios asta yang mga ayëp ang atiang nag̓ipandasag ang ya ag̓ikuw̓ulay tung apuy may yang nag̓idasag para tung pagkamakinasalananën yang pagpadasag,
maskin uyun ka man tung napabtang tung katuw̓ulan,
piru bëlag̓an unu ang ya ëngëd ay nalëlyag̓an ang pisan yang Dios.
9 Pagkatapus may sugpat nang bitala ang tanya unu asan da,
simpan dang magtuman yang nag̓alëlyag̓an yang Dios ang yay buatën na.
Intunsis masadlaw ra yang gustu nang ianing,
ang yang dating patakaran asan da ipabtangay nang imbalidu ra ug̓ud paklian na ta sam bilug.
10 Purisu natëtëngëd tung kalëlyag̓an yang Dios ang atiing tinuman na,
asanita ra nga pabag̓ayay na tung Dios natëtëngëd tung pag̓intriga na tung sadiling tinanguni na tung anyang minsa ilëm ang anda ray ministir ang maumanan na pa.
Yang Dating Mga Pari Pinaklian Da Ka Ta Sasang Paring Sam Bilug Ilëm Ang Ya Rag Kakarung Tung Tëpad Yang Dios Ampir Tung Tuu Na (10:11-14)
11 Dispuis tung dating patakaran,
yang pusisiun yang mga paring pamanirbian,
sasa may sasa tung nira,
yag këkdëng ang pagdasag,
ang pariu-pariu ka ilëm yang nag̓idasag nirang nag̓iprisintar tung Dios ang ya ra ag̓ulit-ulitay nira tung kaldaw-kaldaw,
ang pagkatapus anda ra ka ëngëd ay kinaimuan na ang para asan da rin nga punasay yang mga tau tung mga kasalanan nira.
12 Piru yang paring naang nag̓aaningu,
minsa ilëm yang pagdasag na yang sadili na mismu ang para asan da nga punasay yang mga tau tung mga kasalanan nira ang yang kantidad yang anyang pagdasag indi ra ka ëngëd magbaluy ang asta tung kumpurmi.
Yang pagdasag nang atia kinumpurmian da yang Dios ay pinakarung na ra tanya tung tëpad nang pisan ang ampir tung tuu na ang para kasiraan da ka tanirang mamaggaraëmën.
13 Mag̓impisa pa tii ang asta simanyan duun da tanyag pag̓ëlat tung uras ang yang kumpurming pagkuntra tung anya ipabtang dang pisan yang Dios tung tarampakan yang kakay na.
14 Talagang indi ra ka ëngëd maplëk yang kantidad yang pagdasag nang atia,
ay kipurki natëtëngëd ilëm tung pag̓intriga na yang sadili na tung Dios ang minsa ilëm,
kumpurming tinu pay ipabag̓ay na tung anya,
sukat dang pisan ang magdiritsyung magpalëngët tung anya ang asta tung sampac.
Kumus Kumplitu Rang Pisan Yang Baklung Patakaran, Anda Ray Ministir Ang May Idasag Pang Duma (10:15-18)
15 Kidispuis pa pati nganing yang Espiritu Santo,
pagpaingmatuud da ka tung yatën ang yang pagpakugmatay ni Jesu-Cristo kumplitu rang pisan ang anday kulang.
Nag̓askëan ta tia ay may sasang pinangakuan yang Dios ang ipinagpasulat nang tukaw.
Yang primirung aning na,
mag̓aning,
16 “Maning taa yang palaksu yang baklung patakaran ang ipagpakigpaig̓uu tung nira.
Magpanluakaw yang mga katuw̓ulanu tung mga kinaisipan nira,”
ag̓aaningd.
17 Bëlag̓an ilëm ya tiay pinangakuan na,
kung indi,
may isinugpat na pa kang sam bilug ang maning taa:
“Indi ra ka ëngëd ang pisan dëmdëmënung uman yang mga kasalanan ang nagkarabuat nira,”
mag̓aninge.
18 Ig disir,
basta pinagpatawad da yang Dios yang mga tau tung mga kasalanan nira ang nunut da ka ta panlipat na,
anda rang pisan ay ministir ang may duma pang idasag ang para asan da ka rin nga kuat yang pagkamakinasalananën nira.
Tulung Bag̓ay Ang Nag̓ipagpaprusigir Na Tung Nira (10:19-25)
19 Kapurisu mga putulu,
may kabakëran tang magpalëngët tung Dios ang diritsyu natëtëngëd ilëm tung pagpaturuk ni Jesus yang dug̓u na para tung yatën.
Kung ëklan ta tung pananglit tung turdang atiing pinagtuuan pa rin tung Dios ang tukaw,
katimbang nang liw̓ianuita rang magpaklëd tung kuartung atiing pag̓aningën ang pinakasagradu ang ya ra rin ay pinagtiniran ëngëd yang Dios.
20 Maning pa tung liniwayanita ra anya ta baklung dalan ang yay pag̓aralëngëtan ta yang Dios,
bilang tanya ra mismu yang dalan natëtëngëd nabui si kang uman.
Kung ipananglit ta tung kurtinang atiing pinagsalag̓a tung pinagtiniran ëngëd yang Dios atii kanay,
linapusan na rang nagpaklëd atiing pagpakugmatay na.
21-22 Purisu kumus may sasa rang paring indi mapasiring-siringan ang ya ray pagmangulu tung pamalay-w̓alay yang Diosf,
magpalëngëtita ra ëngëd ang pirmi tung Dios ang bilug yang isip ta tung anya ig mabakëd ka yang pagtalig ta tung anya.
Sarang ang mapagpalëngëtita tung anya natëtëngëd pinagpunasanita ra ni Jesus tung mga kasalanan ang nagkarabuat ta ang asan da ka nga tabtab yang pag̓irimasulun yang mga painu-inu ta tung yatën.
Kuintaita ra dinig̓u tung waing piskan-piskanang.
23 Ig yadwa pa,
kaministiran ang pirming pabilug̓an ta ëngëd ta mga isip ta yang kaayënan ang pinangakuan na ang yay nag̓ipagpakisëw̓at ta ang katulad ka tung nag̓ipag̓ubligar ta kang lag̓i tung mga kaarumanan ta.
Indi ta ëngëd pagpalug̓akan yang pagtaralig̓ën ta ay natëtëngëd yang nagpangaku tung yatën talagang yay matalig̓an tang magkërëng tung nabitalaan na.
24 Ig yaklu pa,
magdërëmdëmanitang magparakëtël-këtëlan ug̓ud asan da mas pang magtinlu yang paggërëgmaan tang magpurutul pati yang mga pag̓urubraën ta.
25 Kapurisu indi ta ra ëngëd pagpaw̓ayaan yang pagsaragpun-sagpun tang magpurutul tung ni Ginuung Jesus ang katulad ka tung duma ang naanad da tung sistima nirang atiang paw̓aya-w̓ayaën.
Kung indi,
kung magsaragpunita ra nganing,
magparakëtël-këtëlanita ta kinaisipan may kinaisipan sigun tung pagtaralig̓ën ta tung ni Ginuu ta.
Kapin da ëngëd ang ya ray padërëpan ta naang midyu may nag̓asiman ta ra ka ang nag̓alëngët dang nag̓alëngët yang uras ang ipaglëkat ni Ginuu ta.
Nag̓apaamanan Na Tanira Ang Indi Ëngëd Mamungkiat Ang Manalyud Tung Baklung Ipinagpakigpaig̓u Ang Tinukud Ni Jesu-Cristong Nagpakugmatay (10:26-31)
26 Ag̓aningënamu ra yëën ta maning tia,
ay kung nabilug̓an ta ra yang kamatuuran natëtëngëd tung Baklung Ipinagpakigpaig̓u yang Dios ëkël tung ni Jesu-Cristong nagpakugmatay,
ang pagkatapus baliwalaën ta ra ilëm tung isip tang panalyuran,
tay anda ray dumang puiding idasag pa ang para asanita ra rin nga patawaray yang Dios tung mga kasalanan tah.
27 Kung indi,
anda ray dumang pakaw̓utun yang pamungkiat ta,
kung indi,
balayanita ra ta ëlëd tang durung pag̓ëlat tung uras ang ipagsintinsia yang Dios tung yatën tung kalainan.
Ay yang sintinsiang atia,
kung dumangat da nganing tung kumpurming tinu pay pagkuntra tung Dios,
yang kaalimbawaan na,
maning pa tung sasang apuy ang durug puirsang pumangan.
28 Dëmdëmën ta ra kanay yang napabtang tung kasulatan natëtëngëd tung malambëg̓an yang sasang taung ëngëd nang naglikëd tung dating ipinagpakigpaig̓u ang atiing ipinagpaintindi ni Moises tung nasyun ta atiing tukaw.
Indi ra ëngëd maildawan,
kung indi,
imatayën da ka ëngëd basta may durua ubin tulu nga tauan ang sasay diklara nirang manistigusi.
29 Kung maning tia yang sintinsiang nalambëg̓an yang sasang taung naglikëd tung dating ipinagpakigpaig̓u,
tung pag̓intindi mi,
unu ra ilëm w̓asu ay mabtangan yang sasang tau ang mismu yang pag̓aningën ang Ana Yang Dios ya pa kay pinanambingan na ang maning pa tung pinaglikëd-likëran nang pinagtëg̓ëd-tëg̓ëd ang anda ëngëd ay kuinta na?
Unu ra ilëm basu ay panampëtan yang taung atia ang yang dug̓u mismung ipinaturuk ni Ginuung Jesus ya ka pa man ay pinangaasan nang ibinitalang pastikular ka ilëm?
Ang pagkatapus yang dug̓ung atia ya pa ka man ay nagpabakëdj tung baklung patakaran ang ipinagpakigpaig̓u yang Dios ang asan da ka rin tanya nga pabag̓ayay tung anya!
Unu ra ilëm basu ay pakaw̓utun yang taung atia ang yang Espiritu Santo mismung nagtandëg tung isip na natëtëngëd tung kanëëman yang Dios kung ya pa ag̓aring mapalg̓uran na,
ya ka pa man ay pinaginsultu na?
Anday dumang mabtangan yang taung maning tia,
kung indi,
bag̓ay ang pisan tung anya ang yay sintinsiaan ta mas malbat kay tung ipinakdul tung sam bilug ang naglikëd tung dating patakaran atiing tukaw.
30 Nag̓asiguru tang talagang yay dangatën na tia,
ay nag̓askëan ta kung tinu pay may bitalang maning taa:
“Yuu mismu yang mangimalësan tung kumpurming nagbatuk tung yëën.
Yuu yang magpakdul tung anya yang sintinsiang bag̓ay ang pisan tung anya,”
ag̓aaningk.
May sam bilug pang maning taa yang ibinitala na:
“Yang mga taung pagpailalang tanira unu mga tauanu buat,
kapin da ëngëd yay papanuw̓alënu,”
ag̓aaningl.
31 Talagang makakaëlëd ka man ang pisan yang sintinsiang ipakdul yang Dios ang makagag̓aëm tung kumpurming mamungkiat dang manalyud tung Baklung Ipinagpakigpaig̓u nang tinukud ni Jesu-Cristo.
Nag̓apadëmdëm Na Tanira Kung Unu Pag Kabakëd Yang Pagtaralig̓ën Nira Tung Ni Ginuung Jesus Atiing Primiru Ang Yay Kaministiran Nirang Padayunan Ka Ëngëd (10:32-39)
32 Ug̓aring,
maskin nag̓apagbitalaaw ra ta maning tia,
mupia pa,
padëmdëman mi ra kanay atiing primiru ang bakluamu pa ka ilëm pinasanag̓an yang Dios natëtëngëd tung ni Jesu-Cristo ang pagkatapus tanya ra ka dayun ay tinalig̓an ming magtapnay tung numyu.
Durung kaliwag̓an ang mga malëlbat ang napasaran mi arangan da ilëm tung pagtaralig̓ën mi tung anya.
Piru indiamu ra ka ëngëd nagpaluw̓ay,
kung indi,
inagwantaan mi ra ka ëngëd yang tanan ang atia.
33 Kung kaisan pinag̓insultuamu ra ka ta duma ang pagkatapus dayunamu ra ka nirang pinagdëëg-dëëg̓an ang para asanamu ra nga pakaëyakay nira tung publiku.
Kung kaisan nadamayamu ra ka tung mga pinitinsia natëtëngëd tung pagpakiunung mi tung mga kaarumanan ming nag̓apasaran da ka ta maning ka tia.
34 Ay naildawamu ra tung mga kaarumanan ming duma ang nagkarakalabus sigun tung pagtaralig̓ën nira tung ni Ginuung Jesus.
Yadwa pa atiing kinalawanamu ra ta mga kaayënan ang nabtang tung pudir mi,
binaliwala mi ra ka ilëm ang masadya pa ka ëngëd yang mga kinaisipan mi,
ay natëtëngëd nakdëkan mi ra ang may nag̓iëlat tung numyung kaayënan ang mas pang matinlu ang ya ra kay magnatis ang asta tung sampa.
35 Kapurisu kumus napasaran mi ra yang mga maning tia,
kung sampëtanamu si ngani,
indiamu ra ëngëd magpatalaw ang mamlëk tung pagtaralig̓ën mi tung ni Ginuu ta.
Kipurki kung patëntënën mi ra yang mga isip mi,
may pakaw̓utun na ka ëngëd ang durung pisan agkatinlu ang ya ray iblës yang Dios tung numyu.
36 Kaministiran ang yag padayunay mi yang pag̓aragwantaën mi ug̓ud mapagtumanamu ra yang kalëlyag̓an yang Dios ang asanamu ra ka nga pakdulay na yang pinangakuan na.
37 Ay padëmdëman mi ra ilëm yang sasang inaning yang Dios ang napabtang tung kasulatan ang mag̓aning,
“Gësyë ra ilëm ang uras,
kumaw̓ut da ka ëngëd ang kumaw̓ut yang nag̓aëlatan ming maglëkat.
Indi ra ka ëngëd magpaërëk-ërëkm.
38 Yang taung salu ra tung pagtërëlëngënu yay mapagpasapën tung yëën ang asta tung sampa ëkël tung pagtaralig̓ën nang mabakëd tung yëënn.
Ug̓aring,
kung tinu pay magpatalaw tung isip nang asta mamlëk da tung pagtaralig̓ën na tung yëën,
yuu ra mismu ay mangaskas tung anya,”
ag̓aaningo.
39 Piru ta yatën,
bëlag itag pagpatalaw ang asanita ra rin nga lambëg tung kadiaduan ang anday katapusan na,
kung indi,
ita pa ka ëngëd agpagpadayun tung pagtaralig̓ën ta tung ni Jesus ang asan da ka nga siguruay ta yang kalibrian ta.