Natëtëngëd Tung Pagkarabëtangën Yang Pagtuuan Ang Dati (9:1-5)
9
1-2 Balikanu ra kanay ang sugpatan yang gustuung ianing natëtëngëd tung dating patakaran ang ipinagpakigpaig̓u yang Dios tung mga kinaampu tang tukaw.
May mga urdinansang ipinausuy na tung nira sigun tung pagturuuën nira tung anya.
May sasa kang pagtuuan nira tung anyang may turdang ipinakëtay ang bag̓ay ilëm taa tung kaliw̓utan ang naaa.
Yang primirung kuartung paraklëran,
yay pag̓aningën ang Sagradu.
Duun agbëbtang yang sasang parabdungan ta kaasb may sasa kang lamisaan ang duun ag̓ipabtangay yang mga tinapay ang ya ag̓iprisintaray tung Diosc.
3 Dispuis duun tung duw̓ali yang sam bilug ang kurtinang nag̓ipagsalag̓a,
may sam bilug pa ka ang kuartung yay pag̓aningën ang kuartung pinakasagradud.
4 Duun tung kuartung sagradu ang ampir tung kurtinang atii may midyu lamisaan ka ang pinakalupkupan ta bulawan ang yay parataw̓ukan ta mga paamute.
Duun tung kaklëran yang kuartung atiing sam bilug ang yay pinakasagradu,
may sasa kang baul ang yay sasang pananglit tung dating ipinagpakigpaig̓u ang atii.
Pinakalupkupan ka ta bulawan.
Duun tung adalëm yang baul ang atii,
may sasang tiw̓ud ang bulawan ka ang may bëtang nang pag̓aningën ang manaf.
Asan ka yag lulg̓ud yang bastun ang atiing ginamit ni Aaron ang nanapiring atiing tukawg asta yang duruang pidasung batung tapik ang yay pinagguritan yang mga katuw̓ulan yang Diosh.
5 Kidispuis pa tung takëp yang baul ang atii,
may durua nga bultuan ang ipinasuad tung pag̓aningën ang “kirubin”i ang pakpakan,
ang kung kaisan duun agpagpaita yang Dios yang kasusulawën na.
Yang pakpak nira yag biw̓itad ang nag̓aakmu ang para malandungan yang takëp na ang yay pagwislikan ta dug̓u ta mga ayëp ang para duun da nga sagangay yang kasisilag̓ën yang Dios tung mga tau natëtëngëd tung pagpakasalak nira tung anya.
Duru pa kang mga pasikut-sikut nang gustuu pa ka rin ang ipasanag tung numyu,
piru bëlag̓an pa numaan.
Mintras May Kadayunan Pa Yang Dating Pagturuuën, Indi Pa Ka Ëngëd Mapagparampil Yang Mga Tau Tung Dios (9:6-10)
6 Taa,
simanyan kumus maning da tia yang pagkarabëtangën yang pagtuuan nirang atii,
maning taa yang pag̓urubraën yang mga pari duun.
Kaldaw-kaldaw pamagpaklëd tung primirung kuartu ang para tumanën da nira yang mga urdinansang itinuw̓ul yang Dios tung niraj.
7 Piru duun tung kuartung atiing sam bilug,
tung sëlëd san takun,
minsa ilëm ang mapaklëran ig sulaminting mapagpaklëd duun,
ya ilëm yang paring pinakalandaw.
Dispuis tung pagpaklëd na duun,
indi maimu kung anday ëkël nang dug̓u ang ya ray iprisintar na tung Dios para tung sadiling kasalanan na mismu ig para tung mga kasalanan kang nagkarabuat yang mga masigkanasyun na ang bëlag̓an ëngëd nirak.
8 Ëkël tung palaksung atia,
duun dag pagpailala yang Espiritu Santo tung yatën ang mintras may kadayunan pa yang dating pagtuuan ang atia pati yang dating ipinagpakigpaig̓u ang yay paniëlan na,
indi pa ag̓ipagpabunayag yang Dios kung ya pa ag̓aring mapaklëran yang mga tau yang kuartung pag̓aningën ang pinakasagradu.
9 Bilang yang pagtuuan ang atia sasang pananglit ang tung panimpu tang naa nag̓atëmëng.
Duun da ngaintindiay ta ang yang mga taung pamagtuu asan,
maskin pamagpakdul ta mga igparasalamat nira tung anya ang nunut da ka ta pagpadasag nira ta mga ayëp ang para iprisintar yang pari tung anya,
piru tung pagturuuën nirang maning tia,
indi ra ka ëngëd nag̓alinaynayan yang mga painu-inu nirang pag̓imasul tung nira natëtëngëd tung nagkarabuat nirang malalain.
10 Ay ya pa ag̓ari,
yang mga urdinansang atiang nag̓usuyun nira,
anday dumang nag̓adapatan na,
kung indi,
tëëd ilëm tung nag̓ibawal ang mga palanganën pati mga irinëmën may tung pagrilimpiuën nira tung sari-saring mga bag̓ay ang yay nag̓ipatuman yang Dios tung nira ang asta kaw̓utun da yang uras ang ipagpakli na ta baklung patakaran.
Nag̓apagpasunaid Na Yang Dug̓u Ni Jesus May Yang Dug̓u Yang Mga Ayëp (9:11-14)
11 Ang pagkatapus numanyan ti Jesu-Cristo naglua rang paring pinakalandaw ang ya ray pag̓ëkël tung mga matitinlung bag̓ayl ang ya ray pinakaw̓ut yang pagpakugmatay na.
Ay nagpaklëd da duun tung talub yang pagtuuan ang dati ang yay landaw ang pisan ta kantidad bëlag nganing tung dati ig mas matinlu gatëd indi binuat ta tau ay bëlag nganing lug̓ud tung kaliw̓utan ang naa.
12 Dispuis napagpaklëd duun,
bëlag̓an ëkël tung dug̓u ta mga kambing ubin mga bakang ipinaturuk na,
kung indi,
natëtëngëd ilëm tung sadiling dug̓u nang ipinaturuk na atiing pagpalansang na tung krus.
Minsa ilëm ang nagpaklëd duun tung pag̓atiniran ëngëd yang Dios ang yay talub yang kuartung atiing pag̓aningën ang pinakasagradu ig anda ray ministir ang maumanan na pa.
Purisu duun da nga tukuray na yang kalibrian tang durung pisan agkabakëd ang asta tung sampa.
13 Dispuis tung patakaran ang atiang dati,
kung may mga taung namansaan da yang pagkabëtang nira,
kaministiran ang mawislikan da kanay yang pari ta dug̓u ta kambing ubin dug̓u ta sinday ta bakang turum u ang kaisan yang nag̓ipagwislik na tung nira,
ya ra yang kaw̓u yang sasang tirnira ang kinuw̓ul ang pagkatapus linaktan da ta wain.
Pagkatapus kung mawislikan da nganing tanira,
yang luaan na,
limpiu ra yang pagkabëtang nira,
liw̓ianu rang magtuu tung Dios.
14 Ig disir kung maning tii yang pinakaw̓ut yang pagpaturuk yang dug̓u yang mga ayëp ka ilëm,
kapin da ëngëd ang may pakaw̓utun na tung yatën yang pagpaturuk ni Jesu-Cristo yang dug̓u na.
Talagang may pakaw̓utun na,
ay kipurki atiing pag̓intriga na yang sadili na tung Dios,
tanya maning pa tung sasang ayëp ang idinasag ang anda ëngëd ang pisan ay mansa-mansa na natëtëngëd andang pisan ay binuatan nang kasalanano.
Kag yadwa pa,
atiing pag̓intriga na yang sadili na,
pinaktël da ta mupia yang Espiritu Santo ang anda ka man ay pinanliitan na kag anda kay pagtapusan na.
Purisu kumus may kantidad ka man yang pagpaturuk na yang dug̓u na ang indi ra ka ëngëd maplëk,
maimu rang asanita ra nga linaynayay tung pag̓imasul tung yatën yang mga painu-inu ta natëtëngëd pinunasanita ra ka man anyang matuud tung mga kasalanan ta ang ya ra rin ay pinagpablag̓an ta tung Dios ang ita maning pa tung sasang patay tung pagtërëlëngën na.
Yang ipinagpunas na tung yatën ay ug̓ud mapanirbianita ra ta ustu tung anyang yay ultimu ilëm ang Dios ang anda ray kasambëran ta.
Baklu Ra Iubligaray Yang Dating Pakigpaig̓u Atii Kanay Pati Yang Baklu, Dapat Ang May Dug̓ung Ipaturuk Ang Para Ya Ray Kabakëran Na (9:15-22)
15 Kapurisu ëkël tung pag̓intriga na yang sadili nang nagpakugmatay,
duun da nagpakaknga tung Dios may tung yatën ang mga tau ang para ya ray mag̓ërëkëlën tung baklung patakaran ang ipinagpakigpaig̓u yang Dios tung yatën.
Yang katuyuan na ay ug̓ud kumpurming tinu pay bintëng yang Dios,
magkatinir da yang kaayënan ang pinangakuan nang anda ëngëd ay katapus-tapusan na.
Talagang mabakëd yang patakaran ang atia ay yang dasag ang pagpabakëd inimatay ra ka man.
Ya ray binuat ug̓ud mangalibri ra yang mga tau tung sintinsiang dumangat da rin tung nira natëtëngëd tung mga paglalampasën nira tung mga katuw̓ulan mintras pag̓andar pa yang dating ipinagpakigpaig̓u yang Dios.
16 Ay kung may sasang patakaran ang ya ag̓ipagpakigpaig̓uay,
kaministiran ang mapruibaan da ang inimatay ra yang dasag ang yay pagpabakëd.
17 Ay kipurki baklu magbakëd yang sasang ag̓ipagpakigpaig̓u,
kaministiran ang may idasag kipurki mintras bui pa,
anda pay puirsa na yang ag̓ipagpakigpaig̓ung atia.
18 Purisu ya ra kay ipinagkaministiran na ang maskin yang dating ipinagpakigpaig̓u yang Dios,
indi naimung pundarën kung anday idinasag ang pinaturuk yang dug̓u na.
19 Kipurki atiing pagpadapat da ni Moises tung tanan ang mga Israel yang tanan ang ipinanuw̓ul yang Dios tung nira ang kumpurming sinambit tung mga katuw̓ulan,
dayun na rang ingkëlan yang dug̓u yang mga turung sinday pa may yang mga kambing ang ipinandasag da ang ya ray linaktan na ta wai.
Pagkatapus ya ray iwinislik-wislik na tung kasulatan mismu ang asan agbëbtang yang mga katuw̓ulan ang atia asta tung tanan ang mga tau.
Yang ginamit nang ipinagwislik-wislik,
ya ra yang sanga-sanga yang ayung pag̓aningën ang isup ang ya ray binalëw̓ëran da ta balaiw̓u ta karniru ang dinampul ta mapula.
20 Yang pagwislik-wislik na,
ya kay pagpasanag na tung mga tau ang mag̓aning,
“Yang dug̓ung naang nag̓ipagwislik-wisliku,
ya ray pagpabakëd tung ipinagpakigpaig̓u yang Dios tung yatën ang naang itinuw̓ul na tung yatën ang usuyun,”
mag̓aningp.
21 Pati yang turdang atiing ipinakëtay ang para pagtuuan nira tung anya may yang tanan ang garamitën tung pagturuuën duun,
parariu kang pinangwislik-wislikan na ta dug̓u.
22 Ig kung isip-isipën ta,
puiding aningën ta ang ëkël tung dug̓ung nag̓ipaturuk,
alus pa ilëm ang yang tanan ang mga maning tia nag̓apabtang dang limpiu tung pagtërëlëngën yang Dios natëtëngëd ya kang lag̓i ay napabtang tung kasulatan.
Dispuis kung anday idasag ang para paturukun yang dug̓u na,
indiita ra ka ëngëd mapatawad yang Dios tung mga kasalanan ta.
Ëkël Tung Pagpakugmatay Ni Jesu-Cristo Duun Da NGa Plëkay Yang Pagkamakinasalananën Ta Tung Dios (9:23-28)
23 Yang palaksu yang dating ipinagpakigpaig̓u,
maning pa tung ipinananglit ka ilëm tung baklung ipinagpakigpaig̓u.
Purisu kung yang ipinananglit ka ilëm,
kaministiran ang may nag̓idasag baklu ra mapabtang ang limpiu tung pagtërëlëngën yang Dios,
ig disir pati yang pinananglitan na mismu,
kaministiran kang may dasag kang mas pang may kantidad na kay tung dating nag̓idasag baklu ra malimpiu.
24 Ay kipurki yang pinaklëran ni Jesu-Cristo bëlag̓an yang kuartung atiing pag̓aningën ang pinakasagradu ang binuat ka ilëm ta tau taa tung kaliw̓utan ang naa ang ya ra ka ilëm nag̓ipananglitay tung pag̓atiniran yang Dios,
kung indi,
ya ra yang ultimung pag̓atiniran na duun tung langit mismu.
Yang ipinagpaklëd na duun ay ug̓ud magpakigtalunga ra tung anyang mangërëngan tung yatën.
25 Dispuis yang katuyuan na,
bëlag̓an ang mag̓aning ang para muya-muyang idasag na yang sadili nang iprisintar tung Dios ang pariu ka tung pag̓abuat yang paring pinakalandaw tung nasyun ta ang takun-takun pagpaklëd tung kuartung atiing pinakasagradu ang may ëkël na kang dug̓u ta sasang ayëp ang idinasag na ang para ya ray iprisintar na tung Dios.
26 Ay kung maning tii yang pinakbungan nang nagpaklëd,
ig disir muya-muya ra rin ang magpakugmatay disti pa atiing primirung pag̓imu yang Dios yang kaliw̓utan ang asta ra ilëm simanyan.
Piru tung pagkamatuud numanyan tung pinamilug̓an yang tanan ang mga panimpung nangatkaw,
minsa ilëm ang nag̓ingtaung bilug ang anda ray ministir ang maumanan na pa ug̓ud tung pagdasag na tung sadili na,
asan da nga kuatay na yang pagkamakinasalananën tang mga tau tung pagtëlëng yang Diosq.
27-28 Dispuis,
katulad tung tanan ang mga tau ang kinatau kang lag̓i nirang minsang mapatay ang pagkatapus tung uri sintinsiaan da yang Dios,
maning kang pisan tia tung pag̓aningën ang Cristo.
Minsa ka ilëm ang nagpakugmatay ang maning pa tung idinasag ang para asan da nga pasapulay nang pisan yang sintinsiang dapat da rin ang dumangat tung dakëlëng mga tau natëtëngëd tung pagpakasalak nira tung Dios.
Pagkatapus tung uri ta kaldaw maglëkat da.
Ug̓aring yang katuyuan na,
bëlag̓an ang mag̓aning ang para intindiën na si yang pagkamakinasalananën tang mga tau ay kipurki pinagtalus na ra tii.
Kung indi,
yang buatën na,
pakdulan na ta kalibrian yang kumpurming paglalangkag̓ën tung anyang maglëkat ang para asan da nga kumplituay nang pisan yang pagpalibri na tung nira pati mga tinanguni nira.