Mas Landaw Yang Pagkapari Ni Jesus Tung Pagkapari Yang Dating Mga Pari (8:1-6)
8
Buinu,
yang pinakaisi tung tanan ang atiang nag̓ianingu,
ita may sasang pinakalandaw ang pari ang katulad dang pisan tung nag̓ianingu ang yay nakarung da tung tëpad ang pisan yang Dios ang makagag̓aëm ang ampir tung tuu na duun tung langit ay kasiraan da ka tanirang pamaggaraëmën.
2 Tanya pangërëngan da tung yatën duun tung ultimung pag̓atiniran yang Dios ang ya kay pinanggid-anggiran yang turdang atiing pinagtuuan pa rin yang mga kinaampu ta tung anya atiing tukaw.
Ig yang panirbian nang atiang nag̓ianingu,
bëlag̓an ipinakdëng ta tau ang katulad ka tung turdang atii,
kung indi,
ipinakdëng yang Dios mismu.
3 Kung ikumpalar pa tung Dating Ipinagpakigpaig̓u,
yang sasang paring pinakalandaw,
yay pinilik yang Dios ang magprisintar tung anya ta mga igparakdul yang mga tau pati mga ayëp ang nag̓ipadasag nira tung anyaa.
Purisu pati yang pari tang naang pinakalandaw,
kaministiran ka ang may anya kang idasag ang iprisintar tung Dios ang katulad ka tung nira.
4 Tung bag̓ay,
kung taa pa rin tanya tung katanëkan,
bëlag̓an ka nganing pari tanya ay may asan da kang lag̓ing mga paring pamagpandasag ta mga ayëp ang para iprisintar nira tung Dios ang katulad ka tung napabtang tung mga urdinansang atiing ibinutwan ni Moises tung nasyun ta.
5 Yang mga paring atiang nag̓asambitu,
yang panirbian nira,
maning pa tung ipinananglit ka ilëm tung panirbian duun tung ultimung pag̓atiniran yang Dios.
Maning pa ka ilëm tung ulung na.
Nag̓askëan tang maning pa tung ipinananglit ka ilëm,
ay natëtëngëd atiing ti Moises pag̓isip-isip da kung ya pa ag̓aring mapaubra na yang turdang pagtuuan nira tung Dios,
tinuw̓ul yang Dios ang inaning,
“Moises,
kung magpaubraa ra nganing tiang pagtuuan mi tung yëën,
amlig̓an mung amlig̓an ang yang tanan ang mga kabag̓ay-bag̓ayan na,
asan da ipausuyay mu tung purmang ipinagpaitaw tung nuyu ta nungayna taa tung bukid ang naang pagkakësënan ta,”
mag̓aningb.
6 Piru simanyan ti Jesus tanya,
nagkatinir da ta pagkapari nang mas pang malandaw kay tung pagkapari nira,
gatëd yang baklung ipinagpakigpaig̓ung pinagtukud na mas matinlu yang pakaw̓utun na tung mga tau kay tung dating ipinagpakigpaig̓u.
Kipurki duun da ipatiëlay yang Dios tung pinangakuan nang mas matinlu yang luluaan na tung mga tau kay tung pinangakuan na atiing pagtukud na tung dating ipinagpakigpaig̓u na tung mga kinaampu ta.
Basta May Baklung Ipinagpakigpaig̓u Yang Dios Tung Mga Tau, Yang Ilyag Nang Ianing, Lag̓i-lag̓i Ra Yang Dati (8:7-13)
7 Ay kipurki kung anday pagkakulang yang dating ipinagpakigpaig̓u,
anda ra rin ay kaministiran ang may sam bilug pa.
8 Piru yang dati talagang may pagkakulang na ka man ëkël tung mga taung pamag̓usuy ang kulang kang lag̓i yang pag̓urusuyun nira.
Ya rang pisan ay nalagpakan yang sasang ibinitala yang Dios ang napabtang tung kasulatan ang mag̓aning,
“Tandaan mi yang bitalaw.
May uras ang kaw̓utun ang ya ray ipagpakigpaig̓uu ta baklung patakaran ang para ipausuyu tung mga kanubli ni Israel pati tung mga kanubli ni Judah.
9 Yang baklung tukurunung atia,
bëlag̓an pariu tung dating tinukuru atiing tukaw ang ya ray ipinausuyu tung mga kinaampu nira atiing pag̓ërëkëlënu tung nirang ipinampaluaw duun tung banwang Egipto.
Yang ipagtukuru yang baklung atiang nag̓asambitu ay natëtëngëd tanira indi ra ilëm namag̓intindi tung dating patakaranu ang ipinausuyu ra rin tung nira.
Purisu ta yëën,
anday dumang binuatu tung nira,
pinampaw̓aya-w̓ayaanu ra ilëm.
10 Maning taa yang palaksu yang baklung patakaran ang ipagpakigpaig̓uu tung tanan ang mga kanubli ni Israel tung uras ang atiang kaw̓utun.
Magpanluakaw ra yang mga katuw̓ulanu tung mga kinaisipan nira.
Imakluënu ra ka yang rilasyun yamën ang narangga ug̓ud yuuy mag̓ing Dios ang tutuuan nira ig tanira kay mag̓ing mga tauanung pampadag̓ën-dag̓ënanu.
11 Sasa may sasa tung nira,
anda ray ministir ang manuldukan tung mga masigkabanwa nira ubin tung mga putul man nira ang dapat mag̓ilalang magparampil tung yëën ay kipurki tanirang tanan,
gëg̓ësyë kag darakulu,
magrarampilanami rang tanan.
12 Yang ipag̓ilala nirang ipagparampil tung yëën ay tanirang tanan ya ray pangildawanung pampatawarën tung nagkarabuat nirang mga malalain.
Maskin unu pa man ang kasalananay ang nagkarabuat nira,
indi ra ka ëngëd dëmdëmënung uman,”
mag̓aningc.
13 Taa simanyan atiing pagkasambit yang Dios ang may baklung patakaran ang ipagpakigpaig̓u na,
yang ilyag nang ianing,
asan da nga palag̓i-lag̓iay na yang dati.
Simpri,
maskin unu pang bag̓ayay,
basta lag̓i-lag̓i ra nganing ang indi ra ka magamit,
makali ra ka ilëm ang maplëk.