Dapat Ang Mag̓inatuay Yang Pagturuuën Nira Tung Dios May Yang Pagpangabui Nirang Pangaldaw-kaldaw (13:1-6)
13
Idayun ta ra yang paggërëgmaan tang magpurutul tung ni Ginuung Jesus.
2 Indi ta ka pagpaw̓aya-w̓ayaan yang pag̓arasikasuën ta tung mga putul tang nag̓apanaw tung yatën,
maskin indi ta pa nag̓ailala.
Kipurki atiing tukaw pa may duma ang nag̓asikasu tung mga taung napanaw tung nira ang anday kaliw̓utan nira ang atii pala mga angila.
3 Dispuis intindiën ta ka ta maayën yang mga kaministiran yang mga aruman tang nag̓akalabus asan arangan da ilëm tung pagtaralig̓ën nira tung ni Jesus.
Pasunairan ta tanira ang katimbang nang itay aruman ka nira duun.
Pati yang mga aruman tang nag̓adërëëg-dëëg̓an asan,
pasunairan ta ka ang katimbang nang kasiraanita ra kang nag̓adërëëg-dëëg̓an.
4 Igalang ta kang tanan yang pagkarasawaën ta ang talagang durung pisan agkasagradu.
Yang pag̓arapënan tang magkarasawa amlig̓an tang indi ra ëngëd mamansaan.
Kipurki yang kumbaw̓aynën ubin kunlaliiën pati yang kumpurming maglimbung tung kasawa na,
ya ray sintinsiaan yang Dios tung kalainan.
5 Dispuis yang pagpangabui ta,
amanan ta ang indi malaktan ta pag̓amluk ta tung kuarta,
kung indi,
kumpurmi ra ilëm yang nag̓aprusigiran ta asanita ra ilëm nga kuntintu.
Kipurki yang Dios mismu nagpangaku tung yatën ang mag̓aning,
“Indiamu ra ka ëngëd paw̓ayaanung ipaalang-alang,”
mag̓aningb.
6 Purisu asanita ra ngaëyangay ta balur tang magkësën-kësën tung mga isip ta ang katulad ka tung sasang taung tukaw ang nabtang tung kasulatan yang inaning na ang mag̓aning,
“Ti Yawi yay yëën ang katabyang.
Purisu indiaw ra ka ëngëd mag̓ëlëd,
maskin unu pay buatën tung yëën yang sasa ka ilëm ang masigkatauu,”
ag̓aaningc.
Nag̓apaamanan Na Ang Yang Itinulduk Tung Nira Yang Mga Manigmangulu Natëtëngëd Tung Kalibrian Ang Pinagtukud Ni Ginuung Jesus Indi Nira Ëngëd Paglipatan (13:7-19)
7 Padëmdëman mi kang pirmi yang mga namagmangulu tung numyung sam pundaan ang tukaw ang ya ra kay namagparakaw̓utun tung numyu yang bitalang ipinagpiar yang Dios tung nira.
Pamaridëngdëngan mi ta maayën yang pinakaw̓ut yang pagpangabui nirang matinlu ang asta ikinagmatay ra ilëm nira ig yang pagtaralig̓ën nirang atiing mabakëd tung ni Jesus,
ya ra kay dapat ang pasuaran mi.
8 Yay pakbungan mi ay ti Jesu-Cristong pinanalig̓an nira,
ya ka man mismu yang nag̓atalig̓an mi simanyan ig ang asta ra ilëm tung sampa ang anday kaumanan.
Pati yang natëtëngëd tung anyang ipinagpakaw̓ut da nira tung numyu,
ya ka,
anda kay kaumanan na.
9 Purisu indiamu ra ëngëd magpaguyud tung sari-saring nag̓itulduk ang balaw̓ag ang pisan tung ipinagtulduk da nira tung numyu ang muya ya ray matalangan mie.
Ay kipurki mas maayën ang yang ipagpabakëd mi tung mga isip ming pagtalig tung Dios ang pirmiamu ra ilëm ang magdëmdëm tung kanëëman ang ipinagpaita na tung numyu ëkël tung ni Jesu-Cristong nagpakugmatay para tung yatën.
Indiamu ra ëngëd mamati tung nag̓ipausuy ra rin ta duma tung numyu ang yang matinlu unung ipagpabakëd mi tung pagtaralig̓ën mi tung Dios ang yamu unu magpakigsaru tung kadaklan ang mga masigkanasyun tang pamamangan yang karni yang mga ayëp ang ya ag̓idasag̓ay tung mga pistang dating pag̓asilibra yang nasyun tad.
Ay yang pamagpakigsaru asan andang pisan ay taw̓ang na tung nira ang para asan da rin maparampil tung Dios.
10 Ay ya pa ag̓ari,
ta yatën ang kumpurming pagtalig da tung ni Jesus sigun tung pagpakugmatay na,
katimbang nang may sasa kang pagsararuan tang idinasag ang andang pisan ay kalalabtën yang mga paring pamanirbian duun tung pagtuuan tung Dios ang pinakalusu ang yang panirbian nira usuy tung dating ipinagpakigpaig̓u.
11 Kipurki padëmdëman ta ra kanay yang nag̓ainabu tung kaldaw ang pinakalusu tung sëlëd san takun sigun tung Dating Ipinagpakigpaig̓uf.
Yang dug̓u yang mga ayëp ang idinasag ya ray nag̓aëklan yang paring pinakalandawg.
duun tung kaklëran yang kuartung atiang pag̓aningën ang pinakasagradu ang para duun da nga tabunay yang pagpakasalak yang mga tau tung Dios.
Piru yang tinanguni yang mga ayëp ang atiang ibinutwan na duun tung kuari lamisaan ang darasag̓an,
anday kalalabtën nang mamangan yang karni nira,
kung indi,
dapat ang ya ikuw̓ulay na duun tung lua yang pinagkampuan nira atii kanayh.
12 Kapurisu pati ti Jesus,
ang para mapabag̓ayita ra anya tung Dios ëkël tung pagpaturuk na yang sadiling dug̓u na,
duun da ka tung lua yang siudad yang Jerusalem nagpakugmatay.
13 Purisu ta yatën,
kaministiran ang magluaita ra ka tung dating pagpakigsasaan ta ra rin ang para magpakiunungita ra tung anyang mag̓agwanta tung kaëyakan ang katulad ka tung inagwanta na.
14 Ay kipurki taa tung kaliw̓utan ang naa anday siudad ang mapagpakëënan ta,
kung indi,
may sasang siudad ang kaw̓utun ang yay pagyëngët-yëngëtan yang mga isip tang pagnatisani.
15 Purisu kumus ti Jesus da yang yatën ang paring pinakalandaw,
tung anya ra ipapanaway tang pirmi yang pagdarayawën ta tung Dios.
Katimbang nang yay sasang idasag tang iprisintar tung anya ang ya ra yang kapakli yang dating ipinirisintar ta ra rin tung anya sigun tung palaksu yang dating ipinagpakigpaig̓u.
Bilang yang pagdarayawën tang atia tung anyang pagpadëngëg maning pa tung sasang nag̓ipamurak yang nganga tang iprisintar ta tung anyaj ang katulad ka tung mga pruduktu ta mga luak tang ipinirisintar ta ra rin tung anya atiing kada nagpasalamatita ra tung anya.
16 Pati yang pagburuatën ta ta matitinlu kung ya pa ag̓ari ita magtaw̓ang tung may mga kaministiran,
indi ta ka paglipatan.
Kipurki yang mga pag̓urubraën tang maning tia,
katimbang na kang mga dasag ang nag̓iiprisintar ta tung Dios ang ya ra kay mauyunan na ta mupiak.
17 Yang mga aruman mi asan ang pamagmangulu tung numyung sam pundaan,
ipaëkël mi yang mga isip mi tung nag̓ipagpasanag nira tung numyu natëtëngëd tung ni Ginuung Jesus.
Galangën mi kang paranëkan natëtëngëd tung ubligasyun nirang atiang ipiniar yang Dios tung nira.
Kipurki tanira mismu durug kadërërëp ang pamagpadag̓ën-dag̓ën tung numyu ang alus anday kaënayan nira ang para indiamu ra ilëm matalang,
kung indi,
mas pang këmëët ang këmëët yang pagtaralig̓ën mi tung ni Jesus.
Yang nag̓ipagpadërëp nirang pamagpaiwan-iwan tung numyu ay natëtëngëd nag̓askëan da ka nira ang insapuan ka tanira yang Dios natëtëngëd tung pagparadag̓ën-dag̓ënën nirang atia tung numyu.
Purisu pauyunan mi tanira ug̓ud masadya kang pirmi yang kinaisipan nirang pamagpaiwan-iwan tung numyu.
Ang anday pagdag̓ëman nira tung numyu ay kipurki kung may pagdag̓ëman nira tung numyu,
anda ra ka ilëm ay luaan nang maayën para tung numyu.
18 Idayun mi ka yang pag̓arampuën mi para tung yëën.
Indiaw nag̓aëyak ang pagpaampu tung numyu ay tung pagpamalaru tung sadiliu,
anday barasulun tung yëën yang sadiling painu-inuu.
Kipurki durung kalëlyag̓u ang yang tanan ang buat-buatu,
pirming maëklanu tung magkatama.
19 Yang sasang nag̓aingaluku ëngëd tung numyung ipag̓ampu mi ang tung makali pabalikënaw ra yang Dios asan tung numyu.
Yang Nag̓ipag̓ampu Na Para Tung Nira (13:20-2l)
20 Buinu,
mga putulu,
nag̓ipag̓ampuamu ra yëën tung Dios ang yay pinangapunglan yang kalibrian tang naang nalg̓uran ta ang duun da ka man ngaulikay yang rilasyun ta tung anyang naglain da.
Tanyay nagpaliit tung mga minatay tung sasang maning pa tung manig̓asikasu ta kaayëpan ang inding pisan mapasiring-siringanl.
Anday duma,
kung indi,
ya ra ti Ginuu tang Jesus ang simanyan pag̓arasikasuën da tung yatën ang mga tauan na.
Yang pagpabui si kang uman yang Dios ang atii tung anya,
ya ra kay pagpailala na ang rinisibi na ra yang pagpaturuk na yang dug̓u na ang duun da ka nga tukuray na yang baklung ipinagpakigpaig̓u na ang yang kantidad na dumayun ang asta tung sampang anda ëngëd ay katapus-tapusan.
21 Yang nag̓ipag̓ampuu tung anya ang pasangkapanamu anya ta kumpurming unu pang kaministiranay ming matinlu ang para mapag̓usuyamu tung kalëlyag̓an na.
Makayanan mi tia ay paëyanganamu ra anya ta ipagpalua mi tung mga ubra-ubrang mauyunan na ëkël tung ni Jesu-Cristong pagpaktël tung numyu.
Ya ra kay dayawën ta tung Dios ang asta tung sampang anday katapus-tapusan na.
Talagang yay magkabag̓ay ang pisan tung anya.
Yang Pagtapusan Yang Sulat (13:22-24)
22 Taa simanyan mga putulu tung ni Ginuu ta,
yang nag̓aingaluku tung numyu,
paawatan ming intindiën ta mupia yang mga bitalaung atiang ipinagpaktëlu tung mga isip mi.
Tutal bëlag̓an kang abwat ang masyadu yang isinulatung atia tung numyu.
23 Dispuis gustuung ibalita tung numyu ang yang putul tang ti Timoteo nalua ra tung kalabus.
Purisu makaw̓ut ilëm tani tung makali,
kasiraanami ra kang mag̓angay asan tung numyu.
24 Panganingën mi yang tanan ang mga pamagmangulu tung numyung sam pundaan asan ang yuu pagpakikumustaw ra tung nira sasa may sasa pati tung kadaklan ang binuat da ka yang Dios ang mga tauan na kang sadili.
Asta yang mga kaputulan tang tag̓a Italia tani pamagpakikumusta ka tung numyung tanan asan.
25 Buinu,
yang gustuu para tung numyung tanan asan ang mas pang maispirinsiaan mi yang kanëëman yang Dios ang pagpadag̓ën-dag̓ën tung numyu.
Ya ra ilëm tia ay maaningu tung numyu