Nag̓apabilug̓an Da Ni Pablo Yang Pagsarasaan Nirang Magpurutul Tung Ni Ginuung Jesus (4:1-6)
4
Kapurisu natëtëngëd tung tanan ang atiang binuat yang Dios para tung numyu,
ta yëën ang sasang prisu tani natëtëngëd ka man tung pangërënganu tung ni Ginuung Jesus,
may sasang gustuung gustung ingalukun tung numyu.
Yang pagpangabui mi tung kaldaw-kaldaw,
ëklan mi tung uyun tung pinalanu kang lag̓i yang Dios para tung yatën ang kumpurming bintëng nang magpagaëm tung ni Ginuung Jesus.
2 Yang paagyatan mi ang magpararanëkanamu sasa may sasa ig magaramumuanamu kang magparaurayan.
Mag̓aragwantaanamu kang magparasinsiaan natëtëngëd tung paggërëgmaan ming magpurutul.
3 Yang paawatan mi ëngëd ang asikasuën ya ra yang pagsarasaan ming magpurutul ang ya ra ka man ay ipinagpaëyang yang Espiritu Santo tung numyu.
Anday dumang papanaw mi tia,
kung indi,
pirmiamung magbërëgkës-bëgkësan ang mag̓uruyunan ta matinlu.
4 Tëëd mi tiang nag̓adapatan yang pagsarasaan tang magpurutul!
Yang kaalimbawaan tang tanan maning pa tung sa nga tinangunianita ra ilëm,
sam bilug ka ilëm yang Espiritu Santong pagtinir tung yatën ang tanan,
sam bilug ka ilëm yang kaayënan ang nag̓ipagpakisëw̓at tang tanan ang yang pagpakisëw̓at tang naa,
minyang da tung mga isip ta atiing pagbëtëng yang Dios tung yatën ang magpagaëm tung ni Ginuung Jesus.
5 Sam bilug ka ilëm yang nag̓atingara tang Ginuu tang may kalalangan tung yatën ang tanan.
Sasa ka ilëm yang kamatuuran ang nag̓apanangëd tang tanan.
Sasa ka ilëm yang nag̓adapatan na yang pagpabënyag tang tanan.
6 Sam bilug ka ilëm yang Dios ang nag̓atuuan ta ang ya ra ka man ay nagyari rang Ama tang tanan ang mga tumatalig.
Yay paggaraëmën tung yatën ang tanan,
ya kay panuw̓ul tung yatën ang tanan,
ig ya kay pagtinir ang pagpakigsasa tung yatën ang tanan.
Purisu dapat tung pagkasambilug yang nagkarasambitung atia,
asan da ipaatuay ta yang pagsarasaan tang magpurutul.
Natëtëngëd Tung Tanan Ang Mga Tumatalig Ang Yay Maning Pa Tung Tinanguni Ni Jesu-Cristo Taa Tung Kaliw̓utan Ang Naa (4:7-16)
7 Dispuis pa,
sasa may sasa tung yatën,
pinamakdulanita ra ni Jesu-Cristo ta abilidad tang para magamit ta tung panirbian ta tung anya.
Sinagpakdulayita anya ta anya-anyang abilidad ang maning pa tung ipinasukat na tung mga sadili ta sasa may sasa.
8 Talagang matuud tiang nag̓ianingu ay uyun tung sasang napabtang tung kasulatan ang mag̓aning,
“Atiing pagpaabwat na,
duru-durung mga kuntrariung pinandëëg nang ang yay nag̓apangguyuran na ang para ipailala na rang pinandëëg na ra tanira.
Pagkatapus nagpamakdul-pakdul da ta mga rigalu tung mga tauan na,”
mag̓aninga.
9 Numanyan unu pa w̓asu ay gustu nang ianing ang tanya unu nagpaabwat da,
kung indi,
tukaw rang nagparanëk taa tung katanëkan.
10 Yang nagparanëk ya mismu yang nagpaabwat duun ëngëd tung kaabwat-abwatan ang pisan yang langit ug̓ud tung uri,
yang tanan ang bag̓ay luw̓us dang papagsasaën nang ipampaulik tung dating nabtangan nirang pagturunuan pa rin.
11 Dispuis,
tanya mismu yang nagpamakdul-pakdul ta mga abilidad tung mga tauan na.
Yang duma pinamakdulan na ta kaya nirang para mag̓ing mga apustul na.
Yang duma,
pinamakdulan na ta kaya nirang para mapagpadapat yang kumpurming nag̓ipaëyang yang Espiritu Santo tung mga painu-inu nira.
Yang duma,
pinamakdulan na ta kaya nira ang para tung pagliliw̓utun nira,
maayën ang magparakaw̓utun yang Matinlung Balita tung mga taung indi pa nag̓agngël.
Yang duma pinamakdulan na ta kaya nirang para mapagpadag̓ën-dag̓ën ta maayën tung mga kaarumanan nirang mga tumatalig ang kada sam pundaan ig maayën kang magturuldukanën tung nira natëtëngëd tung mga kalëlyag̓an yang Dios ang yay dapat ang usuyun nira.
12 Pinamakdulan na nganing yang mga kaya nirang mga maning tia ay ug̓ud ya ray magamit nirang mag̓urugyatën tung mga aruman nira ug̓ud simpan da tanirang masigpëg̓ës yang nira-nirang turnung manirbian ta ustu tung ni Jesu-Cristo ig manirbian da ka tung mga kaarumanan nira.
Yang katuyuan na ëngëd tia,
ay ug̓ud tanirang tanan ang yay maning pa tung tinanguni na,
kung tung balay pa ipananglitayu,
asan da magbakëd ang magbakëd.
13 Ay tung maning tiang palaksu,
kasiraanita rang tanan ang masalapay tung nag̓ipasalapay yang Dios tung yatën ang itang tanan ang mga tumatalig magsarasaanita ra ta pag̓irintindiën tung kamatuuran ig tung pagpabëtang ta tung ni Jesu-Cristo kung unu pay nag̓adapatan yang pangguuy tung anyang Ana Yang Dios.
14 Atia,
indiita ra manulad tung mga mamula ang ërëkël-ëkëlan ta kulu.
Kung ipananglit pa tung pagsaraayën tung tëëb,
indiita ra ka masarangan ang ibëlw̓ël ta maskin unu pang palëtay ang magsampi tung yatën ang ya ray kaalimbawaan yang duma-rumang nag̓itulduk ta mga taung mandaraya ang durug kaansianung magbaliskad tung kamatuuran.
15 Kung indi,
padayunan tang usuyun yang matuud ang nag̓itulduk ig ya ra kay ipagpakigkësën ta tung mga kaarumanan ta ang bistu ka yang pagmaal ta tung nira.
Tung maning tiang palaksu,
asanita ra magminëpët tung pag̓irintindiën ta tung mga kalëlyag̓an ni Jesu-Cristo ang yay maning pa tung sasang kulu ta.
16 Ëkël tung paggaraëmën na tung yatën ang mga tumatalig ang ita maning pa tung tinanguni na taa tung kaliw̓utan ang naa,
nag̓apagturunuanita ta matinlung nag̓apagbërëgkës-bëgkësan.
Magkapariuita tung mga parti-parti yang mga tinanguni ta ang pagturunuan ka ta matinlung pagbërëgkës-bëgkësan ëkël tung mga ulaan na may yang kaulatan nang pagsurugpat-sugpat.
Katulad ka tung nira ang may anya-anya kang turnu,
itang maning pa tung tinanguni ni Ginuung Jesus,
ya ka.
Ig disir,
kung maggërëgmaanita ta ustung magpurutul ig masig̓ubligarita ka tung anya-anyang turnu ang katulad ka tung dapat ang buatën ta,
yang intirung kabilug̓an yang mga tumatalig ang salëgsa-salëgsang pundaan,
asan da ka magdakul ang magdakul ig asan da ka mangtël ang mangtël.
Dapat Ang Yang Dati Mapaklian Da Yang Baklu (4:17-24)
17 Kapurisu,
kumus nag̓aintindian mi ra siguru yang nag̓ianingung atia ig natëtëngëd tung katëngdananung ipinagpiar ni Ginuu ta tung yëën ang mangërënganaw tung anya,
ya ra taa yang dapat ang ipagpaamanu ta mupia tung numyu asan.
Indiamu ra ëngëd magpadayun ang mag̓usuy tung mga ug̓ali yang kadaklan ang mga kaarumanan ming anda ëngëd ay gustu nirang mag̓usuy tung kalëlyag̓an yang Dios.
Ay yang nag̓apasikaran nirang pirmi ya ra ilëm yang pag̓irisipën nirang anda ëngëd ay kakuinta-kuinta na.
18 Ay ya pa ag̓ari,
nakiklëpan da yang mga kinaisipan nira.
Alawid pa tung Dios ay indi pa nganing ag̓ëyangan ta baklung pagkatau ang nag̓ipaëyang nab.
Yay nag̓abtangan nira natëtëngëd ëngëd nirang pagpakuindi tung kamatuuran ay pinakiput da nira yang isip nira ang para indi ra maklëran.
19 Yang mga taung mga maning tia,
kumus namatëltël da,
indi ra mapagsuspindi tung mga kalëlyag̓an nira,
kung indi,
pagpagamën da ka ëngëd tung maskin unu pang pag̓urubraënay ang malalaway ang anda ray tërëgkaan yang nag̓alëlyag̓an nirang papsawan.
20 Piru ta yamu,
talagang bëlag dang maning tia yang naintindian mi tung ni Jesu-Cristo.
21 Simpri nagngël mi ra ka yang balita natëtëngëd tung anya ig atiing pagtalig mi yang mga sadili mi tung anya,
tinuldukanamu rang lag̓i kung ya pa ag̓aring mag̓usuyamu ra tung kalëlyag̓an na.
Yang ipinagtulduk tung numyu tung uras ang atii,
uyun ang pisan tung tamang nag̓itulduk ang liit tung anya.
22 Ay tinuldukanamu ra ang katulad ka tung aw̓ël ang dutdut da ang yag luasay ming iplëk,
dapat ang ya ra ka lipatay mi yang dating pagkatau mi ang duun da rin nga bistu tung dating mga ubra-ubra mi.
Ayw̓a indiamu ra ag̓aningënu,
ay kipurki asan da rin nga diaduay mi yang mga sadili mi natëtëngëd tung mga kalëlyag̓an ming atiing nag̓ëkël ta daya tung numyu.
23 Dispuis,
tinuldukanamu ra ka dayun ang yang pag̓irisipën mi pirming ya ag̓ipaimakluay mi tung Espiritu Santo.
24 Bilang yang panlipat mi tung dating pagkatau mi,
nunut da ka ta pagpaita mi yang baklu ang katulad ka tung aw̓ël ang baklung suut.
Ay kipurki yang baklung pagkatau ming atia ipinaëyang nganing yang Dios tung numyu ang para mag̓atuamu ra tung anya.
Ay asan da tung numyu ngaitaay ta mga tau yang mga ug̓ali na mismu ang pulus ilëm tung magkatama yang pagburuatën na ig pulus ilëm limpiung pisan.
Kung maning tia yay maita tung mga buat-buat mi,
intunsis pag̓usuyamu ra ka man ang matuud tung kamatuuran ang itinulduk da tung numyu.
Nag̓apapagsunaid Na Yang Dapat Ang Iplëk Nira May Yang Kapakli Nang Dapat Tumanën Nira (4:25–5:2)
25 Kapurisu,
kumus dapat ang paklian mi ra yang dati ta baklu ang katulad tung nag̓ianinguc,
dapat ang iplëk mi yang pagburukliën.
Yang kapakli na,
kumpurming unu pay ianing mi tung mga aruman mi pulus da ilëm yang matuud.
Kipurki kung indi mi iplëk tia,
asan da nga ranggaay mi yang pagpurutulan mi.
Ay itang tanan maning pa tung mga parti-parti yang sa nga tinangunian da ilëm ang pagbërëgkës-bëgkësan.
26 Kung alimbawa masilag̓amu,
ya rag palamig̓ay mi yang isip mi ug̓ud indi makanayan ta ipagbuat mi ta kasalanan tung sasang putul mi.
Purisu indi mi ra ëngëd pasalpan ta kaldaw yang kasisilag̓ën mi.
27 Ay kung tëmtëmën mi,
asan da nga pakdulay mi ti Satanas ta mapatiëlan nang magrangga tung pagpurutulan mi tung ni Ginuu ta.
28 Kung may asan tung numyung takawan pa rin atiing indi pa nag̓apagsuku tung ni Ginuung Jesus,
indi na ra ëngëd balikan ang ëgnaan.
Kung indi,
numanyan magpakabëdlay rang mangita ang yang mga kalima nang atiang mabtik pa rin ang manakaw,
ya ray gamitën nang ipabtik tung ubrang matitinlu ug̓ud maita ta mga kaministiran na ig may mataw̓ang na pa tung aruman nang nag̓aliwag̓an.
29 Indiamu ra ka magpalagpak ta mga bitalang makararangga tung mga aruman mi,
kung indi,
yang ibitala mi ya ra ilëm yang may taw̓ang na ig asan da ka këmtël yang mga isip nirang kumpurming pamati ang sikad-sikad ka tung pangaministiran ëngëd nirang magngël tung uras ang atia ay ug̓ud asan da nga taw̓angay mi ta mupia yang sasa may sasa tung nira.
30 Ay kung magpaluaamu pa ta mga bitalang makararangga,
asan da nga pakdulay mi ta pagsëëyan na yang Espiritu Santong pinatinir da yang Dios tung numyu.
Tanya maning pa tung sasang iminarka na tung numyu ang yamu talagang anya rang sadili ang asta kaw̓utun da ilëm yang uras ang ipagpalibri na ra ëngëd ang pisan tung numyu tung tanan ang mga malalaind.
31 Ipamlëk mi ra ka yang kasisilag̓ën mi ang muya maglëlpakënamu rang magsuruayan ta ërëkëtan.
Pati yang kaërëp ming subra ang muya mabugsu ra tung dëmët,
iplëk mi ra ka.
Tabtaw̓ën mi ra ka yang pagliliw̓akën pati pagduruminarën,
asta yang maskin unu pa man ang kalalainënay ta isip,
ya ka,
ipamlëk mi ra kang luw̓us.
32 Yang kapakli na maning taa:
magparaitaanamu ra ta kanëëman may kanëëman,
mag̓irildawanamu ra kang magparatawaran ang duun da ipatupuay mi tung pagpatawad yang Dios tung numyung diw̓aldi ilëm.