Natëtëngëd Tung Katëngdanan Ang Ipinagpiar Yang Dios Tung Ni Pablo (3:1-13)
3
Kapurisu natëtëngëd tung binuat yang Dios ang atia ang pinapagsarasaamu ra anya yang mga putul ming mga Judio,
yuung ti Pablong sasang ditiniadu tani natëtëngëd ilëm tung pagkërërëngënu tung ni Jesu-Cristo arangan da ilëm tung maning tung numyung bëlag̓an mga Judioa--
2 Siguru nabalitaan mi ra ka ang pinagpiaranaw ra yang Dios ta sasang katëngdananu ig nag̓apaktëlaw ra ka dayun anyang pagparakaw̓utun yang bitala na ang para ikaayën mi.
3 Ay pinabunayag̓anaw ra anyang pinapag̓intindi ta maayën natëtëngëd tung planu nang nag̓aëgtëman na pa rin tiing tukaw ang sigun tung kamtangan na,
ya ray isinulatu ta diput ka ilëm.
4 Ig mintras nag̓abasa mi tia,
maskëan mi ra kung unu pay pag̓irintindiënu tung planu nang atia ang ya ray ipiniar na tung ni Jesu-Cristong magpapanaw.
5 Yang planu nang atia,
indi ka man ipinabunayag na tung mga tau ta namagtukaw ang mga panimpu.
Piru numanyan ipinagpabunayag na ra tung mga taung kumpurming pinilik na,
mag̓ing yaming mga apustul mag̓ing mga manigpalatay man ëkël tung Espiritu Santong nagpasanag tung mga painu-inu yamën.
6 Maning taa yang palaksu yang planu nang atia.
Pati yang bëlag̓an mga Judio puidi ra kang pakaayënën yang Dios,
kasiraan da ka tanira yang mga Judio.
Puidi ra kang pasakëpën na tung mga tauan nang baklung paëyang na,
kasiraan da ka tanira yang mga Judio.
Puidi ra kang pakdulan na ta kalibrian nira ang pinangakuan na tung kumpurming tinu pay magtalig yang sadili nira tung ni Jesu-Cristo,
kasiraan da ka tanira yang mga Judio.
Mainabu ra tia kung manangëd da tung Matinlung Balitang nag̓ipagpakaw̓ut da tung nira.
7 Kung natëtëngëd tung balitang atia,
yuu nagyari rang sasang manigparakaw̓utun natëtëngëd ilëm tung kanëëman ang ipinagpaita yang Dios tung yëën.
Pinanuntan na ra ka dayun ta taw̓ang nang dakulu ay pinaktëlaw ra anya ta maayën ang para kayananung magpapanaw tung balitang atiang ipinagpiar na tung yëën.
8 Tëëd mi tia!
Ag̓ad na pa andang pisan ay natëngëran na tung yëën,
ag̓ad na pa yuu ra kay pinakaaranëk ang pisan ta pagkabëtang kung ikumpalar pa tung kadaklan ang binuat da ka yang Dios ang mga kinasakpan na,
piru yuu pay binuluntaran nang piniaran ta katëngdananung magparakaw̓utun yang Matinlung Balita tung maning tung numyung bëlag̓an mga Judio!
Yang kamtangan na ay natëtëngëd tung kalibrian ang gustu ni Jesu-Cristong iparawat tung mga tau ang yang kantidad yang kaayënan na,
inding pisan mapasiring-siringan.
9 Bilang magparasanag̓ënaw kung ya pa ag̓aring ininabu na ra ka ëngëd yang ipinagplanu nang atia ang disti pa atiing primiru inëgtëman na pa rin ang tanya ka man ay may kalalangan tung tanan natëtëngëd yay nag̓imu yang tanan ang bag̓ay.
10 Yang pag̓asikad nang nag̓ëgtëm atii kanay ay ug̓ud simanyan tung panimpung naa,
may sasang baklung ëyang ang mapaita na tung tanan ang kinalasi-kalasi ta mga taung indi nag̓aita ang may mga kagaëman nira duun tung tinalukb.
Ay kung maita ra nganing nira yang pagsarasaan yang mga tumatalig,
mga Judio kag bëlag,
asan da ëngëd nga maladmalaray nira kung ya pa ag̓arig kawawayangën yang isip nang pagpapanaw tung planu nang atia ang yang kawawayangën na bistu ra tung luluaan nang sari-saring apiktar nang pulus matitinlu.
11 Planu na kang lag̓i tia disti pa atiing indi na pa nag̓aimu yang kaliw̓utan.
Ang pagkatapus numanyan inëngëd na rang ipinapanaw ëkël tung pinagtalus ni Jesu-Cristo ang ya ra ka man ay nagyaring Ginuu tang may kalalangan tung yatën.
12 Natëtëngëd tung ni Ginuu tang nag̓apakapulitan tang panalig̓an,
maliway ra yang dalan ang pagpalëngëtan ta tung Dios ang anda rang pisan ay pag̓ëntëran tang mag̓ampu tung anya.
13 Kapurisu yang nag̓aingaluku ëngëd tung numyu,
ang bëlag yay panluw̓ayan mi yang mga kaliwag̓an ang naang nag̓abalitaan ming nag̓apasaranu tani,
kung indi,
ya ngani ay ikadëngëg̓ay ming magdëmdëm ang yang nag̓ipag̓agwantaw tung tanan ang naa ay natëtëngëd da ilëm tung pagmaalu tung numyung bëlag̓an mga Judio ang para tung ikaayën mi.
Yang Kamtangan Yang Nag̓ipag̓ampu Ni Pablo Para Tung Nira (3:14-21)
14 Kapurisu,
natëtëngëd tung binuat yang Dios ang atia ang pinapagsarasaamu ra ka man anya yang mga putul ming mga Judio,
yuu ra nga luud tung katalungaan yang Ama tang Dios ang pag̓ampu para tung numyu.
15 Tanya ka man yang pinakaama yang intirung pamalay-w̓alay na mag̓ing duun da tung langit,
mag̓ing tani pa tung katanëkan man.
16 Yay makagag̓aëm ang andang pisan ay kakulangan yang masarangan na.
Yang nag̓ipag̓ampuu tung anya ang patëntënën na ra ta mupia yang mga kinaisipan ming mag̓usuy ta ustu tung kalëlyag̓an ni Ginuung Jesus ëkël tung pag̓urubraën yang Espiritu Santong nag̓apatinir na tung numyu.
17 Yang sam bilug pang nag̓aingaluku tung anya ang ëkël tung pagtaralig̓ën ming bug̓us tung ni Ginuung Jesus,
tanya mismu yay lugtan ming masadiliamu ra ëngëd anya ang yang kabilangan na sasa may sasa tung numyu gustu nang pakëënan ang katulad ka tung sasang taung këën kang lag̓i tung balay na.
Asanamu ra nga paëyangay na ta paggërëgmaan ming magpurutul ang tëdëk tung mga pupusukun mi ang maskin unu pay mainabu,
indi ra ka ëngëd maunu pa yang pagpurutulan mi.
18 Ya ray kaministiran mi ay ug̓ud asanamu ra ngaëyangay ta ipagpamarësmës mi ta maayën kasiraanamu ra kang magpurutul,
kung unu pa ëngëd ay kantidad yang gëgma ni Jesu-Cristong ibinuluntad na tung numyu,
kung unu pa ëngëd agkawayang,
kung unu pa ëngëd agkataw̓ing,
kung unu pa ëngëd agkaabwat,
kung unu pa ëngëd agkaadalëm.
19 Kag yadwa pa,
bëlag̓an ilëm ya nga marësmësay mi yang kantidad yang gëgma na,
kung indi,
dëmët da ka ëngëd tung mga isip mi yang kantidad nang indi ëngëd masangkad-sangkad yang kadaralëmën na ug̓ud yang pagkatau mi pati mga pag̓urubraën mi mas pang mag̓atu rang mag̓atu tung pagkadios yang Dios ang timlat.
20 Yang Ampuan tang Dios may kaya nang magbuat ta subrang subra pa tung nag̓aingaluk ta tung anya,
subra pa ngani tung kaw̓utun yang mga isip ta ëkël tung kagaëman nang pag̓irimakluën tung yatën.
21 Dapat ang tanyay mapadëngëg̓an ang asta ra ilëm tung sampang anda ëngëd ang pisan ay kabuntuk-buntukan na.
Yang ikadëngëg na ëngëd ya ra yang intirung kabilug̓an yang mga tumatalig ang kada sam pundaan,
kasiraan da ka tanira ni Jesu-Cristong yay pagmangulu tung nira.
Magkamaningan da ka man tia!