Nag̓apapagsunaid Na Yang Dating Nabtangan Nira May Yang Baklu (2:1-10)
2
Ta yamung bëlag̓an mga Judio,
atiing indiamu pa nag̓apagtalig tung ni Ginuung Jesus,
kung sigun tung pag̓urusuyun tung kalëlyag̓an yang Dios,
maningamu pa tung sasang patay ang inding pisan kumiknël.
Pirmiamu ra ilëm ang naglalampasën tung mga katuw̓ulan nang nagpakasalak tung anya.
2 Atii kanay,
nagpaguyuramu pa tung sistimang pag̓andar taa tung kaliw̓utan ang naa ig nag̓usuyamu pa ka tung kalëlyag̓an yang pagmangulua tung sistimang atia ang yay paggaraëmën tung pamilat-pilatan ang pagkalalangan tung mga tau tung tinaluk ang para mamagkuntra tung Dios ig mamagpasilaw̓ët ka tung yatën ang mga tau.
Ya kay pagpaktël tung isip yang mga taung pamagpasuag tung kalëlyag̓an yang Dios.
3 Pati yaming mga Judio,
ya ka.
Itang tanan,
anday inaning,
maning ka man tia yang bida ta atii kanay,
ay kumpurmi ra ilëm yang nauyunan yang mga tinanguni ta may yang minyang tung mga isip ta,
ya ra ilëm ay pinapsawan ta.
Purisu tung dating nabtangan tang atii,
indi maimu ang indiita dangatën yang kasisilag̓ën yang Dios ang magsintinsia tung yatën tung kalainan ang katulad ka tung kadaklan.
4 Piru yang Dios tanya,
kumus lutuk ang pisan yang gëgma na tung yatën,
ya ray ipinagpaita na tung yatën ta kaildaw nang aw̓undang pisan.
5 Purisu,
atiing panalugpatayita pa tung anyang paglalampasën tung mga katuw̓ulan na,
pinaëyanganita ra anya ta pagkatau tang baklu ang para kumiknëlita rang mag̓usuy tung mga kalëlyag̓an na.
Yang kaalimbawaan ta,
maning pa tung kasiraanita ra ka ni Jesu-Cristong binwi na si kang uman.
6 Katulad tung ni Jesu-Cristong pinabungkaras na ang pagkatapus maktël da yang pag̓urulag̓ën na,
ta yatën ang kumpurming nagtalig da tung anya maning ka tia yang nainabu tung yatën.
Maning pa tung pinabungkarasita ra ka yang Dios ang pagkatapus nag̓apag̓ulag̓ita ra kang nag̓apag̓usuy tung nag̓auyunan na.
Katulad ka tung ni Jesu-Cristong pinakarung yang Dios tung tëpad na,
maning ka tia yang nag̓abtangan ta.
Maning pa tung ipinaugpuita ra ka yang Dios tung anya ang simanyan kasiraanita ra ka ni Jesu-Cristong pandëëg tung mga taung indi nag̓aita ang pamagtag̓am ta pasilaw̓ët tung yatën.
7 Atia,
ya ray pinapuistuan yang Dios tung yatën ug̓ud tung uras ang kaw̓utun,
mapabistu na rang mapabistu tung tanan kung unu pag katinlu yang kanëëman nang atiang ipinagpaita na tung yatën ang yay inding pisan mapasiring-siringan ang tanya duru ka man agkaayën tung yatën ëkël tung pinagtalus ni Jesu-Cristo.
8 Ay kipurki natëtëngëd ilëm tung kanëëman nang atia,
tinapnayamu ra anya atiing pagtalig mi yang mga sadili mi tung ni Ginuung Jesus.
Yang pagtapnay nang atii tung numyu,
bëlag̓an tung sadiling patakaran mi,
kung indi,
yamu ra ilëm buluntaray na.
9 Andang pisan ay natëngëran na tung mga buat-buat ming mga matitinlu nusias ya ray pagdakulan ta mga kulu ming magpabug̓al.
Purisu,
maskin tinu pa tung yatën,
asanita ra nga pisanay ta pagdakulan yang kulu tang magpabug̓al din.
10 Ay kipurki suluminti ilëm tanya ang may pag̓urubraën tung mga sadili ta ay atiing pagtalig ta tung ni Jesu-Cristo,
maning pa tung bakluita sing inimu nab Yang katuyuan na tia ay ug̓ud simanyan mapagpaluaita ra ta mga buat-buat ang matitinlu ang disti pa tung primiru,
ya ra kang lag̓i ay ipinagsimpan na ang para ya ray buatën ta.
Pinapagsarasa Ra Yang Dios Yang Mga Judio May Yang Bëlag̓an Mga Judio Ëkël Tung Ni Jesu-Cristong Parariung Tinalig̓an Nira (2:11-22)
11 Kapurisu ta yamung dating tag̓a duma-rumang nasyun ang bëlag̓an mga Judio,
maayën pang padëmdëman mi ra kanay yang pagkabëtang ming dati atiing indiamu pa nag̓apagtalig tung ni Jesu-Cristo.
Yamu ag̓aningay ta mga Judio ang bëlag̓anamu unu mga tauan yang Dios sigun ang yang mga tinanguni mi anday tandang binuat ang katulad ka tung nira.
Yang ug̓aling atiang nag̓apapaktëlan nira,
nag̓askëan ta sasang ubra ka ilëm ta tau ang yang mag̓uman ya ka ilëm yang tung tinanguni nirac.
12 Padëmdëman mi ka ang atii kanay yamu anday kaliw̓utan mi natëtëngëd tung pag̓aningën ang Cristong nag̓aëlatan yang mga Judiong magpakaayën tung nira.
Bëlag̓anamu ka mga kinasakpan yang nasyun nirang Israel ang atiing primiru yay pinagpilik yang Dios ang mag̓ing mga tauan nang sadili.
Anda kay kalalabtën mi tung ipinagpakigpaig̓u na tung nasyun nira.
Inulit na ra ka nganing ang pinaugtunan ta pira pang bisis ig pinanuntan na ra ka ta sasang pangaku nad.
Yang nabtangan mi taa tung kaliw̓utan ang naa,
anday mabakëd ang mapatiëlan mi ang para magpakbatamu ra rin tung kaayënan tung uri ta kaldaw,
ay alalawiramu pa tung matuud ang Dios.
13 Piru numanyan,
kumus pagkarapulitanamu ra ni Jesu-Cristo,
yamung alalawid pa rin tung Dios,
ipinarampilamu rang pisan anya tung sadili na natëtëngëd ilëm tung ni Jesu-Cristong nagpaturuk yang dug̓u na ang yay nagpakëët tung pagrarampilan ming atia yang Dios.
14 Ay kipurki tëlëngan mi.
Tanya mismu yang nagpatinlu tung rilasyun tang duruang grupu,
bilang yaming mga Judio ig yamung bëlag̓an mga masigkanasyun yamën.
Ëkël tung pagpakugmatay na,
pinapagsarasaita ra anya ay kinuat na ra yang pagkinuntraay ta ang yay maning pa tung sasang padir ang pagbërëlag̓anan ta ra rin.
15 Bilang asan da ngaimbaliduay na yang sistima yang mga katuw̓ulan ang nag̓ipatuman tung nasyun yamën ang Israel,
ug̓ud yang duruang grupung naa,
puidi rang imuën nang midyu tung sang nasyun ilëm ang baklung ëyang ang yang kumpurming magtalig tung anya,
mag̓ing Judio kag bëlag asan da ngalg̓ud.
Ya ray papanaw nang nagpatinlu tung rilasyun yang duruang atia ang dati-rati pagkakuntraan ang paglinawayay.
16 Yang sam bilug pang katuyuan yang pagpakugmatay na ay ug̓ud asan da nga kuatay na yang pinagsangkëlan da rin yang isip yang Dios ang magpaulik din tung mga tau ang tanirang tanan nangablag da tung anyae.
Ya ray binuat na ug̓ud tanirang durua pa rin ang grupu,
parariung mapaulik na tung Dios ang mag̓ing sang grupu ra ilëm ang yang kaalimbawaan nira simanyan,
maning pa tung sa nga tinangunian da ilëm.
Asan da nga pukisay na yang paglinawayay nirang duruang grupu.
17 Kidispuis pa,
yamung bëlag̓an nasyun ang Israel ang pag̓aningën ang “alawid tung Dios” may yaming dating nasyun ang Israel ang pag̓aningën ang “alëngët tung Dios”,
parariuita rang pinalëngtan ni Jesus yang mga kinaisipan tang binuskad.
Ipinapanaw na tung mga taung pinanuw̓ul nang magparakaw̓utun yang Matinlung Balita ang duun da ngaintindiay yang mga tau kung ya pa ag̓aring mapaulikita anya tung Dios ig kung ya pa ag̓aring mag̓uruyunanita rang duruang grupu ëkël tung anyang magpasasa tung yatën maskin unu pang nasyunay.
18 Bilang natëtëngëd tung pagpakugmatay na,
itang durua pa rin ang grupu,
parariuita rang may diritsyung magpalëngët tung Ama tang Dios ëkël tung sam bilug ilëm ang Espiritu Santong parariuita rang nag̓apatiniran nang yay pagpaktël tung yatën ang pagpalëngëtf.
19 Ig disir,
ta yamung bëlag̓an ka man mga Judio,
bëlag̓anamu ra ka maning pa tung dumang tau ang anday kalalabtën mi tung mga tauan yang Dios,
kung indi,
naglulug̓uranamu ra ka tung kadaklan ang binuat da ka yang Dios ang mga tauan nang sadili bilang sakëpamu ra ka yang pamalay-w̓alay na.
20 Yang sam bilug ang kaalimbawaan mi,
yamu maning pa tung mga kasangkapan ang nagkaratakëd da tung sasang dakulung balay ang nag̓ipakdëng yang Dios.
Yang maning pa tung pundasyun na,
ya ra yang Matinlung Balitang ipinagpakaw̓ut yamën ang mga apustul,
kasiraanami ra ka yang dumang mga manigpalatay.
Yang maning pa tung dakulung batung pinasag̓i ang yay pinakaimpurtanting batung pamilug̓an yang intirung balay,
ya ra ti Jesu-Cristog.
21 Kumus tanyay pagsurugpat-sugpatën tung mga kasangkapan ang papag̓aratu-atuën,
asan dag pagbakëd agpagbakëd yang intirung balay ang naang ya ray pagyaring sagradung pag̓atiniran yang Dios ëkël tung pagkarapulitan ta ni Ginuu ta.
22 Natëtëngëd tung pagtaralig̓ën mi tung anya,
pati yamung bëlag̓an mga Judio,
gapilamu ra tung maning pa tung balay ang naang nag̓ipakdëng,
kasiraanamu ra ka yang mga Judiong kumpurming pagtalig ka tung anya.
Bilang yamung tanan maning pa tung balay ang atiang ya ray pagyaring pag̓atiniran yang Dios ëkël tung Espiritu Santong pagtinir tung numyu.