Liw̓ianuita Rang Indiita Ra Dapat Ang Magpasuitu Tung Mga Katuw̓ulan Ang Para Asanita Ra Rin NGa Tapnayay Yang Dios (7:1-6)
7
Mga putulu,
kumus yamung sinulatanu mga taung kunusidu kung unu pay palaksu yang mga lai,
simpri nag̓aintindian mi ra ang ubligadu ilëm yang sasang tau ang magpasuitu tung mga lai mintras nag̓abui pa.
2 Ipaalimbawaw ra kanay tung sasang baw̓ay ang kasawaan.
Ubligadung mag̓usuy tung lai natëtëngëd tung pagkarasawaën,
mintras bui pa yang kasawa na.
Piru kung mapatay ra,
luas da tung laing atia.
3 Purisu mintras bui pa yang kasawa na,
kung alimbawa magpaugpu ra tung dumang lalii,
aningën da ka ilëm yang mga tau ang tanya paglimbung da tung kasawa na.
Piru kung mapatay ra yang kasawa na,
luas da tung laing atia.
Maskin magpakasawa si tung dumang lalii,
bëlag̓an ang mag̓aning ang tanya paglimbung.
4 Purisu mga putulu,
maning kang pisan tia yang palaksu yang kalibrian ta.
Katulad tung sasang baw̓ay ang nabalu ang luas da tung laing atia,
ipinaluasita ra ka yang Dios ang indiita ra dapat ang magpasuitu tung mga katuw̓ulan na bakluita ra nga risibiay na ang katulad ka tung dating nag̓alaum ta.
Naluasita ra gatëd ilëm tung pagkasira-siraan ta ni Jesu-Cristong napatay atiing pagpalansang na tung krus.
Purisu duma ra yang may pëg̓ës tung yatën.
Anday dumang maning pa nangasawa tung yatën,
ya ra yang sasang binwi si kang uman yang Dios ang para tanya ray magpaktël tung yatën ang magpalua ta mga pag̓urubraën ang magkatama ang yay ikadëngëg yang Dios.
5 Atiing këmkëmita pa rin yang dating pagkatau tang mapinagpanadili,
maning taa yang palaksu yang pagpangabui ta.
Ëkël da duun tung nag̓aintindian ta tung katuw̓ulan ang may nag̓ibawal tung yatën,
asan da nga bungkad yang mga kalëlyag̓an tang makinasalananën ang asta yang mga parti-parti yang mga tinanguni ta ya ray ginamit tang nagbuat ta mga malalain ang pag̓urubraën ang asanita ra ka dayun nga pablag tung Dios.
6 Piru simanyan,
atiing pagtalig ta tung ni Jesu-Cristo,
pinaluasita ra yang Dios tung pagpasuitu ta tung mga katuw̓ulan ang yang kalaum ta asanita ra nga risibiay na.
Luasita ra ka man asan natëtëngëd atiing pag̓apatay ni Ginuung Jesus,
maning pa tung nagkasira-siraanita ra ka tung anyang napatay.
Purisu simanyan may baklung papanaw ang para mapagtumanita yang kalëlyag̓an yang Dios.
Bëlag dang pariu tung dating papanaw ang yag rëgsay ta yang mga sadili tang magtuman yang mga katuw̓ulan na,
kung indi,
ita rag papaëyangay yang Espiritu Santo ta gustu tang magtuman yang kalëlyag̓an naa.
Yang Nag̓ipanuw̓al Ni Pablo Tung Sasang Riklamu (7:7-13)
7 Muya may magsulingaag tung yëën ang maning taab,
“Kung tama ang tung sasang katuw̓ulan asan da nga bungkad yang kalëlyag̓anung magpakasalak,
intunsis malain pala yang mga katuw̓ulan!”
ag̓aaning.
Yang matuw̓alu tung anya,
“Abëë bëlag ka!
Kung indi,
maning taa.
Indi ra rin nasimanu ang may kalëlyag̓anung magpakasalak kung bëlag tung katuw̓ulan.
Kipurki indi ra rin nabilug̓anu kung unu pay palaksu yang pag̓aramlukun kung bëlag̓an tung sasang katuw̓ulan ang pag̓aning ang indiaw unu dapat ang mag̓amluk tung bëlag̓an yëënc.”
8 Natëtëngëd tung inaning yang katuw̓ulan ang atia,
yang kalëlyag̓ung naang magpakasalak duun da naita ta këtat nang namuirsa ang asta asanaw ra ngaëyangay ta ipag̓amluku tung sari-saring bag̓ay ang dapat da rin ang indi amlukunu.
Ay kipurki kung anday katuw̓ulan ang naintindianung pagbawal tung mga ubra-ubrang malalain,
yang kalëlyag̓anung naang magpakasalak indi ra rin madabdaw̓an.
9-10 Atiing anda pay pagbatikalan yang isipu tung mga katuw̓ulan,
malimëng pa rin yang isipu.
Piru atiing buminatikal da tung isipu yang sam bilug ang indiaw unu dapat ang mag̓amluk,
duun da nga maladmarayu ang atii pala pagbuataw ra ka man ta kasalanan tung Dios ig duun da ka dayun nga simanayu yang pagkablag̓u tung anya.
Yang katuw̓ulan ang naang kalaumu ang kung yay usuyunu asanaw ra ngauyunay yang Dios,
unaw̓is tung paglampasu,
duun da nga simanayu ang yuu nagpablag da tung anya.
11 Bilang yang kalëlyag̓anung magkatinir ta bëlag̓an yëën duun da naita ta këtat na tung ibinawal yang katuw̓ulan ang atia ang asta duunaw ra nga dayaay nang magpasubu tung pagpakasalak ig tung paglampasu tung katuw̓ulan ang atia,
duun da nga simanayu ang yuu nagpablag da tung Dios.
12 Kapurisu unu pay linagpakan na,
kung indi,
tung tanan ang mga katuw̓ulan yang Dios,
andang pisan ay mabangdan ta ang maning yay pagpakdul tung yatën ta kasalanan,
kung indi,
talagang pulus limpiu.
Kumpurming unu pay nag̓ipatuman yang Dios tung yatën ang katulad ka tung sam bilug ang atiang naulitu nungayna,
pulus tung limpiu,
pulus tung magkatama,
pulus tung matinlu.
Yang Nag̓ipamarik Na Tung Sam Bilug Sing Riklamu (7:13)
13 Muya may magsulingaag si tung yëën ang kung tama yang nag̓ianingu,
ig disir pala yang nag̓ipatuman yang Dios tung yëën ang pulus ka man matinlu,
ya unu ay natëngëran na ang nagpablag̓aw ra tung Dios!
Abaa,
indi ka ëngëd magkatama tia!
Kung indi,
naang kalëlyag̓anung magpakasalak nabungkad da atiing pagkaintindiu tung katuw̓ulan ang atia ang pagkatapus ya ray nagsulsul tung yëën ang asta nag̓amlukaw ra ang asanaw ra ka man napablag tung Dios.
Nagkamaning da ta maning tia ay ug̓ud duun da ëngëd nga bilug̓ayu ang yang kalëlyag̓ung naang magpakasalak,
talagang durung pisan agkalain kag yadwa pa ug̓ud tung paglampasu tung katuw̓ulan ang atiang durug tinlu yang rumbu na,
asan da ka nga batikalay ta mupia yang isipu kung ya pa ag̓arig kalaway yang kalëlyag̓ung naang magpakasalak.
Kung Indiita Ipapuklut Ni Jesu-Cristo Tung Pagpasuitu Ta Tung Kalëlyag̓an Tang Magpakasalak, Indiita Ëngëd Mapagbuat Ta Matinlu (7:14-25)
14 Dispuis nag̓askëan ta ka ang yang mga katuw̓ulan ang naang pagkërësënan ta,
tung Dios ka man nanliit ig yang nag̓adapatan nira purus natëtëngëd tung kalëlyag̓an nang yay tumanën ta rin ang mga tau.
Piru ta yëën,
pag̓aëklanaw yang dating pagkatauung naa ang ya ra ilëm yang sadiliu ay pag̓asikaru.
Yang kaalimbawaanu maning pa tung nag̓arëgsananaw ang magpakirëpën tung dating kalëlyag̓ung magpakasalak.
15 Ay kipurki yang dumang pag̓abuatu indi ka ilëm nag̓aintindianu.
Ang kaisan kung ay pa tiing matinlu ang yay nag̓alëlyag̓anung buatën,
ya pa kay indi padayunanung buatën.
Utru si kung kaisan kung ay pa tiing nag̓alawayanu,
ya pa ka ëngëd ay nag̓apadayunanung buatën.
16 Kumus anda ka man ay gustuung magbuat yang mga malalain ang nag̓abuatu,
ya ray pagpailala ang yang mga katuw̓ulan yang Dios nag̓apauyunanu ka ang talagang matinlu.
17 Intunsis bëlag̓an ang mag̓aning ang pagbuataw ta malain natëtëngëd ang ya ra ag̓ëngërayung buatën,
kung indi,
yuug sulsulay yang kalëlyag̓anung magpakasalak ang ya kang lag̓i ay këën tung pagkatauu.
18 Ay nag̓askëanu ang talagang indiaw pa nag̓atiniran ta ipagbuatu yang matinlu.
Bilang yang dating pagkatauung naang mapinagpanadili indi ëngëd nag̓ëyangan ta maning tia.
Ay kipurki maskin durung kalëlyag̓anung magbuat yang matinlu,
piru indi ka ëngëd kayananung buatën.
19 Bilang yang matinlu ang nag̓alëlyag̓anung buatën,
ya pa ka ëngëd ay indi nag̓abuatu,
kung indi,
yang malain ang indi ëngëd nag̓alëlyag̓anung buatën,
ya pa ka ëngëd ay nag̓abuatu.
20 Purisu kumus nag̓abuatu yang malain ang indi nag̓alëlyag̓anung buatën,
ig disir kung buatënu,
bëlag̓an ëngëru,
kung indi,
yuu ra ilëm ag̓asulsulay yang kalëlyag̓anung magpakasalak ang ya kang lag̓i ay këën tung pagkatauu.
21 Kapurisu duun da ngauksibarayu ang yang kadagmitan ang nag̓ainabu,
kung ay pa atiing matinlu ang yay nag̓alëlyag̓anung buatën,
duunaw si nga sagangay yang sasang malain tung sadiliu ang asta indi ra ilëm madayunanung buatën yang matinlung atiang nag̓aisipanu.
22-23 Bilang ag̓ad pa nag̓apauyunanu yang mga katuw̓ulan yang Dios tung kinaisipanu,
piru may sasang nag̓asimanung pag̓andar tung sadiliu ang kung tung gira pa ipananglitayu,
yay pagpakigbatuk ta mupia tung nag̓apauyunan yang isipung matinlu ang ya ra rin ay gustuung buatën.
Katulad tung sasang sundalung dinëëp ta kuntrariu nang kinëmkëm ta durug igpit,
ya kay kaalimbawaanung nag̓akëdkëraw ta mupia yang kalëlyag̓anung naang magpakasalak.
24 Aay,
durung pisan agkakaildaw yang pagkabëtangung naa.
Pagyëngët-yëngëtan da nganing yang isipu ta duru kung tinu ra kaya w̓asu ay masarang ang magbawi tung yëën ang para mapapuklutaw ra anya tung pagkërëmkëmën ang naa tung yëën yang kalëlyag̓anung magpakasalak ang asanaw ra ka man nga pablag tung Dios.
25 Piru simanyan durung pisan agkadakul yang pagpasalamatu tung Dios ay natëtëngëd ilëm tung ni Ginuu tang Jesu-Cristong pagpakigsasang pirmi tung yëën,
saranganaw ra anyang ipapuklut tung pagkërëmkëmën tung yëën yang dating kalëlyag̓anung magpakasalakd.
Kapurisu kung papagbilug̓unu ra yang gustuung ianing tung intirung sam bulus ang atiae,
ya ra taa yang nag̓abtanganu.
Tung isipu,
duru ka man ang kalëlyag̓ung magtuman yang mga katuw̓ulan yang Dios.
Ug̓aring natëtëngëd tung dating pagkatauung mapinagpanadili,
suituaw pa ka ëngëd yang dating kalëlyag̓anung magpakasalak.