Yang Sasang Tumatalig Indi Ra Dapat Ang Magpasulsul Tung Dating Kalëlyag̓an Nang Magpakasalak (6:1-14)
6
Ta,
unu pay linagpakan yang ipinagpasanag̓ung atia?
Aningën ta w̓asu ang kumus pinagpaitaanita ra yang Dios ta kanëëman nang tinapnay,
padanayan ta ra ilëm yang pagpakasalak ta ug̓ud mas pang paitaanita ra anya yang kanëëman na?
2 Abaa,
baliskad dang pisan tia!
Ayw̓a,
ta yatën ang nanalugpatay ra tung kalëlyag̓an tang magpakasalak,
magkabag̓ay pa w̓asu ang magpasulsulita pa?
3 Ayw̓a,
indi mi ra nag̓adëmdëman ang atiing pagpabënyag ta,
asan da nga pananglitay ta ang tung pag̓apatay na,
nagkasira-siraanita ra kang napatay?
4 Ig disir,
atiing pagpalg̓ud tung tinanguni na tung lëyang,
nagkasira-siraanita ra kang ipinalg̓ud.
Ya ray pinananglitan ta atiing ipinadalëmita ra tung wai.
Nagkamaning ta maning tia ay ug̓ud katulad ka tung ni Jesu-Cristong binwi si kang uman yang pag̓aningën nang Ama na ëkël tung puirsa nang indi masagang-sagang,
nagkasira-siraanita ra kang binwi na si kang uman.
Ya ra kay pinananglitan ta atiing binangunita ra tung wai.
Yang katuyuan na tia ay ug̓ud simanyan magpangabuiita ra tung baklung papanaw ang magkatunu tung pangimaklu yang Dios tung yatën.
5 Yang gustuung ianing tia,
kumus maning pa tung nagkasira-siraanita ra kang ipinalg̓ud tung lëyang,
yang gustu nang ianing,
asan da nga pablag̓ay ta yang dating pagpangabui tang malain ang anggid ka tung anyang nagpablag da ka tung dating kabui na taa tung kaliw̓utan atiing pag̓apatay na.
Ig disir,
talagang maning pa tung nagkasira-siraanita ra kang binwi si kang uman yang Dios ang yang gustu nang ianing,
simanyan may pagpangabui ta rang baklu.
6 Indi mi ilëm paglipatan ang yang dating pagkatau ming makinasalananën,
maning pa tung ipinaumid yang Dios tung ni Jesu-Cristong atiing pagpalansang na tung krus.
Ya ray binuat na ug̓ud asan da nga pakapasay na ta puirsa na yang mga tinanguni tang naang naanad da ka man tung pagpakasalak ang para indiita ra maning pa tung magpakirëpën ang magbuat ta kasalanan.
7 Bilang ipinaluasita ra yang Dios tung pagpakirëpën ta tung dating kalëlyag̓an tang magpakasalak ang katulad ka tung sasang taung napatay ang naluas da ka tung pagpakëmkëm na tung dating kalëlyag̓an na.
8 Kumus maning pa tung nagkasira-siraanita ra ka ni Jesu-Cristong napatay,
may kumpiansa tang dayun-dayun da yang pagkinapulitay ta numanyan ang asta ra ilëm tung sampa.
9 Nag̓askëan ta ang ti Jesu-Cristo,
kumus binwi si kang uman yang Dios,
indi ra mapatay ang uman.
Simanyan bëlag dang suitu ta kamatayën.
10 Kung natëtëngëd tung pag̓apatay na,
minsa ilëm ang nagpakugmatay para tung yatën ang nagpakasalak ig anda ray ministir ang maumanan na pa.
Kung natëtëngëd ka man tung pagkabui na si kang uman,
nag̓abui tanya ang para tung ikadëngëg yang Dios.
11 Ig disir,
pati yamu,
kumus pagkinapulitayamu ra ni Jesu-Cristo,
maning ka tia yang pagpabëtang mi tung mga sadili mi.
Kung natëtëngëd tung dating kalëlyag̓an ming magpakasalak,
patayamu ra ka.
Kung natëtëngëd man tung rilasyun mi tung Dios,
nag̓abuiamu ra ka para tung ikadëngëg na.
12 Kapurisu ustu ra tiang pagpagaëm mi yang mga tinanguni mi tung dating kalëlyag̓an ming magpakasalak.
Ayw̓a,
yang sasang suitu ka ilëm ta kamatayën ya pay panuntan mi yang kalëlyag̓an na?
Ay kung pakdulan mi ta lugar tia,
siguradung marëgsananamu rang magtuman yang mga kursunada ming mga malalain.
13 Ustu ra tiang pag̓irintrigaën mi yang mga parti-parti yang mga tinanguni mi tung dating kalëlyag̓an ming magpakasalak ang para magamit mi tung mga malalain ang mga pag̓urubraën.
Kung indi,
ipag̓intriga mi ra ëngëd yang mga sadili ming bug̓us tung Dios ang ipagaëm.
Kipurki yay magkatama tung numyung maning pa tung sasang patay tung pagtërëlëngën yang Dios ang pagkatapus maning pa tung binwiamu si ka anyang uman.
Pati mga parti-parti yang mga tinanguni mi,
luw̓us da kang ipag̓intriga mi tung anya ang para magamit na tung pagburuatën ming magkatama tung pagtërëlëngën na.
14 Kayanan mi ra tia ay kipurki simanyan yang dating kalëlyag̓an ming magpasalak,
indiamu ra ka ëngëd madëëg̓an na kipurki napaklian da yang pagpasuituan mi.
Bëlag̓anamu ra suitu yang mga katuw̓ulan yang Dios ang ibinutwan ni Moises ang anday mataw̓ang na tung yatën ang para magtumanita ra rin.
Piru simanyan pagpagaëmamu ra tung Dios ang maktël yang pagtaraw̓angën na tung numyung para mapanguntiëlan mi yang dating kalëlyag̓an ming atiaa.
Nag̓apapagsunaid Na Yang Pagpakirëpën Nira Tung Dating Kalëlyag̓an Nirang Magpakasalak May Yang Pagpakirëpën Nira Tung Kalëlyag̓an Yang Dios (6:15-23)
15 Ta,
unu pay nalagpakan yang nag̓ipag̓aningung atia?
Aningën ta w̓asu ang liw̓ianuita rang magpakasalak kumus bëlag̓anita ra suitu yang mga katuw̓ulan,
kung indi,
suituita ra yang Dios?
Abaa,
indi ra ka ëngëd magkatama tia!
16 Nag̓aintindian mi ka ang kung alimbawa mag̓intrigaamu ra yang sadili mi tung sasang tau ang para magpakirëpënamu ra tung anya,
kumpurming tinu pang ag̓alënay ang nag̓apanangëd mi ay kirëpënamu ra anyab.
Kung ilaktëru ra yang pananglit ang atia tung pagkabëtang mi,
kung yang dating kalëlyag̓an ming magpakasalak ya ray nag̓apangag̓alënan mi ang para tumanën mi yang kalalangan na,
anday dumang pakaw̓utun na,
asanamu ra nga pablag tung Dios.
Piru kung yang Dios ya ray nag̓apangag̓alënan mi simanyan ang para tumanën mi yang kalëlyag̓an na,
yang luluaan na,
mapagbuatamu ra yang magkatamang pagburuatën.
17 Piru simanyan durug dakul yang pagpasalamatu tung Dios natëtëngëd ta yamung maning pa tung nagpakirëpën da ka man ang tukaw tung dating kalëlyag̓an ming magpakasalak,
nag̓intraamu ra panangëd tung ipinagtulduk da tung numyu ang tëdëk tung mga pupusukun mi.
Yang ipinagtulduk ang atia tung numyu yay maning pa tung sasang pinag̓intrigaan yang Dios tung numyu ang para ya si kay pagpakirëpënan mi.
18 Pinaluasamu ra nganing yang Dios ang indiamu ra suituën yang dating kalëlyag̓an ming magpakasalak ig simanyan yang magkatamang pagburuatën ya si kay maning pa tung pagpakirëpënan ming baklu.
19 Nag̓ipananglitu ilëm yang mga bag̓ay ang atia tung pagpakirëpën ay mas pang mamarësmësan ta yang sasang bag̓ay kung may mapananglitan ta.
Simanyan padëmdëman mi ra kanay ang yang tukaw bilug yang mga isip ming nag̓irintrigaën yang mga parti-parti yang mga tinanguni mi ang para magamit tung malalaway ang pagburuatën ang maning pa tung yay pinagpakirëpënan mi ang asta ya rag durulang agdurulang yang paglalampasën mi tung mga katuw̓ulan yang Dios.
Simanyan kung ya pa ag̓arig kabilug yang isip ming nag̓intriga atii kanay,
simanyan ya ra kay patupuan ming mag̓intriga tung Dios yang mga parti-parti yang mga tinanguni mi ang para yang pagburuatën ang magkatama ya si ay maning pa tung pagpakirëpënan mi ang asta mag̓atu rang mag̓atu yang mga buat-buat mi tung nag̓auyunan yang Dios.
20 Kipurki atii kanay ang yang dating kalëlyag̓an ming magpakasalak ya pay maning pa tung pinagpakirëpënan mi,
luasamu pa tung pagburuatën yang magkatama.
21 Piru unu pa w̓asung kaayënanay ang naita mi tung nagkarabuat-buat mi atii kanay ang simanyan ya ra ka man ay nag̓aëyakan mi?
Andang pisan,
ay natëtëngëd anday dumang pakaw̓utun yang mga ubra-ubrang mga maning tia kung ya pay pinadayunan mi,
asanamu ra nga pablag tung Dios ang asta tung sampa.
22 Piru simanyan pinaluasamu ra yang Dios ang indiamu ra suituën yang dating kalëlyag̓an ming magpakasalak ig nagpagaëmamu ra ka tung anyang tanya si ay maning pa tung pagpakirëpënan mi.
Purisu simanyan yang pinakaw̓ut na tung numyu,
pag̓atu rang pag̓atu yang mga ubra-ubra mi tung nag̓auyunan yang Dios ig tung uri magsarapënanamu ra yang Dios ang anda ëngëd ang pisan ay katapus-tapusan na.
23 Kapurisu kung papagbilug̓unu ra yang gustuung ianing,
ya taa.
Kung tinu pay pagpagaëm tung dating kalëlyag̓an nang magpakasalak,
kung tung pagpatëngëd pa ipananglitayu,
anday dumang midyu tung isuul tung anya,
dayun-dayun yang pagkablag na tung Dios ang tung uri ya ra kay pagnatisan nang asta tung sampa.
Piru yang nag̓ibuluntad yang Dios tung yatën,
puidiita rang magpakigsapën tung anya ang asta tung sampa ëkël ilëm tung kaampiran tang naang baklu tung ni Ginuu tang Jesu-Cristo.