Natëtëngëd Tung Ni Abraham Kung Ya Pa Ag̓aring Nausgaran Da Yang Dios Ang Salu Rang Pisan Tung Pagtërëlëngën Na (4:1-8)
4
Abir,
padëmdëman ta ra kanay ti apung Abraham ang kinaampu yamën ang mga Judio kung ya pa ag̓aring inusgaran yang Dios ang salu rang pisan tung pagtërëlëngën na.
2 Kipurki kung alimbawa tanya inusgaran yang Dios ta maning tia natëtëngëd tung pagburuatën nang matitinlu,
intunsis puidi ka rin ang yay ipagpabug̓al na tung mga kaarumanan na,
piru tung Dios indi ra ka ëngëd mapuidi tii.
3 Kipurki padëmdëman ta ra kanay yang sasang napabtang tung kasulatan ang mag̓aning,
“Ti Abraham nagtalig da tung Dios ang magkërëng tung sasang pinangakuan na tung anya,
ig natëtëngëd ilëm tung pagtalig nang atii,
asan da tanya ngaipabtangay yang Dios ang salu rang pisan tung pagtërëlëngën naa,”
ag̓aaning.
4 Ipabëtangu ra kanay tung sasang pananglit.
Yang sasang taung pagpatëngëd,
yang suul na,
bëlag̓an kang mag̓aning ang ya ra ka ilëm ag̓ipakdulay ta diw̓aldi tung anya,
kung indi,
ya ray pinatëngëran nang nag̓ubra.
Yang pisan yang kaalimbawaan yang sasang taung pagbuat ta matinlu ang para tung paglaum na asan da tanya ngausgaray yang Dios.
Kung asan din ngausgaray yang Dios ang salu ra,
yang pag̓usgad nang atia bëlag̓an kang mag̓aning ang pakdul na ka ilëm ta diw̓aldi tung anya,
kung indi,
ya ra ka rin ay maning pa tung pinatëngëran nang nagbuat ta matinlu.
5 Piru yang taung anday nag̓atalig̓an na tung sadiling pag̓urubraën na ang para asan da rin ngausgaray yang Dios ang salu ra,
kung indi,
pagtalig da ilëm ang bug̓us tung Dios ang yay pag̓usgad tung sasang taung malalain ang salu rang pisan tung pagtërëlëngën na,
yang pag̓usgad nang atia tung anya natëtëngëd ilëm tung pagtalig na,
bëlag̓an ang mag̓aning ang ya ray maning pa tung sasang pinatëngëran na,
kung indi,
ya ra ka ilëm ag̓ipakdulay yang Dios ta diw̓aldi tung anya.
6 Yang bag̓ay ang naa,
yang pisan ay nag̓adapatan yang sasang inaning ni Adi David nun tukaw atiing pagkasambit na yang kasadyaan yang sasang tau ang inusgaran da yang Dios ang salu rang pisan,
ang yang pag̓usgad na ta maning tia tung anya,
andang pisan ay kalalabtën yang pagburuatën na yang matitinlu.
7 Kipurki ya ra taa yang inaning nang atii:
“Durung pisan agkatinlu yang nag̓abtangan yang mga taung kumpurming pinatawad da yang Dios tung mga paglalampasën nira tung mga katuw̓ulan na,
ang yang mga kasalanan nira linipatan na ra.
8 Talagang durung pisan agkatinlu yang nag̓abtangan yang mga tau ang yang mga kasalanan nira,
indi ra nag̓idata yang Dios tung nirab,”
mag̓aning.
Yang Kasadyaan Ta Sasang Taung Inusgaran Da Yang Dios Ta Maning Tia Puidi Kang Malg̓uran Ta Bëlag̓an Mga Judio (4:9-12)
9 Yang katinluan ang atiang nabtangan nira,
tëëd ilëm basu tung yatën ang mga Judio ang pulus binuatan ta tanda tung mga tinanguni ta?
Bëlag̓an ilëm ita,
kung indi,
pati yang bëlag̓an mga Judio ang anda kang lag̓i ay tandang binuat tung mga tinanguni nira,
lug̓ud da ka asan.
Kipurki magpauyunitang tanan siguru tung sasang sinambit tung kasulatan ang natëtëngëd ilëm unu tung pagtalig ni Abraham tung Dios,
asan da unu ngaipabtangay nang salu rang pisan tung pagtërëlëngën nac.
10 Sanu pa w̓asu ngausgaray na ta maning tia?
Atiing tanya indi pa nag̓apabuatan ta tanda tung tinanguni na u atiing pinabuatan da?
Simpri atiing tanya indi pa nag̓apabuatan.
11 Pagkatapus tung pira pang takun baklu ra lalangay yang Dios ang yang tinanguni na pabuatan da ta tandad.
Atia yay sasang sinyalis ilëm ang tanya inusgaran da ka man ang lag̓i yang Dios ang salung pisan natëtëngëd ilëm tung pagtalig nang bug̓us tung anya.
Yang uras ang atii,
anda pa nganing ay tandang binuat tung tinanguni na.
Yang linuaan na,
duun da tanya nagyaring pinamuaran yang tanan ang may pagtalig da ka nira tung Dios ang katulad ka tung pagtalig na ang asan da ka inusgaran nang salu ra maskin anday tandang binuat tung tinanguni na.
12 Bëlag̓an ilëm tanirang anday tanda ay pinamuaran na,
kung indi,
pati yang may mga tanda ang simanyan bëlag dang yay panalig̓an nira,
kung indi,
nagtalig da yang mga sadili nirang bug̓us tung ni Jesu-Cristo ang asan da ka nasug̓ut tung ni Abraham ang kinaampu nira ang yay tukaw ang nagtalig yang sadili nang bug̓us tung Dios,
atiing indi pa nganing nag̓apabuatan ta tanda.
Nag̓aulit Na Yang Primirung Katadlëngan Na May Yang Yadwa Ang Ya Ray Nag̓ipapanaw Na Tung Dumang Pamëtang-bëtang Ta Bitala (4:13-17a)
13 Nag̓askëan tang may sasang pinangakuan yang Dios tung ni Abraham ang tung kauri-urian tanya pati yang kumpurming masug̓ut tung pagtalig na yay papaggaëmën na tung bilug ang kaliw̓utan.
Piru yang ipagkërëng yang Dios tung pinangakuan nang atii bëlag̓an natëtëngëd tung pagturumanën ni Abraham yang mga katuw̓ulan,
kung indi,
natëtëngëd ilëm tung pagtalig nang bug̓us tung anyang talagang magkërëng tung pinangakuan na ang duun da tanya ngausgaray nang salu ra.
14 Kipurki kung alimbawa yang pakdulan yang Dios yang pinangakuan nang atii,
ya ra ilëm yang mga taung pagtuman yang mga katuw̓ulan ang ibinutwan ni Moises,
ig disir,
anda ka rin ay kapulutan yang pagtalig tang naa tung ni Jesu-Cristo.
Pati yang pinangakuan yang Dios tung yatën,
anda ka rin ay pakaw̓utun na.
15 Talagang andang pisan ay kalalabtën yang pagturumanën ta yang mga katuw̓ulan tung pinangakuan yang Dios ang atii.
Ay yang kaaw̓ay yang mga katuw̓ulan parusa.
Kung anda galang ay mga katuw̓ulan ang nag̓ipatuman tung yatën ang mga tau,
anda ka rin ay malampasan ta,
indiita ka rin maparusaan yang Dios.
16 Purisu ya ray natëngëran na ang tung pagtalig ta ilëm yang mga sadili ta tung ni Jesu-Cristo duunita ra nga pakdulay yang Dios yang kalibrian ang pinangakuan na.
Ya ray papanaw na ug̓ud anday dumang patiëlan nang mag̓usgad tung yatën ta maning tia,
kung indi,
sulaminti ilëm yang kaildaw nang durung pisan agkabëw̓ërëng ang andang pisan ay natëngëran na tung pagturumanën ta.
Purisu yang luluaan na,
sigurista rang ipakdul yang Dios yang pinangakuan na tung tanan ang mga taung kumpurming masug̓ut tung pagtalig ni Abraham.
Yang pamakdulan na bëlag̓an ilëm yang mga tumatalig ang mga Judio ang may surubliën nirang mga katuw̓ulan,
kung indi,
pati yang bëlag̓an mga Judiong kumpurming pagtalig da ka tung ni Jesu-Cristo ang katulad ka tung pagtalig ni Abraham tung Dios atiing tukaw ang duun da ka man nagyaring pinamuaran tang tanan ang mga tumatalig,
maskin unu pang nasyunay.
17 Yang pagbakëran yang inaningung atia,
ya ra yang sasang pinangakuan yang Dios tung ni Abraham ang yang ipinagpilik na unu tung anya ay ug̓ud tanya ra unu ay mamuad tung dakëlëng mga nasyune.
Yang Primirung Katadlëngan Na Nag̓abalikan Nang Nag̓ipapanaw Tung Dumang Palaksu (4:17b-22)
Yang pinangakuan nang atii,
durug bakëd natëtëngëd tung pagkapiadur yang Dios ang napanalig̓an ni Abraham.
Ay yay may kagaëman ang magpabui si kang uman tung mga taung nagkarapatay ra ig ya kay pagkalalangan tung indi pa nag̓aëyang ang mëyang daf.
18 Ti Abraham tanya,
maskin midyu anda ra ka rin ay ëlatan na,
nagpadayun da ka ëngëd yang pagtaralig̓ën na tung Dios ang nagpakisëw̓at ka ëngëd ang tanya mamuad da ka man tung dakëlëng mga nasyun ang katulad kang pisan tung pinangakuan yang Dios tung anya ang yang kinadaramëlën unu yang mga kanubli na manulad unu tung mga dumakël ang indi ra mabilang-bilangg.
19 Atii kanay,
kung madëmdëman na yang sadiling tinanguni na ang midyu tung patay rang lag̓i sigun ka man tung idad nang mga sanggatus dang takun,
pati yang pagkabawas yang kasawa nang ti Sara,
bëlag̓an ang yay pinanluw̓ayan yang pagtaralig̓ën na.
20 Bëlag ya magdua-dua yang isip na ang muya indi ra këgngan yang Dios yang pinangakuan nang atia tung anya,
kung indi,
ya magbakëd yang pagtalig nang ya rag pasalamatay na kang lag̓i tung anya yang sasang ubraën na tung anya.
21 Ay nag̓asiguru na ra ka ëngëd ang pisan ang yang pinangakuan yang Dios ang atia tung anya,
talagang kayanan na ka ëngëd ang këgngan.
22 Kapurisu napabtang da ka man tung kasulatan ang natëtëngëd unu tung pagtalig nang atii tung Dios duun da unu ngausgaray nang salu rang pisan tung pagtërëlëngën nah.
Nag̓apabilug Na Yang Natëtëngëd Tung Pagtaralig̓ën Ni Abraham Kung Unu Pay Linagpakan Na Tung Nirang Tanan (4:23-25)
23-24 Kung papagbilug̓unu ra yang gustuung ianing,
yang mga bitalang atiing isinulat natëtëngëd tung pagtalig ni Abraham ang tanya unu duun da ngaipabtangay yang Dios ang salu rang pisan tung pagtërëlëngën na,
bëlag̓an da ilëm tung anya nga dapat,
kung indi,
may nag̓adapatan na ka tung yatën simanyan ang para ya ray pagbakëran yang mga isip tang kumpurming usgaran da ka yang Dios tung maning ka tia.
Bilang isinulat para tung yatën ang kumpurming pagtalig yang mga sadili ta tung Dios ang yay nagpabui si kang uman tung ni Ginuu tang Jesus.
25 Tanya ya iintrigaay na tung pudir yang mga tau ang para ipaimatay nira ang anday dumang natëngëran na,
kung indi,
ya ra yang nagkarabuat tang malalain.
Pagkatapus binwi na si kang uman natëtëngëd gustu nang duun da magpailala tung yatën ang mga tau ang yang pagpakugmatay ni Jesus ang atii rinisibi na ra ang pagkatapus ya ra kay nag̓apatiëlan nang mag̓usgad tung yatën ang saluita rang pisan tung pagtërëlëngën na.