Nag̓apamarik Na Yang Mga Nag̓ipagsulingaag Tung Anya Yang Mga Masigka Judio Na (3:1-8)
3
Muya may sasang masigkanasyunung Judio asan ang gustu nang magsulingaag tung yëën ang maning taa yang palaksu yang katadlëngan na.
“Kung matuud yang nag̓itulduk mu ang indiita ra risibiën yang Dios natëtëngëd tung tandang binuat tung mga tinanguni ta,
tay puis anda pala ay nalandawan ta tung bëlag̓an mga Judiong anday tanda!
Anda ngani ay ikaayën ta tung tanda tang atia!”
2 Yang matuw̓alu asan,
dakëlë kang nag̓ikaayën tang mga Judio natëtëngëd tung pagka Judio ta.
Tukaw tung tanan,
tung yatën ang mga kinaampu ipiaray yang Dios yang bitala na ang lug̓ud ka asan yang mga pinangakuan na tung nasyun ta.
3 Piru muya yang bag̓ay ang atia ya si ay patiëlan yang aruman tang atia ta sam bilug sing katadlëngan na ang maning taa yang palaksu na.
“Ta yatën ang mga Judio,
maskin indiita ra ka man nagkërëng tung pinangakuan ta tung Dios ang ita magtuman yang mga katuw̓ulan na,
yang gustu mung ianing,
asan da imbaliduay yang Dios yang pinangakuan na tung mga kinaampu ta ang itang mga kanubli nira pakaayënënita anya?”
4 Yang matuw̓alu asan,
bëlag maning tiay gustuung ianing.
Simpri yang Dios dapat ang pirming magluang matalig̓an ang magkërëng tung pinangakuan na,
maskin ita magluaita pang bukliën natëtëngëd ka man ang indiita ra ka nagkërëng tung pinangakuan ta tung anya.
Yang bag̓ay ang atia,
bistung bistu duun tung sasang isinulat ni Adi David atiing pagpauyun na tung pagpakusalak yang Dios tung anya natëtëngëd tung sasang binuat nang durug kalain.
Maning taa yang inaning na tung Dios tung uras ang atii:
“Kumpurming unu pay ipagpakusalak mu tung yamën ang mga tau,
talagang magkatamang pisan.
Piru ta yawa,
maskin unu pay ipëtël yang mga tau tung nuyu,
kung maning pa tung kasu,
india ra ka ëngëd mapirdi-pirdi niraa,”
ag̓aaning.
5 Piru muya may magsulingaag si ka ëngëd tung yëën ang maning taa:
“Itang mga Judio,
maskin may mga ubra-ubra tang malalain,
kung alimbawa ikumpalar pa tung mga buat-buat yang Dios ang pulus matitinlu,
asan da nga bistu ang mas pa ang yang mga buat-buat na durung pisan agkatadlëng.
Purisu kumus asan da magkatinir ta ikadëngëg na,
kung yang mga buat-buat ta,
ya pay masilag̓an nang ipagsilut tung yatën,
ig disir,
asan da tanya magbuat ta indi magkatama,”
ag̓aaning.
Atia nag̓aulitu ilëm ay maning tia yang palaksu yang pangatadlëngan yang duma ang durug kabaw̓aliskad.
6 Piru indi ra ka ëngëd magkatama yang katadlëngan ang atia ay natëtëngëd kung indi nganing magsintinsia yang Dios tung yatën ang mga Judio ang ita dating mga tauan na,
ig disir,
indi ra ka ëngëd din magkabag̓ay ang tanya pay magsintinsia tung maskin tinu pang tauay taa tung kaliw̓utan ang naa.
7 Piru muya may magsulingaag si pa ka ëngëd tung yëën ang maning si ka taa:
“Kumus yuu indiaw matalig̓an ang magkërëng tung pinangakuanu tung Dios ang para magtumanaw ra rin yang mga katuw̓ulan na,
ig disir,
kung ikumpalaraw tung anya,
duun da nga bistu ang mas pa ang yang Dios talagang matalig̓an ang magkërëng tung mga pangaku na ang ya ra ka nganing ay ikadëngëg na.
Kumus asan da tung pagkumpalar nag̓ikadëngëg̓ay na yang pagbukliu,
dapat indiaw ra rin sintinsiaan na tung kalainan,”
ag̓aaning.
8 Abaa,
kung tama yang katadlëngan yang pagsulingaag ang atia,
ig disir,
maayën pang magbuatita ra ilëm ta mga malalain ang para may pakaw̓utun nang matinlu ay asan da ka pala nga padëngëg̓ay ta yang Dios buat!
Atia pala maning kang pisan tia yang nag̓ipag̓insultu yang dumang pagbangdan tung yëën ang ya unu ay nag̓ipagpakaw̓utu tung mga tau buat.
Yang mga taung mga maning tia,
sintinsiaan da ka ëngëd yang Dios tung kalainan ang ya ray magkatamang pisan ang buatën na tung nira.
Andang Pisan Ay Taung Mausgaran Yang Dios Ang Salu Ra Tung Pagtërëlëngën Na Natëtëngëd Tung Pagturumanën Na (3:9-20)
9 Ta,
unu pay linagpakan na?
Aningën ta w̓asu ang tung pagtërëlëngën yang Dios itang kumpurming mga Judio may nalandawan ta pa ka ëngëd tung mga tag̓a duma-rumang nasyun?
Andang pisan ay nalandawan ta tung nira kipurki katulad ka tung ipinagpasanag̓u rang lag̓i ta nungayna,
yang tanan ang mga tau,
maskin Judio maskin bëlag,
këmkëm ang luw̓us yang natural nirang pagpakasalak ig indi mangapuklut tung sintinsia yang Dios ang kaw̓utun.
10 Yang bag̓ay ang atia bistung pisan tung napabtang tung kasulatan ang mag̓aning,
“Andang pisan ay taung limpiu tung pagtërëlëngën yang Dios,
may sam bilug.
11 Andang pisan ay taung pag̓intindi ta ustu tung anya.
Anda ka nganing ay taung pagsagyap ang basi pa ra ilëm matultul tung anya.
12 Kung indi,
tanirang tanan nanalyud da ilëm tung anya.
Parariung luminalis tung katuyuan ang nalëlyag̓an da rin yang Dios para tung nira atiing pag̓imu na tung nira.
Anda ëngëd ang pisan ay nag̓apagbuat ta matinlu,
may sam bilugb.
13 Yang mga bitalang nag̓ipalua nira durung pisan agkaligna ang katulad ka tung buyung pag̓ulimpëg tung lëlëbngan ang inabrian da.
Durug kaansianung mamitala ta ipandaya nira tung mga aruman nira.
Durug kasisiit yang mga bitala nirang maning pa tung këg̓ët ta sasang iraw ang madalitc.
14 Pirmi ra ilëm ang nag̓ipagtuluy nira tung malain yang mga aruman nira ig pirmi ra ka ilëm ang pagtirada ta mga bitalang malalaind.
15 Basin gësyë ilëm ang dispirinsia,
makali ra ilëm ang mangimatay tung masigkatau nira.
16 Maskin ay pa manganing,
pagpanrangga tung mga masigkatau nirang pagpakdul ta kalbatan.
17 Indi ka nira ag̓usuyun kung ya pa ag̓aring mag̓uruyunan tanira yang mga masigkatau nira tung matinlue.
18 Indi ka nag̓aëyang tung mga isip nira ang dapat da rin ang magkatinir tanira ta pag̓ëlëd nirang ustu tung Diosf,”
mag̓aning.
Nag̓apabilug Na Yang Gustu Nang Ianing Natëtëngëd Tung Nag̓abtangan Yang Tanan Ang Mga Tau Tung Pagtërëlëngën Yang Dios (3:19-20)
19 Dispuis pa,
nag̓akdëkan ta ka ang kumpurming unu pay napabtang tung kasulatan ang katulad tung nagkaraulitung atia,
tung yatën ëngëd ang mga Judio nga dapat natëtëngëd suituita kang lag̓i yang mga katuw̓ulan yang Dios ang napabtang asan.
Duun da ngaintindiay ta ang maskin tinu pang tauay,
andang pisan ay mabitala na tung pagpakusalak yang Dios tung anya ig yang tanan ang mga tau tung bilug ang kaliw̓utan luw̓us dang pag̓aëlatan yang Dios ta sintinsia na tung kalainan.
20 Kipurki andang pisan ay taung mausgaran yang Dios ang salu ra tung pagtërëlëngën na natëtëngëd tung pagturumanën na yang mga katuw̓ulan na,
sindu andang pisan ay taung mapagsëpët asan.
Asan da ngani tung mga katuw̓ulan na nga bilug̓ay ta ang ita talagang makinasalananën.
Yang Pinakaimpurtanting Linya Natëtëngëd Tung Rimidyung Binuat Yang Dios Ang Para Mausgaran Na Yang Mga Tau Ang Salu Rang Pisan Tung Pagtërëlëngën Na (3:21-26)
21 Ug̓aring simanyan ang mga uras ang naa,
ipinagpabunayag da yang Dios kung ya pa ag̓ari yang pag̓urusgarën na tung mga tau ang tanira salu rang pisan tung pagtërëlëngën na.
Yang papanaw nang pag̓usgad tung nira andang pisan ay kalalabtën na tung pagturumanën nira yang mga katuw̓ulan nang atiing ipinagpaintindi na tung ni Moises atiing tukaw.
Piru ya kang lag̓i ay pinangakuan na disti tung primiru ang duun ipabtangay tung kasulatan ang katulad ka tung isinulat ni Moises may tung nagkarasulat yang mga manigpalatay yang bitala na.
22 Yang nag̓ipag̓usgad yang Dios tung mga tau ang salu rang pisan tung pagtërëlëngën na ay natëtëngëd ilëm tung pagtalig nira yang mga sadili nira tung ni Jesu-Cristong mampatapnay.
Ya ray buatën na tung kumpurming tinu pang tauay ang magtalig mag̓ing Judio man kag bëlag ay andang pisan ay pagsigwatan nira tung pagtërëlëngën na.
23 Ay ya pa ag̓ari,
tanira kang tanan parariung nagpakasalak tung anya ig parariu kang indi nasalapay tung katuyuan yang Dios para tung nira atiing pag̓imu na tung nira ang tanira ipagpadëngëg da rin tung anya.
24 Yang pag̓usgad nang atia tung nira ang salu rang pisan tung pagtërëlëngën na,
diw̓aldi ilëm ëkël tung pagpaita na yang kanëëman na ang andang pisan ay natëngëran na tung nira.
Ay duun ipatiëlay na tung ni Jesu-Cristong nagpatumbas yang linawa na ang para asan da ngaipalibriay na tanira tung sintinsia na tung kalainan.
25-26 Tanya ipinagpailala ra yang Dios ang ëkël tung pagpaturuk na yang dug̓u na,
duun da napasapul tung sintinsiang ipadangat na ra rin tung yatën ang mga tau natëtëngëd tung pagpakasalak ta tung anya ig duun da ka ngaulikay yang kasisilag̓ën na tung yatën.
Purisu simanyan kumpurming tinu pay magtalig yang sadili na tung ni Jesu-Cristo natëtëngëd ka man tung pinagtalus nang atii,
asan da nga risibiay yang Dios.
Ipinagpailala na ra nganing ti Jesu-Cristo ang maning da tia yang kapulutan yang pagpakugmatay na ay ug̓ud duun da nga papruibaay na ang tanya bëlag̓an kusintidur tung mga malalain ang pagburuatën.
Kipurki muya puidi ka rin ang bangdanan ang tanya kusintidur gatëd atiing tukaw pang atiing indi pa nag̓ingtau ti Jesu-Cristo,
midyu tung pinaw̓ayaan na ra ilëm yang pagpakasalak yang mga tau natëtëngëd ilëm tung pagpararurusun na tung nira.
Purisu ya ra ka man tiang nag̓ipag̓aningu ang ti Jesu-Cristo ipinagpailala ra nganing yang Dios tung maning tia ay ug̓ud duun da ka man nga papruibaay na tung panimpu tang naa simanyan ang tanya talagang bëlag̓an ka man kusintidur.
Ya ray binuat na ug̓ud bistu ra ang talagang matadlëng dang pisan yang pag̓urusgarën na kung mag̓usgad da nganing tung mga taung makinasalananën ang salu rang pisan tung pagtërëlëngën na kung magtalig da ilëm yang mga sadili nira tung ni Jesu-Cristong nagsali tung nira.
Nag̓asambit Na Kung Unu Pay Linagpakan Yang Linyang Atiang Pinakaimpurtanti (3:27-31)
27 Kapurisu tung maning tiang palaksu,
unu pa pay mapabug̓al ta sigun tung pag̓usgad yang Dios tung yatën ang saluita rang pisan tung pagtërëlëngën na?
Andang pisan!
Natëtëngëd tung unu pang papanaway ang napisananita ra?
Tung papanaw w̓asung sam bilug ang tung pagturumanën ta yang mga katuw̓ulan na,
asanita w̓asu ngausgaray na ta maning tia?
Bëlag asan,
kung indi,
tung sam bilug ang papanaw ang ita magtalig yang mga sadili ta tung ni Jesu-Cristo,
ultimu ilëm asanita ngausgaray yang Dios ang salu rang pisan tung pagtërëlëngën na.
28 Talagang andang pisan ay sarang ang mapabug̓al ta natëtëngëd tung kalibrian tang naa ay natëtëngëd yang pamilug̓an ëngëd yang pangatadlënganung naa ya taa.
Yang ipag̓usgad yang Dios tung sasang tau ang salu rang pisan tung pagtërëlëngën na ay natëtëngëd ilëm tung pagtalig na yang sadili na tung ni Jesu-Cristong magpatapnay.
Bëlag̓an natëtëngëd tung pagturumanën na yang mga katuw̓ulan na sindu andang pisan ay taung masarang ang yang tanan masulipët na.
29 Ayw̓a,
yamung mga masigkanasyunung mga Judio asan,
kalaum mi ang ita ra ilëm ang mga Judio yay puiding risibiën yang Dios,
piru yang mga tag̓a duma-rumang nasyun indi puidi?
Simpri pati tanira puidi kang risibiën na.
30 Kumus yang Dios sam bilug ilëm,
purisu sam bilug ka ilëm yang papanaw nang mag̓usgad tung mga tau ang salu rang pisan tung pagtërëlëngën na,
mag̓ing mga Judio,
mag̓ing bëlag̓an mga Judio man.
Parariu ka ilëm ang mausgaran na ta maning tia tung pagtalig ilëm nira yang mga sadili nira tung ni Jesu-Cristong magpatapnay.
31 Ta,
unu pa pay linagpakan yang pangatadlënganung atia?
Basu yang mga katuw̓ulan yang Dios asan da ngaimbaliduayu ang anda ray kapulutan na?
Bëlag,
kung indi,
asan da nganing nga pakdulayu ta kantidad nang magkatama.