Natëtëngëd Tung Pitik Ang Usuyun Yang Dios Ang Magsintinsia Tung Tanan Ang Mga Tau, Maskin Mga Judio Maskin Bëlag̓an Mga Judio (2:1-16)
2
Kapurisu yawang maskin tinua pang tauay ang kumpurming pagpakusalak tung bëlag̓an mga Judio natëtëngëd ka man tung mga ubra-ubra nirang mga maning tiang nag̓asambitu,
kung kaw̓utun da nganing yang uras ang ipagsintinsia yang Dios tung mga tau,
pati yawa,
india ra ka pasapayan na.
Ay kipurki kung ay pa atiing nag̓ipakusalak mu tung nira,
duun da ka nga pakusalakay mu yang sadili mu,
natëtëngëd yang dumang mga ubra-ubra nira ya ka man mismu ay nag̓abuat mu.
2 Nag̓akdëkan ta ka ang kung sintinsiaan da nganing yang Dios tung kalainan yang bëlag̓an mga Judiong atiang kumpurming pagbuat yang mga maning tiang bag̓ay,
talagang magkatamang pisan yang parusang ipadangat na tung nira.
3 Ayw̓a,
yawang pagpakusalak tung dumang pagbuat yang mga maning tia,
ang pagkatapus ya kay nag̓abuat mu,
tung kalaum mu mapalikayan mu pa yang sintinsia yang Dios?
4 Muya ya ra ilëm agbaliwalaay mu yang kanëëman ang atiang nag̓ipaita na tung nuyung durug dakul ang india pa nag̓asintinsiaan na,
ang indi,
yawa ra ilëm kanay ag̓agwantaay nang magparurusay.
Ayw̓a,
indi pa ka ëngëd agsakpën yang isip mu ang yang nag̓ipagpaita na ta kanëëman nang atia tung nuyu ay gustu na ra rin ang basi pa ra ilëm ang asana ra ngaëyangay ta ipanligna mu tung mga kasalanan mu?
5 Piru ay pa w̓a?
Bëlag yawag panligna,
yawag pagpakatëg̓as ang pagpadayun ka ëngëd tung pagpakasalak mu.
Purisu yang kaalimbawaan na,
maning pa tung nag̓ipagluug mu rang nag̓ipagluug yang parusang dumangat tung nuyu tung uras ang ipagpaita ka ëngëd yang Dios yang kasisilag̓ën na ang ya ra kay uras ang ipagpabistu na kung unu pay luluaan yang pagsirintinsiaën na tung mga tau ang yay magkatamang pisan.
6 Ay tung uras ang atia magbalës da tung tanan ang mga tau ang kumpurming unu pay mag̓atu tung mga binuat-buatan nira sasa may sasa.
7 Kung kisira may mga taung pagprusigir ta madërëp tung mga pagburuatën ang matitinlu natëtëngëd yang pag̓asikad nira ang tung uri tanira padëngëg̓an da ta maayën yang Dios ang pabanalën,
yang iblës na tung nira,
tugtan na rang magpasapën tung anyang asta tung sampa.
8 Piru tung mga taung ya ilëm yang sadiling kalëlyag̓an nira ay pag̓asikad nira ig anda ëngëd ay gustu nirang manangëd tung kamatuuran natëtëngëd tung pagkadios yang Dios,
kung indi,
pagpadayun ka ëngëd tung mga pag̓urubraën ang bëlag tama,
yang iblës na tung nira,
parusaan na ta malbat ang pagparusa.
9 Bilang magkatinir da ta pinitinsia nirang duru yang kumpurming pagbuat ang pirmi yang malalain,
kapin da ëngëd yang mga Judiong pinamakdulan na ka man ta dakulung pabur atiing tukawa pati yang bëlag̓an mga Judio.
10 Piru kung kisira rin may mga taung pagbuat ang pirmi ta matinlu,
yang iblës yang Dios tung nira ya ray padëngëg̓an na ta maayën ang pakdulan ta kalimëngan kapin da ëngëd yang mga Judio pati yang bëlag̓an mga Judio.
11 Talagang maning tia yang pagbaralësën yang Dios tung mga tau gatëd bëlag̓an ang mag̓aning ang yang pagkabëtang yang sasang tau yay intindiën nang magbalës,
kung indi,
sulaminti ilëm yang mga ubra-ubra nab.
12 Kipurki,
tëlëngan mi ra ilëm yang bëlag̓an mga Judio.
Kumus bëlag̓an suitu yang mga katuw̓ulan ang atiing ipinagpiar yang Dios tung ni Moises,
tanirang tanan ang pamaglampas tung kalëlyag̓an na,
mangablag da tung anya ang asta tung sampa.
Ya ray malambëg̓an nira,
maskin indi na ra buatën ang pitik yang mga katuw̓ulan ang atia ang para yay pagpasunairan na rin tung nira kung tinuman da nira u kung indi.
Pati yang mga masigkanasyunung mga Judio,
kumus suitu tanira yang mga katuw̓ulan ang atia,
purisu tanira kang tanan ang kumpurming paglampas,
sintinsiaan da ka yang Dios tung kalainan ang yang mga katuw̓ulan ang atia yay pitik ang pagpasunairan na tung nira kung tinuman da nira u kung indi.
13 Talagang sintinsiaan na ka tanira ay kipurki bëlag̓an ang mag̓aning ang yang mga taung pamati ilëm tung mga katuw̓ulan ang atiang magbasaën tung nira ang asan da mag̓ing salu ra tung pagtërëlëngën na,
kung indi,
suluminti ilëm yang mga taung pirming pagsëpët yang tanan ang mga katuw̓ulan ang atia ya ra rin ay usgaran nang salu ra tung pagtërëlëngën na.
14 Kipurki tëlëngan mi ra ilëm naang bëlag̓an mga Judio.
Maskin anda ka man ay kaliw̓utan nira tung mga katuw̓ulan ang atia,
piru kada matuman nira yang sasang linyang sinambit tung mga katuw̓ulan ang atia,
duun da nga pruibaay ang may duun kang lag̓i tung mga isip nira kung unu pay magkatama kag bëlag,
maskin indi ka man nag̓aintindian nira yang mga katuw̓ulan ang atia.
15 Ya ray pagpailala ang yang nag̓ipatuman yang Dios ang nag̓asambit tung mga katuw̓ulan,
maning pa tung namarka rang lag̓i tung mga kinaisipan nira.
Nag̓apruibaan dang matuud tia,
ay tung laksu yang mga pag̓irisipën nirang sasa may sasa,
kung kaisan mismu yang sadiling painu-inu nira yay pagbasul tung nira natëtëngëd tung mga ubra-ubra nira,
ig kung magkaisan,
pagdipindir ka ngani.
16 Maning ang pisan tia yang mainabu tung uras ang ipagpatuw̓al yang Dios tung mga tau natëtëngëd tung tanan ang nagkarabuat nira pati nagkaraisip nira maskin taluk pa simanyan.
Italig na yang pagsirintinsiaën ang atia tung ni Jesu-Cristo.
Yang tanan ang atiang nag̓ipag̓aningu lug̓ud tung Matinlung Balitang naang nag̓ipagpakaw̓utu tung mga tau.
Pagturuldukanën Yang Mga Judio Tung Duma Natëtëngëd Tung Mga Katuw̓ulan Yang Dios Piru Tanira Mismu Indi Ka Pamagtuman (2:17-24)
17 Simanyan kung natëtëngëd tung numyung mga masigkanasyunung mga Judio,
pagpadayawamung talagang mga Judioamu ka man ang pulutiku.
Durug dakul yang pagtalig mi ang indiamu ra sakpën yang sintinsia yang Dios gatëd yamuy pinakdulan na yang mga katuw̓ulan na.
Nag̓ipagpabug̓al mi nganing ang yamu ilëm ay ultimung mga tauan na.
18 Dispuis nag̓akdëkan mi ra ka kung unu pay nag̓alëlyag̓an na ang yay buatën mi,
ig kumus ya ray nabadbaran yang mga isip mi yang napabtang tung mga katuw̓ulan na,
nag̓askëamu ra kang magtimbang-timbang tung mga isip mi kung unu pay magkatamang buatën mi.
19 Yadwa pa,
pagtalig̓amu ka ang matakuamu rang manuldukan tung mga taung tag̓a duma-rumang nasyun ang anda pay naërëm nirang masyadu natëtëngëd tung Dios.
Bilang yamu ray nabtang ang mga manigpasanag tung nirang makiklëp pa yang mga pag̓irisipën nira.
20 Maktël da ka yang mga isip ming pagpanadlëng tung nirang pag̓atëlëngan ming indi pa nag̓akdëk yang maayën may yang malain,
maskëamu ra kang magpanugpat-sugpat tung nirang midyu tung may pagkamula pa yang pag̓irintindiën nira tung kamatuuran natëtëngëd tung pagkadios yang Dios.
Tutal asan da ka tung mga katuw̓ulan ang atia nga bilug̓ay mi yang kamatuuran kung unu pay tamang pag̓irintindiën tung Dios.
21 Panuldukanamu ka man tung duma,
piru ayw̓a yang mga sadili mi indi mi ka pala nag̓atuldukan?
Pagparakaw̓utunamu ka nganing tung mga tau ang tanira dapat ang indi manakaw,
ang pagkatapus yamu panakaw ka.
22 Panganingën mi ka tanira ang dapat indi maglimbung tung mga kasawa nira ang pagkatapus yamu paglimbung ka.
Aglalawayanamu ka ta duru tung mga bultung nag̓atutuuan ta duma,
ang pagkatapus,
anday dumang pag̓abuat mi,
yang mga simbaan ang pagtuuan nira,
ya pay nag̓apaklëran ming nag̓apanakawan ang para mapakinaw̓angan mi yang mga mamaalën ang atiang pinamuwat ang mga bultu.
23 Pagpabug̓alamu ang yamu ray pinakdulan yang Dios yang mga katuw̓ulan na,
ang pagkatapus,
asan da ka tung paglalampasën mi nga rëgmëkay mi yang kadëngëg̓an na.
24 Ayw̓a indiamu aningënu sipurki may sasang napabtang tung kasulatan ang nag̓atëmëng dang pisan tung numyu ang mag̓aning,
“Ëkël tung mga ubra-ubra ming mga Judio,
pati yang dëngëg yang Dios ang yay nag̓aningën ming Dios mi,
asan da ka ngaumid tung pagduruminarën yang tag̓a duma-rumang nasyun tung numyu,”
mag̓aningc.
Dapat Ang Indi Mamagtalig Yang Mga Judio Tung Tandang Binuat Tung Mga Tinanguni Nira (2:25-29)
25 Kung tung bag̓ay,
yamung mga masigkanasyunung mga Judio,
pinabuatanamu ta tanda tung mga tinanguni mi ang para maintindian dang lug̓uramu ra ka tung mga tauan yang Dios.
May kantidad na tia basta pagtumanamu yang mga katuw̓ulan ang ipinagpasulat yang Dios tung ni Moises.
Piru kung paglampasamu,
katimbang nang indiamu ra pinabuatan ta tanda.
26 Ig disir kung pausuyanu tia,
kung yang mga taung indi ra pinabuatan ta tanda nag̓apagtuman da yang magkatama ang katulad ka tung napabtang tung mga katuw̓ulan,
bëlag bang yay bilangën yang Dios ang kuari binuatan da ta tanda?
27 Dispuis yang sasang taung dati ra kang lag̓i anday tanda tung tinanguni na piru pagtuman yang nag̓adapatan yang mga katuw̓ulan yang Dios,
ya ray buatën yang Dios ang sasang mulidung pagpasunairan nang magsintinsia tung numyung mga Judio maskin pag̓ëpëtamu tung kasulatan ang asan agbëbtang yang mga katuw̓ulan,
maskin binuatanamu pa ta tanda tung mga tinanguni mi.
28 Tutal tinu pa w̓asu ay ultimung Judio tung pagtërëlëngën yang Dios?
Bëlag̓an yang sasang taung may tandang binuat tung tinanguni na.
29 Kung indi,
yang kumpurming binaklu yang kinaisipan nang taluk yay ultimung Judio.
Yang natëngëran yang pagbaklu na,
bëlag̓an yang pagtuman na yang sasang urdinansa,
kung indi,
suluminti ilëm natëtëngëd tung inubra yang Espiritu Santo tung isip na.
Yang sasang Judiong nagkamaninganan da ta maning tia,
maskin indi dayawën yang mga kaarumanan na,
dayawën ka ëngëd yang Dios.