Yang Isinulat Ni Pablo Tung Mga Tag̓a ROMA
Yang Intrada Yang Intirung Sulat (1:1-7)
1
Yang nagpasulat tung sulat ang atia yuung ti Pablong sasang turuw̓ulun ni Jesu-Cristo ig sasaw kang taralig̓an na,
bilang apustul na.
Nagkamaninganaw ra ta maning tia natëtëngëd ilëm ang pinilikaw yang Dios ang pagkatapus tinuldukaw ka anyang magparakaw̓utun yang Matinlung Balita ang ultimu ilëm tanya yang pinangapunglan na.
2 Yang nag̓adapatan na ya ra kang lag̓i ay pinangakuan na atiing tukaw pa.
Duun ipapanaway na tung mga manigpalatay yang bitala na ang ya ray namagsulat natëtëngëd tung ipinagpaula na tung nira ang simanyan ya ra kay nag̓abasa ta tung kasulatan ang ya ka man ay sagradung bitala na.
3 Anday dumang nag̓adapatan yang balitang naa,
kung indi,
ya ra yang pag̓aningën yang Dios ang “Ana Na”.
Kung natëtëngëd tung pagkatau na,
tanya sasang kanubli ni Adi David.
4 Kung natëtëngëd tung pagkadios na,
ipinagpailala ra yang Dios ang tanya ka man yang pag̓aningën nang “Ana na” ëkël tung sasang pruibang maktël ang tanya binwi na si kang uman.
Anday dumang nag̓ianingu,
kung indi,
ti Jesu-Cristo ang ya ra kay Ginuu tang may kalalangan tung yatën.
5 Ëkël tung pagpaita na yang kaildaw na tung yëën atiing primiru,
pinakdulanaw ra yang Dios yang pagkaapustulung naa ang nunut da ka ta pagpaktël na tung yëën ug̓ud kayananu.
Yang katuyuan nang nagpakdul ay ug̓ud tung maskin unu pang nasyunay ang bëlag̓an mga Judio,
durung mga taung magtalig da yang mga sadili nira tung ni Jesu-Cristong mampatapnay ang asan da ka ngaëyangay ta ipagtuman nira yang kumpurming nag̓ipanuw̓ul na tung nira ang para ikadëngëg na tanira.
6 Pati yamu mismu gapilamu ra ka tung nirang bintëng yang Dios ang para ti Jesu-Cristo ya ray may anya tung numyung tanan.
7 Purisu,
napagpasulataw ra tung numyung tanan asan tung Roma ang nag̓amaal da ka yang Dios ta duru.
Bintëngamu ra ka nganing anyang mag̓ing mga tauan nang sadili.
Yang nag̓ipag̓ampuu para tung numyung tanan asan ang mas pang maispirinsiaan mi yang kanëëman yang Ama tang Dios ang pagpadag̓ën-dag̓ën tung numyu durua ni Ginuu tang Jesu-Cristo ig mas pang ikasadya mi yang kaampiran mi tung nirang naang baklu.
Natëtëngëd Tung Pagmaal Na Tung Nira (1:8-15)
8 Tukaw tung tanan,
durug dakul yang pagpasalamatu tung Dios ang pagpaturuw̓ulunanu natëtëngëd tung numyung tanan asan,
ang asan da ag̓ipapanawayu tung ni Jesu-Cristong pangërëngan tung yatën duun tung katalungaan yang Dios.
Yang nag̓apasalamatanu ëngëd tung anya ang yang pagtaralig̓ën ming durug bakëd tung ni Jesu-Cristo yay nag̓apagkërësën-kësënan yang mga tau tung intirung sinakëpan yang kagaëman yang mga tag̓a Roma.
9-10 Ayw̓a indi maaningu tia ay maski nganing yang Dios puiding pakdëngënu ang talagang matuud ang pirmiamu ilëm ang sambitënu ang kada mag̓ampuaw tung anya.
Tanya ka man yang pagpaturuw̓ulunanu ang bilug yang isipu tung pagparakaw̓utunu yang Matinlung Balita tung mga tau natëtëngëd ka man tung pag̓aningën nang Ana Na.
Yang sasang nag̓aingaluku ëngëd tung anya,
ang basi pa ra ilëm ang simanyan pakdulanaw ra anya ta lugarung mag̓angay ra asan tung numyu kung yay uyun tung kalëlyag̓an na.
11 Kipurki paglalangkag̓ënaw ra ta duru ang tung makali mag̓irita-ita ra ug̓ud mataw̓anganamu ra ka yëën ta kumpurming unu pay ipaëyang yang Espiritu Santo tung isipu ug̓ud ya ray mas pang pagbakëran yang pagtaralig̓ën mi.
12 Yang gustuung ianing tia magkasiraanita rang magparakëtël-këtëlan ta kinaisipan may kinaisipan ëkël tung pagbaralitaan ta kung ya pa ag̓ari yang papanaw yang pagtaralig̓ën ta tung ni Jesu-Cristo sasa may sasa.
13 Mga kaputulan,
duru rang gustuu ang maintindian mi ang muya-muyaaw ra rin ang pasukat-sukat ang mag̓angay asan tung numyu.
Piru pirming may pagsangkëlanu ang asta ra ilëm simanyan.
Ay yang pag̓asikarung mangay asan ang basi pa ra ilëm ang yang balitang naang nag̓ipagpakaw̓utu mag̓umintua ra ka tung kinaisipan yang mga tau ang katulad ka tung pinakaw̓ut na tung duma ang bëlag̓an kang mga Judio.
14 Ay ta yëën,
pinakdulanaw ra yang Dios ta ubligasyunung magparakaw̓utun tung tanan ang nasyun ang bëlag̓an kang mga masigkanasyunung mga Judio,
mag̓ing mga sibilisadu man ang matakung magbitala ta Giniriego kag bëlag,
mag̓ing may mga pinag̓aralan man kag anda man.
15 Purisu ta yëën,
duunaw ra ka ngaëyangay ta kalëlyag̓anung duru ang kung unu pay nag̓alagpakan yang Matinlung Balitang naa,
ya ra kay ipagpasanag̓u tung numyu asan tung Roma ang katulad ka tung pag̓abuatu tung duma-rumang lugar.
Yang Pinakaisi Yang Matinlung Balita (1:16-17)
16 Kung natëtëngëd tung Matinlung Balitang naang nag̓ipagpakaw̓utu natëtëngëd tung pinagtalus ni Jesu-Cristo,
indi ëngëd ikaëyaku,
kipurki durug puirsa yang batikal na gatëd nag̓askëanu ang kung ipagpakaw̓utu ra nganing tung mga tau,
nag̓apanuntan da ka yang Dios yang puirsa nang magtapnay tung kumpurming tinu pay magtalig yang sadili na tung ni Jesu-Cristo.
Atii kanay tung primirung pisan ang palaksu yang balitang naa,
yang pinanapnay na ya pa ilëm yang mga Judio.
Piru simanyan pati yang mga taung tag̓a duma-rumang nasyun ang bëlag̓an mga Judio nag̓apanapnay na ra ka.
17 Dakulu man yang pagtalig̓u ay asan tung Matinlung Balitang naa ngaubligaray yang Dios kung ya pa ag̓ari yang pag̓usgad na tung mga tau ang salu rang pisan tung pagtërëlëngën na.
Anday dumang papanaw ang intindiën nang mag̓usgad tung nira ta maning tia,
kung indi,
tëëd ilëm asan tung pagtalig nira tung ni Jesu-Cristong pagpatapnay.
Talagang matuud tia,
ay kipurki may sasang bitalang ipinagpasulat yang Dios ang tukaw ang mag̓aning,
“Kumpurming tinu pay inusgaran da yang Dios ang salu rang pisan tung pagtërëlëngën na ëkël tung pagtalig na yang sadili na tung anya,
ya ray mapagpasapën tung anyang asta tung sampab,”
ag̓aaning.
Natëtëngëd Tung Nag̓asilag̓an Yang Dios Tung Bëlag̓an Mga Judio Ang Ya Ra Kay Nag̓ipagkaministiran Nira Ta Kalibrian (1:18-32)c
18 Sinambitu nganing kung ya pa ag̓ari yang pag̓usgad yang Dios tung mga tau ang salu rang pisan tung pagtërëlëngën na ay natëtëngëd tanira talagang bëlag da kang lag̓ing salu.
Nag̓ipagpabistu ra nganing yang Dios ang pagtinir tung langit ang nag̓asilag nganing tung mga tau ang ya rag balësay na ta parusa.
Yang nag̓asilag̓an na tung nira ya ra yang tanan ang panlipat nira tung anya may yang tanan ang pagburuatën nirang mga malalain tung mga masigkatau nira ang asan da ka nga tampëkay nira yang nag̓askëan nirang matuud natëtëngëd tung anya.
19 Talagang magkatamang pisan yang nag̓ianingung atia ang tanya nag̓asilag tung nira ay yang sarang ang maintindian nira natëtëngëd tung anya,
bistu rang pisan tung nira,
ay ipinagpabunayag na ra nganing tung nira.
20 Ay kipurki disti pa atiing pag̓imu na yang kaliw̓utan,
yang pagkabëtang nang indig dakatën ta mata asan da kang lag̓i nga maladmaray nira tung mga bag̓ay ang inimu na.
Bilang asan nga maladmaray nira ang tanya makagag̓aëm tung tanan disti pa tung katëbtëw̓an ang asta tung sampa ig yang pagkadios na inding pisan mapasiring-siringan ta maskin unu pa tung inimu na.
Purisu andang pisan ay mapadatëlan nira ang para mapanginluas da rin ang maning anday nag̓aintindian nira natëtëngëd tung Dios.
21 Kipurki maskin may nag̓aintindian da ka man nira natëtëngëd tung anya,
piru bëlag yag dayaway nira ang yay Dios,
bëlag kang yag pasalamatay nira tung anya yang mga kaayënan ang nag̓ipamakdul-pakdul nang pirmi tung nira,
kung indi,
yang nag̓aisip nira natëtëngëd tung anya,
naski ra tung anda ëngëd ay kakuinta-kuinta na.
Nakiklëpan da yang mga kinaisipan nira ang asta nangaplëkan da ta ipag̓intindi nirang ustu tung anya.
22 Mag̓aning tanira ang tanira unu yay pangaskë,
piru tung pagkamatuud,
sigun tung pag̓irintindiën nira tung Dios,
namaglua rang midyu ra ilëm tung mga kabus-kabus.
23 Imbis tuuan nirang padëngëg̓an tanya ang yay banal,
pinaklian da ilëm nira ta mga bultung ipinakbung da nira tung sasang tau ka ilëm ang suitu ta kamatayën,
pati tung mga lamlam,
asta tung mga ayëp ang pamagpanaw-panaw asta yang pamagkanwang ang para yang mga maning ka ilëm tia ya ray tutuuan nirad.
24 Kapurisu kumus tinalyuran da ka man nira yang Dios,
pinaw̓ayaan na ra ilëm tanirang mamagtuman yang kumpurming unu pay makursunadaan nirang malalaway ang asta asan da ilëm nga durug̓asay nira yang dëngëg ang ipinakdul yang Dios tung nira sasa may sasa ëkël tung buat-buat nirang tinanguni may tinanguni.
25 Pinaw̓ayaan na man nganing ay natëtëngëd imbis padayunan nira yang nag̓aintindian nirang magkatama natëtëngëd tung anya,
unaw̓is ya rag pakliay nira ta kabuklian.
Ay maning da ka man tia ang yang nag̓apanirbian nirang nag̓atuuan,
ya ra yang sasang inimu ka ilëm yang Dios,
bëlag da tanya mismung nag̓imu ag̓ad ultimu ilëm tanya ay bag̓ay ang pisan ang dayawën tang mga taung inimu na ang asta tung sampa.
Talagang yay magkatamang pisan ang buatën ta.
26 Kapurisu natëtëngëd tung pag̓abuat nirang atia,
pinaw̓ayaan na ra ilëm tanira ang asta naëyangan da ta mga kursunada nirang makakaëyak.
Sasa ra duun tung mga baw̓ay nira ang yang natural nirang mangay tung sasang lalii pinaklian da ilëm nira ta kabaliskad na ang simanyan baw̓ay may baw̓ay pagkinasawa-kasawaay ra.
27 Maski nganing yang mga lalii nira,
ya ka.
Yang natural nirang mangay tung sasang baw̓ay binutwanan da ka ilëm nira ay naëyangan da ta ipagkursunada nirang makinit tung masigkapariu nirang mga lalii.
Tëëd mi tia,
lalii may lalii pagbinuatay ta durug kalalaway ang andang pisan ay ëyak-ëyak nira!
Purisu yang parusang sukat tung nira ya rang pisan tiang nag̓ibalës yang Dios tung nira natëtëngëd ka man tung pag̓irintindiën nirang atia tung anya ang durung pisan agkakamalie.
28 Kumus ipinabtang da ilëm nira yang Dios tung anda ray kuinta ang para intindiën pa rin nira,
purisu pinaw̓ayaan na ra ka ilëm tanira ang asta tinubwan da ta kinaisipan nirang anda kay kuinta.
Yang dinangat na,
namampaklëd da tung mga pag̓urubraën ang indi ka ëngëd magkabag̓ay tung pagtërëlëngën yang Dios.
29 Tëlëngan mi ra ilëm.
Durung kalëlyag nirang magbuat ta sari-saring mga malalain ang indi ka ëngëd magkatamang buw̓uatën nira tung mga masigkatau nira ang katulad da asan tung magdarasun ang sambitënu.
Asan da ta panalënsën ang anday tërëgkaan yang kagustuan nira.
Asan da ka ta pirming tima tung isip nirang magpakdul ta kunsimisiun tung aruman nira.
Asan da ka ta durug kainiw̓ëg̓ën tung mga kaarumanan nira.
Asan da ka ta nagamën da yang isip nira tung pagpangimatay tung mga masigkatau nira.
Asan da ka ta durung kalëlyag nirang magpundar ta suruayën.
Asan da ka ta mandaraya.
Asan da ka ta madinëmëtën ang magbuat ta malain.
Asan da ka ta madaraldal.
30 Yang duma kunliw̓aknën.
Yang duma,
maski yang Dios ya ray nag̓asilag̓an nira.
Yang duma,
masyadug kalinamkuën tung mga masigkatau nira ang nunut da ka ta pandëëg-dëëg nira.
Yang duma durug kabuw̓ug̓al.
Yang duma pirmi ilëm ang pagtima ta baklung palaksu kung ya pa ag̓aring mapagbuat ta mga malalain.
Yang duma mabinatukun tung mga ginikanan nira.
31 Asan da ka ta mga taung nangaplëkan da ta ipag̓intindi nirang ustu kung ay pay magkatama kag bëlag ang asta anda ray pag̓urubraën nirang ustu tung pagtërëlëngën yang Dios.
Asan da ka ta anday nabitalaan nang tau.
Asan da ka ta mga taung maskin pa tung may mga kaampiran tung nira,
indi nganing ag̓askëng maggëgma.
Asan da ka ta andang pisan ay kakaildawën na tung mga masigkatau na.
32 Tanirang tanan,
nag̓askëan da ka nira yang kalalangan yang Dios ang kumpurming tinu pay pagbuat yang mga maning tia,
bag̓ay ra tung nirang mapatay.
Piru,
maskin nag̓aintindian da ka man nira,
bëlag̓an ilëm ang ya pag padayunay nira yang pagburuatën nira yang mga maning tia,
kung indi,
pagpauyun pa nganing tung duma ang pagbuat ka ta mga maning ka tia.