Pagkërëng Ti Pablo Tung Sadili Na Tung Katalungaan Ni Adi Agripa (26:1-11)
26
Numanyan mag̓aning ti Adi Agripa tung ni Pablo,
“Puidia rang magbitala ang para magdipinsaa yang sadili mu,”
mag̓aning.
Purisu ti Pablo tanya,
dayun na rang inunat yang kalima na,
bilang ya ray sinyas na tung mga tau ang tanya magbitala ra.
Maning taa yang pagkërërëngën na tung sadili na:
2 “Maginuung Adi Agripa,
kung natëtëngëd tung tanan ang nag̓ipagbangdan ang atia tung yëën yang mga masigkanasyunung mga Judio,
tung yëën ang pag̓intindi,
durug dakul ang pabur ang ipinakdul tung yëën ang naawaw ra tung katalungaan mu manuw̓al.
3 Ag̓aaningaw ra ta maning tia ay yawa ëngëd ay sag̓ad tung tanan ang kinaug̓alian yang nasyun yamën ang naang mga Judio pati yang mga bag̓ay ang pagbaratiran yamën ang pagsurug̓aan.
Purisu sasa ilëm ang ingalukunu tung nuyu,
Maginuung Adi,
ang kung maimu ilëm tung nuyu,
pasinsiaayaw ra kanay nuyung pabitalaay ta abwat-abwat ang uras.
4 “Kung natëtëngëd tung pagkatauu disti pa tung primiru ang paran-paranaw pa duun tung banwang natauanu ubin duun ka tung Jerusalem,
kunisidu ra yang mga masigkanasyunung tanan.
5 Tung tantung kabuay ra,
nag̓askëan da nira ang disti pa tung primiru yuu kinasakpan ang lag̓i yang sasang grupung pag̓aningën ang mga Pariseo ang yang pagturuuën nira tung Dios pinakasulipët tung tanan ang mga grupu tung nasyun yamën.
Kung mangalëlyag ilëm tanira,
puiding pasistigusan nirang talagang matuud yang bitalaung atia.
6 Ta,
numanyan ang mga uras ang naa,
anday dumang nag̓ipagbista tung yëën,
ang indi,
natëtëngëd panangëraw ra ang talagang matuud yang sasang pinangakuan yang Dios tung mga kinaampu yamën atiing tukaw paa.
7 Yang pinangakuan nang atii ya pa ka man mismu yang nag̓aëlatan yang intirung nasyun yamën ang sam puluk may durua nga palanaan ang basi pa ra ilëm mapakinaw̓angan da nira.
Yay nag̓atëngëran yang pagturuuën nira tung Dios ang durug dërëp tung uras ang tanan.
Tëëd mu tia,
Maginuung Adi,
natëtëngëd tung nag̓apanangërung naa sigun tung pinangakuan yang Dios ang atii tung nasyun yamën ya ra ka pala ay nag̓ipagbangdan tung yëën yang mga masigkasayunu mismu!
8 Ayw̓a kaya durug liwag tung mga isip ming manangëd ang yang Dios pagpabuing uman tung mga patay?
9 “Maskin yuu ngani atii kanay,
kanisipu ang yang nag̓ibandilyung atia natëtëngëd tung ni Jesus ang atiang tag̓a Nazaret yay dapat ang batukanu ta ustu.
10 Ya ra ka man tiing binuatu duun tung Jerusalem.
Kumus yuuy pinakdulan da ta katëngdanan yang mga paring arabubwat,
kadakël da yang mga tauan yang Dios ang ipinampakalabusu.
Kada sintinsiaan dang dapat ang imatayën,
nagpauyunaw ka.
11 Muya-muyang pinampaparasanung pinampaanut kung may nagkarapanawanu duun tung mga pagsaragpunan yamën ang mga Judio.
Ay tinag̓amanu ra rin ang panrëgsën ang para magbitala ta malain tung ni Jesus ang aningën nirang bukliën.
Pinanikaru pa nganing ang pinanrutus asta duun tung mga siudad ang alalawirën,
yang kasisilag̓ënung duru tung nira.
12 Ya kay inangayu duun tung Damasco.
May ëkëlung kabakëran ang pagpailala tung yëën ang pinakdulanaw ka man ta katëngdanan yang mga paring arabubwat ig pag̓atuw̓ulaw nira.
13 Numanyan atiing pagparanawënu tung karsadang panganing duun,
atiing kërëng da yang kaldaw,
Maginuung Adi,
naitaw ra ta sasang masadlaw ang nagliit tung langit ang makilaw pa tung kaldaw ang ya ray sumininggat tung yëën may tung mga arumanu.
14 Pagpadagpa yamën ang tanan tung tanëk,
unaw̓is may nagngëlung busis ang pag̓aning tung yëën tung bitalang Hinebreo ang mag̓aning,
‘Ay Saulo,
ayw̓at nag̓adërëëg-dëëg̓anaw nuyu?
Yang kaalimbawaan mu maning pa tung sasang bakang panagbëng tung ayung matarëm ang nag̓ipagtudyuk-tudyuk tung anya.
Yang nag̓atigbak mu yang sadili mu mismu,’
ag̓aaning.
15 Mag̓aningaw ka ta yëën ang minlës,
‘Ayw̓a,
tinua pa?’
Mag̓aning tung yëën,
‘Yuu ra ti Jesus ang nag̓adërëëg-dëëg̓an mu.
16 Ala,
magbungkarasa ra!
Nagpaitaw ra nganing tung nuyu ay pinilika ra yëën ang magparaturuw̓ulun tung yëën.
Ay magpaingmatuura ra tung mga tau kung unu pay linagpakan yang naita mung naa tung yëën numaan pati yang ipaitaw pa tung nuyu tung magdarasun.
17 Dispuis bawiëna yëën tung mga karisguan ang mapanawan mu tung mga masigkanasyun mung mga Judio pati tung mga tag̓a duma-rumang nasyun ang yay ituw̓ulu tung nuyung pampakaw̓utan.
18 Pampasanag̓an mu yang mga painu-inu nira ug̓ud mapanalyud da tung makiklëp ang mapaklëd tung masadlaw.
Bilang mapuklut da tung pagkërëmkëmën ni Satanas ang mapalg̓ud da tung pagpërëg̓ësën yang Dios.
Ya ray prusigiran mu ug̓ud ëkël tung pagtalig nira tung yëën,
asan da tanira nga patawaray yang Dios tung mga kasalanan nira ig asan da ka nga lakët tung kadaklan ang binuatung mga tauan yang Dios ang sadili,’
ag̓aaning duun tung yëën.
19-20 “Kapurisu,
Maginuung Adi,
indiaw nagpasuag tung itinuw̓ul ang atia tung yëën atiing may ipinadakat da tung panëlëngu ang liit ka man tung langit,
kung indi,
nagparakaw̓utunaw ra ka man tung mga tau.
Atiing primiru,
duunaw ra kang lag̓i tung Damasco nagparakaw̓utun,
magdasun duun tung Jerusalem,
pati duun tung intirung sinakëpan yang Judea,
asta ra duun ëngëd tung bëlag̓an mga masigkanasyunung tag̓a duma-rumang nasyun.
Tanirang tanan pinanganingu ang kaministiran ang magsug̓at da tanira tung mga kasalanan ang pagkarabuat nira ang para ya ray panalyuran nirang magbalik tung Dios.
Yadwa pa kaministiran ka ang may maita tung mga ubra-ubra nirang yay magpailala ang talagang nanligna ra ka man ang matuud tung mga kasalanan nira.
21 Kapurisu yang pagparakaw̓utunu tung mga tau ang anday pinilikan maskin unu pang nasyunay,
ya ray natëngëran yang pagdëëp tung yëën yang mga masigkanasyunu duun tung pagtuuan yamën ang pinakalusu ang pagkatapus tinag̓amanaw ra nirang imatayën.
22 Piru nag̓ataw̓anganaw ka ëngëd yang Dios ang asta ra ilëm simanyan.
Purisu naniaw rag këkdëng ang pagpaingmatuud tung numyung tanan,
maskin aranëkamu ta pagkabëtang maskin abwat.
Anday dumang nag̓ipagpakaw̓utu ang indi turunung pisan tung nagkaraulang tukaw yang mga manigpalatay may ni Moises ang ya ka man unu ay dapat ang magkarainabu.
23 Bilang yang pag̓aningën ang Cristo,
kung kumaw̓ut da nganing unu,
dapat unung mapasaran ta kamatayën ang durug kapinitinsia ig dapat kang tukaw tung tanan ang mabui si kang uman ug̓ud magpasanag tung mga painu-inu yang mga masigka Judio na pati tung mga tag̓a duma-rumang nasyun kung ya pa ag̓ari yang pagpaklëd nira tung masadlaw ang asan da ka tanira nga tapnayay na,”
ag̓aaning ti Pablo.
24 Numanyan atiing pagkërëng ni Pablo ta maning tia tung sadili na,
tinabkaw ra ni Gubirnadur Festong ginasëran ang mag̓aning,
“Ëëy,
Pablo,
bariadua!
Yang pinag̓aralan mung atia kumus duru ra,
ya ray pagpabariadu tung nuyu!”
25 Mag̓aning ka ti Pablong nagtimalës,
“Maginuung Festo,
bëlag̓anaw bariadu,
ang indi,
tung katamtaman ilëm yang isipu.
Pulus matuud yang mga bitalang atiang nag̓ipagpadapatu.
26 Kunisidu ni Maginuung Adi yang mga bag̓ay ang atia ig tung anya puiding ianingu tung diritsyaan.
Ay indiaw kumpurmi ang anda pay kaliw̓utan na natëtëngëd tung mga bag̓ay ang atia,
ay bëlag̓an tung taluk ngainabu.
27 Maginuung Adi Agripa,
yawa pag̓ingmatuura ka tung nagkarasulat yang mga manigpalatay yang bitala yang Dios atiing tukaw?
Piru nag̓askëanung talagang panangëra.”
28 Mag̓aning ti Adi Agripang nagtimalës,
“Ayw̓a kalaum mu ang makali-kaliaw ra ilëm nuyung mapapanangëd ang ti Jesus ang atiang nag̓asambit mu ya ra yang pag̓aningën ang Cristo ang para yuu magpagaëm ka tung anyang mag̓ing tauan na?”
29 Mag̓aning ti Pablong minlës,
“Aay,
Adi,
maskin tung makali,
maskin tung mabuay pa,
pariu ka ilëm tung yëën,
basta yang nag̓ipag̓ampuu tung Dios ang bëlag̓an ilëm yaway makbung tung yëën ang magtalig ka tung ni Jesus,
kung indi,
pati tanirang tanan ang pamagpamati tung yëën numaan,
ya ka,
puira pa tung mga kadinang naang ibinëgkës tung yëën,”
mag̓aning.
30 Atiing indi pa nganing nag̓atapus ti Pablo ta pagbitala,
kumindëng da yang Adi ang para magliit da,
kasiraan da ka tanira yang Gubirnadur may ti Bernice asta yang kadaklan ang mga kaarumanan nirang kumarungan da ka rin asan.
31 Atiing alawid-lawid da tanira,
namagkërësën-kësën da tanira sasa may sasa ang mag̓aning,
“Yang taung nakaa,
andang pisan ay binuatan na ang dapat da rin matumbasan ta linawa na ubin ya ra rin ay ipagpakalabus tung anya.”
32 Numanyan mag̓aning ti Adi Agripa tung ni Gubirnadur Festo,
“Yang taung nakaa,
kung indi ilëm din napag̓ingaluk ta apilar tung ni Maginuung Adi Cesar duun tung Roma,
mapalpasan da rin,”
mag̓aning.