Pag̓ingaluk Ti Pablo Ta Apilar Tung Ading Pinakalandaw (25:1-12)
25
Taa numanyan pagkatapus yang tulung kaldaw ang ikakarungun ni Gubirnadur Festo tung puistu,
nagliit da tung Cesareang minangay duun tung Jerusalem.
2-3 Kumaw̓ut duun,
yang mga paring arabubwat may yang mga manig̓ërëkëlën tung nasyun yang mga Judio,
ya ray namansiangay tung anyang namagbangdan tung ni Pablo.
Namangamu-amu ra tung anyang mag̓aning,
“Kung maimu ilëm tung nuyu,
Maginuung Gubirnadur,
patuw̓ulan mu ti Pablong iatëd taa ug̓ud taa ra bistaay mu,”
mag̓aning.
Maning tia yang iningaluk nira ay may natima ra nirang paëlg̓an da nira ti Pablong ipaimatay.
4 Numanyan mag̓aning ti Festong tuminuw̓al,
“Ti Pablo ya nga kalabus duun tung Cesarea.
Indi ra ka ilëm buay,
duunaw ra ka magbalik.
5 Maayën pa,
yang may mga katëngdanan asan tung numyu mansinunut da ilëm tung yëën.
Kung may binuatan na,
duun da ilëm idimandaay mi,”
ag̓aaning ti Festo.
6 Atii,
nagtinir pa duun ta indi nagsubra tung sam puluk ang kaldaw,
baklu naglëkat duun tung Cesarea.
Pagkapangayag,
pagkarung na tung pag̓usgaran,
dayun na rang pinaguuyan ti Pablo.
7 Pagkaw̓ut ni Pablo,
dayun dang tinaripukpukan yang mga Judiong atiang namagliit duun tung Jerusalem.
Inimpisaan da nira ta bangdan ta mga malëlbat ang kasalanan ang indi ka ilëm mapapruibaan nira.
8 Matapus,
ti Pablo nanuw̓al dang mag̓aning,
“Anday kasalanan ang binuatanu.
Indiaw naglikëd tung mga urdinansang pag̓ausuy yamën ang mga Judio,
indiaw ka nagpalangaas ang para dinamangënu yang pagtuuan yamën ang atiang pinakalusu,
ig indiaw ka nagbatuk tung katuw̓ulan ni Maginuung Adi Cesar duun tung Roma,”
mag̓aning.
9 Piru ti Gubirnadur Festo tanya,
kumus may gustu nang magluak ta utang ang kanëëman tung mga Judio,
dayun na rang tinalimaan ti Pablong mag̓aning,
“Ta,
unu pa?
Gustu mung mangay duun tung Jerusalem ang para duuna ra bistaayu natëtëngëd tung nag̓ibangdan nirang atia tung nuyu?”
10 Mag̓aning ti Pablong minlës,
“Naanaw ra sakpay yang kausgaran ni Maginuung Adi Cesar ang itinalig na tung nuyu.
Dapat taanaw ra ilëm bistaay.
Nag̓askëan mu ra ka ang anday binuatanung malain tung mga masigkanasyunung mga Judio.
11 Kung alimbawa man,
yuu may kasalanan ang dapat ang tumbasan ta linawaw,
indiaw magpalias.
Ug̓aring kung bëlag̓an matuud yang nag̓ibangdan nira tung yëën,
indi puiding iintrigaaw pa tung pudir nira.
Yuu pag̓ingalukaw ra ta apilar tung ni Maginuung Adi Cesar!”
mag̓aning.
12 Atii,
nagpainunuku ra ti Festo tung mga manigkunsiu na kung unu pay maayën ang buatën.
Pagkatapus tia,
mag̓aning tung ni Pablo,
“Kumus tung ni Maginuung Adi Cesar nag̓ingaluka ta apilar,
duuna ra ilëm tung anya ipaangayayu,”
mag̓aning.
Pagpasanag Ti Gubirnadur Festo Tung Ni Adi Agripa Natëtëngëd Tung Kasu Ni Pablo (25:13-22)
13 Numanyan pagtaklib yang pira pang kaldaw,
may sasang Ading nag̓aranan tung ni Agripa ang nagkaw̓ut duun tung Cesarea,
durua tanira ni Bernice ang ari nang baw̓ay.
Yang inangay nira duun,
mamanggalang tung ni Gubirnadur Festong baklung nakarung tung puistu.
14 Atiing nabuay-w̓uay ra duun,
nagpasanag da ti Gubirnadur Festo tung ni Adi Agripa natëtëngëd tung asuntu ni Pablo ang mag̓aning,
“May sasang tau taa ang ibinutwan da ilëm ni Felix tung kalabus.
15 Atiing duunaw pa tung Jerusalem,
ya ray binangdanan yang mga paring arabubwat may yang mga pamagpakigmaëpët tung nasyun nirang mga Judio.
Namag̓ingaluk da tung yëën ang sintinsiaanu rang lag̓i tung kalainan.
16 Piru nagtuw̓alaw ang lag̓i duun tung nira ang bëlag̓an ug̓ali yamën ang mga tag̓a Roma ang yang taung nag̓idimanda,
sintinsiaan dang lag̓i,
ang indi,
kaministiran magtaralungaan da kanay tanira tung katalungaan yang sasang usgadu ig yang taung nag̓idimanda nira pakdulan da ka ta rugal nang manuw̓al tung nag̓ibangdan tung anya.
17 Purisu atiing pagnunut yang duma tung yëën ang nagbalik taa,
indi pinaw̓ayaanu yang kasung atia,
kung indi,
pagkapangayag,
pagkakarungu tung pag̓urusgaran,
pinatuw̓ulanung lag̓i ti Pablong magpabista ra.
18 Numaan pagkërëng yang pamagdimanda tung anya,
naa pala yang nag̓ibangdan nira tung anya bëlag̓an pala mga malain ang buat ang katulad ka tung nag̓alaumu.
19 Kung indi,
yang nag̓ipagsuay nira tung anya ay natëtëngëd ilëm tung pag̓atuuan nirang mga Judio may tung sasang taung patay ra ang nag̓aranan tung ni Jesus ang ya ray ag̓aningën ni Pablong talagang nabui si ka unung uman.
20 Ta yëën,
tanya,
kumus indi ilëm maintindianu kung ya pa ag̓ari yang pagpasadsaru tung kapungul yang pinagsuruayan nirang atia,
tinalimaanu ra ti Pablo kung malëlyag ang mangay duun tung Jerusalem ang para duun da bistaay natëtëngëd tung mga bag̓ay ang atia.
21 Piru indi ra nalëlyag,
kung indi,
nag̓ingaluk da ta apilar ang yang asuntu na ditiniën da kanay ang ipakaw̓ut tung ni Maginuung Adi Cesar duun tung Roma kung unu pay disisiun na.
Purisu nagkalalanganaw ra ang tanya bantayan da kanay ta mga sundalu ang asta mapaatëru duun tung ni Maginuung Adi Cesar,”
ag̓aaning ti Festo.
22 Mag̓aning ti Adi Agripang minlës,
“Pati yuu,
gustuu kang mamati tung taung atia.”
Mag̓aning ka ti Gubirnadur Festong tuminuw̓al,
“Andamal,
mapamatian mu ra ka tia,”
mag̓aning.
Ti Pablo Nag̓ipatalunga Ni Gubirnadur Festo Tung Ni Adi Agripa (25:23-27)
23 Purisu pagkapangayag minangay ra ti Adi Agripa durua ni Bernice duun tung munisipiu.
Yang bisti nira durug tinlu ig yang pagparaklëran nira tung pagmitingan,
pag̓agalang da ta mupia yang mga tau.
May mga Koronel may darakulung mga tau ang tag̓a siudad ang atia ang pamagkumpanya tung anya.
Numanyan pinaguuyan da ni Gubirnadur Festo ti Pablo.
24 Pagkaw̓ut na,
nagpasanag da ti Gubirnadur Festong mag̓aning,
“Maginuung Adi Agripa may yamung tanan ang pagsaragpun taa tung yatën,
ya rag dawalay mi yang taung naang ipinagriklamu tung yëën yang intirung nasyun yang mga Judio duun tung Jerusalem pati taa tung siudad ang naa.
Tëëd mi,
ya rag ilpakay nira tung katalungaanu ang tanya unu bëlag dang bag̓ay ang pabuiën pa.
25 Piru ta yëën,
anday kasalanan ang naitaw tung anya ang dapat tumbasan ta linawa na.
Numanyan,
kumus napag̓ingaluk da tanya ta apilar tung ni Maginuung Adi Cesar,
pinagdisisiunanung ipaatëru duun tung anya.
26 Ug̓aring indi ilëm maskëanu kung unu pa ëngëd ay sarang ang ipabtangu tung sulat ang ipaëkëlu duun tung ni Maginuung Adi Cesar.
Purisu numanyan,
nani ra ag̓ipatalungaw ra tung numyu,
kapin pa ëngëd tung nuyu,
Adi Agripa,
ug̓ud kung mabista mu ra nganing,
may masulatu tung anya.
27 Ay sipurki kung isip-isipënu ëngëd,
midyu anday kapulutan na ang yang sasang prisu ipaatëd duun tung Roma ang indi ka ipasanag ta maayën kung unu pay nag̓ibangdan tung anya,”
ag̓aaning ti Gubirnadur Festo.