Ti Pablo Nag̓abangdanan Yang Mga Judio Tung Katalungaan Ni Gubirnadur Felix (24:1-9)
24
Taa numanyan,
pagtaklib yang limang kaldaw,
nanikad da duun tung Cesarea ti Ananias ang atiang paring pinakalandaw kasiraan da ka tanira yang mga pamagpakigmaëpët ang duma may ti Tertulo ang yay sasang abugadung taralig̓an nira.
Ay mamagdimanda ra tung ni Pablo duun tung katalungaan ni Gubirnadur Felix.
2 Numanyan,
pinaguuyan da ti Pablong para magpabista.
Atiing asan da,
inimpisaan da ni Tertulo ta pagbangdan ang maning taa:
“Maginuung Gubirnadur,
durug kalimëng yang banwang naa ay natëtëngëd tung pag̓ërëkëlën mu ig duru kang mga kaayënan ang nag̓apakinaw̓angan yang nasyun yamën ëkël tung pagpadag̓ën-dag̓ën mu.
3 Yang mga bag̓ay ang atia,
pirmi ra ilëm ang nag̓adëmdëm yamën ang mga kinasakpan mung maskin ariami pag pagtinir ang ya kay nag̓apasalamatan yamën tung nuyu ta dakulung pagpasalamat.
4 Numaan,
kumus indiami ka malëlyag ang maatrasu yang uras mu ta masyadu,
kung maimu ilëm tung nuyu,
yang riklamu yamën ang naa,
pamatian mu ra kanay ta gësyëng uras ilëm.
5 Yang taung atia nag̓apaniiran ka yamën ang sasang sarut.
Ay pagtukud ta gulu tung mga masigkanasyun yamën tung maskin ay pang banwaay.
Ay ya pa ag̓ari,
tanya sasang pagmangulu tung sasang grupung pamag̓usuy tung itinulduk yang sasang taung bukliën ang nag̓aranan tung ni Jesus ang tag̓a Nazaret.
6-7 Tinag̓aman na pa rin nganing ang dinamangën yang pagtuuan yamën ang pinakalusu,
piru inag̓apan dang lag̓i yamën ang dinëëpa.
8 Kung bistaën mu tanya,
makdëkan mu ka tung anya natëtëngëd tung mga bag̓ay ang naang nag̓ipagbangdan yamën tung anya,”
ag̓aaning ti Tertulo.
9 Atii,
yang mga bitala ni Tertulong atia,
pinaugtunan da yang mga kaarumanan nang mga Judio ang talagang matuud.
Yang Nag̓ipanuw̓al Ni Pablo Tung Katalungaan Ni Gubirnadur Felix Natëtëngëd Tung Nag̓ibangdan Nira Tung Anya (24:10-16)
10 Pagkatapus tia,
tinëlëngan ni Felix ti Pablong sininyasan ang puidi rang manuw̓al.
Purisu mag̓aning ti Pablong nagbitala,
“Maginuung Gubirnadur,
nag̓askëanu ang tung pira pira rang takun yaway dating manig̓usgad tung nasyun yamën.
Purisu pagpasalamataw ka ang taanaw ka tung katalungaan mu manuw̓al para tung sadiliu.
11 Malpës da ilëm ang masiguru mu ang indi ilëm maglampas tung sam puluk may duruang kaldaw ang yuu minangayaw duun tung Jerusalem ang para magtuuaw tung Dios.
12 Atiing pagkaita nira tung yëën duun,
indiaw pagpakigsug̓a maskin tung ninu pa duun tung pagtuuan ang pinakalusu,
indiaw ka pagtukud ta gulu.
Maskin duun tung mga pagsaragpunan nira,
maskin ay pa duun tung siudad,
andang pisan ay binuatanung maning tia.
13 Anda kay pruiba ang sarang mapaita nira tung nuyu,
Maginuung Gubirnadur,
natëtëngëd tung nag̓ibangdan nirang atia tung yëën.
14-15 Ug̓aring yang sasang sarang ang aminënu tung nuyu ya ra taa:
pag̓usuyaw ka man tung pag̓irintindiën ang naang baklu ang yay pag̓aningën nirang kabuklian.
Yang pag̓urusuyunung naa ya kay pagturuuënu ta ustu tung Dios ang atiing tinuuan ka yang mga kinaampu yamën nuntukaw.
Ay ya pa ag̓ari,
panangëraw ka tung tanan ang napabtang tung kasulatan ang ipinagsulat ni Moises pati yang nagkarasulat yang mga manig̓ulang tukaw.
Purisu duunaw ra ngaëyangay ta nag̓ipagpakisëw̓atu tung Dios ang pariung pisan tung nag̓aëlatan yang mga taung naa mismu ang talagang pamuiën na si ka ëngëd ang uman yang tanan ang mga taung patay mag̓ing salu ra tung pagtërëlëngën na kag bëlag.
16 Purisu pagprusigiraw ngani ang yang mga buat-buatu pulus tung nag̓auyunan yang Dios pati mga masigkatauu ug̓ud pirming limpiu yang sadiling paininuu ang anday mabasul na tung yëën.
17 “Numanyan atiing pira rang takun ang andanaw ra duun tung Jerusalem,
minangayaw si duun ang para mag̓atëraw tung mga masigkanasyunung maliliwag̓ën yang kuartang itinalig tung yëën,
yadwa pa ang para magpakdulaw ka ta mga ibuluntaru tung Dios.
18 Numanyan tung pag̓irintindiënu tung mga bag̓ay ang atia,
duunaw ra kaw̓utay yang duma tung pagtuuan ang pinakalusu atiing bakluaw ra ilëm nagtuman yang sasang urdinansa ang para liw̓ianuaw rang magpaklëd.
19 Piru may mga Judiong tag̓a Asia duun ang nangaita tung yëën.
Dapat da rin ang taniray mamagdimanda taa tung katalungaan mu,
kung may ibangdan nira tung yëën.
20 Maski pa yang mga taung naang pamagbangdan da tung yëën,
abir,
pasulitën mu kung unu pang malainay ang napruibaan nira tung yëën atiing pagbista tung yëën yang intirung pamagpakigmaëpët.
21 Ug̓aring,
inay ilëm kung muya ag̓ipakusalak nira tung yëën yang sasang ipinagkëndalu duun tung pinagtaralungaan yamën ang mag̓aningaw tung nira,
‘Anday dumang nag̓ipagbista mi tung yëën numaan,
ang indi,
yuu panangëd ang yang mga taung patay pamuiën si kang uman yang Dios,’”
ag̓aaning ti Pablo.
22 Atii,
kumus biasa kang lag̓i ti Felix natëtëngëd tung pag̓irintindiën tung Dios ang atiang baklu,
indi na ra pinadayun yang bista.
Mag̓aning tung nira,
“Makaw̓ut ilëm taa ti Koronel Lisias,
bakluamu ra usgarayu,”
mag̓aning.
23 Numanyan dayun dang naglalang tung Kapitan ang atiang pagbantay kang lag̓i tung ni Pablo ang maskin bantayan na,
indi ilëm igpitan ta masyadu.
Dispuis,
kung alimbawa,
may gustu yang mga ungkuy nang magbisita tung anyang mag̓asikasu,
pakdulan na ka ta libri.
24 Numanyan,
pagpanaw ra ta pira pang kaldaw,
minangay si ti Felix duun tung munisipiu durua tanirang magkasawa ni Drusila ang sasang Judio kang lag̓i yang nasyun na.
Pagkaw̓ut nira,
pinaguuyan ni Felix ti Pablo ang pagkatapus namamati tanirang magkasawa tung anyang nagpasanag kung unu pay lagpakan yang pagtaralig̓ën yang sasang tau tung ni Jesu-Cristo.
25 Yang kamtangan yang nag̓ipagpasanag na tung nira ay natëtëngëd tung pagturumanën yang nag̓auyunan yang Dios may natëtëngëd tung pagsuruspindiën tung sadiling kalëlyag̓an may natëtëngëd tung sintinsia yang Dios tung kalainan.
Numanyan ya rag dëlaay ti Felix ang pamati.
Purisu ya ra ilëm ag̓aningay na ti Pablong,
“Ustu ra kanay basu tia,
Pablo.
Kung may timpuu tung dumang uras,
baklua si paguuyayung uman,”
mag̓aning.
26 Napag̓aning da ta maning tii,
ay naa pala,
gustu na rin ang ti Pablo magbagsak ta kuarta tung anya ang para mapalpasan na.
Purisu muya-muyang pag̓apaguuyan na ang para magkësën da tanira.
27 Numanyan,
pagtaklib yang duruang takun,
ti Felix pinaklian da ni Porcio Festo tung pagkagubirnadur.
Ang asta nagpapakli ra ilëm ti Felix,
indi na ra inintindi yang kasu ni Pablo,
kung indi,
pinaw̓ayaan na ra ilëm tung prisuan,
ay pagluak ta utang ang kanëëman tung mga Judio.