23
Numanyan ti Pablo,
pag̓asiman-siman na ta mupia yang mga pamagpakigmaëpët ang atia,
dayun dang nagbitala tung nirang mag̓aning,
“Mga kaputulan,
ta yëën,
kung natëtëngëd tung pagsurunurunu tung mga ubligasyunung sasa kang sakëp yang nasyun tang naang Israel,
andang pisan ay pag̓abasul tung yëën yang sadiling painu-inuu.
Maskin tung pagtërëlëngën yang Dios,
ang asta ra ilëm simanyan,
anday binuatanung katulad ka tung nag̓ipagbangdan ming atia tung yëën,”
mag̓aning.
2 Atii,
yang paring pinakalandaw ang nag̓aranan tung ni Ananias,
ya ray nagtuw̓ul tung mga kaarumanan nang katëpad ni Pablo ang dapalan da nira tung nganga na.
3 Pagkadapal,
mag̓aning ti Pablong nagtuw̓al tung anya,
“Yawang pagpaita-ita ilëm yang mga buat-buat mua,
dapalana ka yang Dios.
Asawag kakarung ang para mag̓usgara tung yëën sigun tung lai ta ang pagkatapus tung pagtuw̓ul mung atia tung nirang mandapal tung yëën,
asan dang lag̓i nga likday mu yang lai tang atia!”
ag̓aaning.
4 Numanyan,
yang mga taung atiang këmdëngan tung tëpad ni Pablo,
ya ray namagtimalës ang mag̓aning,
“Abaa,
ya rag sawayay mu yang paring pinakalandaw ang yay nag̓atalig̓an yang Dios ang mangërëngan tung anyang mag̓usgad?”
5 Mag̓aning ka ti Pablong tuminuw̓al,
“Mga kaputulan,
nalamangaw ra pala.
Anday kaliw̓utanu ang ya ra yang paring pinakalandaw.
Ay kipurki nag̓adëmdëmanu yang sasang bitala yang Dios ang napabtang tung kasulatan ang indiita unu dapat ang magpalagpak ta bitalang malbat tung sasang pagmangulu tung nasyun ta,”
mag̓aningb.
6 Taa numanyan,
pagkapamalad da ni Pablo ang yang dumang mga pamagpakigmaëpët asan mga Saduseo ig yang duma mga Pariseo,
dayun na rang pinadakul yang busis nang mag̓aning,
“Mga kaputulan,
yuu sasang Pariseo.
Yang tatayu pati mga kinaampuu,
pulus ka man mga Pariseo.
Anday dumang nag̓ipagbista tung yëën simanyan,
ang indi,
yuu may nag̓ipagpakisëw̓atu tung Dios ang talagang pamuiën na si kang uman yang mga taung nagkarapatay ra,”
mag̓aning.
7 Pagkaaning na tii,
namag̓impisa rang namagbaralalaan yang mga Saduseo may yang mga Pariseo asan.
Tinëgkaan na,
nagbëlag̓an da ilëm tung duruang parti yang pagparainu-inuën nira.
8 Nagkamaningan da ta maning tia ay yang nag̓apapaktëlan yang mga Saduseo ay yang mga tau unung nagkarapatay ra indi ra unu mabui si kang uman.
Anda ka unu ay angil ubin ispiritu pa.
Piru yang mga Pariseo pamag̓impurmi tung tanan ang atia.
9 Kapurisu numanyan,
mas pang nagtunul yang paglëlpakën nirang pamagsuruayan.
Numanyan may mga Pariseo asan ang mga sag̓ad tung mga urdinansa ang ya ray namansikdëng ang namagpakigbatuk ta diskusiun tung mga Saduseo ang mag̓aning,
“Anday kasalanan ang nag̓aita yamën tung taung naa.
Ay kung muya may angil ka man ang nagbitala tung anya ubin ispiritu pa!”
ag̓aaning.
10 Atiing namanginit da ta mupia yang mga kulu nirang pamagsuruayan,
durung ëlëd yang Koronel ang muya ti Pablo lagmit-lagmitën da ilëm nirang tarampuyukan.
Purisu nagkalalangan da tung mga sundalu ang ti Pablo paranëkan da nirang bawiën ang para ëklan da nira duun tung kuartil.
Nag̓apaktël Da Ni Ginuung Jesus Yang Isip Ni Pablo (23:11)
11 Numanyan,
tung law̓iing atii,
nagpalëngët da ti Ginuung Jesus tung ni Pablong mag̓aning,
“Paktëlën mu yang isip mu ay duuna ka tung Roma magpaingmatuud tung mga tau natëtëngëd tung yëën ang katulad ka tung pag̓abuat mu taa tung Jerusalem,”
mag̓aning.
Ti Pablo Pag̓atimaan Da Yang Mga Masigka Judio Nang Imatayën (23:12-23)
12 Taa pagkapangayag,
may mga Judiong namagsaranyug dang namagsumpa ang baklu mamangan ubin manginëm ta wai,
kung napatay ra nira ti Pablo.
13 Tanirang namagsaranyug,
sumubra pa tung ëpat ang puluk nga tauan.
14 Numanyan pagkasumpa nira,
diritsyu rang namagpalëngët tung mga paring atiang arabubwat may tung mga pamagpakigmaëpët ang mag̓aning,
“Yami taa,
nagsumpaami ra tung malbat ang kundisiun ang andang pisan ay panganën yamën mintras indi pa ag̓apatay yamën ti Pablo.
15 Kapurisu simanyan,
may pira pa nga tauan ang tag̓a numyung mangërëngan da tung intirung pamagpakigmaëpët ang magpakigkaw̓ut tung koronël.
Mag̓ingalukamu tung anya ang kung maimu ilëm,
ti Pablo ëklan na si kanay asan tung numyu.
Ëklan mi ra ilëm tung pasëën ang may gustu ming maimbistigaran ta ustu.
Ta yamën tanya,
riparasiunami ra kang mangimatay tung anya.
Indi ra ilëm ipakaw̓ut yamën taa,”
ag̓aaning tanira.
16 Numanyan yang nag̓atima nirang atii natiktikan da yang angkën ni Pablo.
Diritsyung minangay tung ni Pablo duun tung kuartil ang nagkig̓a.
17 Pagkagngël da ni Pablo tia,
dayun na rang ginuuyan yang sasang Kapitan ang mag̓aning,
“Maginuung Kapitan,
kung maimu ilëm tung nuyu,
iatëd mu ra kanay ang patigayun taning mulang nani duun tung koronël.
May ibalita na rin tung anya,”
mag̓aning.
18 Numanyan,
ingkëlan da yang Kapitan tung Koronël ang mag̓aning,
“Maginuung Koronel,
ginuuyanaw ni Pablong atiang prisu ta.
Inarabaw anya ang naning mula ëklanu ra kanay ang patigayun unu taa tung nuyu,
ay may gustu na rin unu ang ibalita tung nuyu,”
ag̓aaning.
19 Atii pinggësan da yang Koronel yang mula tung kalima nang ipinaligbin tung binit ang durua ilëm tanira.
Tinalimaan nang mag̓aning,
“Ta,
unu pay gustu mung ibalita tung yëën?”
20 Mag̓aning ka yang mulang nagtuw̓al,
“Maginuung Koronel,
may mga Judiong namagsarangyug da ang andamal mamag̓ingaluk da tung nuyu ang ti Pablo ëklan mu si tung intirung pamagpakigmaëpët duun tung aranëk.
Ipasëën da ilëm nira ang gustu nirang maimbistigaran ta ustu.
21 Piru kung maimu ilëm tung nuyu,
india ra mamati tung nira.
Kipurki may sumubra pa tung ëpat ang puluk nga tauan ang mga kaarumanan ka nira ang pamag̓ëlëg tung anya.
Tanirang tanan namagsumpa ra nganing ang baklu ra mamangan ubin manginëm ta wai,
ang tanya napatay ra nira.
Numaan simpan da tanira.
Pamag̓ëlat da ilëm tung nuyung magpauyun tung kalëlyag̓an nira,”
ag̓aaning duun yang mula.
22 Mag̓aning yang Koronel ang minlës,
“India ra ilëm mag̓ugtul maskin tung ninu pa ang yang mga bag̓ay ang naa ibinalita mu taa tung yëën,”
ag̓aaning.
Pagkatapus tia,
yang mula dayun na rang pinaulik.
Ti Pablo Nag̓ipalibring Nag̓ipaatëd Tung Cesarea (23:23-35)
23 Taa numanyan yang Koronel dayun dang nagpaguuy tung mga Kapitan ang durua ang mag̓aning tung nira,
“Magsimpanamu ra kanay ta mga duruang gatus nga sundaluan ang para mamag̓angay duun tung Cesarea.
Kasiraan da ka tanira yang pitung puluk ang mga manigsaay ta kabayu may durua pang gatus ang mga manigpamangkaw.
Ay muya tung mga alas nuibing kalalaw̓iiën,
lumargaamu ra.
24 Ti Pablo simpanan mi ka ta mga kabayung masaayan nang pagpakli-paklian na ug̓ud matinlu ka yang pag̓atëd mi tung anya duun tung ni Gubirnadur Felix ang indi ka maunu pa,”
mag̓aning.
25 Atii,
dayun dang nagsulat ang maning taa yang kamtangan na:
26 “Maginuung Gubirnadur Felix,
Yuung may sulat taa ti Claudio Lisias.
Tukaw-tukaw tung tanan pagpakumustaw asan tung nuyu kung maayën yang paninanguni mu.
27 Yang taung atiang ipinatëru ra asan tung nuyu,
dinëëp yang mga Judio tani ang pagkatapus puntu ilëm inimatay nira.
Pagkasapuu ang tanya may linya nang pariu ka tung dating mga tag̓a Roma,
lag̓i-lag̓ing pinaranëkan yamën yang mga sundaluung binawi.
28 Pagkatapus tia,
kumus may gustuung magpasadsad tung nag̓ibangdan nirang atia tung anya,
ingkëlanu ra tung intirung pamagpakigmaëpët tung nasyun nira ang ipinatalunga.
29 Baklu ra ngaskëayu ang naa pala,
yang nag̓ipagbangdan nirang atia tung anya ay natëtëngëd ilëm tung pag̓atuuan nirang mga Judio ang yay pagsuruayan nira.
Piru kung tung lai ta tëlëngay,
andang pisan ay binuatan nang dapat da rin ang matumbasan ta linawa na ubin ya ra rin ay ipagpakalabus ta tung anya.
30 Numanyan,
atiing pagkabalitaw ra ang tanya nag̓atimaan da yang mga Judiong imatayën,
lag̓i-lag̓ing ipinaangayu ra asan tung nuyu.
Pati yang pamagbangdan tung anya,
pinaglalanganu ra ka ang asan da ilëm idimandaay nira tung katalungaan mu.
Ya ra ilëm tia yang sarang ang masulatu tung nuyu.”
Maning tia yang isinulat yang Koronel tung ni Gubirnadur Felix.
31 Taa numanyan,
tinuman da ka man yang mga sundalung atia yang itinuw̓ul yang Koronel tung nira.
Tung law̓iing atii,
ti Pablo ingkëlan da nira ang asta duun tung siudad ang Antipatris.
32 Pagkapangayag,
yang kadaklan ang mga sundalung atia,
baklu ra namagbalik tung Jerusalem duun tung kuartil nira,
ipiniar da nira ti Pablo tung mga kaarumanan ka nirang mga manigsaay ta kabayu ang para ya ray mamagpadayun ang mamag̓atëd tung anya duun tung Cesarea.
33 Purisu numanyan duun da ka man inatëd nira.
Pagkaw̓ut nira,
pagpakdul nira yang sulat tung ni Gubirnadur Felix,
dayun da nirang inintriga ti Pablo tung anya.
34-35 Numanyan pagbasa ni Gubirnadur Felix yang sulat ang atia,
dayun na rang tinalimaan ti Pablo kung ay pang banwaay nga sakëp.
Pagkasapu na ang tanya sakëp yang Cilicia,
dayun na rang inaning,
“Kung mansikaw̓ut da nganing taa yang pamagbangdan tung nuyu,
bistaëna ra yëën,”
mag̓aning.
Pagkatapus,
nagkalalangan da ang ti Pablo bantayan da ilëm duun tung munisipiu ang tukaw ya kay balay ang dakulu ang pinagtiniran ang tukaw ni Adi Herodes.