22
“Mga kaputulan,
mga mamaëpëtu,
pamatian mi ra kanay yang bitalaung naang ipanuw̓alu tung numyu,”
ag̓aaning.
2 Numanyan pagkagngël da nirang pagbitala tung sadiling bitala nira,
mas pang pinanlimëngan ang namamati.
3 Mag̓aning ti Pablong nagpadayun yang bitala na,
“Yuu sasang masigka Judio mi.
Maskin duunaw ipanganaay tung siudad ang Tarso duun tung sinakëpan yang Cilicia,
taanaw tung Jerusalem nagdakul ig nagpatuldukaw ka tung ni Maginuung Gamaliel.
Durug kasulipët yang ipinagtulduk na tung yëën natëtëngëd tung mga urdinansang pinanubli ta tung mga kinaampu ta.
Purisu yang linuaan na,
duruaug kadërëp ang nagkërëng tung dëngëg yang Dios ang katulad ka tung numyung tanan numaan.
4 Nagpamarasaw nganing tung mga taung pamag̓usuy tung baklung pag̓irintindiën tung Dios ang naa,
ay gustuu ang magkarapatay rang luw̓us.
Purisu ya ray ipinagdëëpu tung nirang ipinampakalabus tig lalii tig baw̓ay.
5 Atia,
maskin pasistugusan mi tung paring pinakalandaw may tung tanan ang mga pamagpakigmaëpët tung uras ang atii.
Kipurki tanira kay namagpakdul tung yëën yang mga sulat ang ipagpailalaw tung mga masigkanasyun ta duun tung siudad ang Damasco.
Purisu duunaw ka man minangay ang para pandëëpënu yang mga taung atiang kumpurming maitaw duun ang para panggapusunung ipamalik tani tung Jerusalem ang para taa ra parusaay.
6 “Simanyan atiing pagpanawaw ra tung karsada ang nag̓aalëngëtaw ra duun tung Damasco,
mga kërëng da yang kaldaw,
nainalianaw rang sininggatan ta masadlaw ang durug kasulaw ang liit tung langit.
7 Dayunaw rang nagpadagpa tung tanëk.
May nagngëlung busis ang pag̓aning tung yëën ang ‘Ay Saulo,
ayw̓at nag̓adërëëg-dëëg̓anaw nuyu?’
mag̓aning.
8 Mag̓aningaw ka ta yëën ang nagtimalës,
‘Ayw̓a,
tinua pa?’
Mag̓aning tung yëën,
‘Yuu ra ti Jesus ang tag̓a Nazaret ang nag̓adëëg-dëëg̓an mu,’
ag̓aaning.
9 Yang mga arumanu nangaita ka tung masadlaw ang atiing sumininggat,
piru indi ilëm nasalimëtan nira yang bitalang inaning tung yëën.
10 Atii,
dayunaw sing nagtalimaan tung anyang mag̓aning,
‘Unu pay kalëlyag mung buatënu?’
Mag̓aning yang tuw̓al na,
‘Ala,
magbungkarasa rang magdayun duun tung Damasco.
Duun may magpakdëk tung nuyu yang tanan ang pinagplanu yang Dios ang yay dapat ang tumanën mu,’
ag̓aaning duun tung yëën.
11 Numanyan,
atiing indiaw ra maita natëtëngëd tung kaas ang atiing durug kasulaw ang sumininggat tung yëën,
yuu ra ilëm agguyuray yang mga arumanu ang asta nakaw̓utami ra duun tung Damasco.
12 “Duun may sasang taung nag̓aranan tung ni Ananias ang durug katinumanën tung mga katuw̓ulan yang Dios ig pag̓agalang ka ta mupia yang tanan ang mga masigka Judio tang pamagtinir ka duun.
13 Tung pagkaw̓ut na tung yëën,
pinaalëngtanaw rang lag̓i anyang inaning,
‘Saulo,
putulu,
yang mata mu mabuskad da,’
ag̓aaning.
Atii,
lag̓i-lag̓ing naitaw ra ang tanya mismu ya kag dawalayu tung tëparu.
14 Mag̓aning si tung yëën,
‘Saulo,
yang Dios ang nagpailalang tukaw tung mga kinaampu ta ya kay nagpilik tung nuyu disti pa tung primiru.
Yang ipinagpilik na tung nuyu ay ug̓ud maintindian mu ra kung unu pay nag̓aplanu nang buatën kag maita mu ra ka yang sasang pinagpilik nang magtalus tung tanan ang kalëlyag̓an na kag magngël mu ra ka yang busis na mismung pagbitala tung nuyu.
15 Anday dumang kapulutan na tia,
ang indi,
yaway mangërëngan tung anyang magpaingmatuud tung tanan ang mga tau kung unu pay linagpakan yang naita mu kag nagngël mu.
16 Purisu numaan unu pa pay ëlatan mu?
Ala,
magbungkarasa rang magsimpan ang magpabënyag.
Asan da nga papruibaay mu tung pagkamatuud ang ta yawa nag̓ambaya ra ka man tung ni Ginuung Jesus ang magtapnay tung nuyu ang asana ra nga punasay na tung mga kasalanan mu.’
17 “Taa numanyan,
atiing pagbaliku tani tung Jerusalem,
may uras ang ipinag̓ampuu tung Dios asan tung pagtuuan tang atia.
Atiing pag̓arampuënu,
may sasang ipinadakat yang Dios tung panëlëngu.
18 Naitaw ra ti Ginuu ang pag̓aning unu tung yëën,
‘Pakalia rang magliit taa tung Jerusalem kipurki yang mga tau taa indi ra mamanangëd tung nag̓ipagpaingmatuud mu tung nira natëtëngëd tung yëën,’
mag̓aning.
19 Mag̓aningaw ka ta yëën ang nagpakiildaw,
‘Piru Ginuu,
tanira mismu ay nag̓askë ang yuuy nagpanëptëp ang tukaw tung mga pagsaragpunan ang para kumpurming mapanawanung pagtalig tung nuyu,
yay ipadëëpung paburdunan ang ipakalabus.
20 Dispuis pa,
atiing pangimatay yang mga pamagpakigmaëpët tung ni Esteban ang atiing nagpaingmatuud natëtëngëd tung nuyu,
duunaw ka mismung nagpaniid.
Nagpauyunaw ka tung disisiun nira ang tanya imatayën da ilëm.
Inasikasuu pa nganing yang mga lambung nirang pamangimatay tung anya,’
ag̓aaningaw duun tung anya.
21 Mag̓aning tung yëën ang minlës,
‘Ala,
panawa ra!
Ay tuw̓uluna ra yëën ang magparakaw̓utun yang bitalaw tung mga taung tag̓a duma-rumang nasyun duun tung mga banwang alalawid,’
ag̓aaning duun tung yëën.”
22 Sigi-sigi pa rin yang pagparamatiën nira tung ni Pablong pagbalita ang asta sinambit na yang tag̓a duma-rumang nasyun ang yay pinatuw̓ulan ni Ginuung pampakaw̓utan.
Pagkagngël da nira tia,
dayun dang namag̓impisang namaglëlpakën ang mag̓aning,
“Ëëy,
patayën da ilëm yang sasang taung maning tia!
Indi ra magkabag̓ay ang pabuiën pa taa tung kaliw̓utan,”
mag̓aning.
23 Sigi-sigi ra yang paglëlpakën nirang maning tia.
Dayun dang namagluas yang mga lambung nirang ipinagyapyap.
Namangakëp pa ta tanëk ang ipinampatibungbung nira tung abwat natëtëngëd tung kasisilag̓ën nirang duru tung ni Pabloa.
24 Kapurisu,
yang Koronel nagkalalangan da tung mga sundalu na ang ti Pablo idayun da nirang ipatakwal tung kuartil.
Ay duun da anutay ta latigung patug̓anën ang para makdëkan na kung unu pay nag̓ipaglëpak yang mga taung atia ang kuntra tung anya.
25 Numaan,
pagkapalw̓u nira tung adiling pagkatagkës ang para matinlung panggaruti nira tung anya,
nagbitala ra ti Pablo tung Kapitan ang yag këkdëng asan ang mag̓aning,
“Maginuung Kapitan,
magkabag̓ay w̓asu tung lai ang yang sasang taung may linya na ka ang katulad ka tung dating mga tag̓a Roma,
burdunun mi pa ang indi pa nganing nag̓abista?”
26 Pagkagngël yang Kapitan tia,
diritsyung minangay tung Koronel ang nagpaskë ang mag̓aning,
“Maginuung Koronel,
nag̓amarësmësan mu yang nag̓apabuat mu tung taung nakaa?
Naa pala,
may linya na ka ang katulad ka tung dating mga tag̓a Roma,”
mag̓aning.
27 Purisu simanyan,
yang koronel tanya,
diritsyu rang minangay tung ni Pablong nagtalimaan ang mag̓aning,
“Mag̓ugtula ra tung yëën kung matuud ang yawa may linya mung katulad ka tung dating mga tag̓a Roma.”
Mag̓aning ti Pablong nagtuw̓al,
“Ëë,
may yëën kang linyang maning tia.”
28 Mag̓aning si yang Koronel tung anya,
“Aa ta yëën,
nagkagastaanaw ta dakulung kuarta bakluaw naëkël yang linyaung maning tia,”
ag̓aaning.
Mag̓aning ka ti Pablong tuminuw̓al,
“Piru yang yëën dëngan tung pagkatauu,”
mag̓aning.
29 Atii,
pagkagngël da yang mamagburdun da rin tia,
namampakali-kali rang namampaisul.
Asta yang Koronel,
pagkaintindi na ang naa pala ti Pablo may linya nang maning tii,
ya ra nga talamtamay na yang kandas na.
Ay nalamangan na ra ka man ang napatagkës.
Natëtëngëd Tung Panuw̓al Ni Pablo Tung Mga Pamagpakigmaëpët Asta Yang Luluaan Na (22:30–23:10)
30 Pagkapangayag,
kumus gustu yang koronël ang magpasadsad kung unu pa ëngëd ay nag̓ipagbangdan yang mga Judiong atia tung ni Pablo,
pinatuw̓ulan na tung mga sundalung panangtangën da nira yang mga pusas tung kalima na.
Pagkatapus nagkalalangan da tung mga paring atiang arabubwat ang mamagsaragpun da,
kasiraan da ka tanira yang intirung pamagpakigmaëpët.
Pagkatapus tia,
ti Pablo,
dayun na rang ingkëlan ang pinakdëng tung pinagtaralungaan nirang tanan.