Natëtëngëd Tung Pagsaraayën Nirang Namanliit Tung Mileto Ang Asta Nansikaw̓ut Da Duun Tung Jerusalem (21:1-16)
21
Simanyan pagbërëlag yamën,
nagpalayag̓ami si.
Pabur yamën ang nagpalaksu ang asta nanampëtami ra duun tung pulung paggug̓uuyan ang Cos.
Pagkapangayag,
nagpalayag̓ami si ang asta nanampëtami ra duun tung pulung pagug̓uuyan ang Rodas.
Pagkapangayag nagpalayag̓ami si ang asta nanampëtami ra duun tung siudad ang Patara.
2 Paglampud yamën duun tung Patara,
may naita yamën ang salaayan ang pagdistinu duun tung sinakëpan yang Fenicia.
Purisu ya si kay pinanaayan yamën ang nagpalayag.
3 Numanyan,
atiing paglëw̓awan da yang pulung paggug̓uuyan ang Chipre,
tinakliw̓an da ilëm yamën tung sagpaw na ang nagpadayun yang biai yamën duun ampir tung sinakëpan yang Siria.
Numanyan duunami ra nanampët tung siudad ang Tiro ay duun kang lag̓i diskargaay yang kargamintu yang gulita.
4 Pagkasagyap yamën yang mga tumatalig ang tag̓a duun,
duunami ra ilëm tung nira nagdayun ta sëlëd pitung kaldaw.
Yang mga taung atia,
kumus pinasanag̓an da yang Espiritu Santo kung unu pay mapasaran ni Pablong kaliwag̓an,
ya ra kay muya-muyang pinagtag̓aman nira ta ampalar ang indi ëngëd magpadayun ang magdistinu duun tung Jerusalem.
5 Numanyan pagkaw̓ut yang uras ang ipaglarga si yamën,
dayunami rang nagliit ang para magpadayunami ra yang biai yamën.
Inatërami ra nirang tanan duun tung lua yang siudad,
pati mga kasawa nira asta mga ana nira,
namagpakignunut da ka.
Kumaw̓utami tung bakayan,
nagluurami rang tanan ang nag̓ampu.
6 Numanyan,
pagbërëlag yamën,
suminaayami si.
Tanirang nagkarabutwan,
namag̓urulikan da.
7 Simanyan manliitami duun tung Tiro,
nagpadayunami ra yang pagpalayag yamën ang asta nanampëtami ra duun tung siudad ang Tolemaida.
Paglampud yamën duun,
nagpakumustaami ra tung mga kaputulan yamën ang mga tumatalig ang tag̓a duun.
Duunami ra ka nagdayun tung nira ta sang kaldaw.
8 Pagkapangayag,
nagsaayami si ang asta nanampëtami ra duun tung siudad ang Cesarea.
Kumaw̓utami duun,
minangayami ra tung balay ni Felipe ang sasa kang manigparakaw̓utun natëtëngëd tung ni Ginuung Jesus.
Tan taa yay sam bilug tung pitu nga laliian ang atiing pinamiaran ta katëngdanan duun tung Jerusalema.
Numanyan duunami ra tung anya nagdayun.
9 Tanya may mga ana nang ëpat nga daralaan ang mga manigpadapat ta mga bitalang ya ag̓ipaëyangay yang Espiritu Santo tung mga painu-inu nira.
10 Numanyan may piraami rang kaldaw duun,
kinaw̓utanami ra ta sasang tumatalig ang nag̓aranan tung ni Agabob ang duun manliit tung Judea.
Tanya sasang nag̓apasanag̓an kang lag̓i yang Espiritu Santo ang para makdëk kung unu pay mainabu tung panalungaan.
11 Numanyan,
pagpalëngët na tung yamën na Pablo,
dayun na rang inuw̓ad yang aw̓ël ang atiang inulambët ni Pablo tung awa na.
Ya ray ibinëgkës na tung mga kalima na dayun tung mga kakay na.
Mag̓aning tung yamën ang nagbitala,
“Ya ra taa yang bitala yang Espiritu Santo:
‘Kung tinu pay may akës taa,
bëgkësën ka yang mga masigka Judio na duun tung Jerusalem ta maning ka taang pagbërëgkësën.
Pagkatapus iintriga ra nira tung pudir yang mga tag̓a dumang nasyun,’”
mag̓aning.
12 Pagkagngël yamën tia,
yami asta yang mga kaputulan ang tag̓a duun,
dayun dang pinagtag̓aman yamën ti Pablo ta amu-amu ang indi ëngëd magpadayun ang manungul-tungul duun tung Jerusalem.
13 Mag̓aning ka ti Pablong nagtimalës,
“Baa tia?
Ayw̓a,
unu ray gustu ming ianing?
Papanluluw̓ayënaw ra numyu tung pagtarangitën ming atia?
Ay ta yëën,
simpanaw rang mag̓agwanta,
maskin bëgkësënaw nira,
maskin imatayënaw pa nganing nira duun tung Jerusalem arangan da ilëm tung ni Ginuung Jesus ang pag̓akëgnganu,”
mag̓aning.
14 Numanyan kumus midyu indi ra maëklan yamën yang isip na,
pinaw̓ayaan da ilëm yamën ang inaning,
“Yang kalëlyag̓an ni Ginuung Jesus yay matutuman,”
mag̓aning.
15 Taa numanyan,
pagkataklib da yang pira rang kaldaw,
nangimësami rang nanliit ang para manungul-tungulami ra duun tung Jerusalem.
16 Namagpakignunut da ka tung yamën yang dumang mga tumatalig ang tag̓a Cesarea.
Ya ray namag̓atëd tung yamën tung balay ni Manason duun tung Jerusalem ay duunami tung anya magpadayun.
Tanya tag̓a Chipre ig dati kang lag̓ing tumatalig disti pa tung primiru.
Pagpailala Ra Rin Ti Pablo Ang Tanya Pag̓usuy Pa Ka Tung Kinaug̓alian Nirang Mga Judio (21:17-26)
17 Numanyan pagkaw̓ut yamën duun tung Jerusalem,
yang mga tumatalig ang tag̓a duun,
durug sadya yang mga isip nirang namagsarapëtën tung yamën.
18 Numanyan pagkapangayag,
ti Pablo minangay ra duun tung ni Santiago,
kasiraanami ra kang mga aruman na.
Kaw̓utan yamën,
naa pala asan da pamagsaragpun yang tanan ang mga pamagmaëpët-ëpët tung sam pundaan ang atia.
19 Numanyan,
pagpakdul ni Pablo ta mupiang timpranu tung nira,
dayun dang nagbaw̓alitaën ta sëpët tung nira kung ya pa ag̓ari yang pag̓urubraën yang Dios tung mga isip yang bëlag̓an mga masigka Judio nira ëkël tung pag̓ërëkëlën na yang katëngdanan nang nagparakaw̓utun tung nira.
20 Pagkagngël nira tia,
durung pagdarayawën nira tung Dios.
Mintras pamagdarayawën yang kadaklan,
yang duma namansianing da tung ni Pablo ang,
“Putul,
balitaana pa?
Tëëd mu,
pira-pira rang laksa yang mga masigkanasyun ta taa ang namagtalig da ka yang mga sadili nira tung ni Ginuung Jesus.
Durug kadërërëp tanirang pamagtuman yang mga katuw̓ulan ang atiang ibinutwan ni Moises tung nasyun ta.
21 Numanyan nagkarabalitaan da natëtëngëd tung nuyu ang yang tanan unung mga masigkanasyun tang atiang nagkarawasak da tung duma-rumang banwang nag̓atiniran ta bëlag̓an mga Judio,
nag̓atuldukan mu unu ang lipatën da nira yang mga katuw̓ulan ang atia.
Ag̓aningën mu ka unu ang indi ra nira pabuatan ta tanda yang tinanguni yang mga ana nirang mga lalii,
pati yang mga kinaug̓alian tang duma,
indi ra ka unu intindiën nira.
22 Simpri mabalitaan da tanira ang yawa nakaw̓ut da.
Unu pay matinlung buatën ta?
23 Maayën pa siguru ang usuyun mu yang paëtad yamën ang naa.
May mga putul tang ëpat nga laliian taa ang may pinangakuan nira tung Dios ang indi pa nag̓atupad nira.
24 Mupia pa dumanan mu tanira duun tung pagtuuan ang pinakalusu.
Magpakiununga ka tung nirang magtuman yang sasang urdinansa ang para liw̓ianuamu rang magpaklëd tung pagtuuan ang pinakalusu.
Dispuis bayaran mu ra ka yang tanan ang kagastusan nira asan ug̓ud bunayag dang mamagtupad tung pinangakuan nirang mamagpakayas yang mga kulu nirac.
Kung tumanën mu tia,
duun da ngaintindiay yang kadaklan ang mga kaputulan ta ang anday kamatuuran yang nagngël nirang balita ang para tung nuyu,
kung indi,
asan da ngaintindiay nira ang talagang pagtumana ka man yang mga urdinansang ipinatuman ni Moises tung nasyun ta.
25 Numanyan kung natëtëngëd tung mga tumatalig ang atiang bëlag̓an mga masigkanasyun ta,
nag̓askëan mu ra ka ang ta yami,
pinaëklan da yamën ta sulat natëtëngëd tung pinag̓irig̓uan ta tan taa ang yang dapat ang likayan nira ya ra ka ilëm taa.
Indi ra magpakipangan ta palanganën ang isinag̓ud tung mga bultu,
indi ra ka mamangan ta dug̓u ubin karni ta ayëp ang indi ra pinatiktikan ta dug̓u na,
ig indi ra ka magpalangaas ang mangumbaw̓ay ubin mangunlaliid.
Atia indi ra dulangan yamën,”
ag̓aaning tanira tung ni Pablo.
26 Purisu numanyan,
pagkapangayag,
nagpakiunung da ka man ti Pablo tung ëpat nga tauan ang atia ang kasiraan da ka tanirang namagtuman yang sasang urdinansa ang para liw̓ianu ra ka man tanirang mamagpaklëd tung pagtuuan.
Pagkatapus tia,
dayun dang nagpaklëd ang nagpakdëk tung sasang manig̓ërëkëlën kung unu pang kaldaway makumplitu nira yang urdinansang atia ang ya ra kay uras ang ipagtupad yang mga aruman na yang pangaku nirang masigpadasag ta mga ayëp ang iprisintar tung Dios.
Ti Pablo Agtaraw̓angan Da Yang Mga Masigkanasyun Na Duun Tung Pagtuuan Ang Pinakalusu (21:27-36)
27 Simanyan atiing alëngët dang makumplitu yang pitung kaldaw ang atiing itinipu ni Pablo,
may mga Judiong duun mamanliit tung sinakëpan yang Asia ang ya ray nangaita tung anya asan tung pagtuuan ang pinakalusu.
Pagkaita nira tung anya,
dayun da nirang dinabdaw̓an yang kulu yang mga taung buntun asan ig ti Pablo dayun dang pinggësan nirang dinëëp.
28 Namaglëlpakën dang mag̓aning,
“Mga kaputulan yamën ang mga Israel,
taw̓ang!
Nani ra yang taung pagliliw̓utun tung bilug ang kaliw̓utan ang pagturuldukanën tung mga tau ta ipagpamirdi tung dëngëg yang nasyun ta.
Anda unu ay kuinta na yang mga urdinansang pinanubli ta tung ni Moises,
pati yang pagturuuën ta taa tung lugar ang naa,
anday unu ay pakaw̓utun na.
Bëlag ilëm maning tia ay pag̓abuat na,
ang indi,
may mga taung bëlag̓an ka pa man ang mga masigkanasyun ta ang pinangkëlan nang pinaklëd taa tung pagtuuan tang naa ang asan da dinamangay na yang lugar tang naang sagradu!”
mag̓aning.
29 Naa pala,
nangapagbitala ta maning tia ay tan taa pa naita ra nira ti Trofimong atiang tag̓a Efeso ang pagduman tung ni Pablo asan tung siudad.
Purisu ya ray linaum nirang ingkëlan ni Pablong pinaklëd tung pagtuuan ang atiang pinakalusue.
30 Taa numanyan pagsarambung da yang balita,
nainali rang nagkagulu yang intirung siudad ang asta duun da namagdag̓umuk yang mga tau tung pagtuuan.
Numanyan dayun dang dinëëp nira ti Pablong linag̓unut duun tung lua.
Pagkalua nira,
lag̓i-lag̓ing pinaniraduan da yang mga purta yang pagtuuanf.
31 Atiing tag̓aman da rin nirang imatayën ti Pablo,
nabalita ra duun tung Koronel ang atiang may kalalangan tung sang grupung mga sundalung tag̓a Roma ang yang intirung siudad unu pagkagulu ra.
32 Purisu tung makali nag̓ëkël da yang Koronel ang atia ta mga Kapitan pati mga sundalung lug̓ud tung kagaëman nira ang pagkatapus kali-kaling namansilampud ang namansilaksu duun tung mga taung atiang buntun dang pamagkagulu.
Numanyan pagkaita nira tung Koronel may tung mga sundalung atiang kaarumanan na,
tinadëngan da nira ti Pablo ta pagpalu.
33 Numanyan,
pagpalëngët yang Koronel tung ni Pablo,
dayun na rang inalsipung pinapusasan tung mga sundalung duruang nagtimbang.
Pagkapusas,
dayun na rang tinalimaan tung mga tau kung tinu pang tauay ig kung unu pay binuatan nang malain.
34 Atii,
yang duma namaglëlpakën da ilëm ta maning taa,
yang duma namagbiw̓italaën da ka ta maning duun.
Numanyan kumus maliwag dang mabilug̓an natëtëngëd tung masyadung galëng nira,
pinatuw̓ulan na ra ilëm ti Pablo tung mga sundalu ang ipatakwal da nira duun tung kuartil.
35 Numanyan pagkaw̓ut yang mga sundalu duun tung tarakwalan tung kuartil,
ya ra iduulay nira ti Pablo tung abwat natëtëngëd ang pag̓asag̓ësë yang mga taung atiang buntun ang pag̓akalaw rin nira.
36 Ay pamagrutus tung anyang pamaglëlpakën ang mag̓aning,
“Ala,
imatayën da ilëm tia!”
Yang Nag̓ipanuw̓al Ni Pablo Tung Mga Masigkanasyun Na (21:37–22:21)
37 Atiing ag̓ipaklëd da rin nira tung kuartil,
nagbitala ra ti Pablo tung Koronel ang mag̓aning,
“Maginuung Koronel,
puidiaw w̓asung magbitala tung nuyu?”
Mag̓aning yang Koronel ang nagtimalës,
“Naa pala,
matakuang magbitala ta Giniriego!
38 Bëlag̓ana ka pala yang sasang tag̓a Egiptong atiing nagmangulu tan taa tung mga taung namansibatuk tung gubirnu?
Ya tiing nagguyud tung ëpat ang liw̓u nga tauan na duun tung banwang kapas ang pulus mga manigpanaksak?”
39 Mag̓aning ti Pablong minlës,
“Bëlag,
Maginuung Koronel.
Yuu sasang Judio.
Duunaw ipanganaay tung siudad ang Tarso duun tung sinakëpan yang Cilicia ig yang banwang atiang pag̓asunuranu bëlag̓an ilëm gësyëng siudad.
Kung maimu ilëm tung nuyu,
Maginuung Koronel,
tugtayaw ka nuyung magbitala tung mga taung atia.”
40 Atii,
tinugtan da yang Koronel ang magbitala.
Purisu mintras pagkërëng asan tung tarakwalan,
nagsinyas da yang kalima na tung mga tau ang para mamagpamati ra tung bitala na.
Atiing anda rang pisan ay tiknguk-tiknguk yang mga tau,
dayun dang nagbitala tung nira tung sadiling bitala nirang Hinebreo ang maning taa yang bitala na: