Natëtëngëd Tung Duma Tung Efeso Ang May Pagkakulang Yang Pag̓irintindiën Nira (19:1-7)
19
Mintras duun pa ti Apolos tung Corintong pagtaw̓ang tung mga tumatalig,
ti Pablo tanya nagpadayun yang pagparanawën nang nanggëtës tung sinakëpan yang Asia ang asta nanuldak da duun tung siudad ang Efeso.
Duun may napanawan nang pira pa nga tauan ang kuw̓ali mga tumatalig.
2 Purisu dayun na rang tinalimaan ang inaning,
“Atiing panangëd mi tung itinulduk tung numyu,
natiniranamu ra yang Espiritu Santo?”
Mag̓aning tanirang nansituw̓al,
“Anda.
Indi pa nganing nag̓askëan yamën ang may Espiritu Santo!”
3 Mag̓aning si ti Pablong nagtimalës,
“Ayw̓a,
unu pang klasiay ta bënyag ang ibinënyag tung numyu?”
Mag̓aning tanira,
“Nagpabënyag̓aming uyun tung ipinagtulduk ni Juan ang manigbënyag.”
4 Mag̓aning si ti Pablong nagbadbad tung mga kinaisipan nira,
“Kung tung bag̓ay,
yang linagpakan yang pagbërënyag̓ën ni Juan tung mga masigka Judio na,
ang para asan da ngaipailalaay nira ang tanira nanligna rang matuud tung mga kasalanan nira.
Piru yang mga taung pinamënyag̓an na,
pinanganing na ra kang pirmi ang may sasang nag̓auri pa tung anya ang ya ray dapat talig̓an nirang magtapnay tung nira,
bilang ti Jesus da tii,”
mag̓aning ti Pablo duun tung nira.
5 Numanyan,
pagkagngël da nira tia,
dayun dang namagpabënyag ang namampailala ang tanira nagpagaëm da ka man yang mga sadili nira tung ni Ginuung Jesus.
6 Numanyan,
pagkadëën ni Pablo yang kalima na tung nira,
nangalampuran da yang Espiritu Santo.
Dayun dang namagbiw̓italaën ta mga bitalang indi nag̓aintindian ta tau ig nunut da ka ta pagpalatay nira ta mga bitalang ipinaëyang yang Espiritu Santo tung mga painu-inu niraa.
7 Tanirang tanan mga sam puluk may durua nga laliian.
Natëtëngëd Tung Pagparakaw̓utun Ni Pablo Duun Tung Efeso (19:8-10)
8 Taa numanyan,
tung sëlëd tulung bulan,
kada kaw̓utun yang kaldaw ang nag̓ipamaënay,
ti Pablo pagpakilakët tung mga masigka Judio na duun tung pagsaragpunan nirang sam pundaan duun tung Efeso.
Anday inëntëran nang nagpasanag tung nira ang asan da ipapanaway na tung baralës-balësan.
Ay gustu nang basi pa ra ilëm ang asan da mapangkëlan na yang mga kinaisipan nirang mamag̓ingmatuud da ka tung nag̓ipagpakaw̓ut na natëtëngëd tung palaksu yang paggaraëmën yang Dios ang baklu ang ya ray tinukud ni Jesu-Cristo.
9 Ug̓aring ilëm,
tung kabuayan da,
namagpakgat da yang duma ang indi ra mamanangëd.
Namag̓intra ra saway pa nganing sigun tung pag̓irintindiën tung Dios ang atiang baklung pag̓itulduk na ang natëtëngëd tung ni Ginuung Jesus.
Purisu yang binuat ni Pablo,
nagliit da ilëm tung nira,
kasiraan da ka yang kumpurming mga taung gustu pa nirang magpatulduk tung anya.
Ya ray pinangkëlan nang nagpauman duun tung may kuartung dakulu ang yay dating pagdiskursuan yang mga tau ang yang may anya,
yang sasang taung nag̓aranan tung ni Tirano.
Duun si nag̓intra pasanag tung kaldaw-kaldaw tung mga taung kumpurming tinu pay nag̓alëlyag dang magpamati,
ang yang pagpasanag na tung nira ipinapanaw na ka tung baralës-balësan.
10 Maning dang maning tung sëlëd duruang takun ang asta yang pinakaw̓ut na,
yang tanan ang mga taung pamag̓istar tung sinakëpan yang Asia,
mga Judio kag bëlag,
nagkaragngël da nira yang balita natëtëngëd tung ni Ginuung Jesus.
Kung Ya Pa Ag̓ari Ang Yang Aran Ni Ginuung Jesus Mas Pang Dinayaw Yang Mga Tag̓a Efeso (19:11-20)
11 Atii kanay,
ti Pablo pinaktël yang Dios ta mupiang nagpalua ta mga pruibang indi pa nag̓aita-ita.
12 Ay maskin mga panyu ilëm ubin mga sapin ang atiang nagkaragamit na,
ya ray pinamisik ta dumang ipinamakdul tung mga taung pamaglaru ang pagkatapus ya ray pinagmupiaan nira.
Pati mga taung pinag̓ëkël-ëkëlan da rin ta mga dimunyu,
namagmaayën da ka asan.
13 Numanyan duun tung Efeso may mga Judiong pamagliliw̓utun ang mga manigpalayas ta mga dimunyung pamag̓ëkël-ëkël tung mga tau.
Numanyan pag̓atag̓aman da nirang sambitën yang aran ni Jesus.
Ya ra ag̓aningay nira yang mga dimunyu ang maning taa:
“Ëëy,
lalanganamu ra yëën ang maglayas asan ëkël tung kagaëman ni Jesus ang atiang nag̓asambit ni Pablong pagparakaw̓utun,”
mag̓aning.
14 Tanirang pamagbuat ta maning tia,
pitung magpurutul ang mga ana yang sasang taung nag̓aranan tung ni Esceva.
Tanya sasang Judiong pagpailala ang tanya unu sasang pari ang abwat ta katëngdanan buat.
15 Taa numanyan,
may sasang dimunyung pinaglalangan da nira ta maning tia ang pagkatapus diritsyu rang nagtimalës ang mag̓aning,
“Ti Jesus nag̓ailalaw ig nabalitaanaw ra ka natëtëngëd tung ni Pablo,
piru yamu,
unu pay pagpabëtang mi tung mga sadili mi?”
mag̓aning.
16 Taa numanyan,
yang taung atiang pag̓aëkël-ëkëlan yang dimunyung atia,
pinangëgpaan na yang pitung atiang magpurutul ang asta namansikëras da ilëm tung balay ang atii ang namagpalibri ra.
Anda ray mga aw̓ël nira,
ay pinamëkras-bëkras da.
Nagkaralukanan pa ta pagunut.
17 Pagkatapus tia,
nabalita ra tung tanan ang mga taung pamag̓istar tung Efeso,
mag̓ing mga Judio kag bëlag.
Purisu tanirang tanan pinamalayan da ta ëlëd nirang duru ang yang aran ni Ginuung Jesus mas pang dinayaw nira.
18 Yang sam bilug pang pinakaw̓ut yang makabëw̓ërëng ang atii,
durung mga taung namagtalig da kang lag̓i tung ni Ginuung Jesu-Cristo ang simanyan baklu ra nagkaramanmanan da yang mga isip nira.
Purisu namag̓ubligar dang namangamin tung publiku kung unu pay mga ubra-ubra nirang anday sayud.
19 Dakëlë tung nirang mga manig̓urasiun ang simanyan pinagtimës da nira yang tanan ang mga librung nag̓agamit da rin nira tung pag̓ururasiunun nira ang pagkatapus pinanguw̓ul da nirang luw̓us tung apuy tung katalungaan yang kadaklan.
Tung pagpatëng-patëng nira yang balur yang mga librung atia,
duminangat da tung limang puluk ang liw̓ung pidasung salapi yang balur na (50,000 pidasu)b!
20 Kapurisu natëtëngëd tung mga bag̓ay ang atiang nagkarainabung durung pisan agkabëw̓ërëng,
yang balitang naa natëtëngëd tung ni Ginuung Jesus,
mas pang namuirsa yang builu na ig ya ra nag̓awasak dang nag̓awasak ang asta ya rag durulang agdurulang yang kinadakël yang mga taung nagtalig yang mga sadili nira tung anya.
Nag̓ipaskëng Lag̓i Ni Lucas Kung Ay Pay Gustu Ni Pablong Angayën (19:21-22)
21 Pagkatapus yang mga bag̓ay ang atia,
binilug da ni Pablo yang isip nang baklu ra mangay duun tung Jerusalem,
magpalaktëd da kanay duun tung Macedonia may duun tung Acaya.
Dispuis may aning na kang maning taa:
“Pagkatapus mangayaw ra nganing duun tung Jerusalem,
dapat ang mangayaw ra ka duun tung Roma.”
22 Purisu numanyan yang mga katabyang nang ti Timoteo durua ni Erasto,
ya ray ipinaangay na duun tung Macedoniang ipinatkaw.
Piru tanya nagpabutwan pa kanay duun tung sinakëpan yang Asia.
Natëtëngëd Tung Gulung Nag̓itukud Tung Efeso (19:23-41)
23 Tung uras ang atii yang baklung pag̓irintindiën tung Dios ang nag̓itulduk na Pablo,
yay natëngëran ta sasang gulu tung Efeso ang bëlag̓an ilëm gësyëng bag̓ay.
24 May sasang manigpanday ang nag̓aranan tung ni Demetrio.
Yang landuk ang salapi ya ray pag̓apatunaw nang pag̓abuat ang mga balay-w̓alay ang gëg̓ësyë,
bilang mulidu yang simbaan ang pagtuuan tung sasang ginuung baw̓ay ang nag̓aranan tung ni Artemisc.
Durug kadakul yang ganansiang nag̓aita na asan asta yang mga ubrirus na.
25 Numanyan pinaguuyan na tanirang tanan ang pinasagpun,
kasiraan da ka tanira yang kadaklan ang parariu ka ta pangita.
Mag̓aning tung nira ti Demetriong nagbitala,
“Mga putulu,
nag̓askëan mi ra ka ang yang nag̓ipagmanggad ta natëtëngëd ilëm tung pangita tang naa.
26 Numanyan nagngël mi ra ka yang balita ig nag̓apaniiran mi ra ka mismu kung unu pay nag̓abuat yang taung naang ti Pablo.
Ay pag̓aning ka ang yang mga ginuu-ginuung nag̓apasuaran ta mga bultu bëlag̓an unu ang yay tamang tuuan tang mga tau.
Tëëd mi!
Durug kadakël yang mga taung pinangkëlan na yang mga isip nirang pinapanalyud tung dating pag̓atuuan nira.
Bëlag ilëm taa tung Efeso,
ang indi alus pa ilëm tung intirung sinakëpan yang Asia.
27 Kung yay magdayun tii,
bëlag̓an ilëm ang yang pangita tang naa ay masawayan ta mga tau,
kung indi,
pati yang simbaan ang pagtuuan ta tung ni Artemisang yay pinakalandaw ang ginuu,
ipabtang da ilëm yang mga tau tung anday kakuinta-kuinta na.
Asta tanyang pag̓atutuuan yang mga tau tung intirung sinakëpan yang Asia asta tung maskin ay pang banwaay,
muya yang kadëngëg̓an na ay madiadu ra ka,”
mag̓aning duun ti Demetrio.
28 Numanyan,
pagkagngël nira yang bitala ni Demetriong atia,
pinanungkukan da ta kasisilag̓ën nirang duru.
Namag̓impisa rang namaglëlpakën ang mag̓aning,
“Landaw tung tanan ti Artemisang pag̓atutuuan tang tag̓a Efeso!”
29 Numaan yang intirung siudad nagkagulu ra.
Anday duma,
namagdag̓umuk da yang mga tau duun tung pagsaragpunan nirang dakulu ang bug̓awas.
Yang mga aruman ni Pablong tag̓a Macedonia ang ti Gayo durua ni Aristarco,
ya ray pinggësan nirang linag̓unut duun.
30 Pagkabalita ni Pablo,
gustu na ra rin ang magpailala tung mga taung atiang buntun ang para magbitala ra kanay tung nira.
Piru indi ra tinugtan yang mga tumatalig.
31 Yadwa pa pinatuw̓ulan da ka yang dumang mga kunsial ang atiang pinakaabwat tung intirung sinakëpan yang Asia ang yay mga ungkuy na.
Pinag̓amuy-amuyan ka nira ang indi ra ëngëd magpasubung magpaita duun tung pagsaragpunan.
32 Taa numanyan duun tung pagsaragpunan,
nagkagulu ra ta mupia,
ay yang duma pamaglëlpakën da ta maning taa,
yang duma pamagbiw̓italaën da ka ta maning duun.
Purisu yang kadaklan,
anday kaliw̓utan nira ang unu pay pinagsaragpunan nira.
33 Numanyan may sasang Judio duun ang yang aran na ti Alejandro.
Ya ray inasig̓-asig yang mga masigka Judio nang itinulmun asan tung parada.
Dayun dang kumindëng ang nagkumpas yang kalima na,
ay gustu na ra rin ang mangërëngan tung mga masigkanasyun na ang para mangaluas da tung malain natëtëngëd tung nainabung atia.
34 Ug̓aring pagkailala nira tung anya ang tanya sasang Judio,
dërëngan da tanirang namag̓irikbawan ang namaglëlpakën tung sëlëd duruang uras ang mag̓aning,
“Landaw ti Artemis!
Landaw ka ëngëd ti Artemisang pag̓atutuuan tang tag̓a Efeso!”
35 Numanyan yang sikritariu tung siudad,
atiing kinayanan na ra ta palimëng yang mga taung atiing buntun,
nagbitala ra tung nirang mag̓aning,
“Mga putulung tag̓a taa tung Efeso,
tinu pay naintindian ming tau ang indi pa nag̓akdëk ang itang tag̓a Efeso ay pag̓arasikasuën tung simbaan ang pagtuuan ta tung ni Artemisang naang kalandawan,
may tung sagradung batung nag̓atuuan tang duun manliit tung langit ang luminagpak tung katanëkan?
36 Simpri andang pisan ay mapagpaimukli tung mga bag̓ay ang atia.
Kapurisu kaministiran ang indiita ra magpagulpi-gulpi,
kung indi,
magpakalimëngita ra ilëm.
37 Kipurki tëlëngan mi.
Yang mga taung naang durua,
midyu pinangaasan mi ra ilëm ang ginuyuran taa ang anda kay tinakaw nira duun tung simbaan ta ig anda kay mga bitalang makalalain ang ipinagpalagpak nira tung ni ginuung pag̓atutuuan ta.
38 Kapurisu kung ti Demetrio may yang mga kaarumanan nang mga manigpanday may riklamu nira tung sasang tau,
may uras ang nag̓ipagbista ig may mga manig̓usgad.
Purisu bala ra tanirang magbarangdanan duun.
39 Ug̓aring kung may pag̓asikad mi pa ka ëngëd,
duun da ilëm iriklamuay mi tung kaw̓utun yang upisial miting yang tanan ang magbaw̓anwa.
40 Muya mabtangitang tanan tung karisguan,
ay puiding dilëmën tung yatën yang mga tag̓a Roma yang gulung naang nainabu simanyan tung siudad ta.
Yadwa pa ariita pa mangkël ta katadlëngan tang mabakëd ang para ipanuw̓al ta tung nira ang maning da taang anday bastanting rasun ang mapadatëlan ta?”
mag̓aning duun yang sikritariu tung nira.
41 Atii,
pagkatapus ta pagbitala,
dayun na rang pinampapanaw yang mga taung pinampaulik.