Natëtëngëd Tung Pagparakaw̓utun Na Pablo Duun Tung Tesalonica (17:1-9)
17
Taa numanyan,
yang pagparanawën na Pablo ni Silas namanggëtës da ilëm ang yang mga siudad ang Amfipolis may Apolonia,
tinakliw̓an da ilëm nira.
Dayun-dayun yang pagparanawën nira ang asta nansikaw̓ut da duun tung siudad ang Tesalonica.
Ay duun may pagsaragpunan ta mga masigka Judio nira.
2 Numanyan,
sigun tung ug̓ali ni Pablong kadagmitan ang nag̓ausuy na,
namagpakilakët da tung mga masigkanasyun nira duun tung pagsaragpunan nira.
Kada kaw̓utun yang kaldaw ang nag̓ipamaënay nirang mga Judio,
ya ray ipinagpasanag na tung nira ta maklung bisis.
Ipinapanaw na tung baralës-balësan ang kërësën ig asan da ka ipatiëlay na tung napabtang tung kasulatan.
3 Ya ray iwinaswas na ta maayën ang maning taa yang palaksu yang pangatadlëngan na:
“Naula kang lag̓i tung kasulatan ang kung kumaw̓ut da nganing yang pag̓aningën ang Cristo,
dapat unung mapasaran ta kamatayën ang pagkatapus pabungkarasën da ka yang Dios.
Numanyan yang nagkaraulang atia tëmëng dang pisan tung ni Jesus ang naang nag̓asambitu.
Purisu duun ta ra ngaintindiay ang tanya ka man yang pag̓aningën ang Cristo,”
ag̓aaning.
4 Numanyan,
yang dumang mga Judio asan,
namanangëd da tung nag̓ipagpakaw̓ut ni Pablo.
Dayun dang namagpakiugpu tung ni Pablo durua ni Silas,
kasiraan da ka tanira yang bëlag̓an mga Judiong durug dakël ang dating pamag̓intindi ra kang lag̓i tung pag̓atuuan yang mga Judio may dakëlë kang mga baw̓ay ang atiang abubwat ta pagkabëtang.
5 Ug̓aring,
dispirinsia ilëm,
yang mga Judiong atiang indi ra pamanangëd ya ray namangimun tung ni Pablo.
Purisu anday dumang binuat nira,
namagsakada tung mga taung atiang mga bastus ang yang bida nira tung kaldaw-kaldaw,
ya ra ilëm agpamagpanaw-panaw asan tung plasa.
Pagkasagpun nira ang buntun da,
kasiraan da ka tanirang namanggulu tung siudad.
Numanyan,
dinayunan nirang iniskandalu yang balay ni Jason ang atiang magdayunan din na Pablo.
Ay gustu ra rin nirang paluaën ang para idimanda nira duun tung katalungaan yang kadaklan ang mga kinasakpan yang siudad kung mamagmiting da nganing.
6 Taa numaan,
kumus indi ra naita nira,
anday duma,
ti Jason ang may balay pati mga tumatalig ang duma ya ray linag̓unut nira duun tung may mga katëngdanan.
Pagkaw̓ut nira duun,
namaglëlpakën dang mag̓aning,
“Yang mga taung pamagtukud ta gulu tung tanan ang banwa taa ra tung yatën nansiangay.
7 Ya ray nag̓apadayun ni Jason tung balay na.
Dispuis,
tanira pati yang pamag̓usuy tung nag̓itulduk nira pamaglikëd tung mga katuw̓ulan ni Maginuung Caesar.
Ay pamansianing ka ang may duma pa unung adi ang dapat panangdën nira ang yay nag̓aranan tung ni Jesus unu,”
mag̓aning tanirang pamagbangdan.
8 Numanyan pagkagngël yang may mga katëngdanan tia,
namanginit da yang mga kulu nira asta yang mga taung atiang buntun ang pamamati,
ya ka.
9 Purisu yang binuat yang may mga katëngdanan,
baklu ra palpasay nira na Jason,
pinag̓ingalukan pa nira ta piansa,
basta mapaliit ilëm nira na Pablo tung siudad.
Yang Nainabu Duun Tung Berea Ang Durug Tinlu (17:10-15)
10 Numanyan,
pagkalaw̓ii ra,
na Pablo pinapanaw ra ka man yang mga tumatalig duun tung siudad ang Berea.
Atiing duun da,
namagpakilakët si tung mga masigka Judio nira duun tung pagsaragpun nirang sam pundaan.
11 Naa pala mas pang buskad ta kinaisipan kay tung mga Judio duun tung Tesalonica.
Ay pamagpamati tanira ta durug dërëp tung nag̓ipagpakaw̓ut ni Pablo.
Kaldaw-kaldaw pamagbasang pamagpasadsad tung kasulatan ang para maskëan nira kung yang nag̓ipag̓aning ni Pablo magkatunu tung napabtang tung kasulatan u kung indi.
12 Taa yang linuaan na,
kadakël dang namanangëd ang mga Judio pati yang bëlag̓an mga Judiong abubwat ta mga pagkabëtang tig lalii tig baw̓ay.
13 Dispirinsia ilëm,
pagkabalita yang mga Judio duun tung Tesalonica ang duun da ka tung Berea pagparakaw̓utun ti Pablo,
dayun da nirang sinikad duun.
Pagkaw̓ut nira,
ya ra mamagdabdab tung kulu yang mga tau ang para mangasilag da tung ni Pablo.
14 Purisu ti Pablo dayun dang ipinaatëd yang mga tumatalig tung mga aruman nirang duma duun tung bakayan.
Piru ti Silas durua ni Timoteo namagpabutwan pa duun tung Berea.
15 Taa numanyan,
yang mga taung atiang pamag̓ëkël tung ni Pablo,
inatëd da ëngëd nira ang asta duun ëngëd tung Atenas.
Baklu namagbalik tung Berea yang namag̓atëd,
itinuyun ni Pablo ti Silas durua ni Timoteo ang mamanikad dang lag̓i tung anya.
Yang Kamtangan Yang Nag̓ipagpakaw̓ut Ni Pablo Tung Mga Tag̓a Atenas (17:16-34)
16 Numanyan mintras pag̓ëlat ti Pablo tung mga aruman nang atiang itinuyun na,
tung pagpaniid na tung siudad ang midyu lëëp da ta mga bultung magtutuuan yang mga tau,
pinagsampi ra ta kapupungawën nang duru ang nunut da ka ta pagkëba-këba yang dëdlaan na natëtëngëd tung nag̓abtangan yang mga taung atiang makakaildaw.
17 Kapurisu anday dumang binuat na,
nag̓intra ra pasanag natëtëngëd tung ni Ginuung Jesus duun tung pagsaragpunan yang mga masigka Judio na.
Ipinapanaw na tung baralës-balësan yang pagparasanag̓ën na tung nira,
kasiraan da ka tanira yang bëlag̓an mga Judiong atiang dating pamag̓intindi ra kang lag̓i tung pag̓atuuan nirang mga Judio.
Maskin duun tung palingki,
kaldaw-kaldaw ya kay pag̓abuat na tung mga taung nag̓apanaw duun ang kumpurming tinu pay nag̓alëlyag ang mamati tung anya.
18 May mga taung pamati ang ya ray namag̓intra pakigdibati tung anya.
Yang duma ya ra yang pag̓aningën ang mga Epicureo,
yang duma ya ra yang pag̓aningën ang mga Estoico.
Mag̓aning yang duma ang,
“Abaa,
yang taung atia inding pisan maskë.
Unu pa ilëm ay gustu nang ianing?
Midyu ya ra ilëm ag̓apamisik-pisik ta mga bitalang nagkaragngël na tung duma may ruma.
Ya ra ilëm agpagpatalëbtëb,”
ag̓aaning.
Mag̓aning ka yang dumang pagpatug̓ud,
“Tanya midyu sasang manigparakaw̓utun ang pangërëngan tung dumang mga ginuu-ginuung nag̓atutuuan ta,”
ag̓aaning.
Naa pala,
nangapagbitala ra ta maning tii,
ay yang nag̓apabilug̓an ni Pablong pagbitala ay ti Jesus may yang pagkabui si kang uman yang mga pataya.
19 Purisu numanyan ti Pablo ingkëlan da nira duun tung may mga pamagpakigmaëpët ang pamagsaragpun tung sasang bundung pag̓aningën ang “Bundu Ni Aries”b.
Mamansikaw̓ut tanira duun,
inaning da nira ti Pablo ang,
“Gustu ra yamën ang magpasadsad tung nag̓itulduk mung atiang baklu ang inding pisan nag̓adëngël-dëngël yamën.
20 Ay midyu tung nag̓abakluanami pa natëtëngëd tung dumang nagkaraaning mung nabalitaan yamën.
Purisu gustu ra yamën ang maintindian kung unu pay mga lagpakan na yang mga bag̓ay ang atia,”
mag̓aning duun tanira.
21 Nangapagbitala ta maning tia ay yang kadaklan ang mga tag̓a Atenas may yang mga tag̓a duma-rumang lugar ang pamagtinir duun,
anday dumang nag̓apaërëk-ërëkan nira ta maayën,
kung indi,
pag̓iristuriaan tanira natëtëngëd tung mga nagkarabalitaan nirang baklu.
22 Numanyan,
kumindëng da ti Pablo tung kakngaan yang pinagtaralungaan nira ang nag̓impisa rang nagbitala ang mag̓aning,
“Mga kaputulan ang tag̓a taa tung Atenas,
nag̓apaniiranamu ra ka yëën ang talagang anda ray magdëëg tung numyung duru amug katinuuën.
23 Kipurki tung pagparanaw-panawënu taa tung siudad ming pagpaniid tung mga pag̓atutuuan mi,
may napanawanung sasang darasag̓an ang may mga bitalang iginurit asan ang maning taa yang palaksu na:
Naa yang darasag̓an para tung sasang dios ang indi pa nag̓ailala ta.
Purisu atiang pag̓atuuan ming atiang indi mi pala nag̓ailala,
ya ray ipaintindiu tung numyung ipailala.
24 Yang Dios ang nag̓imu yang kaliw̓utan may yang tanan ang mga bëtang na,
kumus yay may anya tung kalangitan may kaliw̓utan,
indi pagkaministiran ta mga simbaan ang matiniran na ang binuat ta mga tau ka ilëm.
25 Yadwa pa indi ka pagpasikasu tung yatën ang mga tau ang maning pa tung may kaministiran na tung yatën.
Ay ya pa ag̓ari tanya mismu yay pagpakdul yang kabui tang tanan ang mga tau pati yang tanan ang mga kaministiran ta.
26 Tanya kay nag̓imu yang tanan ang mga nasyun ta mga tau ëkël tung sam bilug ang inimu na atiing primiru ang ya ray binuat nang pinamuaran nirang kadaklan ang asta naglëëp da yang bilug ang kaliw̓utan.
Baklu nagkaratau tanira,
nagplanu ra kang lag̓i ang unu pang panimpuay magkarabui,
kung ay pang banwaay mamag̓istar.
27 Ya ray binuat na ug̓ud tanyay sagyapën nirang maning pa tung ya ag̓apapay nira ang basi pa ra ilëm matultulan ka ëngëd nirang ilalaën.
Piru maskin maning ka man tia ang maning pa tung ya ag̓apapay,
bëlag̓an kang alawid tung sasa may sasa tung yatën.
28 Ay yang bag̓ay ang atia nag̓agngël ta tung duma may ruma ang mag̓aning unu,
‘Kung bëlag tung anya,
indiita nag̓abui,
indiita nag̓aulag̓-ulag,
ig indiita pa ngani natau.’
Katulad ka tung sasang isinulat ang tukaw yang tag̓a numyu kang mga manigtula ang mag̓aning unu,
‘Kaw̓a inimuita anya,
itay maning pa tung mga ana na.’
29 Kapurisu,
kumus maning da ka man tia ang itay maning pa tung mga ana na,
dapat ang indiita maglaum ang itang inimu na ita si kay mag̓imu tung anya ang yang pagkadios na ya pay mapasuaran ta tung mga bultung nag̓abuat ta mga taung ansianung magpanday tung bulawan ubin landuk ang salapi ubin batu.
30 Tung bag̓ay,
yang tukaw ang mga panimpu,
indi ra idinata yang Dios tung mga tau yang panlipat nirang maning tia tung anya.
Piru numanyan ang mga uras ang naa,
pagkalalangan da tung tanan ang mga tau tung maskin ay pang banwaay tung bilug ang kaliw̓utan ang manligna ra tanira tung mga ubra-ubra nirang malalain tung pagtërëlëngën na.
31 Kipurki may uras ang ipinagtipu na ang ya ra ëngëd ay ipagsintinsia na tung kalainan tung mga tau tung bilug ang kaliw̓utan ang yang pagsirintinsiaën nang atia tung nira ya ray ëklan na tung pulus magkatama ang duun da ipiaray na tung sasang taung pinagpilik na.
Yang taung atiang nag̓aaningu pinaingmatuuran na ra tung tanan ang mga tau ang yay talig̓an nang magsintinsia tung nira ëkël tung pagpabungkaras na tung anya,”
mag̓aning duun ti Pablo.
32 Numanyan atiing pagkagngël da nira yang sinambit ni Pablo natëtëngëd tung pagpabungkaras yang Dios tung sasang patay,
sinawayan da ta dumang pinagtalangkakan.
Piru yang duma namansianing ka ang,
“Gustuu pa ka yamën ang mamati tung nag̓ipag̓aning mung atia,
piru baklu mu ra kanay idayunay,
taa si tung dumang uras,”
ag̓aaning.
33 Kapurisu ti Pablo,
dayun dang nagliit duun tung pinagtaralungaan nira.
34 Ug̓aring tung pagliit na,
may pira pa nga laliian ang namagpakiugpu ra tung anyang namagpasadsad.
Tinëgkaan na,
namagtalig da tanira yang mga sadili nira tung ni Ginuung Jesus.
Yang sam bilug tung nira ya ra ti Dionisio ang yay sasang dating pagpakigmaëpët tung grupu nirang atia,
durua yang sasang baw̓ay ang nag̓aranan tung ni Damaris,
kasiraan da ka tanira yang duma.