Ti Timoteo Nag̓aëklan Da Ni Pablo (16:1-5)
16
Numanyan namagpadayun da na Pablo yang pagparanawën nirang asta nangakaw̓ut da duun tung Derbe may tung Listra.
Duun tung Listra may sasang tumatalig ang nag̓aranan tung ni Timoteo.
Yang nanay na tumatalig ka ig Judio yang nasyun na.
Piru yang tatay na bëlag̓an Judio.
2 Ti Timoteong naa nag̓adayaw ta matinlu yang mga kaputulan tung Listra may tung Iconio.
3 Gustu ni Pablo ang ya ray ëklan na ang para magduman tung anya.
Ug̓aring,
kumus nag̓akdëkan da ta kadaklan ang yang tatay na bëlag̓an Judio,
ingkëlan da ni Pablong pinabuatan ta tanda tung tinanguni na ug̓ud anda ray pagsangkëlan yang mga isip yang mga Judiong magrisibi tung anya duun tung mga rugal ang distinuën nira.
4 Taa numanyan atiing pagparanaw-panawën nirang tulu tung mga lansangan,
yang mga urdinansang atiang pinag̓irig̓uan da yang mga apustul may yang mga pamagmaëpët-ëpët duun tung Jerusalem,
ya ray nag̓ipagpakaw̓ut nirang nag̓ipatuman tung mga tumatalig.
5 Purisu nagkamaningan da ang kada sam pundaan yang mga tumatalig,
nagbakëd dang nagbakëd yang pagtaralig̓ën nira ig yang kinadakël yang mga taung pamagtalig tung ni Ginuung Jesus,
ya rag durulang agdurulang.
Natëtëngëd Tung Pagmangulu Yang Espiritu Santo Tung Pagparanawën Na Pablo (16:6-10)
6 Taa numanyan,
namagpadayun da na Pablo yang pagparanawën nirang namanggëtës duun tung parti Frigia tung sinakëpan yang Galacia.
Gustu rin nirang mamagpalaktëd duun tung sinakëpan yang Asia,
piru indi ra tinugtan yang Espiritu Santong mamagparakaw̓utun duun.
7 Purisu pagkaw̓ut nira duun tung kampus yang sinakëpan yang Misia,
tinag̓aman da rin nirang linaktëran yang sinakëpan yang Bitinia.
Piru indi si tinugtan yang Espiritu Santong nag̓ipatinir tung nira ni Ginuung Jesus.
8 Kapurisu,
namanggëtës da ilëm tung sinakëpan yang Misia ang namanuldak duun tung lansangan ang Troas.
9 Pagkaw̓ut nira duun,
pagkalaw̓ii ra,
may sasang ipinadakat yang Dios tung panëlëng ni Pablo.
Yang nabag̓ay tung panëlëng na may sasang taung tag̓a Macedonia ang yag këkdëng tung pinagtalungaan nirang durua ang durung pag̓amuy-amuy na tung anyang mag̓aning unu,
“Magpalaktëra ra tani tung yamën tung Macedonia ang para taw̓anganami ra ka nuyu,”
ag̓aaning unu.
10 Kumus maning da ka man tii yang nabag̓ay tung panëlëng ni Pablo,
pagkapangayag,
nagsimpanami rang lag̓i ang para magpalaktërami ra duun tung Macedonia.
Ay namalamaran da yamën ang pinaintindiami ra yang Dios ang magparakaw̓utun yang Matinlung Balita duun tung mga taung atii.
(Yuung ti Lucas ang may sulat taa,
nagpakignunutaw ra ka tung na Pablo tung uras ang atii.)
Agbuskarën Da Yang Dios Yang Kinaisipan Ni Lidia (16:11-15)
11 Atiing pagpalaud da yamën ang nanliit tung Troas,
pabur yamën ang nagpatabuk tung sasang pulung paggug̓uuyan tung Samotracia.
Pagkapangayag,
nagpalaktërami si duun tung Neapolis.
12 Paglampud yamën,
diritsyuami rang nanug̓ud ang nagpanaw duun tung Filipos.
Yay pinakasiudad duun tung sinakëpan yang Macedonia ig pinagpabrika kang tukaw ta mga tag̓a Roma.
Duunami nagtinir ta mga pira pang kaldaw.
13 Numanyan kaw̓utun da yang kaldaw ang nag̓ipamaënay ta mga Judio,
nagluaami ra tung siudad ang minangay duun tung binit yang sasang suba ay tung karkulu ilëm yamën puiding may sasang pag̓arangay-angayan ta mga Judiong mamag̓ampu tung Dios.
Kaw̓utan yamën,
naa pala pulus mga baw̓ay ang nagkarasagpun duun.
Purisu dayunami ra kang kuminarung ang nag̓impisang nangësën-kësën tung nira ang asta naampir da tung ni Ginuung Jesus yang pag̓akërësënan yamën.
14 Simanyan,
may sasang baw̓ay ang pamati ang yang aran na ti Lidia.
Tanya tag̓a Tiatira ig sasang manigpaalang ta mga aw̓ël ang matitinlung klasi ang yang kulay na tapël.
Yadwa pa,
pag̓intindi ra kang lag̓i tung pag̓atuuan yang mga Judio.
Numanyan,
tinandëg da yang Dios yang kinaisipan nang binuskad ang asta napanangëd da tung nag̓ipag̓aning ni Pablo.
15 Numanyan tanya asta yang mga kaarumanan nang kalukut na tung balay na,
dayun dang namampabënyag ang namampailala ang pinalamtuk da nira tung ni Ginuung Jesus yang pundu yang kinaisipan nira.
Pagkatapus pinangimbitarami ra anyang inaning,
“Kung midyu pag̓ingmatuuramu ra tung yëën ang pagtalig̓aw ra ka man ang matuud tung ni Ginuung Jesus,
taniamu ra ilëm tung balay yamën magdayun,”
mag̓aning.
Pagkatapus tung masyadung pag̓imbitar na,
nagpauyunami ra ilëm tung kalëlyag̓an na.
Nag̓ipakalabus Da Ti Pablo Durua Ni Silas Duun Tung Filipos (16:16-34)
16 Taa numanyan may sasang kaldaw,
atiing pag̓angay si yamën duun tung rugal ang atiing pag̓arangay-angayan ta mga Judio ang para mamag̓ampu,
may nabag̓as yamën ang sasang baw̓ay ang kirëpën ta tau.
Naa pala may tau na tung tinaluk ang yay pagpakdul ta kinatakwanan nang mag̓ula.
Yang mga ag̓alën na durug dakul yang pangita nirang kuarta natëtëngëd tung pag̓urulaën nang atia.
The Conversion of the Jailer (Mga Binuat-buatan 16:16-40)
17 Taa numanyan sigi-sigi ra yang pagdasun-dasun yang baw̓ay ang atia tung yamën na Pablo,
ig sigi-sigi ka yang paglëlpakën nang mag̓aning,
“Ëëy,
yang mga taung nani pag̓apanuw̓ul yang Dios ang pinakalandaw ang para mamagparakaw̓utun tung numyu kung ya pa ag̓aring matapnayamu ra yang Dios,”
mag̓aning.
18 Maning ka tia yang pag̓abuat na tung kaldaw-kaldaw ang asta ginamuan da ilëm ti Pablo ta pamati.
Dayun dang nagbëdlëng ang nanalunga tung anya ang yang tau na tung tinaluk ya ray binugnu nang inaning,
“Kumu pag̓atuw̓ulaw ni Jesu-Cristo,
lalangana ra yëën ang maglayasa rang lag̓i tung anya,”
mag̓aning.
Atii,
lag̓i-lag̓i ra ka man ang naglayas.
19 Numanyan pagkasiman yang mga ag̓alën yang baw̓ay ang atia ang anda ray maëklan nira tung anyang pakinaw̓ang,
dayun da nirang dinëëp ti Pablo,
durua ni Silas.
Linag̓unut da ilëm nira duun tung plasa tung katalungaan yang may mga katëngdanan.
20 Dayun da nirang idinimanda yang duruang atia tung may mga katëngdanan ang pinakaabwat ang mag̓aning,
“Yang mga taung naa pamagtukud da ta gulu taa tung siudad ta.
Ay tanira mga Judio kang lag̓i!
21 Pamagturuldukanën ta mga ug̓aling bëlag̓an tamang pauyunan tang usuyun ay ita tag̓a Roma ka man,”
mag̓aning.
22 Numanyan yang mga taung buntun ang namagsaragpun duun,
namag̓impisa rang mamangalima tung nira.
Atii yang may mga katëngdanan,
ya ray namagtuw̓ul tung mga pulis ang pamëkrasën da nira yang mga lambung na Pablo ang pamaluën.
23 Pagkatapus nira ta pamalu ang midyu pinaëpdan da ilëm nira ta linawa nirang gësyë,
dayun da nirang ibinalalang tung kalabus.
Yang guardia tung kalabus,
pinag̓urdinan da ka nirang bantayan na ta mupia.
24 Kapurisu,
pagkagngël yang guardia,
dayun na rang ipinamlëk duun ëngëd tung sëlëd yang pinakauri rang kuartu yang kalabus.
Yang mga bisit nira ipinampakipit na tung panglaw.
25 Taa numanyan,
atiing tënganan da ta law̓ii,
ti Pablo durua ni Silas pamag̓ampu ang nunut da ka ta pagkarantaën nirang pamagdayaw tung Dios.
Nag̓apamatian yang mga masigkaprisu nira.
26 Atii,
nainali rang nayëgyëg yang kaliw̓utan ta maktël.
Yang pinakdëngan yang kalabus gulpi rang nayëg̓ë-yëg̓ë.
Gulpi ra kang namag̓aabri yang mga sada yang tanan ang mga purta.
Pati mga kadina ang atiang pinanggapus tung mga prisu,
gulpi ra kang nagkaratangtang.
27 Pagkayëgyëg,
dayun dang napuaw yang guardia.
Pagkaita na yang mga purtang luw̓us dang abirtu,
kalaum nang namampalibri ra yang mga prisung luw̓us.
Purisu,
anday dumang binuat na,
nanlaw̓ut da yang sabli na ay manëg̓ët da.
28 Atii,
nagkëndal da ti Pablo ta maknul ang mag̓aning,
“India ra magbuat ta maning tia tung sadili mu.
Naniami kang tanan,”
mag̓aning.
29 Numanyan nagpaguuy ta kaas yang guardia ang pagkatapus gulpi rang nagpaklëd ang nagpadagpa ra ilëm tung pinagtaralungaan nira na Pablong pagpangërël da.
30 Dayun dang nagpalua tung nirang durua ang pagkatapus nagtalimaan tung nirang mag̓aning,
“Unu ray dapat ang buatënu ang para malibriaw tung sintinsia yang Dios?”
31 Mag̓aning tanirang namagtimalës,
“Magtalig̓a ra yang sadili mu tung ni Ginuung Jesus ang magpatapnay.
Atiang lag̓i,
tapnayëna ra anya.
Asta yang tanan ang mga kaarumanan mung kalukut tung pamalay-w̓alay mu,
ya ka,
kung magtalig da ka yang mga sadili nira tung anya,”
ag̓aaning.
32 Dayun dang namagpaintindi tung anya natëtëngëd tung ni Ginuung Jesus may tung kalibrian ang pinagtukud na.
Asta yang mga kaarumanan na,
pinampaintindi ra ka nira.
33 Pagkatapus ta pagpaintindi nira,
atiing lag̓ing pagtënganan ta law̓ii,
dayun dang ingkëlan yang guardia na Pablo duun tung may wai ang pinangug̓asan yang mga luka nirang pinanakëp yang palu.
Pagkatapus ta pangug̓as na,
yang guardia pati yang mga kaarumanan nang kalukut tung pamalay-w̓alay na,
namampabënyag dang namampapruiba ang tanira namagtalig da yang mga sadili nira tung ni Ginuung Jesus.
34 Pagkatapus ta pagpabënyag nira,
dayun dang ingkëlan yang guardia na Pablo tung balay nang pinapaan.
Tanya may yang tanan ang mga kaarumanan nang kalukut tung pamalay-w̓alay na pinangampayan da ta kasadyaan nirang duru natëtëngëd simanyan yang matuud ang Dios ya ray nag̓atalig̓an nira.
Nag̓apalpasan Da Na Pablo (16:35-40)
35 Pagkapangayag,
yang may mga katëngdanan ang pinakaabwat namagtuw̓ul da tung mga pulis ang na Pablo palpasan da.
36 Purisu ipinalatay ra yang guardia yang bitala nira tung na Pablong mag̓aning,
“Nag̓apatuw̓ulanamu ra yang may mga katëngdanan ang palpasanamu ra unu.
Purisu lumuaamu ra.
Indiamu ra ilëm magpaërëk-ërëk,
magliitamu rang lag̓i.”
37 Diritsyu rang nagtuw̓al ti Pablo ang yang mga pulis ya ray inaning nang,
“Abaw,
indiami nganing nabista ta ustu,
pinagpaluami rang lag̓i tung publiku ag̓ad yami sakëp ka yang riglamintu yang gubirnu ang kapariu ka tung dating mga tag̓a Romaa.
Pagkatapus ibinalalangami pa nira tani tung kalabus ang pagkatapus numanyan basta-w̓astaënami ra ilëm nirang palpasan tung sikritu?
Indi puidi.
Tanirang may mga katëngdanan,
yay mansiangay taa ang magpalpas tung yamën,”
mag̓aning.
38 Pagkagngël yang mga pulis yang bitala ni Pablo,
antimanung binalikan nirang inugtulan yang may mga katëngdanan.
Pagkaintindi nira ang naa pala tanira sakëp ka yang gubirnu ang katulad ka tung nira,
pinamangëlbaan da natëtëngëd talagang lampas da yang binuat nira tung na Pablo ang sakëp ka tanira yang gubirnub.
39 Purisu,
anday dumang binuat nira,
nansiangay ra ka man duun tung kalabus ang namag̓ingaluk ta pasinsia tung nira.
Dayun da nirang pinalpasan ang inaning,
“Mupia pa,
magliitamu ra ilëm taa tung siudad yamën,”
mag̓aning.
40 Numanyan,
paglua na Pablo ni Silas tung kalabus,
diritsyu rang nansiangay duun tung balay na Lidia.
Pag̓irita nira yang mga kaputulan nira tung ni Ginuung Jesus,
dayun da nirang pinaktël yang mga kinaisipan nirang magkarabutwan baklu ra namagliit.