Nag̓apagkërësënan Da Kung Yang Mga Tumatalig Ang Bëlag̓an Mga Judio Ubligadu Pang Magpabuat Ta Tanda Baklu Ra Tapnayay Yang Dios (15:1-21)
15
Taa numanyan may mga taung baklung namansikaw̓ut tung Antioquia ang duun mamanliit tung Judea.
Namag̓impisa rang namagturuldukanën tung mga masigkatumatalig nirang bëlag̓an mga Judio ang maning taa:
“Kung indiamu magpabuat ta tanda tung mga tinanguni mi ang katulad ka tung urdinansang ibinutwan ni Moises tung nasyun yamën ang mga Judio,
indiamu ka ëngëd tapnayën yang Dios,”
mag̓aning.
2 Pagkagngël ni Pablo durua ni Bernabe tia,
tinumpalak da nira ta mupia yang nag̓apapaktëlan nirang atia.
Yang dinangat na,
namagparaig̓u ra tanirang sam pundaan ang maayën pa ang ti Pablo durua ni Bernabe pati yang dumang tag̓a nira ka ya ray mamansiangay duun tung dating mga apustul may mga pamagmaëpët-ëpët tung sam pundaan duun tung Jerusalem ang para pagkërësënan da nira ta pinu yang bag̓ay ang atia.
3 Kapurisu numanyan pinagpadag̓ën-dag̓ënan da ka nirang sam pundaan ang pinapanaw.
Tung pagparanawën nira duun tung sinakëpan yang Fenicia may Samaria,
namagbaw̓alitaën da tung mga kaputulan nirang mga tumatalig ang kada sam pundaan natëtëngëd tung mga tag̓a duma-rumang nasyun kung ya pa ag̓aring namagsuku rang namagtalig yang mga sadili nira tung ni Ginuung Jesus.
Purisu yang tanan ang mga kaputulan ang atiang nagkarabalitaan,
pinangampayan da ta kasadyaan nirang duru.
4 Numanyan pagkaw̓ut nira duun tung Jerusalem,
pinangistimar da ta mupiang pinanapët yang intirung sam pundaan yang mga tumatalig ang tag̓a duun pati mga apustul ang atiang dati pati mga pamagmaëpët-ëpët.
Mintras ag̓asikasuën pa tanira atiing primirung pagkaw̓ut nira,
namagbaw̓alitaën da dayun natëtëngëd tung tanan ang pagtaraw̓angën yang Dios tung nirang namagparakaw̓utun yang bitala na tung mga tag̓a duma-rumang nasyun.
5 Atii may mga tumatalig ang namansikdëng dang para mamagbitala.
Maskin mga kinasakpan da kang lag̓i yang mga Pariseo,
namagtalig da ka ëngëd tung ni Ginuung Jesus.
Yang aning nira,
“Yang mga taung atiang naaning ming namagtalig da ka tung ni Ginuung Jesus ang bëlag̓an mga masigka Judio ta,
dapat ang magpabuat da ta tanda tung mga tinanguni nira ang katulad ka tung yatën ang dating mga Judio.
Iksirën mi ang asan da magpailala ang tanira mamagtuman da ka yang mga katuw̓ulan ang ibinutwan ni Moises tung nasyun ta,”
mag̓aning.
6 Kapurisu numanyan,
namagsaragpun da yang mga apustul pati mga pamagmaëpët-ëpët ang para mamag̓irintindian da natëtëngëd tung bag̓ay ang atia.
7 Atiing nabuay ra yang pag̓urunta-untaan nirang pamagparaig̓u,
kumindëng da ti Pedrong nagbitala ang mag̓aning,
“Mga kaputulan,
nag̓askëan mi ra ka ang tan taa pa,
yuu ray pinilik yang Dios tung yatën ang para magparakaw̓utun yang Matinlung Balita tung mga taung bëlag̓an mga masigkanasyun ta ang para magngël da nira ig mamagtalig da ka dayun tung ni Ginuung Jesus.
8 Pagkatapus,
tanirang pinagpakaw̓utanu,
namagtalig da ka man yang duma tung anya.
Kumus yang Dios nag̓asangkad na yang kinaisipan yang tanan ang mga tau,
naskëan na ra ang talagang matuud yang pagtalig nirang atiia.
Purisu atiang lag̓i,
pinapruibaan na ra ang tanira tinapnay na ra ka man.
Ay pinampatiniran na tanira tung Espiritu Santo ang katulad ka tung binuat na tung yatën atiing primiru.
9 Bilang yang pagtërëlëngën na tung nira may tung yatën,
anday naglandawan.
Ay atiing pagtalig nira yang mga sadili nira tung ni Ginuung Jesus,
pinunasan na ra ka tung mga kasalanan nira.
10 Kapurisu ayw̓at simanyan,
gustu mi pa ka ëngëd ang tag̓aman mi yang Dios ta pagtuung kung sumalapuamu tung anya u kung indi?
Ay maning da tiang gustu ming pasaknën yang mga tumatalig ang atia ta sasang durug lëbat ang indi nganing kinayanan yang mga kinaampu ta ta sakan,
maskin nganing ita pa,
indi ta ka nag̓akayananb!
11 Kung indi,
ta yatën ang mga Judio,
anday dumang ipinagtapnay ni Ginuung Jesus tung yatën atiing pagtalig ta tung anya yang mga sadili ta,
ya ra ilëm yang kaildaw nang ipinagpaita na tung yatën ag̓ad indi ka rin magkabag̓ay ang ildawanita pa anya.
Ya kay nag̓ipagtapnay na tung nirang bëlag̓an mga Judio,”
mag̓aning ti Pedro duun tung nira.
12 Atii,
andang pisan ay iw̓ëk-iw̓ëkën tanirang tanan ang nangasagpun asan.
Namamati ra ilëm tung ni Bernabe durua ni Pablong nagbëlësan ang nagbaw̓alitaën natëtëngëd tung mga pruibang makabëw̓ërëng ang ipinagpaita yang Dios tung bëlag̓an mga Judio ëkël tung nirang durua ang nagparakaw̓utun tung mga taung atii.
13 Pagkatapus nira ta pagbaw̓alitaën,
ti Santiago,
ya ray nagsubling nagbitala ang mag̓aning,
“Mga kaputulan,
mamatiamu ra kanay tung yëën.
14 Naang putul tang naang ti Simeon baklu rang nagpasanag tung yatën ta nungayna kung ya pa ag̓ari yang impisada yang pagpadag̓ën-dag̓ën yang Dios tung mga taung tag̓a duma-rumang nasyun ang ya ra kay nag̓apangkëlan na ta mga tauan na kang sadilic.
15 Ay yang bag̓ay ang atia magkatunung pisan tung bitala yang mga manig̓ula atiing tukaw ang katulad ka tung sasang inaning yang Dios ang napabtang tung kasulatan ang mag̓aning,
16-17 ‘Tung uri ta kaldaw magbalikaw ra.
Bawiënu ra yang pag̓aradiën ni David ang nadisparatis da.
Maskin diadu ra ka man,
paulikanu ra ka ëngëd ang pabakërën ug̓ud mamagsagyap da tung yëën yang kadaklan ang mga tau ang para matultulanaw ra ka nirang ilalaën.
Ya ka man yang mga tag̓a duma-rumang nasyun ang kumpurming tinu pay imbitarënung mag̓ing tauanu.
Atia ya ray inaning ni Yawi ang yay magpalua tung mga bag̓ay ang atia tung uri ta kaldaw,’
mag̓aning yang manig̓ulang atiid.
18 “Ig disir,
planu na ra kang lag̓i ang mag̓imbitar tung mga taung atia.
19 Kapurisu yang yëën ang disisiun ya ra taa:
indi ta ra ilëm pagpalbatan yang mga tag̓a duma-rumang nasyun ang atiang nag̓amanmanan da yang mga isip nirang pagtalig tung ultimu ilëm ang Dios.
20 Kung indi,
paëklan ta ra ilëm ta sulat.
Aningën tang indi ra ëngëd magpakigsaru tung nag̓isag̓ud tung mga bultung nag̓atuuan yang mga kaarumanan nira.
Indi ra ka magpalangaas ang mangumbaw̓ay ubin mangunlalii.
Indi ra ka mamangan yang karni ta ayëp ang indi pinaturukan yang dug̓u nang pinatiktikan.
Pati dug̓u,
indi ra ka nira panganëne.
21 Maayën pang ya ray aramlig̓an nira ay tung tantung kabuay ra ya ray naanaran ta yang mga urdinansang atia.
Ay maskin ay pang lansanganay,
may pagparakaw̓utun natëtëngëd tung isinulat ni Moises.
Kada kaw̓utun yang kaldaw ang nag̓ipamaënay,
nag̓abasa yang bitala na tung mga balay ang pagsaragpun-sagpunan,”
mag̓aning ti Santiago.
Pag̓apaëklan Da Nira Ta Sulat Yang Mga Tumatalig Ang Tag̓a Duma-rumang Nasyun (15:22-35)
22 Purisu numanyan namagparaig̓u ra yang mga apustul may yang mga pamagmaëpët-ëpët asta yang intirung sam pundaan ang maayën pang may mga aruman nirang pilikën nirang ipanunut tung ni Pablo durua ni Bernabeng mansiulik da duun tung Antioquia.
Numanyan yang pinilik nira ya ra ti Silas,
durua ni Judas ang atiang kaisan nag̓aguuyan ka tung ana ni Sabbas (Bar-sabbas).
Ay tanira kang lag̓i ay nag̓agalang ta maayën yang mga kaarumanan nira.
23 Ya ray pinapag̓ëkël nira yang sulat ang isinimpan nira ang maning da taa yang kamtangan na:
“Yaming mga putul ming mga apustul may mga pagmaëpët-ëpët tani,
pagpakumustaami tung numyung mga kaputulan yamën ang bëlag̓an mga masigkanasyun yamën ang pag̓istar asan tung siudad yang Antioquia may asan ka tung sinakëpan yang Siria ang asta asan ka tung sinakëpan yang Cilicia.
24 Nabalitaan da yamën ang naa pala may duma unung tag̓a yamën tani ang namagdistinu asan tung numyu ang pagkatapus ginuluamu ra unu nira ëkël tung itinulduk nira ang ya ra unu ay naliw̓ëg̓an ta mupia yang mga kulu mi.
Piru gustu ilëm yamën ang maskëan mi ang indi ka tinuw̓ul yamën.
25 Kapurisu ya ray pinagsaragpunan yamën tani ang pinag̓irig̓uan ang maayën pa may mga aruman yamën ang pilikën yamën ang ipaangay asan tung numyu.
Pagkatapus ipinanunut yamën tung ni Bernabe durua ni Pablo ang yay nag̓amaal yamën ta duru.
26 Ay ya ray mga taung ipinirinda ra nira yang mga linawa nira arangan da ilëm tung pagkërërëngën nira tung ni Ginuu tang Jesu-Cristo.
27 Purisu,
yang mga taung atiang tinuw̓ul yamën ang ipinanunut tung nira,
ya ra ti Judas durua ni Silas.
Yay mamagpirsunal ang mamagbaw̓alitaën tung numyu natëtëngëd tung mga bag̓ay mismung ipinabtang yamën asan tung sulat ang atiang ëkël-ëkël nira.
28-29 Yaming nagparaig̓u tani pinasanag̓anami ra yang Espiritu Santo ang maayën pang indiamu ra ilëm palbatan yamën ta masyadu,
kung indi,
ya ra ilëm taa ay kaministiran ming likayan.
Indiamu ra magpakipangan ta palanganën ang isinag̓ud tung mga bultu.
Indiamu ra ka mamangan ta dug̓u ubin karni ta ayëp ang indi ra pinatiktikan yang dug̓u na.
Indiamu ra ka magpalangaas ang mangumbaw̓ay ubin mangunlalii.
Purisu kung ya ray likayan mi yang mga bag̓ay ang atia,
magkatama yang mga buat-buat mi ang indiamu ra ka malawayan ta duma.
Ya ra ilëm tia ay sarang ang maaning yamën tung numyu.”
30 Purisu numanyan,
tanirang ëpat pinampadag̓ën-dag̓ënan da nirang pinampapanaw ang para duun mansiangay tung Antioquia.
Simanyan mansikaw̓ut duun,
pinasagpun da nira yang intirung sam pundaan yang mga tumatalig.
Pagsaragpun da,
inintrigaan da nira yang sulat.
31 Numanyan pagkabasa ra nira yang sulat,
pinangampayan da ta kasadyaan nirang duru natëtëngëd tung kamtangan na ang duun da nagkëtël yang mga isip nira.
32 Dispuis ti Judas durua ni Silas,
kumus mga manigpalatay kang lag̓i ta mga bitalang ya ag̓ipaëyangay yang Dios tung mga isip nira,
durung mga bitalang ipinagpagngël nirang ipinagpaktël tung mga isip yang mga kaputulan nira ang duun da nagkatëntën.
33-34 Numanyan namagtinir duun ta mga pira pang linggu.
Atiing mansibalik da tung namagtuw̓ul tung nira,
baklu ra papanaway yang mga kaputulan nirang tag̓a Antioquia,
pinag̓ingalukan pa nira tung Dios ta matinlung pagparanawën niraf.
35 Ug̓aring na Pablo ni Bernabe namagpabutwan pa asan tung Antioquia.
Ay namagturuldukanën tung mga kaputulan ig namagparakaw̓utun ka tung duma yang bitala yang Dios natëtëngëd tung ni Ginuung Jesus,
kasiraan da ka tanira yang mga kaarumanan nirang duru.
Pagbëlag̓an Da Ti Pablo Durua Ni Bernabe (15:36-40)
36 Atiing nangabuay ra duun,
mag̓aning ti Pablo tung ni Bernabe,
“Pamalikan ta ra kanay ang pamisitaan yang mga kaputulan ta duun tung kada lansangan ang atiing pinagpakaw̓utan ta yang bitala yang Dios natëtëngëd tung ni Ginuung Jesus kung maun da yang pagpadayun nira tung pagtaralig̓ën nira tung anya,”
mag̓aning.
37 Taa numanyan gustu rin ni Bernabe ang ëklan si nira ti Juan ang atiang nag̓apapuanggaan tung ni Marcos.
38 Piru ti Pablo tanya indi ka ëngëd nagkatama tung isip nang ëklan pa nira yang sasang taung maning tiang namutwan pa tung nira duun tung Pamfilia ig indi ra nagpadayun yang pagtaraw̓angën na tung nira.
39 Numanyan ya ray nakanayan ta pagbalalaan nirang durua ta makinit-kinit.
Tinëgkaan na,
nagbëlag̓an da ilëm tanira.
Ti Bernabe yay nag̓ëkël tung ni Marcos ang namanaayan dang para duun tung Chipre.
40 Ti Pablo tanya yang ingkëlan na ya ra ti Silas.
Baklu namagliit tanira,
ipinag̓intriga ra yang mga kaputulan tung Dios ang para padag̓ën-dag̓ënan na ta mupia tung panalungaan nira.
41 Taa numanyan namagpanaw ra tanirang durua duun tung sinakëpan yang Siria may Cilicia.
Kada sam pundaan yang mga tumatalig,
ya ray pinampaktël nira yang mga isip nira ang para matëntën da yang pagtaralig̓ën nira tung ni Ginuung Jesus.