Natëtëngëd Tung Pagparakaw̓utun Na Pablo Duun Tung Iconio (14:1-7)
14
Numanyan pagkaw̓ut na Pablo durua ni Bernabe duun tung Iconio,
yang binuat nira pariu ka tung binuat nira duun tung Antioquia.
Bilang namagpakiglakët tung mga masigka Judio nira duun tung pagsaragpunan nira.
Pagkatapus,
kumus mabuilu ig makatatalig yang ipinagpakaw̓ut nira natëtëngëd tung ni Jesus,
durug dakël yang mga taung namagsukung namagtalig yang mga sadili nira tung anya.
Nagkasira-siraan da yang mga Judio may yang mga kaarumanan nirang tag̓a dumang nasyun ang nagpalaktëd dang tukaw tung pag̓irintindiën nirang mga Judio tung Dios.
2 Piru yang mga kaarumanan nira mga Judiong indi ra nangalëlyag ang mamanangëd,
ya ray namagsulsul tung mga masigkalansangan nirang ang bëlag̓an mga masigkanasyun nira ang asta nangasilag da tung mga taung atiang baklung namagtalig tung ni Ginuung Jesus.
3 Piru maskin pang maning tia,
namagpabuay ra ka ëngëd na Pablo.
Anday inëntëran nirang nagparakaw̓utun natëtëngëd tung ni Ginuung Jesus.
Yang nag̓ipaintindi nira natëtëngëd tung kanëëman nang atiing ipinagpaita nang nagpakugmatay,
ya ray pinaingmatuuran na ëkël tung mga pruibang makabëw̓ërëng ang ipinabuat na tung nira.
4 Taa numanyan,
yang mga tau tung lansangan ang atia nagdurua rang parti.
Yang sang parti namagpakampi ra tung mga Judiong atiang pamagpakigkuntra.
Yang sang parti namagkërëng da tung mga apustul.
5 Taa numanyan yang mga Judiong atia pati yang bëlag̓an mga Judio,
ya ray namagtima ta malain ang kuntra tung na Pablo,
kasiraan da ka tanira yang mga manigmangulu nira.
Yang planu nira,
dëëg-dëëg̓an da nirang batwën ang asta mapatay.
6 Pagkasiman na Pablo,
dayun dang namagpalibri duun tung sinakëpan yang Licaonia ang duun aglulg̓ud tung siudad ang Listra may yang siudad ang Derbe.
7 Duun si ka namagparakaw̓utun tung mga tau yang Matinlung Balita natëtëngëd tung ni Ginuung Jesus.
Natëtëngëd Tung Pagparakaw̓utun Na Pablo Duun Tung Listra May Derbe (14:8-23)
8 Numanyan duun tung siudad ang Listra,
may sasang taung pilay.
Kinatau na yang pagkabëtang na.
Inding pisan nag̓apanaw.
9 Numanyan yag kakarung ang pagpamati tung ni Pablong pagparakaw̓utun.
Tung pagpatëëk-tëëk ni Pablo tung anya,
nasiman na ra ang naëyangan da ta ipagtalig na tung ni Jesus ang yay sarang ang magpamaayën tung anya.
10 Purisu,
pinadakul da ni Pablo yang busis nang mag̓aning tung anya,
“Këmdënga ra ta ustu!”
mag̓aning.
Pagkagngël na,
lag̓i-lag̓ing luminukbu rang nagpanaw-panaw.
11 Numanyan pagkaita yang mga taung buntun kung unu pay binuat ni Pablo,
dayun dang namaglëlpakën ang namag̓aning tung bitala nirang tag̓a Licaonia ang,
“Uay,
atia ra yang mga ginuu-ginuung pag̓atuuan ta.
Nansilampud da taa tung yatën ang pamagpatulut-tulut tung mga tau ang maning pa tung yatën,”
ag̓aaning.
12 Naa pala,
ti Bernabe,
ya ray ginuuyan nira tung ni Zeusa.
Ti Pablo ya ray ginuuyan nira tung ni Hermesb ay tanyay manigparakaw̓utun.
13 Numanyan yang manigdasag para tung ni Zeus,
ya ray pagguyud ta durua nga turuan duun tung purta yang siudad.
Yang dikël nira pinanabdan da ta mga bulaklak ang binuat ang maninga balyëg ay simpan dang idasag.
Ay gustu nira yang mga taung atiang buntun ang yang mga apustul dasag̓an da nira tung balay ang pagtuuan nira tung ni Zeus duun tung lua yang siudad.
14-15 Pagkabalita ni Pablo durua ni Bernabe ang taniray nag̓aisipan da nirang dasag̓an,
ya ra pamakbakay nira yang mga lambung nirang nag̓asuut nira ang para asan da mamagpailala ang indi ra tanira mamagpauyun tung nag̓atima nirang atia.
Pagkatapus dayun dang namanakat-sakat tung mga tau ang namaglëlpakën dang mag̓aning,
“Mga putul,
ayw̓at magbuatamu ra ta maning tia?
Ay yami parariu ka ilëm tung numyung tau.
Minangayami ilëm taa ay gustu yamën ang magparakaw̓utun tung numyu ang yang mga bag̓ay ang atiang anday kuinta na,
maayën pang ya ray talyuran ming butwanan ug̓ud mapanalungaamu ra ta ustu tung matuud ang Dios ang anday pinanliitan na.
Ay yay nag̓imu yang langit may yang tanëk may yang tëëb asta yang tanan ang mga bëtang nira.
16 Tung bag̓ay,
atiing tukaw pang mga panimpu,
matuud ka man ang yang tanan ang nasyun pinaw̓ayaan na ra ilëm ang para mamag̓usuy ra ilëm tung kumpurming unu pay nag̓alëlyag̓an nira.
17 Piru maskin maning tii,
durung lag̓ing mga pruibang nag̓ipaita na ang pagpailala tung pagkadios na ëkël tung pagburuatën na yang mga matitinlu.
Ay nag̓apakdulanamu anya ta kuran pati yang tilig̓ayëg ang para mabialamu ig maampayanamu ra ka ta kasadyaan,”
mag̓aning tanira.
18 Piru maskin pang maning tia yang mga bitalang nag̓ipagngël nira tung mga taung atiang buntun,
imurat da ilëm ang naampalar nira ang para indi ra ilëm mamagdayun ang mamagdasag tung nira.
19 Numanyan,
atiing pagpadayun na Pablo yang pagparakaw̓utun nira tung mga tau ta mabuay-w̓uay,
may mga Judiong tag̓a Antioquia may tag̓a Iconio ang baklung namansikaw̓ut.
Kumus pamagpasuag da kang lag̓i tanira tung ni Pablo,
dayun dang namagsulsul tung mga taung buntun ang tag̓a asan tung Listra ang asta namagpamatu ra tung ni Pablo.
Pagkabatu nira,
dayun da nirang ginuyuran ang ipinalua tung siudad ay kalaum nira patay ra.
20 Atii,
yang mga taung atiang baklung namagtalig tung ni Ginuung Jesus,
ya ra kay namagtaripukpuk tung anyang para mamagtaw̓ang.
Yang pagtaripukpuk nira tung anya ya ra kay pagkërëng nang nagbalik si tung siudad.
Pagkapangayag minangay ra duun tung siudad ang Derbe,
durua tanira ni Bernabe.
21 Mansikaw̓ut duun,
namagparakaw̓utun si tanira natëtëngëd tung ni Ginuung Jesus.
Duru kang mga taung pinangkëlan nira yang mga isip nira ang para magtalig da yang mga sadili nira tung ni Ginuung Jesus bilang magpagaëm da tung anyang mag̓usuy tung kalëlyag̓an na.
Pagkatapus tia,
pinamalikan da nira yang siudad ang Listra may Iconio may Antioquia.
22 Pinampaintindi nira yang mga tumatalig ang atia kung ya pa ag̓ari magpakatëntën yang mga isip nira.
Pinampaktël da ka nira ang padanayan da ka ëngëd nira yang pagtaralig̓ën nira tung ni Ginuung Jesus.
Pinagpaaman pa nirang mag̓aning,
“Ta yatën ang pagtalig tung ni Ginuung Jesus,
indi maimu ang indiita mapasaran ta sari-saring kaliwag̓an taa tung kaliw̓utan ang naa bakluita ra malg̓ud tung paggaraëmën yang Dios tung uri,”
mag̓aning.
23 Kada sam pundaan,
pinilikan na Pablo ta mga aruman nirang pira pang bilug ang para mamagmaëpët-ëpët.
Yang pagpirilikën nira duun da ipapanaway nira tung pag̓arampuën nira ig pëlëk yang pagparanganën nira ang para bilug yang mga isip nirang pamag̓ampu.
Pagkatapus tanirang intirung sam pundaan ya ray ipinag̓intriga nira tung ni Ginuung Jesus ang ya ra kang lag̓i ay tinalig̓an nirang magtapnay tung nira sasa may sasa.
24 Simanyan pagsalaid nira yang sinakëpan yang Pisidia,
nangalaktëd da tung sinakëpan yang Pamfilia.
25 Numanyan pagkaw̓ut nira duun tung siudad ang Perga,
namagparakaw̓utun da tung mga taung tag̓a duun natëtëngëd tung ni Ginuung Jesus.
Pagkatapus namanuldak da duun tung Atalia.
26 Pagkaw̓ut nira duun,
dayun dang namanaayan ang para mansiulik da duun tung siudad ang Antioquia.
Ay yang sam pundaan yang mga tumatalig duun,
ya ray namag̓intriga tung nira tung Dios ang para paktëlën na tanira tung ubraën nira ang simanyan ya ra ka man ay tinalus nira.
27 Numanyan pagkaw̓ut nira duun tung Antioquia,
pinasagpun da nira yang intirung sam pundaan ang mga tumatalig tung ni Ginuung Jesus.
Pagkasagpun,
namagbaw̓alitaën da tanira natëtëngëd tung tanan ang pagtaraw̓angën yang Dios tung nirang namagparakaw̓utun yang bitala na tung bëlag̓an mga Judio,
kung ya pa ag̓aaring pinakdulan na tanira ta lugar nirang mamagtalig yang mga sadili nira tung ni Ginuung Jesus.
28 Pagkatapus,
namagpabuay ra duun tung mga kaarumanan nirang pamag̓usuy tung ni Ginuung Jesus.