Ti Adi Herodes Pagkalalangan Da Ang Pandëëg-dëëg̓an Da Yang Dumang Mga Tumatalig Duun Tung Jerusalem (12:1-5)
12
Simanyan tung mga uras ang atii,
ti Adi Herodes nagkalalangan da ang pandëëg-dëëg̓an da yang mga tumatalig ang sakëp yang sam pundaan duun tung Jerusalem.
2 Ti Santiagong atiang aka ni Juan,
ya ray pinapug̓usan na ta dikël.
3 Pagkamalamad yang Adi ang ya ray nauyunan ang pisan yang kadaklan ang mga Judio,
dinulangan na pa yang pag̓abuat nang malain ang ti Pedro ya ray ipinadëëp na.
(Atii nagkatuun tung pistang atiang nag̓ipamangan yang mga Judio ta tinapay ang indi pinalëskag.)
4 Pagkadëëp tung ni Pedro,
dayun dang ipinakalabus.
Inintriga pa tung mga guardiang ëpat ang pundaan ang talaëpat nga tauan ang yay mamagbërëlës ta bantay tung anya.
Ay nag̓atimaan da yang Adi ang malapas ilëm yang pista,
baklu na ra bistaay ang ipaimatay tung katalungaan yang mga tau.
5 Kapurisu kumus maning da tia yang nabtangan ni Pedro duun tung kalabus ang tanya nag̓apabantayan da ta mupia,
pinadërëpan da ta pag̓arampuën yang mga tumatalig ang sam pundaan.
Ti Pedro Nag̓ipagpalibri Yang Dios (12:6-19)
6 Taa numanyan,
atiing law̓ii ra ang andamal ya ray uras ang nag̓aisip yang Ading ipagpalua na tung ni Pedrong ipagpabista,
ëlëk da ti Pedro tung kalabus.
Ya ngaknga tung durua nga guardian ang nagtimbang.
Yang kalima nang durua parariung pinusasan ta kadina tung duw̓ali may duw̓ali.
Duun tung purta may durua pa nga guardian ang pamagbantay ka.
7 Numanyan may sasang angil ang pag̓atuw̓ul yang Dios ang inali ra ilëm ang lumimput duun ig gulpi ra kang nanadlaw yang kuartung atiang pagbantayan tung ni Pedro.
Dayun dang nagyëg̓ë-yëg̓ë tung ni Pedro tung palda nang namuaw.
Inaning na rang,
“Kali!
Magbungkarasa ra!”
mag̓aning.
Atii,
lag̓i-lag̓ing nagkaratangtang da yang mga pusas tung kalima na.
8 Pagkatapus,
dayun na sing inaning ang,
“Ëltën mu ra tiang akës mu,
pati sandalyas mu suutun mu ra ka,”
ag̓aaning.
Antimanung tinuman ni Pedro.
Pagkatapus inaning na si ang,
“Suutun mu ra ka yang panlamig mung magnunut tung yëën,”
ag̓aaning.
9 Purisu ninuntan da ka man ni Pedrong luminua tung kalabus.
Ug̓aring indi ilëm nag̓aintindian na kung yang pag̓abuat yang angil matuud da.
Yang kalaum na,
nag̓abag̓ay ilëm tung sasang nag̓ipadakat yang Dios tung panëlëng na.
10 Numanyan,
natakliw̓an da nira yang primirung tumpuk yang mga guardia pati yadwang tumpuk ang asta nansikaw̓ut da tung purtang atiang salsalën ang maglulua tung siudad.
Kaw̓utan nira,
tung kalëlyag̓an na ra ilëm ang nag̓abri.
Dayun da tanirang nansilua.
Atiing pagpanaw nira tung sasang karsadang piët,
inali ra ilëm ang binutwanan yang angil.
11 Atii,
namanmanan da ti Pedrong mag̓aning tung sadili na,
“Banaosklu ra nga maladmarayu ang nainabu ka man ang matuud.
Pinatuw̓ulanaw ra yang Dios tung sasang angil na.
Binawiaw ra anya tung kagaëman ni Adi Herodes,
ipinalibriaw ra ka anya tung kalainan ang dumangat da rin tung yëën ang ya kang lag̓i ay nag̓apakbat yang mga masigkanasyunung mga Judio,”
mag̓aning.
12 Numanyan pagkalimadmad na ra yang pagkabëtang na,
diritsyu rang minangay duun tung balay ni Maria ang yay nanay ni Juan ang yang puangga na ti Marcosa.
Ay yay pagsagpunan yang dakëlëng mga tau ang pamag̓arampuën tung Dios para tung anya.
13 Pagkaw̓ut na,
pinagtuktukan na ra yang purta.
Pagkatuktuk na,
may sasang turuw̓ulun ang nag̓aranan tung ni Roda ang ya ray minangay tung purta ang para manginsapu.
14 Numanyan pagkailala na yang busis ni Pedro,
kumus dërëëg̓ën da yang kasadyaan na,
bëlag ya ngabriay na,
ya ra palaksung napabalik tung balay ang nagbaw̓alitaën ang ti Pedro unu takaa rag këkdëng tung lua yang purta.
15 Mag̓aning tanirang namagtimalës,
“Bariadua rang mulaa.”
Piru inulit na rang inulit yang inaning nang kindëngan ang talagang matuud.
Mag̓aning tanirang pamagpaimukli,
“Abëë,
siguru ya ra yang angil ang pagbantay tung anya.
Napasuad da ilëm tung anya!”
mag̓aning.
16 Numanyan ti Pedro tanya,
sigi-sigi yang tuktuk na.
Buay-w̓uay ta gësyë,
inabrian da nira.
Pagkaita nira tung anya,
nangabërëng da ta dakulung pagkabërëng.
17 Ti Pedro tanya,
nagsinyas da yang kalima na ang para tanira mamag̓ëkmëng da.
Dayun dang nag̓ugtulun kung ya pa ag̓ari yang pagparaluaën yang Dios tung anya duun tung kalabus.
Pagkatapus dayun na rang sinugpatan yang bitala nang mag̓aning,
“Ibalita mi ra tia tung ni Santiago b may tung mga kaputulan tang kadaklan,”
mag̓aning.
Pagkatapus,
dayun dang nagliit tung nirang nagpalikay tung dumang rugal.
18 Mangayag yang kaliw̓utan,
bëlag̓an ilëm gësyë yang pagkataranta yang mga guardiang atiang pamagbantay ra rin tung ni Pedro,
kung ay ra kaya tanya.
19 Asta ti Adi Herodes,
ipinasagyap na pa rin,
piru indi ra ka ëngëd naita nira.
Purisu,
dayun na rang sinumaria yang mga guardiang atia.
Pagkatapus pinagsintinsiaan na rang pangimatayën.
Pagkatapus tia,
dayun dang nagliit yang Adi tung Judea ang minangay duun tung siudad ang Cesarea ang duun da nagdayun ta pira pang kaldaw.
Natëtëngëd Tung Kamatayën Ni Adi Herodes Kung Unu Pay Natëngëran Na (12:20-23)
20 Atiing duun da yang Adi,
nasilag da ta duru tung mga kinasakpan nang tag̓a siudad ang Tiro asta siudad ang Sidon.
Purisu sam paluyug̓an tanirang namansiangay ra duun tung anya.
Yang primirung binuat nira,
ti Blastong atiang taralig̓an yang Adi ang manig̓asikasu tung kuartung pag̓ëlkan na,
ya ray inalam-alam nirang inaw̓ungan.
Pagkatapus,
pagpaklëd nira tung Adi,
namagsuku ra ilëm ang namagpakiluuy tung anya.
Yang ipinagsuku nira tung anya,
ay yang inadian na ya kang lag̓i ay pangkëlan yang mga sakëp nira ta pamangan nira.
21 Numanyan,
kaw̓utun da nganing yang kaldaw ang itinipu,
ti Adi Herodes nagsuut da yang aw̓ël nang pagkaadi ang pagkatapus dayun dang kuminarung tung kakarungan nang dati kang lag̓ing pag̓usgaran na.
Pagkatapus dayun da kang nagdiskursu tung mga taung namagsaragpun.
22 Numanyan,
yang mga taung pamamati tung anya,
namaglëlpakën dang namagdayaw tung anyang mag̓aning,
“Bëlag dang pastikular ang tau tia ang pagbitala,
kung indi,
may pagkadios na ra!”
mag̓aning.
23 Antimanung may sasang angil ang tinuw̓ul yang Dios ang magpadalpët ta sasang malain tung tinanguni yang Adi ay natëtëngëd atiing pagkagngël na yang pagdarayawën nirang atia,
bëlag̓an ya ipakaw̓utay na tung Dios yang kadëngëg̓an,
kung indi,
iningmatuud na ra.
Kapurisu yang pinakaw̓ut na,
linug̓ay ra ta mupia ang pagkatapus ya ray napatayan na.
24 Numanyan yang dinangat yang bitala yang Dios ang atiang ipinagpakaw̓ut nirang mga tumatalig,
duun da kumintël ang mas pa yang builu na ang asta ya rag durulang agdurulang yang kinadakël yang mga taung namagtalig yang mga sadili nira tung ni Ginuung Jesus.
Nag̓apabilug̓an Da Yang May Sulat Yang Pag̓urubraën Ni Bernabe Durua Ni Saulo (12:25)
25 Ibalik ta ra kanay yang isturia tung ni Bernabe durua ni Saulo.
Kumus tinapus da nira yang sirbisyu nirang namag̓intriga yang itinaw̓ang tung mga tumatalig duun tung Jerusalemc,
dayun dang nansiliit ang nansibalik duun tung Antioquia.
Ti Juan ang atiang may puangga nang ti Marcos,
ya ray ingkëlan nirang pinanunut.