Pag̓ugtulun Da Ti Pedro Tung Mga Tumatalig Duun Tung Jerusalem Kung Unu Pay Nainabu Duun Tung Cesarea (11:1-18)
11
Taa numanyan,
nabalitaan da yang mga apustul ni Ginuung Jesus pati yang mga kaputulan tung intirung sinakëpan yang Judea ang naa pala maski tung mga taung bëlag̓an mga masigka Judio nira may namagpauyun da ka tung bitala yang Dios ang ipinagpakaw̓ut tung nira.
2 Ug̓aring ilëm,
atiing pagkaw̓ut na Pedro duun tung Jerusalem,
may dumang mga tumatalig ang mga Judio ang namag̓intra ra saway tung anya.
Ay yang nag̓apapaktëlan nira ang yang bëlag̓an mga masigka Judio nira dapat unung magpabuat ta tanda tung mga tinanguni nira baklu ra unu nga risibiay yang Dios ang mga kinasakpan nang matuud.
3 Mag̓aning tanirang pamagbasul tung ni Pedro,
“Naa pala,
duruag kalain.
Nagpadayuna ra tung mga taung bëlag̓an yatënanën.
Anday tandang binuat tung mga tinanguni nira.
Nagpakisarua ka pa man ngani tung niraa!”
ag̓aaning.
4-5 Kapurisu,
ti Pedro tanya,
nag̓impisa rang nagbaw̓alitaën tung nira yang tanan ang nagkarainabu ang mag̓aning,
“Atiing duunaw pa rin tung Jopang pag̓ampu tung Dios,
may sasang ipinadakat na tung panëlëngu ang may kuari layag ang dakulu ang yag paparanëk.
Kuari nag̓apëgsan tung pusud nang ëpat ang nag̓ituntun ang asta nadasën da tung yëën.
6 Tinëlënganu ra ta mupia kung unu pay paklëd na.
May naitaw rang mga ayëp ang atiang pamagpanaw-panaw tung tanëk,
pati mga talunun,
pati yang pamagkanwang-kanwang asta mga lamlam pa.
7 Atii may nagngëlung busis ang pag̓aning tung yëën ang,
‘Ala Pedro,
magbungkarasa rang mamilik asan ta patayën mu ang para ipalutuk mung panganën.’
8 Ag̓aaningaw ka ta yëën ang nagtimalës,
‘Aa Ginuu,
indiaw!
Ay kipurki inding pisan nag̓aklëd tung ngangaw yang mga maning tiang liliiën kang lag̓i yamën ang mga Judio,’
ag̓aaningaw duun tung anya.
9 Mag̓aning si tung yëën yang busis ang atiing liit tung langit,
‘Yang kumpurming ipinagpabtang da yang Dios ang bag̓ay rang panganën,
indi mu ra aningën ang liliiën pa,’
ag̓aaning duun tung yëën.
10 Atia,
maklung mainabu.
Pagkayaklu ra nabatak dang luw̓us duun tung langit.
11 Atiing uras ang atii,
tamang nag̓abatak da duun tung langit,
naa pala may tulu nga tauan ang baklung namansikaw̓ut tung balay ang atiing nag̓adayunanu.
Pinanuw̓ul ta sasang taung tag̓a Cesarea ang mamanawag tung yëën.
12 Inaningaw ra dayun yang Espiritu Santo ang magpakignunutaw ra ilëm tung nira ang indi ra ilëm isipënu kung unu pang nasyunay tanira.
Naning mga putul tang ënëm ang tag̓a Jopa namansinunut da ka tung yëën duun tung Cesarea ang pagkatapus kasiraanami ra kang nagpaklëd tung balay yang taung atii.
13 Pagpaklëd yamën,
inugtulanami ra ka anya natëtëngëd tung sasang angil ang naita nang kumindëng asan tung kaklëran yang balay na ang pagkatapus nagbitala tung anyang mag̓aning,
‘Patuw̓ulan mu ra yang sasang tau duun tung Jopa ang nag̓aranan tung ni Simon ang yang puangga na ti Pedro.
14 Ya ray magpakdëk tung nuyu kung ya pa ag̓aring matapnaya ra yang Dios,
kasiraanamu kang sam pamilya pati mga turuw̓ulun mu,’
mag̓aning.
15 Taa numanyan,
atiing indiaw pa nganing nag̓atapus ta pagparakaw̓utun tung nira,
nangalampuran da yang Espiritu Santong pinamanguluan ang pariu ka tung nainabu tung yatën tan taa rab.
16 Atii,
baklu ra nga dëmdëmayu yang sasang inaning ni Ginuung Jesus tung yamën ang mag̓aning,
‘Maskin may mga taung pinamënyag̓an ka man ni Juan tung wai,
piru ta yamu,
maning pa tung bënyag̓anamu ka ay natëtëngëd tung Espiritu Santong patinirënu tung numyu.’
17 Ig disir kumus bistu rang pinatiniran da tanira yang Dios tung Espiritu Santo atiing pagtalig nira tung ni Ginuu tang Jesu-Cristo ang pariu ka tung binuat na tung yatën atiing pagtalig ta tung anya,
ayw̓a,
yuu w̓asu may pudirung kuntraënu yang Dios?”
ag̓aaning ti Pedro tung nira.
18 Numanyan,
pagkagngël da nira tia,
anda ray mabitala nira tung anya,
kung indi,
ya ra mamagdayaw tung Dios ang mag̓aning,
“Naa pala,
maskin yang bëlag̓an mga yatënanën,
nag̓apakdulan da ka yang Dios ta lugar nirang mamanligna tung mga kasalanan nira ug̓ud asan da ka nga paëyangay na ta ipagpangabui nirang baklu,”
mag̓aning.
Natëtëngëd Tung Pagpalikëd Yang Matinlung Balita Duun Tung Siudad Ang Antioquia (11:19-26)
19 Taa numanyan ibalik ta ra kanay yang isturia tung mga tumatalig ang atiing nagkarawasag dang namaglalaksuan tung uras ang atiing pangimatay tung ni Esteban.
Yang duma yang kinaw̓ut nirang banwa asta duun tung Fenicia,
yang duma asta duun tung Chipre,
yang duma asta duun tung siudad ang Antioquia.
Ug̓aring ilëm,
yang pinagpakaw̓utan nira yang Matinlung Balita natëtëngëd tung ni Jesus,
ya ka ilëm yang mga masigkanasyun nirang mga Judio.
20 Piru may dumang mga tumatalig ang dating tag̓a Chipre may tag̓a Cirene ang ya ra kay namansiangay duun tung siudad ang atiang Antioquia.
Pagkaw̓ut nira duun,
pati yang bëlag̓an mga masigkanasyun nirang mga Judio pinagpakaw̓utan da ka nira.
21 Numanyan,
yang pagparakaw̓utun nira,
pinaktël da ta mupia ni Ginuung Jesus.
Durug dakël yang mga taung namanangëd ang namagtalig yang mga sadili nira tung anya.
22 Numanyan yang balita natëtëngëd tung mga taung atiang baklung namagtalig kaw̓ut da tung sam pundaan yang mga tumatalig duun tung Jerusalem.
Purisu ti Bernabe,
ya ray tinuw̓ul nirang mangay duun tung Antioquia ang para manginsapu.
23 Pagkaw̓ut na duun,
nasiman na rang lag̓i ang durug tinlu yang pag̓urubraën yang Dios tung mga isip nira ang ya ray ikinasadya na ta duru.
Purisu dayun dang nagpaktël tung mga isip nirang mamag̓usuy tung ni Ginuung Jesus ang tanya ilëm ay pag̓inëtëg̓an yang mga isip nirang pirmi.
24 Ay ya pa ag̓ari,
ti Bernabeng naa,
durug kaayën ang tau.
Pagpamangulung pirmi tung Espiritu Santo ig durug bakëd yang pagtaralig̓ën na tung Dios.
Purisu anday dumang pinakaw̓ut yang pagparadag̓ën-dag̓ënën na duun,
durug dakël yang mga taung nagkaraëklan na yang mga kinaisipan nirang asta nagpalamtuk da tung ni Ginuung Jesus yang pundu yang kinaisipan nira.
25 Taa numanyan minangay ra ti Bernabe duun tung siudad ang Tarso ang para magsagyap da tung ni Saulo.
26 Pagkaita na,
dayun na rang ingkëlan duun tung Antioquia.
Purisu nagkamaningan da ang tung sëlëd san takun,
namagpakigsampura ra tanirang durua tung mga tumatalig ang atiang sam pundaan.
Durug dakël yang mga taung pinagtuldukan nira.
Kapurisu duun tung Antioquia,
tanirang mga tumatalig tung ni Ginuung Jesus,
tukaw tung tanan ang pinaaranan ta duma ang “mga tauan yang pag̓aningën ang Cristo”.
Pamagpaëkël Yang Mga Tumatalig Ta Taw̓ang Tung Mga Kaputulan Nira Duun Tung Jerusalem (11:27-30)
27 Numanyan tung mga uras ang atii,
may mga manigpalatay ta bitalang nag̓ipasanag yang Dios tung mga painu-inu nira ang namagliit da duun tung Jerusalem ang namansiangay duun tung Antioquia.
28 May sam bilug tung nira ang nag̓aranan tung ni Agabo.
Kumus nag̓apasanag̓an da yang Espiritu Santo,
ya ray kumindëng ang nag̓ula tung kadaklan ang yang bilug ang kaliw̓utan magkatinir da unu ta puirting panuw̓uk.
(Yang panuw̓uk ang atii,
duminangat da ka man tung uri atiing pagkaadi ni Claudio duun tung Roma.)
29 Purisu,
pagkagngël yang mga tumatalig yang inulang atia,
namagparaig̓u ra ang para mamagpaëkël da ta itaw̓ang nira tung mga kaputulan nira duun tung Judea.
Yang pagparakdulun nira,
kumpurming sarangan yang sasa may sasa tung nira.
30 Numanyan yang pinag̓irig̓uan nirang atia,
tinuman da nira.
Pagkatapus yang naimës nira ya ray ipinaëkël nira tung ni Bernabe durua ni Saulo ang para iintriga ra nira tung mga pamagmangulu tung sam pundaan yang mga tumatalig duun tung Jerusalem.