Ti Saulo Pagsuku Ra Tung Ni Ginuung Jesus (9:1-19a)
9
Numanyan ibalik ta ra kanay yang isturia tung ni Saulong naang nasambit ta nungaynaa.
Kumus nag̓adëmtan na ta mupia yang mga taung pamag̓usuy ra tung ni Ginuung Jesus,
indi ra tëmëgka ang indi na ra pamalëg̓ën ta mupia ang kung indi mamamalpas tung anya,
ipampaimatay na.
Numanyan ya ray inangay na tung paring pinakalandaw.
2 Nag̓ingaluk tung anya ta kabakëran na ang sarang mapaita na tung mga manig̓ërëkëlën ang kada sam pundaan yang mga masigka Judio nirang pamagsaragpun-sagpun duun tung siudad ang Damasco.
Yang kamtangan yang kasulatan ang tanya pinakdulan da ta katëngdanan na ang kung may maita nang mga kaarumanan nirang pag̓usuy ra tung pag̓irintindiën tung Dios ang atiang baklu,
puiding ipadëëp na tig lalii tig baw̓ay ang para pangkëlan na duun tung Jerusalem ang ipampakalabus.
Conversion of Saul (Mga Binuat-buatan 9:1-19)
3 Numanyan tung pagparanawën nang nag̓alëngët da tung Damasco,
nainalian dang nasinggatan ta masadlaw ang durug kasulaw ang duun manliit tung langit.
4 Tung pagpadagpa na tung tanëk,
may nagngël nang busis ang pagbitala tung anya tung bitalang Hinebreong natauan na ang mag̓aning,
“Ay Saulo,
ayw̓at nag̓adërëëg-dëëg̓anaw nuyu?”
5 Mag̓aning ti Saulong nagtimalës,
“Ayw̓a,
tinua pa?”
Mag̓aning ka yang busis ang tuminuw̓al,
“Yuu ti Jesus ang nag̓adëëg-dëëg̓an mu.
6 Ala,
magbungkarasa rang mangay duun tung siudad.
Duun may sasang taung magpakdëk tung nuyu kung unu pay dapat ang buatën mu,”
mag̓aning.
7 Yang mga kaarumanan ni Saulo,
pagbungkaras nira,
nanganganga ra ilëm.
Tung bag̓ay,
nagngël da ka nira yang busis piru anday naita nira.
8 Numanyan pagbungkaras ni Saulo,
namikat-pikat da yang mata na,
piru andang pisan ay naita na.
Purisu ya ra ilëm agguyuray yang mga kaarumanan nang asta nansikaw̓ut da duun tung Damasco.
9 Tung sëlëd tulung kaldaw,
indi naita.
Anday pinangan na ubin ininëm na.
10 Taa numanyan may sasang tumatalig duun tung Damasco ang nag̓aranan tung ni Ananias.
Numaan may sasang ipinadakat ni Ginuung Jesus tung panëlëng na ang tanya mismu napagbitala tung anyang mag̓aning,
“Ananias!”
Mag̓aning ka ti Ananias ang nagtimalës,
“Naniaw ka,
Ginuu.”
11 Mag̓aning ka ti Ginuung Jesus ang nagpadayun yang bitala na,
“Ala,
mangaya ra duun tung karsadang atiang paggug̓uuyan tung ‘Matadlëng’.
Kung kaw̓utun mu ra nganing yang balay ni Judas,
dawalën mu duun yang sasang taung tag̓a Tarso ang nag̓aranan tung ni Saulo,
ay pag̓arampuën da numaan.
12 Dispuis,
Ananias,
may ipinadakatu ra ka tung panëlëng na ang yaway naita nang nagpaklëd tung balay ang nagdëën tung anya ug̓ud mabuskad da yang mata na,”
mag̓aning.
13 Mag̓aning ka ti Ananias ang nagtimalës,
“Piru Ginuu,
duru rang balitang nagkaradëngëlu natëtëngëd tung taung atia ang duru unug kalain yang binuat-buatan na tung mga tauan mu duun tung Jerusalem.
14 Maskin taa tung Damasco may katëngdanan na ka unung ipinakdul tung anya yang mga paring arabubwat ang para magpadëëp tung kumpurming tinu pay pag̓ambay tung nuyu.”
15 Mag̓aning ti Ginuung Jesus ang nagtimalës,
“Ala,
magpanawa ra ay sipurki yang taung atia pinagpiliku ra ang para gamitënung mangërëngan tung yëën ang magparakaw̓utun tung mga taung tag̓a duma-rumang nasyun pati tung mga adi nira asta tung mga masigkanasyun ming mga Israel.
16 Ag̓aningënung pinagpiliku rang para mangërëngan tung yëën ay kipurki yuu mismu ay magpakdëk tung anya kung unu pay dapat ang mapasaran na arangan da ilëm tung yëën ang pag̓akëgngan na,”
mag̓aning.
17 Purisu simanyan nagpanaw ra ka man ti Ananias ang nagpaklëd tung balay ang atiang ipinaëtad tung anya.
Dayun dang nagdëën tung ni Saulo ang mag̓aning tung anya,
“Saulo,
putulu,
tinuw̓ulaw ra ni Ginuu tang mangay taa tung nuyu.
Ya ra ka man ti Jesus mismung nagpaita tung nuyu duun tung karsadang pinanawan mung minangay taa.
Tinuw̓ulaw man nganing anyang mangay taa ug̓ud maitaa si ig manguluana ra ka yang Espiritu Santo,”
mag̓aning.
18 Atii lag̓i-lag̓ing nagkarataktak da tung mata ni Saulo yang maninga mga imbis ang asta naita si.
Dayun dang kumindëng ang nagpabënyag da ay gustu nang magpapruiba ang tanya pagpagaëm dang matuud tung ni Ginuung Jesus.
19 Numanyan pagkapamangan na,
naulikan da yang kaluluw̓ayën na.
Pagparakaw̓utun Da Ti Saulo Ang Ti Jesus Talagang Ya Ra Yang Pag̓aningën Ang Ana Yang Dios (9:19b-22)
Taa numanyan nagpakilakët da ti Saulo ta pira pang kaldaw tung mga tumatalig tung ni Ginuung Jesus duun tung Damasco.
20 Atiang lag̓i dirityu rang nag̓angay duun tung mga pagsaragpunan yang mga masigkanasyun nang mga Judio.
Nag̓impisa rang nagparakaw̓utun tung nira ang ti Jesus ya ra ka man yang pag̓aningën ang Ana Yang Dios.
21 Numanyan tanirang tanan ang namagpamati tung anya,
nangabërëng da ta mupia.
Namagtaralimaan-talimaanan da tanirang namag̓araning-aningan ang,
“Bëlag ba ang yang taung atia ya ra yang nagpamaras tung mga tau duun tung Jerusalem ang kumpurming pag̓ambay tung ni Jesus?
Bëlag ba ang yang inangay na taa ang para ipampadëëp na yang mga taung atia ang para guyurun na duun tung mga paring atiang arabubwat?”
mag̓aning.
22 Numanyan ti Saulo tanya mas pang nagkëtël yang builu yang pagparakaw̓utun na.
Durug bakëd yang katadlëngan na ang ti Jesus talagang ya ra ka man yang pag̓aningën ang Cristong nag̓aëlatan kang lag̓i nira.
Purisu yang mga Judiong atiang pamagtinir tung Damasco,
indi ra nira nasarangan yang katadlëngan nang barikën.
Ti Saulo Nag̓abalakan Da Ta Malain (9:23-25)
23 Taa numanyan atiing nabuay ra,
namag̓urunta-untaan da yang mga masigka Judio ni Saulo duun tung Damasco ang tanya imatayën da.
24 Law̓iig kaldaw yang pagbarantayën nira tung mga purta yang siudad ang para baklu malua,
madëëp da nirang imatayën.
Numanyan nabalitaan da ni Pablo natëtëngëd tung nag̓atima nirang atia.
25 Numanyan anday dumang binuat yang mga taung namanangëd da tung ipinagpakaw̓ut na,
tanya ingkëlan da nira ta law̓ii tung may pagpapuklutan tung padir.
Duun da ilëm ipabtangay nira tung sasang bulanglang ang itinuntun tung lua yang padir ang para magpalibri ra.
Yang Pagbalik Ni Saulo Duun Tung Jerusalem (9:26-30)
26 Taa numanyan tung pagbalik ni Saulo duun tung Jerusalem,
tinag̓aman na ra rin ang magpakilakët tung mga taung pamag̓usuy ra tung ni Ginuung Jesus.
Piru ya ra ngaëlday nirang tanan ay indi pamanangëd ang tanya pag̓usuy ra ka tung ni Ginuung Jesus.
27 Numanyan ti Bernabe ya ray nagtaw̓ang ang nag̓ëkël tung anya duun tung mga apustul ang dati.
Pagkatapus nagbaw̓alitaën da tung nira kung ya pa ag̓aring naita na ti Ginuung Jesus tung karsada ang may pinag̓aning ka ni Ginuu tung anya.
Ibinalita na ka tung nira kung unu pag kabalur nang nagparakaw̓utun tung mga masigka Judio nira duun tung Damasco natëtëngëd tung ni Ginuung Jesus.
28 Kapurisu numanyan,
napagpakiugpu ra tung mga tumatalig ang durug tinlu yang pagnurunutan nira duun tung Jerusalem ig tanya durug kabalur ang nagparakaw̓utun tung mga tau natëtëngëd tung ni Ginuung Jesus.
29 Ang kaisan,
nagparakaw̓utun tung mga masigka Judio na ang yang bitala nira Giniriego.
Yang nag̓ipakaw̓ut na asan da ipatiëlay na tung napabtang tung kasulatan ang basi pa ra ilëm mamanangëd da.
Piru bëlag ya mamanangëd,
ya mamagtag̓am ang mamangimatay tung anya.
30 Numanyan pagkabalita yang mga kaputulan nang mga tumatalig,
dayun da nirang ingkëlan ang namanuldak duun tung siudad ang Cesareab ang pagkatapus ipinaulik da nira duun tung Tarso.
Nag̓ipagpasanag Yang Nagsulat Kung Ya Pa Ag̓ari Yang Pagkabëtang Yang Kabilug̓an Yang Mga Tumatalig (9:31)
31 Purisu nagkamaningan da ang nagkalimëng da yang pagkabëtang yang kabilug̓an yang mga tumatalig tung ni Jesus tung intirung sinakëpan yang Judea may tung intirung sinakëpan yang Galilea pati tung intirung sinakëpan yang Samaria.
Dispuis nagbakëd dang nagbakëd yang pagtaralig̓ën nira tung ni Ginuung Jesus ang nunut da ka ta pangaman nira ta mupia ang muya mamaglampas tung kalëlyag̓an na.
Asta yang kinadakël nira ya ra kag durulang agdurulang ëkël tung pagpadag̓ën-dag̓ën yang Espiritu Santo.
Ti Eneas Nag̓apamaayën Ni Jesu-Cristo Ëkël Tung Ni Pedro (9:32-35)
32 Taa numanyan ibalik ta ra kanay yang isturia tung ni Pedro.
Tung pagliliw̓utun na may mininsang nanuldak da duun tung lansangan ang Lida ang para magbisita tung mga taung pamag̓usuy ra tung ni Ginuung Jesus ang pamagtinir duun.
33 Duun may napanawan nang sasang taung nag̓aranan tung ni Eneas.
Tung sëlëd walu rang takun midyu tung dëpët da ilëm tanya tung lulubgan na ay pamimilay yang mga tinanguni na.
34 Mag̓aning ti Pedrong nagbugnu tung anya,
“Eneas,
pamaayënëna ra ni Jesu-Cristo.
Magbungkarasa rang magpatayu-tayu yang lulubgan mu,”
mag̓aning.
Atii,
lag̓i-lag̓ing nagbungkaras ti Eneas.
35 Yang dinangat na,
durung mga taung nagkaraita tung ni Eneas ang maayën da ang duun da nga manmanay yang mga isip nirang namagpagaëm yang mga sadili nira tung ni Ginuung Jesus.
Yang duma pamagtinir tung lansangan ang atiang Lida,
yang duma pamag̓istar tung kakunayungan yang kadatalan ang atiang malapad ang paggug̓uuyan tung Saron.
Ti Dorcas Nagbaklung Kabui Ëkël Tung Nag̓ipag̓ampu Ni Pedro (9:36-43)
36 Taa numanyan duun tung lansangan ang Jopa may sasang baw̓ay ang nag̓aranan tung ni Tabita ang yay sasang tumatalig tung ni Ginuung Jesus.
Kung ilaktëd yang aran na tung bitalang Giniriego ay Dorcas.
Yang puntus yang aran na ay “Kalasiaw”.
Pirmi ra ilëm ang pagbuat ta matitinlu ig durug katinaw̓angën tung mga taung pagkaliwag.
37 Numanyan tung mga uras ang atii,
nagkatinir da ta laru na ang pagkatapus ya ray napatayan na.
Pagkapatay na,
dinig̓u ra yang mga aruman na ang pagkatapus ipinabtang da nira duun tung sasang kuartu tung yadwang gradu yang balay.
38 Kumus alëngët ka ilëm yang Jopa tung Lida,
pagkabalita yang mga tumatalig ang tag̓a Jopa ang ti Pedro duun tung Lida,
dayun da nirang pinaguuyan tung durua nga laliian ang kung maimu ilëm tung makali,
mangay rang lag̓i tanya duun tung nira.
39 Purisu pagkagngël ni Pedro yang tuyun nira,
dayun dang nagsimpan ang pagkatapus nagnunut da tung nira.
Pagkaw̓ut nira duun,
dayun dang ingkëlan nira ti Pedro tung kuartung atia tung yadwang gradu.
Pagkatapus yang tanan ang mga balung mga baw̓ay ang tag̓a duun namagtaripukpuk da tung anyang pamagtarangitën dang pamagpaita tung anya yang mga kamisun may yang mga kimunang atiing pinagtiik ni Dorcas atiing bui pa ang ya ra kay ipinamakdul-pakdul na tung nira.
40 Numanyan tanirang tanan pinalua ra ni Pedro tung kuartung atia.
Pagkatapus dayun dang nagluud ang nag̓ampu tung Dios.
Pagkatapus ta pag̓ampu na,
dayun dang nanalunga tung tinanguni yang patay ang nagbitala tung anyang mag̓aning,
“Tabita,
magbungkarasa ra!”
mag̓aning.
41 Lag̓i-lag̓ing nabuskad da yang mata na.
Pagkaita na tung ni Pedro,
dayun dang nagbangun.
Atii,
pinggësan da ni Pedro tung kalima nang pinakdëng.
Pagkatapus dayun na rang ginuuyan yang mga balung atia asta yang mga kaarumanan nirang mga tauan ka ni Ginuung Jesus ang pagkatapus ti Tabita ipinirisintar na ra tung nirang bui ra.
42 Numanyan pagsarambung da yang balita tung intirung lansangan ang atiang Jopa,
duru sing mga taung namagtalig tung ni Ginuung Jesus ang namagpatapnay.
43 Taa numanyan duun da ilëm nagpadayun ti Pedro ta mabuay tung balay ni Simon ang sasang manigdampul ta ulit ta mga ayëp.