Nag̓adëëg-dëëg̓an Da Yang Mga Tumatalig Duun Tung Jerusalem (8:1-4)
8
Taa numanyan tung kaldaw ang atii,
tanirang sam pundaan yang mga tumatalig duun tung Jerusalem,
kinaw̓utan da ta kaliwag̓an ang durug lëbat natëtëngëd nag̓apandëëg-dëëg̓an da tanira ta mupia yang mga masigkanasyun nira.
Purisu nagkarawasag da ilëm ang namampalaksu yang kadaklan duun tung sinakëpan yang Judea may Samaria,
puira pa tung mga apustul.
2 Numanyan may mga tau duun tung Jerusalem ang durug katinumanën tung mga katuw̓ulan yang Dios ang ya ray namag̓asikasu tung tinanguni ni Esteban ang ipinalg̓ud tung sasang lëyang.
Durung tangit nirang namag̓urulimëngmëngën natëtëngëd tung anya.
3 Numanyan ti Saulong naa,
pinagpaliwag̓an na ta mupia yang intirung kabilug̓an yang mga tumatalig duun.
Anday dumang binuat na,
kada balay ang pagsaragpun-sagpunan nira yay pinampaklëran na ang pagkatapus pinanlag̓unut na ra dayun ang ipinampakalabus tig lalii tig baw̓ay.
4 Kapurisu numanyan maning taa yang nainabu.
Yang mga tumatalig ang atiang nagkarawasag da ya ray namagliliw̓utun ang namagparakaw̓utun tung mga tau yang Matinlung Balita natëtëngëd tung ni Jesus.
Natëtëngëd Tung Palaksu Yang Matinlung Balitang Nag̓ipagpakaw̓ut Duun Tung Samaria (8:5-25)
5 Numanyan yang sam bilug ang nagparakaw̓utun ya ra ti Felipea.
Tanya nagdistinu ra duun tung pinakasiudad tung sinakëpan yang Samaria.
Kumaw̓ut duun,
nagparakaw̓utun da tung mga tau natëtëngëd tung pag̓aningën ang Cristong nag̓aëlatan nirab.
6 Durug tinlu yang pagparamatiën yang mga taung buntun tung nag̓ipagpakaw̓ut ni Felipe natëtëngëd tung mga pruibang nag̓ipagpalapus na ang nagkarabalitaan nira ig naita ka man mismu nira.
7 Ay dakëlëng pinag̓ëkël-ëkëlan pa rin ta mga dimunyu ang pinampalayasan na.
Tung paglayas nira tung tau,
naglëlpakën da ta mupia.
Dakëlë ra kang mga taung namimilay pa rin yang mga tinanguni nira ang pinampamaayën na pati yang mga barik ya ka.
8 Purisu durug sadya yang mga tau duun tung siudad ang atii.
9 Taa numanyan may sasang taung nag̓aranan tung ni Simon ang nabuay ra yang pag̓ururasiunun na duun tung lansangan ang atia.
Ya ray nabërëngan ta mupia yang mga tag̓a Samaria.
Puirting pagpaambug na tung sadili na ang tanya unu may kinatakwanan nang durug puirsa.
10 Purisu yang tanan ang mga tau duun,
maskin darakulu,
maskin gëg̓ësyë,
luw̓us dang namag̓intindi ta maayën tung anya.
Ya ra ag̓aningay nirang “Sasang pangërëngan tung Dios ang abwat!”
11 Yang nag̓ipag̓intindi nira ta maayën tung anya,
ay natëtëngëd tung tantung kabuay ra ta pagpaita na ta mga pruibang makabëw̓ërëng ang pisan.
12 Piru atiing pagpakaw̓ut ni Felipe yang Matinlung Balita natëtëngëd tung palaksu yang paggaraëmën yang Dios tung mga tau ig natëtëngëd ka tung ni Jesus ang ya ka man yang pag̓aningën ang Cristong yay nagtukud,
namanangëd da tanira laliig baw̓ay.
Pagkatapus namampabënyag da.
13 Maski nganing ti Simon ang naa,
nanangëd da ka.
Pagkatapus ta pagpabënyag na,
nagpakignunut da tung ni Felipe ay durung pagkabërëng nang pagpamalad tung mga pruibang atiang durug këtël ang nag̓ipalua na.
14 Taa numanyan,
duun tung Jerusalem,
pagkabalita yang mga apustul ang yang mga tag̓a Samaria namagpauyun da ka tung bitala yang Dios ang ipinagpakaw̓ut ni Felipe tung nira,
dayun da nirang ipinaangay duun ti Pedro durua ni Juan.
15 Mansikaw̓ut tanira duun,
dayun da nirang ipinag̓ampu yang baklung namagtalig ang atia ang patiniran da ka yang Dios tung Espiritu Santo.
16 Ay ya pa ag̓ari,
tung uras ang atii,
maskin tinu pa tung nira indi pa nag̓apatiniran yang Dios tung Espiritu Santoc.
Namagpabënyag pa ilëm ang namagpailala ang kada sasa may sasa tung nira nagpagaëm dang matuud tung ni Jesu-Cristo.
17 Yang pag̓ampu na Pedro,
ya kay pagdëën nira tung mga kulu nira sasa may sasa,
baklu ra pinatiniran yang Dios tung Espiritu Santod.
18-19 Numanyan ti Simon ang naa,
pagkaita na ang ëkël tung pagdëën yang mga apustul tung mga kaarumanan na,
asan da tanira nga patiniray yang Dios tung Espiritu Santo,
dayun dang nagpadawat ta kuarta tung nira ang mag̓aning,
“Partiayaw ka numyu ta kinatakwanan ang maning tia ug̓ud kung tinu pay dëënanu,
asan da ka nga tiniray yang Espiritu Santo.”
20 Mag̓aning ka ti Pedrong minlës,
“Abaa,
numunuta ra ilëm tung kuarta mung atiang manampët duun tung kadiaduan ay yang kanisip mu ang yang katëngdanan ang naang ipinakdul yang Dios ta diw̓aldi tung yamën maëklan mu pa ta kuarta!
21 Anda ëngëd ang pisan ay kalalabtën mu tung bitalang naang nag̓ipagpakaw̓ut yamën ay sipurki bëlag̓an tama yang nag̓abtang tung kinaisipan mu tung pagtërëlëngën yang Dios.
22 Purisu maayën pang manlignaa ra tung nag̓aplanu mung atiang anda ëngëd ay kakuinta-kuinta na.
Mag̓ampua ra ka dayun tung Dios ang basi pa ra ilëm patawarëna pa anya tung nag̓atima mung atiang durug kalain.
23 Ag̓aningëna ra yëën ta maning tia ay nag̓asimanu ang yang sistima mung atia maning pa tung sasang lasun ang panalaktak tung bilug ang tinanguni ta ang pati yang mga kaarumanan mu asan da ka nga saliray mu ta pagwaldangan nira.”
24 Mag̓aning ka ti Simon ang nagtimalës,
“Yamu ray mag̓ampu tung Dios para tung yëën ang anda ray dumangat tung yëën ang pariu ka tung nag̓ipag̓aning ming atia,”
mag̓aning.
25 Kapurisu numanyan,
yang binuat na Pedro,
dayun da nirang pinagpasanag̓an yang mga tumatalig ta mupia natëtëngëd tung pag̓urusuyun nira tung ni Ginuung Jesus.
Pagkatapus tia,
dayun dang namagpanaw ang para mansiulik da duun tung Jerusalem.
Tung pagparanawën nira,
sigi-sigi yang pagparakaw̓utun nira yang Matinlung Balita tung mga taung nagkarapanawan nira tung dakëlëng mga baryu yang mga tag̓a Samaria.
Pagparakaw̓utun Ti Felipe Yang Matinlung Balita Tung Sasang Upisial Ang Tag̓a Etiopia (8:26-40)
26 Taa numanyan,
may sasang angil ang tinuw̓ul yang Dios ang yay nagbitala tung ni Felipe ang mag̓aning,
“Ala,
Felipe,
magpanawa ra ampir duun tung salatan.
Yang usuyun mu ya ra yang karsadang taa manliit tung Jerusalem ang duun da manampët tung Gaza,”
mag̓aning.
(Yang karsadang atii pagpanaw duun tung banwang kapas.)
27-28 Purisu numanyan,
pagkasimpan ni Felipe,
dayun da ka man ang nagpanaw.
Numanyan duun tung karsadang atiang nag̓apanawan na,
may sasang upisial ang tag̓a Etiopia ang pagsaay tung dikaritun.
Tanya tisuriru yang pag̓aningën ang Candace ang yay pangguuy tung sasang baw̓ay ang paggaëm tung banwang atiang Etiopia.
Duun manliit yang taung atia tung Jerusalem ang ya ray inangay na ang para magtuu tung Dios.
Numanyan ag̓ulik da duun tung banwang pinagliitan na.
Yang pagsaay na tung dikaritun ya kay pagbasa na yang isinulat ni Isaias ang sasang manig̓ula atiing tukaw.
29 Numanyan ti Felipe,
inaning da yang Espiritu Santo ang “Palëngtan mu rang aw̓ayën yang dikaritun ang atii,”
ag̓aaning.
30 Atii,
dayun dang nanlaksu ti Felipe ang asta naskaran na ra.
Tung pagpaaw̓ay na tung dikaritun,
nag̓agngël na yang upisial ang pagbasa tung isinulat ni Isaias ang sasang manig̓ula.
Pagkatapus dayun na rang binugnu ang inaning,
“Ta,
yang nag̓abasa mung atia nag̓amarësmësan mu yang nag̓adapatan na?”
31 Mag̓aning yang upisial ang nagtimalës,
“Ya pa ag̓aaring maintindianu naang anday magpainunuku tung yëën?
Maayën pang sumaaya ra ilëm tani ang magpakpad tung yëën,”
mag̓aning.
32-33 Numanyan yang sam bulus ang atiang nag̓abasa na tung kasulatan ang nag̓abëw̓ëklad na maning taa yang palaksu na:
“Katulad tung sasang karnirung nag̓aguyuran dang patayën,
katulad ka tung sasang sinday ang karniru ang nag̓atupian da yang bulw̓ul na,
ya ra kay pambungun yang pag̓aningën nang turuw̓ulun na ang maskin unu pay buatën tung anya,
indi ka ëngëd mag̓iw̓ëk-iw̓ëk.
Dëëg-dëëg̓an da nira ta mupia ig lëpësan yang usgad ang ipakdul nira tung anya.
Anday mapagpaintindi kung ayw̓a maning da tia ay buatën yang mga masigkanasyun na tung anya,
ay tapusun da nira yang kalayunan na taa tung kaliw̓utan,”
mag̓aninge.
34 Numanyan mag̓aning yang upisial tung ni Felipe,
“Maimu ilëm tung nuyu,
gustuu ilëm ang maintindianu kung tinu pay nag̓adapatan yang bitalang atiing pinag̓aning yang manig̓ula.
Tanya mismu u dumang tau?”
ag̓aaning.
35 Numaan yang sam bulus ang atia ya ray pinatiëlan ni Felipeng nagparakaw̓utun tung anya yang Matinlung Balita natëtëngëd tung ni Jesus.
36-37 Numanyan tung pagpalaksu nira tung dikaritun,
may napanawan da nirang wai.
Pagkaita yang upisial,
dayun na rang inaning ti Felipe ang “Atii pala may wai.
Mag̓aninga ka kung may pagsankël pa tung yëën ang indiaw pa mapagpapruibang mapagpabënyag,”
mag̓aningf.
38 Numanyan naglalang da yang upisial ang yang dikaritun patadëngën da.
Pagkatapus dayun dang naglampud durua ni Felipe ang nagparanëk tung waing nansilanguy ang pagkatapus dayun dang binënyag̓an ni Felipe.
39 Numanyan pagkatakas nira,
yang Espiritu Santong nag̓ipatinir kang lag̓i ni Ginuung Jesus tung ni Felipe,
ya ray nag̓ëkël ta inali tung anyang ipinaliit ang indi ra naitang uman yang upisial.
Nagpadayun da ilëm yang pagsaraayën nang durug sadya yang isip nang pagsaay.
40 Numanyan ti Felipe,
mandawal-dawal,
naa pala duun da tanya tung Asotog.
Mag̓impisa duun,
pinanëptëp na ra yang tanan ang mga lansangan ta pagparakaw̓utun yang Matinlung Balita natëtëngëd tung ni Jesus ang asta kuminaw̓ut da duun tung lansangan ang Cesareah.