Natëtëngëd Tung Sasang Prublimang Minyang Tung Nirang Sam Pundaan Ig Kung Ya Pa Ag̓ari Yang Pagsulw̓ad Nira (6:1-7)
6
Taa numanyan tung mga uras ang atia,
yang kinadakël yang mga tauan ni Ginuung Jesus,
ya rag durulang agdurulang.
Purisu ya ray nakanayan na ang yang mga tumatalig ang atiang bëlag̓an dating tag̓a Judea ang yang bitala nira Giniriego,
namagburunguy-w̓unguyan dang kuntra tung mga tumatalig ang atiang dating tag̓a Judea ang yang bitala nira Hinebreo.
Ay yang riklamu nira,
yang mga balu unu nirang mga baw̓ay,
nag̓alipi-lipi ra unung nag̓apaw̓aya-w̓ayaan tung pagtërëptëpën ta mga kaministiran nira tung kaldaw-kaldaw.
2 Purisu yang binuat yang mga apustul ang sam puluk may durua,
namagpasagpun da tung tanan ang mga tauan ni Ginuung Jesus.
Pagkasagpun nira,
dayun da nirang pinag̓aning ang,
“Midyu indi ka ëngëd magkatama kung paw̓aya-w̓ayaan da ilëm yamën yang pagparakaw̓utun yamën yang bitala yang Dios tung mga tau ang para intindiën da rin yamën yang mga kaministiran yang mga balu ta.
3 Maayën pa,
mga kaputulan,
mandawalamu ra kanay ta pitu nga laliian tung mga kaarumanan tang ilaladung pagpamangulung pirmi tung Espiritu Santo ig durug kawayang yang mga isip nira.
Pagkatapus ya ray piaran ta katëngdanan nirang mamag̓ërëkëlën tung bag̓ay ang atia.
4 Purisu tung maning tia,
ta yami,
ërëk-ërëk da ka yamën yang pag̓arampuën yamën may yang pagparakaw̓utun yamën yang bitala yang Dios tung mga tau,”
mag̓aning.
5 Numanyan pinauyunan da nirang tanan yang bitala yang mga apustul ang atia.
Purisu pinilik da nira ti Esteban ang durug bakëd yang pagtaralig̓ën na tung Dios ig pagpamangulung pirmi tung Espiritu Santo.
Pati na Felipe,
ni Procoro,
ni Nicanor,
ni Timon,
ni Parmenas,
ni Nicolas ang atiing tag̓a Antioquia,
pinilik da ka nira.
Baklu tanya napagtalig tung ni Jesus,
maskin bëlag̓an Judio,
naglaktëd da tung pag̓atuuan yang mga Judio.
6 Numanyan tanirang pitu nga tauan ang pinagpilik nira,
ya ray ipinampatalunga nira tung katalungaan yang mga apustul ang pagkatapus ipinag̓ampu ra nirang pinandëënan ta mga kalima nirang ipinag̓intriga tung Dios para tung ubrang atiang nag̓ipiar tung nira.
7 Purisu yang bitala yang Dios ang ipinagpakaw̓ut nira asan da kumintël ang mas yang builu na ang asta yang kinadakël yang mga taung pamag̓usuy ra tung ni Jesus ya rag durulang agdurulang.
Pati yang dumang mga paring atiang pamag̓ërëkëlën tung mga pag̓urubraën duun tung pagtuuan ang atiang pinakalusu,
buntun da tanirang namanangëd tung Matinlung Balita ang namagtalig da ka yang mga sadili nira tung ni Jesus.
Ti Esteban Nag̓apëtëlan Da Ta Kasalanan Duun Tung Katalungaan Yang Mga Pamagpakigmaëpët (6:8-15)
8 Taa numanyan ti Esteban ang naa,
kumus nag̓apadag̓ën-dag̓ënan da yang Dios ta mupyang nag̓apaktël,
may mga pruibang maktël ang napalapus na ang ya ray nabërëngan ta mupia yang mga tau.
9 Ang pagkatapus may mga taung namagpakigkuntra ta mupia tung anya.
Tanira kagrupu yang sasang pagsaragpunan ta mga Judio ang yay pag̓aningën ang pagsaragpunan ta mga taung ipinampalibri tung pagpakirëpën nira tung mga ag̓alën nira.
Yang mga Judiong atia tag̓a Cirene may tag̓a Alejandria.
Dispuis may mga Judio kang tag̓a Cilicia may tag̓a Asia ang namagpaugtun da tung nirang namagpakigsug̓a tung ni Esteban.
10 Numanyan indi ra nangasarang tung anya natëtëngëd nag̓apaëyangan yang Espiritu Santo ta kinaisipan nang mawayang tung panuw̓al na tung nira.
11 Numanyan kumus maning da tii,
anday dumang binuat nira,
sinulsulan da nira yang duma tung sikritu ang para ya ray mamagpëtël ta kasalanan tung ni Esteban ang maning taa:
“Yang taung atia nagngël da yamën ang pagduminar tung ni Moises may tung Dios,”
mag̓aning.
12 Tung maning tiang papanaw,
pinag̓urnuan da nira yang isip yang mga tau pati yang mga pamagpakigmaëpët asta yang mga sag̓ad tung urdinansa nirang mga Judio.
Pagkatapus may sasang kaldaw ang ti Esteban limput da nira ta inaling linag̓unut ang ipinatalunga tung intirung pamagpakigmaëpët.
13 Pagkatapus may mga sistigus ang sinulsulan nirang magdikta ta bukli ang maning taa:
“Yang taung naa,
pirmi ra ilëm ang pagsarawayën tung pagtuuan tang naang durug kasagradu pati tung mga katuw̓ulan ang ibinutwan ni Moises tung nasyun ta.
14 Ay kipurki nagngël da yamën mismung pag̓aning ang ti Jesus unung atiang tag̓a Nazaret gëw̓aën na unu yang pagtuuan tang naa ig paklian na ra ka unu yang mga ug̓ali ang ipinasubli ni Moises tung yatën,”
mag̓aning.
15 Numanyan tanirang tanan ang mga pamagpakigmaëpët ang kumarungan asan ang para mamagbista tung ni Esteban,
yang mga mata nira maninga isinamwag da ilëm nira tung ityura nang durug kabananag ang midyu tung ityura ta sasang angil.