Ti Ananias Durua Ni Sapira Pamagtag̓am Ta Bukli (5:1-11)
5
Ug̓aring ilëm may sasang lalii asan tung nira ang nag̓aranan tung ni Ananias ang nagpaalang ka ta sasang tanëk nirang magkasawa ang yang aran yang kasawa na ti Sapira.
2 Numanyan pagkarisibi na yang kabayaran nang kuarta,
binwinan nang lag̓i ta sam parti ang ya ray inawiran na.
Ay tia kakësënan kang lag̓i nirang magkasawa.
Pagkatapus yang kadaklan ya ray ingkëlan na duun tung mga apustul ang inintriga.
3 Pagkaintriga na yang kuarta,
dayun dang binugnu ni Pedrong inaning,
“Abaw,
Ananias,
durung pisan agkaliwag tung isipu ang ayw̓a kaya ipinagaëm mu ra yang isip mu tung ni Satanas ang asta yang Espiritu Santo ya ra palangaasay mung bukliay ang yang bayad yang tanëk mi ya ra buinay mu?
4 Atiing indi mu pa nag̓ipaalang,
bëlag bang nuyung sadili?
Pagkatapus mu ta pagpaalang,
bëlag pa w̓ang nuyung kalalangan yang bayad nang kuarta kung uniën mu pa?
Abaw,
durug liwag ang isipën ang ayw̓a kaya naisip mung magbuata ra ta maning taa?
Bëlag̓an ilëm yaming mga tau ay tinag̓aman mu ta pagbukli,
kung indi,
pati nganing yang Dios,
ya ka!”
mag̓aning.
5 Numanyan pagkagngël ni Ananias yang mga bitalang atia,
tuminumba ra ilëm asan tung kindëngan nang napatay.
Yang tanan ang nangabalitaan pinamangëlbaan da ta mupia.
6 Numanyan may mga sultirus asan.
Yang binuat nira,
sinaw̓ëd-saw̓ëran da nira yang tinanguni ni Ananias ta aw̓ël ang pagkatapus ya ray pinagturug̓uran da nirang sinapupu ang ipinalua ang asta duun tung lua yang siudad ang ipinalg̓ud tung sasang lëyang ang binuat ang panlug̓uran ta mga patay.
7 Taa numanyan,
pagkataklib yang mga tulung uras,
asan da kuminaw̓ut yang kasawa ni Ananias.
Anda pay kaliw̓utan na kung unu pay nainabu.
8 Mag̓aning ti Pedrong nagtalimaan tung anya,
“Sapira,
pakdëkay kanay,
ya ra taa yang katutalan yang kuartang narisibi ming magkasawa tung tanëk ming atiang ipinagpaalang mi?”
Mag̓aning yang baw̓ay ang nagtuw̓al,
“Ëë,
ya ra tia.”
9 Mag̓aning ka ti Pedrong nagtimalës,
“Abaw durug liwag tung isipu ang ayw̓a kaya pinagsanyug̓an mi rang magkasawa ang yang Espiritu Santo mismung nag̓ipagpatinir ni Ginuung Jesus tung yatën,
ya rag tag̓amay mi ta pagtuung kung masalapuamu tung anya u kung indi?
Ta,
yang namanlug̓ud tung ni kasawa mu tung lëyang takaa ra tung purta.
Yawa si kay ëklan nira,”
mag̓aning.
10 Numanyan tuminumba ra ilëm duun tung pinagtalungaan nirang durua ang napatay.
Kaw̓utan yang mga sultirus,
patay ra.
Anday duma,
dayun da ka nirang ingkëlan duun tung lua ang ipinakpad tung kasawa na tung lëyang.
11 Numanyan pinamangëlbaan da ta duru yang intirung sam pundaan yang mga tumatalig pati yang kadaklan ang nagkarabalitaan.
Nag̓aulit Ni Lucas Yang Mga Risultang Matitinlu (5:12-16)
12 Ëkël tung mga apustul ang nag̓apaktël ni Jesus,
durung mga pruibang makabëw̓ërëng ang nagkaraita yang mga tau.
Dispuis tanirang tanan ang mga tumatalig pirming pagsarasaan ta matinlu ang pamagsaragpun-sagpun duun tung pantaw yang pagtuuan ang pinakalusu.
13 Yang dumang mga tau ang bëlag pang mga tumatalig tung ni Jesus,
maskin durung pagdayaw nira tung mga tumatalig,
piru malbat tung mga isip nirang magpangaas ang magpakigsapën tung nira ang tung pauyun-uyun ilëm.
14 Piru duru pa ka ëngëd ang mga taung disididung namagtalig tung ni Ginuung Jesus ang ya rag durulang agdurulang yang kinadakël nira tig lalii tig baw̓ay.
15 Ang pagkatapus yang dinangat na,
maskin tung mga plasa may nag̓ipampaluang mga taung pamaglaru ang ya ra ilëm nag̓ipampalw̓ug̓ay tung mga bayan-bayan ubin mga amëk ug̓ud kung magtaklib da nganing asan ti Pedro,
ang basi pa ra ilëm ang maulungan yang duma.
16 Asta yang mga taung tag̓a duma-rumang lansangan ang atiang alëlëngëtën tung Jerusalem,
buntun-buntun tanira ang namag̓arangay-angayan da ka ay pamag̓ërëkëlën tung mga kaarumanan nirang may mga laru pati yang duma ang nag̓apaliwag̓an ta mupia ta mga dimunyu.
Pagkatapus tanirang tanan namagmaayën da ka.
Yang Pagdëëp Tung Mga Apustul May Yang Pagbista Tung Nira (5:17-33)
17 Taa numanyan yang paring atiang pinakalandaw may yang mga kaarumanan nirang mga Saduseo namangimun da ta mupia tung mga apustul.
Purisu tung makali namag̓ulag dang namagkuntra tung nira.
18 Anday duma,
dayun da nirang ipinampadëëp ang ipinampakalabus.
19-20 Numanyan tung law̓iing atii,
may sasang angil ang ipinaangay yang Dios duun tung kalabus ang ya ray nag̓abri yang mga purta na ang pagkatapus pinangkëlan na ra yang mga apustul duun tung lua.
Dayun na rang pinag̓aning ang,
“Ala,
magbalikamu ra duun tung pagtuuan ang pinakalusu.
Pasanag̓an mi ta mupia yang mga tau duun natëtëngëd tung kalibrian ang naang pinagtukud yang Dios,”
mag̓aning.
21 Numanyan tinuman da nira yang bitala na.
Mangayag ang timpranu,
namansiangay ra ka man duun tung pagtuuan ang atia ang namag̓intra ra pasanag tung mga tau.
Taa numanyan,
duun tung duw̓ali yang pagtuuan,
yang paring atiang pinakalandaw may yang mga kaarumanan na,
namagpaguuy ra tung intirung pamagpakigmaëpët tung nasyun ang Israel ang para mamagsaragpun da.
Pagkatapus pinatuw̓ulan nira yang mga apustul duun tung kalabus ang mamanalunga ra tung nira.
22-23 Numanyan pagkaw̓ut yang pinanuw̓ul nira duun tung kalabus,
anda ra duun yang mga taung atia.
Purisu diritsyu rang namagbalik tung namanuw̓ul tung nirang namagbaw̓alitaën ang mag̓aning,
“Kaw̓utan yamën yang kalabus siradung pisan,
pati mga guardia asan ka pamagbantay tung mga purta na.
Ug̓aring maabrian da yamën,
andang pisan ay naita yamën ang mga tau tung kaklëran,”
mag̓aning.
24 Numanyan yang pagmangulu tung mga guardia duun tung pagtuuan may yang mga paring atiang arabubwat,
pagkagngël da nira yang balitang atia,
nangaliwëg̓an da ta pag̓isip kung unu pa kaya ay dangatën na.
25 Numanyan may sasang taung baklung kaw̓ut ang may ëkël nang balita ang mag̓aning,
“Yang mga taung atiang ipinampakalabus mi nungapun,
takaa ra tung pagtuuan ta,
pamagparasanag̓ën tung mga tau!”
mag̓aning.
26 Purisu yang binuat yang manigmangulu tung mga guardia may yang mga tauan na,
dayun dang namansiangay duun tung duw̓ali ang ingkëlan da nira yang mga apustul.
Ug̓aring indi nira ingkëlan tung rëg̓ës puirsa ay natëtëngëd may pangamanan nira tung mga tau ang muya mamamatu ra tung nira.
27 Numanyan ingkëlan da nirang ipinampatalunga tung intirung mga pamagpakigmaëpët.
Pagkatapus dayun dang sinumaria yang paring atiang pinakalandaw.
28 Mag̓aning tung nira,
“Ta,
indi pinag̓urdinanamu ra ka yamën ang indiamu ra magturuldukanën tung mga tau natëtëngëd tung taung atia?
Piru ay pa w̓a?
Yang nag̓itulduk ming atia ya ra ag̓ipagwasakay mi tung intirung siudad ang Jerusalem!
Yadwa pa,
gustu ming papanuw̓alënami pa numyu tung kamatayën yang taung atia!”
29 Mag̓aning ti Pedrong nanuw̓al,
ang kasiraan da ka tanira yang mga kaarumanan nang mga apustul “Bëlag̓an mga tau ka ilëm yang dapat ang panangdën yamën,
kung indi,
ultimu ra ilëm yang Dios!
30 Ay tanyang may mga tauan tung mga kinaampu ta atiing tukaw,
ya ra ka man mismu ay nagpabui si kang uman tung ni Jesus ang naa ang ta yamu,
ipinagpaimatay ming ipinagpalansang tung krus ang duun da nga pakaëyakay ming maning pa tung sasang kriminal.
31 Tanya pinadëngëg̓an da yang Dios ang pinakarung tung ampir tung tuu na,
bilang Manigmangulu ig Mananapnay ug̓ud ta yatën ang nasyun ang Israel,
mapaëyanganita ra anya ta ipanligna ta tung mga kasalanan ta ang pagkatapus mapatawarita ra ka anya dayun.
32 Kidispuis pa yami mga sistigus ang pagpaingmatuud tung mga tau natëtëngëd tung mga bag̓ay ang atia,
kasiraanami ra ka yang Espiritu Santo ang ya ra ka man ay ipinagpatinir yang Dios tung mga taung kumpurming panangëd tung anya,”
mag̓aning.
33 Numanyan pagkagngël da yang mga pamagpakigmaëpët yang pinag̓aning ni Pedrong atia,
pinanungkukan da ta kasisilag̓ën nirang duru ang asta namagsaranyug dang dapat ang pangimatayën da ilëm nira yang mga apustul.
Yang Nag̓ikunsiu Ni Gamaliel Tung Mga Masigkamaëpët Na (5:34-40)
34 Taa numanyan,
may sam bilug tung nirang pamagpakigmaëpët ang nag̓aranan tung ni Gamaliel ang ya ray nagkërëng ang para magbitala.
Tanya kinasakpan yang pag̓aningën ang mga Pariseo ig sasa kang manigtulduk ang sag̓ad tung mga katuw̓ulan yang Dios.
Purisu nag̓agag̓alang ta mupia yang kadaklan ang mga tau.
Numanyan yang primirung binuat na,
nagkalalangan da ang yang mga apustul ipampalua ra kanay ta gësyëng uras.
35 Pagkatapus dayun dang nagbitala tung mga kaarumanan nang pamagpakigmaëpët ang mag̓aning,
“Mga putulung mga masigkanasyunung mga Israel,
kuidaw!
Isipën mi ta maayën kung uniën mi pa yang mga taung nakaa.
36 Ag̓aningënamu ra yëën ta maning tia,
ay ang tukaw ti Teudas naglua rang nag̓ambu ang tanya unu sasang maktël ang manigmangulu.
Alëngët ëpat ang gatus nga tauan ang namagpakignunut tung anya ang para mamagbatuk tung gubirnu.
Ang pagkatapus inimatay ig yang tanan ang namagpaëkël yang mga isip nira tung anya,
nagkarawasak da ka ilëm.
Pati yang tinukud na,
andang pisan ay pinakaw̓ut na.
37 Utru si tung pira pang takun,
atiing pagpasalista yang tanan ang mga tau,
ti Judas ang atiing tag̓a Galilea ya si kay naglua.
May mga taung pinag̓urnuan na yang mga isip nirang mamagbatuk ka tung gubirnu.
Ang pagkatapus inimatay ra ka ig yang tanan ang namagpasanyug tung anya nagkarawasak da ka ilëm.
38 Kapurisu sigun tung bag̓ay ang naang pagkërësënan ta numanyan,
yang ikunsiuu tung numyu,
indi mi ra pasilabtan yang mga taung nakaa.
Paw̓ayaan mi ra ilëm ay sipurki kung yang nag̓apapaktëlan nirang atia planu ka ilëm ta mga tau,
andang pisan ay pakaw̓utun na.
39 Piru kung nag̓apaktël yang Dios tia,
indi mi ra ka ilëm masarangan ang palagpakën.
Muya kung ya pa idayunay mi,
asanamu ra maglua ang pati nganing yang Dios mismu,
ya ra kay nag̓abatukan mi,”
mag̓aning ti Gamaliel duun tung nira.
40 Numanyan pinaguuyan da nira yang mga apustul ang pinabalik ang pagkatapus dayun da nirang pinaburdunan.
Pagkatapus ta pagpaburdun tung nira,
pinaglalangan da ka nira ang indi ra ëngëd mamagparakaw̓utun ang uman tung mga tau natëtëngëd tung ni Jesus.
Pagkatapus dayun da nirang pinalpasan.
Natëtëngëd Tung Kung Unyën Pa Yang Mga Apustul Yang Kalalangan Yang Mga Pamagpakigmaëpët (5:41-42)
41 Kapurisu numanyan yang dinangat na,
tung pagliit yang mga apustul duun tung katalungaan yang mga pamagpakigmaëpët,
durung pisan agkasadya yang mga kinaisipan nira gatëd nag̓amaladmaran da nira ang tanira pinadëngëg̓an da yang Dios ang pinapasar tung kaëyakan ang atiang pagpatigbak arangan da ilëm tung ni Jesus ang nag̓akëgngan nira.
42 Kidispuis pa kaldaw-kaldaw sigi-sigi ra ka ëngëd yang pagparasanag̓ën nira tung mga tau duun tung pantaw yang pagtuuan ang atiang pinakalusu pati tung mga kabalayan yang mga tau.
Yang pinabilug̓an nirang namagparakaw̓utun ang ti Jesus talagang ya ra ka man yang pag̓aningën ang Cristong nag̓aëlatan nira.