Yang Nag̓ipanuw̓al Na Pedro Tung Mga Pamagpakigmaëpët Ang Pamag̓usisa Tung Nira (4:1-22)
4
Taa numanyan atiing indi pa nganing nag̓atapus ti Pedro durua ni Juan ta pagparakaw̓utun nira tung mga taung atia,
may mga pari ang nansilput da asan,
kasiraan da ka tanira yang aruman nirang sam bilug ang yay may kalalangan tung mga manigbantay duun tung pagtuuan ang atia asta yang mga Saduseo.
2 Yang inangay nira asan,
nangaërëpan da ta mupia tung na Pedro ay balaw̓ag ang pisan tung pamati nira yang nag̓ipagpakaw̓ut nirang durua tung mga tau ang ti Jesus unu binwi si kang uman yang Dios.
Ay ya pa ag̓ari,
asan da ka nag̓ipatiël nira yang katadlëngan nira ang pati unu yang mga patay duun da ka mamagsug̓ut tung anyang mangabui si kang uman.
3 Purisu anday dumang binuat nira,
dayun da nirang ipinadëëp.
Kumus apun dang pisan,
ipinakalabus da ilëm nira ta nagdamal baklu ra bistaay nira.
4 Piru maskin pa maning tia,
tung mga taung atiang namagpamati tung ipinagpakaw̓ut na Pedro,
duru rang namagtalig yang mga sadili nira tung ni Jesus ang namagpatapnay.
Purisu yang kinadakël nirang tanan,
kung yang mga lalii ilëm ay bilangën,
duminangat da tung mga limang liw̓u nga tauan.
5 Pangayag yang mga manigmangulu may yang mga pamagpakigmaëpët may yang mga sag̓ad tung mga katuw̓ulan,
namagsaragpun da tanirang tanan duun tung Jerusalem.
6 Lug̓ud da ka asan ti Anas ang yay paring pinakalandaw kasiraan da ka tanira na Caifas ni Juan may ti Alejandro pati yang duma ang may kaampiran tung ni Anas.
7 Numanyan linalangan da nira na Pedrong mamagkërëng asan tung pinagtaralungaan nirang tanan.
Pagkatapus dayun da nirang sinumaria ang inaning,
“Ay pa ngaëklay mi yang binuat ming atia?
Tinu pay nagpaktël tung numyu ang maning ka ilëm tia yang pagkatau mi?”
mag̓aning.
8-10 Numanyan ti Pedro kumus nag̓amanguluan da yang Espiritu Santo,
ya ray nagtuw̓al tung nirang mag̓aning,
“Maginuung mga manigmangulu tung nasyun tang naang Israel ig maginuung mga pamagpakigmaëpët taa tung banwa ta.
Kung yami pag̓atalimaan mi natëtëngëd tung ikinaayën yang sasang taung pilay ra rin kung ya pa ag̓aring nagmaayën da,
yang dapat ang maintindian ming tanan pati yang kadaklan ang mga masigkanasyun ta ya ra taa.
Anday dumang pinagmaayënan yang taung naa,
kung indi,
ya ra yang puirsa ni Jesu-Cristong tag̓a Nazaret.
Ya ra ka man mismu atiing ipinalansang mi tung krus ang pagkatapus binwi si ka ëngëd ang uman yang Dios.
11 anya ka man yang nag̓adapatan yang sasang pananglit ang napabtang tung kasulatan ang mag̓aning,
‘Yang batung pinasag̓ing atiang pinangindian ming mga manigpakdëng ang anday kuinta na,
ya pa ka ëngëd ay nagluang pinakaimpurtanting batu tung intirung balay,’
mag̓aninga.
12 Purisu anday dumang mapagpalibri tung yatën ang mga tau,
kung indi,
ultimu ilëm tanya.
Ay anday dumang aran ang nag̓ipagpailala yang Dios tung bilug ang kaliw̓utan ang kung yay talig̓an ta,
asanita ra nga tapnayay na,”
mag̓aning.
13 Numanyan pagpaniid nira tung na Pedro durua ni Juan ang midyu andang pisan ay nag̓aëldan nira,
nangabërëng da ta mupia.
Ay kipurki nag̓asiman da nira ang tanira mga gëg̓ësyëng mga tau ig anda kay pinag̓aralan nirang abwat.
Baklu ra nga maladmaray nira ang tanira mga aruman ni Jesus tan taa pa.
14 Piru anday maaning nira ay ya ra kag dawalay nira yang taung atiang pinamaayën da ang yag këkdëng tung tëpad nira ni Pedro.
15-16 Kapurisu linalangan da ilëm nirang mansilua ra kanay asan tung pinagsaragpunan nirang atia.
Paglua ra nira,
namagkërësën dang namag̓araning-aningan ang mag̓aning yang duma,
“Uniën ta pa yang mga taung nakaa?
Kipurki nag̓askëan da yang tanan ang mga taung pamag̓istar taa tung Jerusalem ang may sasang pruibang makabëw̓ërëng ang nainabu ëkël tung nira.
Indiita ra ka mapagpaimukli ay bistung pisan.
17 Ug̓aring para indi ilëm mawasak ang masyadu yang nag̓ipagpakaw̓ut nirang atia,
ampalarën tang indi rang pisan mamagbaw̓alitaën ang uman natëtëngëd tung taung atiang nag̓akëgngan nira,
maskin tung ninu pa,”
ag̓aaning.
18 Purisu numanyan pinaguuyan da nira na Pedro ang pagkatapus pinaglalangan da nira ang indi rang pisan mamagparakaw̓utun tung mga tau natëtëngëd tung ni Jesus ubin magturuldukanën pa sigun tung anya.
19 Mag̓aning ti Pedrong nagtuw̓al durua ni Juan,
“Timbangën mi ta maayën tung mga isip mi ang ay pay magkatama tung pagtërëlëngën yang Dios ang manangërami tung numyu u ang manangërami tung anya?
20 Ay ta yami indiami tëmëgka ang indiami magbaw̓alitaën tung mga tau kung unu pay nagkaraita yamën mismu tung ni Jesus ig kung unu pay nagkaragngël yamën tung anya,”
mag̓aning.
21 Pagkagngël da nira yang itinuw̓al nirang atia,
pinag̓ampalar pa ka ëngëd nirang uman ang nunut da ka ta pagpalëg baklu ra palpasay nira.
Ay anda ray naita nira ang sarang mapatiëlan nirang ipagtumar ta aksiun tung nira ay natëtëngëd tung mga taung atiang buntun.
Ay tanirang tanan pamagdarayawën tung Dios natëtëngëd tung nainabung atiang makabëw̓ërëng.
22 Ay yang taung atiang may pruibang pinagmaayënan na subra pa tung ëpat ang puluk ang takun yang idad na.
Pamag̓arampuën Da Yang Mga Tumatalig Tung Dios Ang Paktëlën Na Tanirang Mamagparakaw̓utun Yang Bitala Nang Anda Ray Këlba Nira (4:23-31)
23 Taa numanyan atiing pinalpasan da tanira,
diritsyu rang namagbalik tung mga kaarumanan nirang namag̓ugtulun yang kumpurming pinag̓aning tung nira yang mga paring atiang arabubwat may yang mga kaarumanan nirang pamagpakigmaëpët.
24 Pagkabalita nira tia,
binilug da nira yang mga isip nirang namag̓ampu tung Dios ang maning taa yang pag̓arampuën nira,
“Dios ang makagag̓aëm,
yaway nag̓imu yang langit may yang tanëk asta yang tëëb pati yang tanan ang mga bëtang nira.
25 Atiing panirbian tung nuyu ti Adi David ang kinaampu yamën,
yaway nagpabitala tung anya ëkël tung Espiritu Santong nagpaula tung anya ta maning taa:
‘Ayw̓a,
kanisip yang mga tag̓a duma-rumang nasyun ang may pakaw̓utun na pa yang kasisilag̓ën nirang pamagpasuag tung kalëlyag̓an yang Dios?
Pati yang mga masigkanasyunung mga Israel,
ayw̓a kalaum nira ang may luaan na pa yang pag̓urunta-untaan nirang mamagbatuk tung planu yang Dios?
26 Ay kipurki yang mga adi taa tung kaliw̓utan simpan dang mamagbatuk tung anya pati may mga katëngdanan,
sasay kërësën nirang mamagpakigkuntra tung ni Yawi pati tung pag̓aningën ang Cristong pag̓atuw̓ul na,’
mag̓aningb.
27 Taa numanyan nagkamatuud da yang bitala mung atia taa tung siudad ang naa.
Kipurki yang mga tag̓a duma-rumang nasyun may yang mga masigkanasyun yamën mismung mga Israel may ti Adi Herodes asta ti Gubirnadur Poncio Pilato ya ra ka man ay namagsaranyug ang namagkuntra tung ni Jesus ang sasang pagpaturuw̓ulun tung nuyu ang ya ëngëd ay pinagpilik mung magpapanaw tung planu mu.
28 Ang pagkatapus,
anday dumang dinangat yang pagkuntra nirang atia,
kung indi,
asan dang pisan nga tumanay nira yang kumpurming unu pay pinagplanu mu kang lag̓ing magkarainabu.
29 Kapurisu numaan,
Yawi,
tandaan mu ta maayën yang pagpalëg nirang atia tung yamën.
Kumus pag̓atuw̓ulami ra nuyu,
paktëlayami kang magparakaw̓utun yang bitala mu ang andang pisan ay ëldan yamën.
30 Mintras pagparakaw̓utunami,
ipaita mu ra ka yang kagaëman mung magpamaayën tung may mga laru.
Pati yang dumang mga pruibang makabëw̓ërëng,
ipalapus mu ra ka ang para ya ray magpailala tung katëngdanan ang atiang ipinakdul mu tung ni Jesus ang yay turuw̓ulun mung pinagpilik mu,”
mag̓aning.
31 Numanyan pagkatapus ta pag̓arampuën nira,
nayëgyëg da yang pagsaragpunan nirang atia.
Pagkatapus tanirang tanan minanguluan da yang Espiritu Santong namagparakaw̓utun da ka man yang bitala yang Dios ang anday inlëran nira.
Yang Mga Tumatalig Pamagparakdul-pakdulan Kung Tinu Pay May Kaministiran (4:32-35)
32 Taa numanyan tung mga uras ang atii,
tanirang sam pundaan ang mga tumatalig tung ni Jesus sasay kinaisipan nirang tanan ang pagbërëgkës-bëgkësan ta matinlu.
Dispuis anday pag̓aning ang yang kaayënan na anya ra ilëm ang sadili,
kung indi,
pamagparakdul-pakdulan kung tinu pay may kaministiran.
33 Purisu ya ray nagpabuilung mas pa tung pagpaingmatuud yang mga apustul tung mga tau ang ti Jesus nabui si ka man ang matuud.
Yadwa pa duru kag tinlu yang pinakaw̓ut yang pag̓urubraën yang Dios tung mga isip nira.
34-35 Ay tung kaugpuan nirang atia,
anday pagkaliwag ang masyadu gatëd kung tinu pay may mga tanëk ubin balay,
ya ray nag̓ipaalang nirang kaisan ang pagkatapus yang kabayaran nang kuarta ya ray pag̓aëklan nira tung mga taralig̓an ni Ginuung Jesus ang nag̓ipag̓intriga.
Pagkatapus ya ray nag̓iparti-parti nira tung mga aruman nirang may kaministiran ang sikad-sikad ka tung kaministiran nira sasa may sasa.
Natëtëngëd Tung Binuat Ni Bernabe Ang Durug Tinlu (4:36-37)
36 Pariu ra duun tung binuat ni Jose ang atiang pinapuanggaan yang mga apustul tung ni Bernabe.
Ay yang puntus yang puangga nang atii tung bitala nirang Hinebreo ay sasang taung maskëng magpaktël tung isip yang aruman na.
Yang taung atia duun ipanganaay tung pulung paggug̓uuyan ang Chipre ig tanya sasang kanubli ni Levi.
37 Numanyan anday dumang binuat yang taung atia,
kung indi,
may sasang tanëk na ang ya ray ipinaalang na ang pagkatapus yang kabayaran nang kuarta ya ray ingkëlan na tung mga apustul ang ipinag̓intriga.