May Sasang Taung Pilay Ang Nag̓apamaayën Ni Jesus Ëkël Tung Ni Pedro Durua Ni Juan (3:1-10)
3
Taa numanyan,
may sasang kaldaw ang ti Pedro durua ni Juan,
namanungul da duun tung pagtuuan ang pinakalusu.
Yang uras ang atii alas tris da yang apun ang ya kang lag̓i ay uras ang kadagmitan ang nag̓ipag̓ampu ta mga Judio.
2 Duun tung may purtang atiang pagug̓uuyan ang “Durug Tinlu” may sasang taung pilay ang kinatau na yang pagkapilay na.
Kaldaw-kaldaw pag̓aëklan ta mga aruman nang nag̓ipabtang duun tung may purta ug̓ud mapagpalimus tung mga taung pamagpaklëd duun.
3 Numanyan pagkaita na tung ni Pedro durua ni Juan ang magpapaklëd,
diritsyu rang nagpalimus tung nira.
4 Atii,
pinatëëk-tëëkan nira ta mupia ang nunut da ka ta pagbugnu ni Pedro tung anyang mag̓aning,
“Ëy,
tëlëngayami ka,”
ag̓aaning.
5 Purisu dayun dang nagtëlëng tung nira ay kanisip nang may maëklan na tung nira.
6 Numanyan mag̓aning si ti Pedro tung anya,
“Andang pisan ay kuartaw,
piru may yëën kang sarang ang mapakdulu tung nuyu.
Ëkël tung kagaëman ni Jesu-Cristong tag̓a Nazaret,
lalangana ra yëën ang magpanawa ra!”
mag̓aning.
7 Atii,
dayun na rang pinggësan tung kalima nang tuu ang pinakdëng.
Lag̓i-lag̓ing kumintël da yang kakay na may yang talinga-talinga yang kakay na.
8 Diritsyu rang kumindëng ang nagpanaw-panaw ang asta nagpakignunut da dayun tung nirang namagpaklëd.
Sigi ra ilëm yang pagparanawën na ang ya rag paglikting-likting ang pagdarayawën tung Dios.
9 Numanyan yang kadaklan ang mga taung atiang buntun,
naita ra nira yang taung atiang pagpanaw ra ig nagngël da ka nira yang pagdarayawën na tung Dios.
10 Pagkamalamad da nira ang tanya ka man yang dating manigpalimus ang pirming pagkarung asan tung purtang atiang pag̓aningën ang “Durug Tinlu”,
nangabërëng da ta dakulung pagkabërëng natëtëngëd tung nainabung atia tung anya.
Yang Nag̓ipagpakaw̓ut Ni Pedro Tung Mga Tau Natëtëngëd Tung Ni Jesus (3:11-26)
11 Taa numanyan,
mintras pagpëg̓ës yang taung atia tung mga kalima na Pedro ni Juan sigun tung kasadyaan na,
lag̓i-lag̓ing namagdag̓umukan da yang kadaklan ang mga tau tung nira duun tung pantaw ang atiang paggug̓uuyan yang mga tau ang palayas ang ipinatambi ni Adi Solomon,
ay dërëëg̓ën da ta mupia yang pagkabërëng nira.
12 Numanyan,
pagkaita ni Pedro tung mga taung atia,
dayun dang nagpasanag tung nirang mag̓aning,
“Mga masigkanasyunung mga Israel,
ayw̓a ya ray nag̓abërëngan mi?
Ayw̓a nag̓apatëktëkanami ra numyu ta maayën?
Kanisip mi tia ang napapanaw yamën yang taung naa natëtëngëd tung sadiling kinatakwanan yamën ubin natëtëngëd ang yami diosnun ang pagkatau?
Bëlag ka!
13 Anday dumang may kabuat-buatan tia kung indi,
ya ra yang Dios mismu ang yay may mga tauan tung na Abraham ni Isaac may ni Jacob,
ang asta tung mga kinaampu tang kadaklan ang namagsurubli-subli tung nira.
Ay tung nainabung atia nungayna,
asan da nga papruibaay na ang pinagpadëngëg̓an na ka man ang matuud ti Jesus ang pag̓aningën nang turuw̓ulun naa.
Ang ta numyu,
ya ka man mismu yang ipinag̓intriga mi tung pudir ni Gubirnadur Pilato ang pagkatapus,
atiing naisip na rang palpasan,
ya ra kay pinangindian mi duun tung katalungaan na.
14 Ta yamu,
anday dumang pinangindian mi,
ya ra mismu yang naulang tukaw ang yay pilikën yang Dios ang magtalus tung tanan ang kalëlyag̓an na.
Ang pagkatapus yang iningaluk mi tung ni Gubirnadur ang palpasan na,
ya ra yang sasang nangimatay ta mga tau.
15 Purisu tanyang pinangapunglan yang kalibrian tang mga tau ya pay ipinaimatay mi ang pagkatapus anday dumang binuat yang Dios,
ya ra ka man ay pinabungkaras nang binwi si kang uman ang yami ka man sistigus tung pagkamatuud asan.
16 Purisu numanyan,
sigun ka man tung kagaëman na,
ya ray nagpaktël tung tinanguni yang taung naang nag̓ailala mi ig nag̓atëlëngan mi.
Kipurki pagkagngël na yang aran na,
lag̓i-lag̓ing tinalig̓an nang inintrigaan yang sadili na.
Purisu asan tung pagtalig nang atia,
nagkatinir da ta tinanguni nang banikasan ang pariu ra numaan ang ya ra kag dawalay mi.
17 “Nag̓askëanu ka ang indi mi ra ilëm naintindian kung unu pa ëngëd ay lagpakan yang binuat ming atia tung ni Jesus ang katulad ka tung mga pamagpakigmaëpët tung nasyun tang pinagpaguyuran mi.
18 Piru yang Dios tanya,
asan da nga matuuray na yang ipinagpaula na,
tung tanan ang mga manigpalatay yang bitala nang tukaw ang yang pag̓aningën ang Cristong tuw̓ulun na mapasaran ka man ta kamatayën.
19 Purisu ta numyu,
magsug̓atamu rang magbalik tung Dios ug̓ud mapunasanamu ra anya tung mga kasalanan mi.
20 Kung ya ray buatën mi,
ipakaw̓ut na ra tung yatën yang sasang panimpung paglimëngan ang pisan yang mga isip ta.
Bilang tuw̓ulun na si ti Jesus ang magbalik taa ang ya ra ka man yang pag̓aningën ang Cristong pinagpilik na ra kang lag̓ing maggaraëmën tung yatën.
21 Ug̓aring ilëm,
numanyan,
kaministiran ang mabutwan da kanay duun tung langit ang asta kaw̓utun da ka man yang panimpung atiang nag̓aaningu ang yang tanan ang bag̓ay luw̓us dang pangimakluën yang Dios ang ya ra kang lag̓i ay ipinagpaula na tung mga taung pinamilik nang magpalatay yang bitala na atiing tukaw.
22 Ti Moises ngani may sasang naula na sigun tung pag̓aningën ang Cristong atia ay may pinag̓aning na tung mga kinaampu tang tukaw ang maning taa:
‘May sasang masigkanasyun ming maglua tung uri ang yay tuw̓ulun ni Yawi ang yay Dios ang pag̓atuuan ta.
Yay buatën nang sasang manigpalatay yang bitala na tung numyu ang katulad ka tung yëën.
Yang kumpurming ianing na tung numyu yay dapat ming panangërën.
23 Kung tinu pay indi manangëd tung manigpalatay ang atiang nag̓ianingu,
dapat ang kaskasën da ilëm tung mga tauan yang Dios ang ipaimatay,’
mag̓aningb.
24 Pati nganing yang kadaklan ang mga manigpalatay yang bitala yang Dios atiing tukaw,
mag̓impisa pa tung ni Samuel ang asta tung namagdarasun-dasun tung anya,
pulus dang may nagkaraula kung unu pay mainabu tung mga uras ang naang ipinangingtau yang pag̓aningën ang Cristo.
25 Numanyan yamu ray sarang ang magpakinaw̓ang tung sasang kaayënan ang ipinaula yang Dios tung mga manigpalatay ang atii.
Ay lug̓uramu kang lag̓i tung planung atiing ipinagpaintindi na tung mga kinaampu ta ang katulad ka tung pinag̓aning na tung ni Abraham ang mag̓aning,
‘Natëtëngëd tung kanubli mung sam bilug,
maimu rang pampakaayënënu yang mga tau maskin unu pang nasyunay tung bilug ang kaliw̓utan,’
mag̓aningc.
26 Taa numanyan,
tung yatën da ëngëd ang nasyun ipinaangay yang Dios yang pag̓aningën nang turuw̓ulun nang atiang pinagpilik na ug̓ud pakaayënënamu ra anyang papanalyurun tung mga pagburuatën ming malalain,”
mag̓aning tanira duun.